Eaa Ka Akakite ei i te Tika?

E 18 o Manfred mataiti, e te tereniia ra aia i roto i te opati.a Kua akanoo te kamupani e angaanga ra aia, kia aere aia e etai atu aronga e tereniia ra ki te koreti tereni anga no tetai ngai angaanga, e rua ra i te epetoma. Tetai ra kua tuku vaveia te pupu apii kia aere. Kia tau ki te ture a te kamupani, ka oki te aronga e tereniia ra ki te angaanga i te toenga o tera ra. Inara, kua aere pouroa ratou i te tamataora, toe mai ko Manfred, tei oki atu ki te ngai angaanga. Kare i manakoia ana, kua aere poitirere ua mai te akaaere o te aronga e tereniia ra na reira. I te kite anga ia Manfred, kua ui atu aia e: “Eaa koe i kore ei i aere ki te apii i teia ra? Teea tetai papaki?” Ka akapeea ra a Manfred me pau?

Te turanga ngata ta Manfred e kite ra kua tupu ana te reira. Ka akakite ainei aia i te tika, me ka uuna ainei? Me akakite aia i te tika ka riro ei manamanata no tera mai aronga e kare aia e rekaia mai. E mea tau ainei kia pikikaa i roto i taua au turanga ra? Naringa ko koe tera, eaa ra taau ka rave? Ka oki akaou mai tatou kia Manfred a muri ake, inara ka akamanako ana tatou na mua e eaa te o maira me inangaroia tatou kia iki e me ka akakite rai i te tika me kare.

Tika e te Tika Kore​—E Putotoanga Puapinga

I akatumuia te au mea ravarai ki runga i te tuatua tika, i te akamata mai anga te tuatua enua o te tangata. Kare e tavirivirianga i te au tumu tikai, kare e tarurikeanga me kore e akatarevakeanga i te tika. Ko Iehova, Tei Anga mai, koia “te Atua tuatua-mou.” E tuatua tika tana; kare e tika iaia kia pikikaa, e te akaapa ra aia i te pikipikikaa e te aronga pikikaa.​—Salamo 31:5; Ioane 17:17; Tito 1:2.

I te mea e ko te reira te tu, i akapeea ake i reira te tuatua tika kore i tupu mai ei? Kua oronga mai a Iesu Karaiti i te pauanga tika tikai i te akakite anga aia ki te aronga akonoanga patoi iaia, e tei umuumu i te tamate iaia e: “Ko te diabolo to kotou metua, i akatikaʼi kotou i te anoano o to kotou metua ra. E ta tangata aia mei ito mairai, kare aia i mou i te tuatua-mou, no te mea kare e tuatua-mou o roto iaia. Kia tuatua aia i te pikikaa ra, kua tuatua aia i tei tau iaia uaorai: e pikikaa aia, e e metua oki no te pikikaa.” (Ioane 8:44) Te tuatua ra oki a Iesu, no runga i tei tupu i roto i te kainga i Edene i te akavare anga a Satani i nga tangata mua kia akarongo kore i te Atua e riro atura ei tuikaa no te ara e te mate.​—Genese 3:1-5; Roma 5:12.

Kua akataka meitaki mai te au tuatua a Iesu e ko Satani te ‘metua no te pikikaa,’ te tumu o te pikipikikaa e te tuatua tika kore. Kua riro ua atu rai a Satani ei turuturu maata no te tuatua tika kore e, “ko tei pikikaa i to te ao katoatoa nei.” Tei runga iaia uaorai te apainga teimaa no te kino ta te totoa ua anga o te pikipikikaa i akatupu ki te tangata i teia tuatau.​—Apokalupo 12:9.

Te vai marikonga kore ua nei rai te putotoanga puapinga i rotopu i te tika e te tika kore, ta Satani te Tiaporo i akamata. Te eva ua nei te reira ki roto i te au turanga katoatoa o te taiate tangata e te akatuke nei i te au tu tangata ravarai. Ka riro te mataara e noo ra tetai tangata i te tuku iaia ki tetai, me kore i terao mai tua o te maroanga. Te aronga tei piri ki te Atua te akanoo ra i to ratou oraanga ki runga i te tuatua mou a te Tuatua a te Atua, i te Pipiria. Tetai ua atu kare e aru i te arataa o te tuatua mou, noatu kua kite aia e me kare i kite, ka topa aia ki roto i nga rima o Satani no te mea “te vai ua nei rai to te ao ravarai i raro ake i taua vaerua kino ra.”​—1 Ioane 5:19; Mataio 7:13, 14.

Eaa te Tumu i Pikikaa Ai?

Na te tika e te vai ua nei rai to “te ao ravarai” i raro i te mana o Satani i akakite mai kia tatou e no teaa te tangata e manganui e pikipikikaa ai. Inara penei ka ui tatou e, ‘Eaa ra a Satani, “te metua oki no te pikikaa,” i akapera ai?’ Kua kite ke ana a Satani e ko Iehova te Ngateitei tikai o te au mea katoatoa tei angaia e Ia, kapiti mai i nga tangata mua. E oti akera, kua umuumu rai a Satani e kia riro nona teia turanga teitei e te takake rava, tetai apinga kare takiri e tikaia nona. No te tu noinoi e te karapii, kua parani aia kia riro iaia te ngai o Iehova. E rauka ai teia, kua akatupu i reira a Satani i te pikikaa e te akavare.​—1 Timoteo 3:6.

