E Akariro ia Iehova ko Toou Irinakianga

“Ko koe toku manako anga, e taku Atu; toku irinaki anga, e Iehova, mei toku ou anga mairai.”​—SALAMO 71:5.

1. Eaa te akaaoanga tei aro atura te tamaiti tiaki ko Davida?

E VAITATA i te toru mita te roroa i taua tangata ra. No reira rai te au vaeau o te ngai tamakianga o Iseraela i mataku ei i te tamaki atu iaia! No tetai au epetoma, i te au popongi ravarai e te au aiai ravarai, kua akakoko te tuputupua Philiseti ko Golia i te vaeau o Iseraela, te akaaoanga ia ratou kia tuku mai i tetai toa kia ta atu iaia. I te openga ra, kua arikiia taua akaaoanga, kare e na tetai tangata vaeau, mari na tetai tamaiti ou. E peneneke ua te tamaiti ou tiaki mamoe ko Davida me akaaiteia atu ki tei patoi iaia. Eaa ra, penei te aite ra tona teiaa ki ta Golia rakei e te au apinga tamaki ra! Noatu rai, kua aro atu te tamaiti ou i te tuputupua e kua riro mai ei akaraanga rongonui o te tu mataku kore.​—1 Samuela 17:1-51.

2, 3. (a) Eaa i rauka ei ia Davida i te aro atu ia Golia ma te papu? (e) Ko teea nga takainga e rua ta tatou ka uriuri e rauka ei te akariro ia Iehova e ko to tatou irinakianga?

² Na teaa i akariro ia Davida kia kore e mataku? Ka akamanako ana i tetai au tuatua papu e kua tataia e Davida i tona au mataiti i muri mai: “Ko koe toku manako anga, e taku Atu; toku irinaki anga, e Iehova, mei toku ou anga mairai.” (Salamo 71:5) Ae, ei tamaiti ou, kua irinaki pu tikai a Davida ia Iehova. Kua aro atu aia ia Golia, i te tuatua anga: “Te aere maira koe kiaku nei ma te koke, e te korare, e te paruru: te aere atu nei ra au kia koe ma te ingoa o Iehova Sabaota ra, te Atua no te au nuku o Iseraela ra, tei akavaavaaia e koe na.” (1 Samuela 17:45) Kareka ra to Golia irinaki tei roto i tona maroiroi maata e tana au apinga tamaki, tei roto ra to Davida irinaki ia Iehova. Ma te Atu Ngateitei o te ao e pini ua ake i tona tua, eaa ra a Davida ka mataku ei i tetai tangata, noatu mei teaa te maatamaata iaia e kua rakei meitaki ia?

³ Ia koe e tatau ra no runga ia Davida, te kite ra ainei koe e vare ua atu koe e te pakari ra toou uaorai irinaki ia Iehova? Papu e, manganui ia tatou te manako akapera ra. No reira ka akara ana tatou i nga takainga e rua ka rauka ia tatou i te akono kia akariro ia Iehova e ko to tatou irinakianga. Te mea mua, ka anoanoia tatou kia akatere tamou i te au arairaianga matauia ki te tu irinakianga. Te rua, ka anoanoia tatou kia apii e eaa te o maira ki roto i te irinaki anga ia Iehova.

Autuanga i te Arairaianga Matauia ki te Irinakianga ia Iehova

4, 5. Eaa ra i ngata ei i te au tangata e manganui i te tuku i te irinaki ki roto i te Atua?

⁴ Eaa te arairai ra i te au tangata mei te tukuanga i to ratou irinakianga ki roto i te Atua? I te maata anga o te taime, te manamanata ra etai i te tumu i tupu ei te au apinga kino. E manganui tei apiiia e kua apa te Atua no te mamaeanga. Me tupu te au tumatetenga, penei ka tuatua tetai au orometua e kua “apai” te Atua i taua au tangata e kia kapiti atu kiaia i te rangi ra. Pera katoa, e manganui te au arataki akonoanga te apii ra e kua akakoro te Atua i mua ana i te au tupuanga ravarai​—kapiti mai te tumatetenga e te au angaanga kino​—e tupu nei i roto i teia ao. Ka ngata i reira i te tuku i te irinaki ki roto i tetai Atua manako kore. Ko Satani, tei akamatapo i te au manako o te aronga irinaki kore, te inangaro ra i te akakite pouroa i taua “tuatua o te au demoni ra.”​—1 Timoteo 4:1; 2 Korinetia 4:4.