Akapeea i teia tuatau? Kare ainei koe e akatika e ko te tu noinoi e te karapii te nga tumu maata e akakeu nei rai i te tangata e manganui kia pikipikikaa? Kua ki ua te au pitiniti noinoi, te angaanga neneva a te poritiki, e te akonoanga pikikaa i te akavare, te pikikaa, te tarurike, e te keia. No teaa ra? Kare ainei e no te mea te akakeuia ra te tangata i te maataanga o te taime e te tu noinoi e te anoano kia tere ki mua me kore kia rauka te apinga nui, te mana akatere, me kore te taoonga kare i tikaia no ratou? Kua akamatakite mai tetai tutara kite pakari, ko te Ariki ko Solomona o Iseraela i taito e: “Ko tei rapurapu ra i te akaputu i te apinga kia maata, kare e kore te ara.” (Maseli 28:20) E kua tata te apotetoro ko Paulo e: “Ko te anoano maata oki i te moni te tumu o te au kino katoa nei.” (1 Timoteo 6:10) Papu e ka tau katoa kia karangaia e mei te reira rai te anoano nui i te mana me kore i te taoonga.

Tetai tumu no te pikipikikaa koia oki e mataku​—e mataku i te ka tupu me kore i ta etai ke e manako maira me akakiteia te tika. E tu natura ua no te tangata i te inangaro kia rekaia mai me kore kia arikiia mai e etai ke. Inara, ka riro teia anoano, ei akakeu ia ratou kia taviriviri i te tika, noatu e e mea meangiti ua, kia rauka i te tangaro i te au tarevake, kia uuna i te au mea tau kore, me kore kia rauka tetai akaraanga meitaki. Kua tau rai a Solomona kia tata e: “E rokoia e te ii tei mataku i te tangata ra: ko tei irinaki ia Iehova ra, e ora ïa.”​—Maseli 29:25.

Tiratiratu ki te Atua Tuatua Mou

Eaa ta Manfred i tuatua atu i te ui mai anga te akaaere o te kamupani kiaia i tetai akamaramaanga? Kua akakite a Manfred i te tika. Kua karanga aia: “Kua tuku vave mai te puapii ia matou i teia ra, no reira au i oki mai ei ki te angaanga. Tetai papaki ra, kare e rauka iaku i te tuatua no ratou. Penei naau rai e ui tika atu kia ratou.”

Ka rauka ua rai ia Manfred kia oake atu i tetai pauanga kikite e te pikikaa, kia rekaia mai aia i reira e te aronga e tereniia ra. Inara e au tumu tau tikai tana i tamou tiratiratu ei ki te tika. Ko Manfred oki tetai o te Au Kite o Iehova. Kua paruru tona tu tika i tona akava ngakau tiama. Kua rauka katoa mai iaia te irinakianga o tona pu. Ei tuanga no tana terenianga, kua tukuia atu a Manfred ki te tipatimani o te au apinga akamanea, maata te taime kare te aronga e tereniia ra e akatikaia ana kia angaanga. Mei tetai 15 mataiti i muri mai, i te tukuia atu anga a Manfred ki tetai turanga teitei atu i roto i te kamupani, kua ringi mai taua akaaere ra i te akameitaki mai iaia e i te akamaara mai no runga i tona tu tiratiratu i te akakite i te tika.

I te mea ko Iehova te Atua tuatua mou, ko tetai ua atu tangata e inangaro ra kia rauka tetai pirianga vaitata kiaia ka anoanoia “kia kopae ua atu i te pikikaa” e “ei tuatua-mou” ra. E tau te tavini o te Atua kia inangaro i te tuatua tika. “Kare te kite tuatua-mou ra e pikikaa,” i tata ai taua tangata kite pakari ra. Eaa ra, i reira, te pikikaa?​—Ephesia 4:25; Maseli 14:5.

Eaa te Pikikaa?

E tuatua tika kore te au pikikaa ravarai, kare ra te au tuatua tika kore ravarai i te pikikaa. No teaa ra? Te akamarama maira tetai tikitinari e ko te pikikaa e “tuatua te reira no runga i tetai apinga kua kite me kore kua irinaki te tangata e tuatua ra e, kare i te tika inara kua akakoro tikai aia kia akavare.” Ae, te kapiti maira te pikipikikaa i te akakoroanga tikai kia akavare i tetai tangata. No reira kia tuatua i tetai mea kare i tika ma te kore i akakoro​—mei te akakite i tetai au mea kua tarevake me kore i tetai au numero tarevake ki tetai tangata​—kare ia i aiteite ki te pikikaa.