⁵ Te inangaro ra a Satani i te tangata kia kore e irinaki kia Iehova. Kare taua enemi o te Atua e inangaro ia tatou kia kite i te au tumu tikai o te mamaeanga tangata. E i te mea kua kite mai tatou i te au tumu Tuatua Tapu no te mamaeanga, ka inangaro a Satani ia tatou kia akangaropoina i te reira. No reira, e mea meitaki no tatou i te akara akaou i tetai taime i nga tumu e toru i tupu ei te mamaeanga i roto i teianei ao. Na te raveanga i te reira, ka rauka ia tatou i te akapapu ki roto i to tatou au ngakau e kare a Iehova i apa no te au manamanata te aro atu nei tatou i roto i te oraanga.​—Philipi 1:9, 10.

6. Akapeea a 1 Petero 5:8 i te tou anga mai i tetai tumu no te mamaeanga tangata?

⁶ Te tumu mua i mamae ei te tangata koia oki kua inangaro a Satani i te aati i te tu pikikaa kore o to Iehova iti tangata tiratiratu. Kua tauta aia i te aati i te tu pikikaa kore o Iobu. Kua poka a Satani i taua taime ra, kare ra aia i tuku i te au. Ei tutara o teia ao, te kimi ra aia no te “[aka]pou” i to Iehova au tavini tiratiratu. (1 Petero 5:8) Te kapiti maira te reira ia tatou tataki tai! Te inangaro ra a Satani ia tatou kia akamutu i te tavini ia Iehova. No reira, kua akatupu tamou aia i te takinokinoanga. Noatu te kino o taua mamaeanga, e tumu meitaki ta tatou kia tamou marie. Na te raveanga i te reira, te tauturu ra tatou i te akapapu e e pikikaa a Satani e i reira te akamareka ra ia Iehova. (Iobu 2:4; Maseli 27:11) Ia Iehova e akamaroiroi maira ia tatou kia tamou marie i te takinokinoanga, ka tupu ua atu to tatou irinakianga ki roto iaia.​—Salamo 9:9, 10.

7. Te tauturu maira a Galatia 6:7 ia tatou kia kite eaa te tumu o te mamaeanga?

⁷ Te rua o te tumu i mamae ei te kiteaia ra i roto i teia kaveinga: “Ko ta te tangata e ruru ra, ko tana ra ïa e kokoti.” (Galatia 6:7) Tetai taime te ruru ra te tangata na te rave anga i te au ikianga kino e tei tupu kua kokoti i te mamae. Penei ka iki ratou i te akaoro marikonga kore, te akatupuanga i te tumatetenga. E manganui te iki ra i te kai avaava, te taki anga atu ki te maki pukuatu me kore te maki cancer o te umauma. Ko te aronga e iki ra i te rave i te ainga tau kore te tuku ra e kia mamae i te pae o te au pirianga kopu tangata, te ngereanga o te tu ngateitei uaorai, te maki ainga tau kore, e te nuianga kare i anoanoia. Penei ka tauta te tangata i te akaapa i te Atua no te mamaeanga, inara kua mamae ratou uaorai no ta ratou au ikianga kino.​—Maseli 19:3.

8. Kia tau kia Koheleta 9:11, eaa ra te tangata i mamae ei?

⁸ Te toru o te tumu i mamae ei te akakiteia maira ia Koheleta 9:11: “E manganui oki toku kite anga i te ao nei e, kare tei te vaevae viviki te emo e emo ei, e kare tei te maroiroi e riro ei te re, e kare tei te aronga pakari te kai, e kare tei te aronga kite meitaki te apinga, e kare tei te karape te kiteia mai; e tuatau ra, e te manuia ua, to te tangata katoa ra.” I tetai taime, tei te ngai tarevake te tangata i te ora tarevake. Noatu to tatou au tu maroiroi me kore te au tu paruparu, ka rokoia tetai ia tatou e te mamae e te matenga ma te kore e tapapaia. Ei akatauanga, i to Iesu tuatau kua inga tetai punanga ki raro i Ierusalema e kua tamate atu e 18 tangata. Kua akaari atu a Iesu e kare te Atua i akautunga ia ratou no te au ara o mua ana. (Luka 13:4) Kare, kare e ko Iehova te ka akaapaia no te mamaeanga.