Tetai katoa, ka anoanoia tatou kia akamanako e me kua tau rai kia orongaia te katoatoa anga o te pauanga ki te tangata e ui maira. Ei akaraanga, akapeea i reira me na te akaaere o tetai kamupani ke mai i ui i taua au uianga ra kia Manfred. Ka anoanoia ainei a Manfred kia akakite i te au mea katoatoa kiaia? Kare. I te mea kare o taua akaaere ra tikaanga ki taua au tuatua ra, kare i te angaanga na Manfred kia oronga atu i te reira. E tika e, i roto katoa i teia mea tei tupu, e tarevake rai kia pikikaa aia.

Eaa ra te akaraanga ta Iesu Karaiti i akanoo no runga i teia? I tetai atianga, te tuatua ra a Iesu ki tetai aronga irinaki kore tei inangaro kia kite i tana au parani no tona tere. “Ka akaruke mai koe i teianei enua, ka aere atu koe ki Iudea,” i akakite atura ratou kiaia. Eaa ra ta Iesu pauanga? “Ka aere kotou ki taua oroa ra; kare au e aere vave atu ki taua oroa ra; kare akerai i tae ki toku ora tikai.” I muri poto ua ake, kua aere rai a Iesu ki Ierusalema no te oroa. No teaa ra aia i pau akapera ai? Kare i anoanoia kia kite ratou i te au mea katoatoa no runga i tana au ngai ka aere. No reira noatu kare a Iesu i tuatua i tetai tuatua tika kore, kua oronga ra aia i tetai tuanga ua o te pauanga kia akaiti mai i te maata o te kino ta ratou ka akatupu kiaia me kore ki tana au pipi. Kare teia i te pikikaa no te mea, kua tata te apotetoro ko Petero no runga ia Karaiti: “I tei kore roa i rave i te ara, kare ua e pikikaa i kitea i tona vaa.”​—Ioane 7:1-13; 1 Petero 2:22.

Akapeea i reira a Petero uaorai? I te po i opuia ai a Iesu, kare ainei a Petero i pikikaa ana e toru taime i te akakore e kare aia i kite ia Iesu? Ae, kua rokoia a Petero e te mataku i te tangata e kua pikikaa iora. Inara i te reira taime rai kua ‘maata ua atura tona aue’ e kua tataraara akera, e kua akakoreia maira tana ara. Tei maata roa atu, kua rauka mai iaia tetai apiianga no runga i tona tarevake. Tetai au ra i muri mai, kua tuatua atura aia ki te tangata ravarai no runga ia Iesu e ma te tu ngaueue kore kare aia i akamutu ana, i te tamatakuia mai anga e te aronga mana o te ngati Iuda i Ierusalema. Papu e ka tau to Petero tarevake poto ua e te meitaki viviki akaou mai anga ei akamaroiroianga kia tatou pouroa, no te mea e rokoia vivikiia ana rai tatou e te atianga apikepike e e turori ana rai i te tuatuaanga me kore i te angaanga.​—Mataio 26:69-75; Angaanga 4:18-20; 5:27-32; Iakobo 3:2.

Ka Akatinamouia te Tuatua Mou e Tuatau Ua Atu

“Te vaa tuatua-mou ra, ka akatinamouia ïa e tuatau ua atu; kareka te arero pikikaa ra, mei te kamoanga mata ua ïa,” e akamarama maira a Maseli 12:19. Ae, ko te tu ngaueue kore e te tinamou te akairo o te tuatua tika. Ka tinamou e ka mareka roa atu te au pirianga tangata me inangaro tikai te tangata i te akakite i te tika e i te tavaitai atu ki te reira. E tika rava e, ka apai mai te tu tuatua tika i te au akameitakianga viviki ua. Te kapiti maira te reira i te akava ngakau ma, te ingoa meitaki, e te au pirianga ngaueue kore i roto i te akaipoipoanga, i te pamiri, i rotopu i te au taeake, e i roto katoa i te pitiniti.

Kareka te pikikaa, kare ia e mou. Penei no tetai tuatau ua ka rauka i te arero pikikaa i te akavare, kare ra te vaianga o te tuatua tika kore e roa. Pera katoa, kua akanoo te Atua tuatua mou ra, ko Iehova, i te tuatau no te akakoromaki anga i te tuatua tika kore e te aronga e turuturu ra i te pikikaa. Te taputou maira te Pipiria e ka takore takiri a Iehova i te mana akakeu o Satani te Tiaporo, te metua o te pikikaa, ko tei pikikaa i to te ao katoa nei. Kare e roa atu ka akaope takiri a Iehova i te pikikaa e te aronga pikikaa katoatoa.​—Apokalupo 21:8.

Kare aiteia te pumaana me akatinamouia “te vaa tuatua-mou” e tuatau ua atu!

[Tataanga Rikiriki i Raro]

[Tataanga i te kapi 5]

E tu noinoi e te karapii nga tumu e akakeu ra i te tangata e manganui kia pikikaa

[Tataanga i te kapi 6]

E tuatua tika kore te au pikikaa ravarai, kare ra te au tuatua tika kore ravarai i te pikikaa

[Tutu i te kapi 6]

Eaa ta tatou i mou mai mei te akakoreanga a Petero ia Karaiti?

[Tutu i te kapi 7]

Ka tupu te au pirianga tinamou e te mareka ua me akakite i te tika