9. Eaa ta te manganui kare i marama no runga i te mamaeanga?

⁹ Te maramaanga i etai o te au tumu o te mamaeanga e mea puapinga ia. Inara, te vaira tetai tuanga o taua manako te ngata ra i te manganui kia marama. Ko teia: Eaa ra te Atua ko Iehova i tuku ua ei i te mamaeanga?

Eaa ra a Iehova i Tuku Ua ei i te Mamae?

10, 11. (a) Kia tau kia Roma 8:19-22, eaa tei tupu ki te “au mea katoa i angaia”? (e) Akapeea tatou i te akatakaanga e naai i akariro i te au mea i angaia kia puapinga kore?

¹⁰ Te akamarama maira tetai tuanga o te reta a te apotetoro ko Paulo ki to Roma no runga i teia tumu manako puapinga. Kua tata a Paulo: “Te anoano maata o te au mea angaia nei ma te arōrō, te tatari nei ïa i te akakite angaia mai i te tamariki a te Atua: (Kua akariroia oki te au mea angaia nei ei puapinga kore ua, kare ra i te mea anoano, nana ra, na tei akariro ra;) Ma te tatarianga e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra. Kua kite oki tatou e, te ngunguru anake nei te au mea katoa i angaia mei te mamae anau ra e tae rava akenei i teianei rā.”​—Roma 8:19-22.

¹¹ E marama ei i teia au irava, ka anoanoia tatou na mua i te akatanotano i etai au uianga puapinga maata. Ei akatauanga, Naai i akariro i te au mea i angaia ei puapinga kore ua? Kua tou etai kia Satani; ko tetai ke kia Adamu. Inara kare e rauka i nga toko rua kia rave i te akariroanga. No teaa ra? No te mea ko tei akariro i te au mea i angaia kia puapinga kore ua te rave ra “ma te tatarianga.” Ae, te oronga maira aia i te manakonakoanga no te aronga tiratiratu i te openga ra ka “akaora katoaia te au mea angaia nei i te tapeka o te mate.” Kare e rauka ia Adamu raua ko Satani i te oronga mai i taua manakonakoanga. Ka rauka ua ia Iehova. Te taka meitaki ra, i reira, e nana i akariro i te au mea i angaia kia puapinga kore ua.

12. Eaa te manako manamanata tei tupu mai no te akataka anga tikai i te “au mea katoa i angaia,” e ka akapeea teia uianga me pauia?

¹² Eaa, i reira, te “au mea katoa i angaia” e taikuia ra i roto i teia irava? Te karanga ra etai e ko te “au mea katoa i angaia” te taiku ra ki te katoa anga o te au mea natura o te enua nei, kapiti mai i te au animara e te au rau rakau. Inara te manakonako ra ainei te au animara e te au rau rakau e kia rauka te manakonakoanga “te rangatira meitaki o te tamariki a te Atua ra”? Kare. (2 Petero 2:12) Ko te “au mea katoa i angaia” i reira, te taikuia ra ki te au tangata anake. Ko teia te au mea i angaia tei takinga kinoia e te ara e te mate no te meameaau i Edene e te anoano maata ra i te manakonakoanga.​—Roma 5:12.

13. Eaa ta te meameaau i Edene ra i akatupu no te tangata ravarai?

¹³ Eaa, tikai, ta te meameaau i rave ki te tangata ravarai? Kua akataka mai a Paulo i tona au tupuanga ma te tuatua okotai: puapinga kore.a Kia tau ki tetai puka tata, te akataka maira teia tuatua “i te puapinga kore o tetai apinga kare e angaanga mei tei maaniia kia rave pera.” Kua akakoroia te tangata ravarai kia noo e tuatau ua atu, te angaanga kapiti anga ei pamiri taokotai e te apa kore i te akono anga i te enua parataito. Kareka ra, kua akono ratou i te oraanga poto ua, mamae ua, e i te maata anga o te taime ma te pekapeka. Mei ta Iobu e karanga ra, “ko te tangata ta te vaine e anau nei, e iti ua ona puke rā, e te ki oki i te pekapeka.” (Iobu 14:1) E mea puapinga kore tikai!

14, 15. (a) Eaa te kiteanga o te tuatua tau te kite ra tatou i ta Iehova utunga anga i te tangata ravarai? (e) Eaa ra a Paulo i tuatua ei e kua akariroia te au mea i angaia kia puapinga kore “kare i tona anoano”?

¹⁴ I teianei kua tae mai tatou ki te uianga maata: Eaa ra “te Akava i to te ao” i tuku ua ei i te tangata ravarai kia kite i teia oraanga pekapeka e te mamaeanga? (Genese 18:25) Kua tau ainei aia i te raveanga i te reira? I na, ka akamaara i tei raveia e to tatou nga metua mua. I te meameaau anga i te Atua, kua iki raua i te tua o Satani, tei taiku i tetai akaaoanga i to Iehova tu ngateitei. Na roto i ta raua i rave, kua turu raua i te maroanga e e meitaki atu te tangata me kare a Iehova, te tutara anga ia raua uaorai i raro ake i te aratakianga a te vaerua meameaau. I te akautunga anga i nga tangata akarongo kore, mei tera te tu, kua oronga a Iehova kia raua i ta raua i umuumu ra. Kua tuku ua aia i te tangata kia tutara iaia uaorai i raro ake i te akaaerenga a Satani. I raro ake i taua au turanga, eaa te ikianga oonu te tu tau e i te tukuanga i te tangata ravarai kia puapinga kore inara ma tetai manakonakoanga?

¹⁵ E tika, kare teia e ko to te au mea i angaia ra “anoano.” Kua anauia tatou ei aronga tuikaa ki te ara e te akapouanga ma te kore te ikianga no teia mea. Inara kua tuku ua atu a Iehova no tona tu akaaroa ia Adamu raua ko Eva kia ora ua atu e kia uanga mai. Noatu ko tatou, ta raua au uanga, tei raro i te mea puapinga kore o te ara e te mate, kua rauka ia tatou te tuatau no te rave i tei kore i rauka ia Adamu raua ko Eva i te rave. Ka rauka ia tatou te akarongo kia Iehova e te apii e e tuatua tika e te tau tona tu ngateitei, koi apai ua mai ei ta te tangata tutaraanga takake mei ta Iehova i te mamae, te pekapeka, e te puapinga kore. (Ieremia 10:23; Apokalupo 4:11) E te akariro ra ta Satani akaaerenga e kia kino ua atu te au mea. Te akapapu maira te tuatua enua o te tangata i te tika o teia au tuatua.​—Koheleta 8:9.

16. (a) Eaa ra tatou ka papu ei e kare a Iehova i apa no te mamaeanga e kite nei tatou i te ao i teia tuatau? (e) Eaa te manakonakoanga ta Iehova i oronga aroa ua mai no te au tangata tiratiratu?

¹⁶ Te taka meitaki ra, e au tumu tau ta Iehova no te akariro anga i te tangata ravarai ki raro i te mea puapinga kore. Inara, ko te aiteanga ainei o te reira, e ko Iehova te tumu o te mea puapinga kore e te mamaeanga te akakino nei ia tatou tataki tai i teia tuatau? I na, ka akamanako ana i tetai akavanui i te tukuanga i te utunga tau ki runga i tetai tangata rave kino. Penei ka mamae maata tei rave i te kino iaia e tutaki ra i tana utunga, inara ka rauka tikai ainei iaia i te akaapa i te akavanui no te tumu o tona mamaeanga? Kare rava! Pera katoa, kare rava a Iehova i te tumu o te kino. Te karanga ra a Iakobo 1:13 e: “Kare rava te Atua e vavare i te kino, kare rava oki aia e pikikaa i te tangata.” Kia maara, katoa, tatou e kua tuku a Iehova i teia utunga “ma te tatarianga.” Kua rave aroa ua aia i te au akanoonooanga no te au uanga tiratiratu a Adamu raua ko Eva kia kite i te openga o te mea puapinga kore e kia rekareka i “te rangatira meitaki o te tamariki a te Atua ra.” E tuatau ua atu, kare rava te au tangata tiratiratu e manata e ka tomo akaou te au mea i angaia ki roto i tetai turanga puapinga kore e te mamae ua. Ka akatupu ta Iehova akono anga i te au mea ma te tau i te tu tika tikai o tona tu ngateitei e mutu kore ua atu.​—Isaia 25:8.

17. Akapeea tatou me akakeuia na te akara akaou anga i te au tumu no te mamaeanga i te ao i teia tuatau?

¹⁷ Ia tatou e akara akaou ra i teia au tumu no te mamaeanga tangata, te kite ra ainei tatou i tetai tumu no te akaapa anga i te kino ki runga ia Iehova me kore no te ngere anga i to tatou irinakianga iaia? Ei tukeanga, te oronga maira taua apiianga i te tumu kia tatou kia akatika i teia au tuatua a Mose: “Ko te Mato aia ko tei tika rava tana angaanga ra; ko tei tau katoa tona au aerenga; e Atua tuatua-mou, e te kino kore ra, e tuatua-tika tana, e te tiratiratu!” (Deuteronomi 32:4) Na te akamanakoanga i teia au mea, kia akaoraora tatou i to tatou maramaanga i te reira i tetai au taime. Na te reira mataara, me aro atu tatou i te au timataanga, ka rauka ia tatou te patoi atu i ta Satani au tautaanga no te ruru i te au manako ekoko ki roto i to tatou au manako. Akapeea, i reira, te rua o te takainga tei taikuia i te akamataanga? Eaa te o maira ki roto i te irinaki anga ia Iehova?

Eaa te Aiteanga kia Irinaki ia Iehova

18, 19. Eaa te au tuatua ta te Pipiria e akamaroiroi ra ia tatou kia irinaki ia Iehova, inara no te reira, eaa te au manako tarevake te akono ra etai?

¹⁸ Te raurau maira ta te Atua Tuatua ia tatou: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” (Maseli 3:5, 6) E au tuatua manea e te akapumaana anga te reira. Papu tikai kare atu e tangata ke i te ao katoa e tau kia irinakiia e i to tatou Metua akaperepereia i te rangi ra. Noatu rai, e mea mama ua i te tatau i taua au tuatua i roto ia Maseli e kia taangaanga i te reira.

¹⁹ E manganui te manako tarevake ra no te aiteanga kia irinaki ia Iehova. Te manako ra etai i taua irinaki ei au manako ngakau, e tu mataora ia te ka tupu mai mei te ngakau. Te irinaki ra tetai ke e ko te aiteanga o te irinaki anga i te Atua ka rauka ia tatou i te tapapa iaia kia paruru ia tatou mei te au manamanata ngata, kia akatikatika i to tatou au manamanata, kia akatikatika i to tatou au akaaoanga i te au ra mei ta tatou i tapapa atu​—e ma te viviki! Inara kare taua au manako i akatumu meitakiia. E maata atu te aiteanga o te irinaki anga i te manako ngakau, e tika tikai te reira. I roto i te aronga mamaata, te kapiti maira ki roto i te irinaki te akono anga i te au ikianga tau.

20, 21. Eaa te o maira ki roto i te irinaki anga ia Iehova? Akatutu mai.

²⁰ Ka akara ana i ta Maseli 3:5 e karanga ra. Te akatuke ra i te irinaki anga ia Iehova mei te irinaki anga i to tatou uaorai marama, te taikuanga mai e kare e rauka ia tatou i te rave i nga mea e rua. Ko te aiteanga ainei i te reira e kare e rauka ia tatou i te taangaanga i to tatou uaorai kite marama anga? Kare, te tapapa maira a Iehova, tei oronga mai kia tatou i taua kite, kia taangaanga tatou i te reira i te tavini anga iaia. (Roma 12:1) Inara ka iri me kore ka irinaki tatou ki runga i teaa? Me autu kore to tatou manako i te rotai ki to Iehova, te ariki ra ainei tatou i tona pakari​—e teitei roa atu i to tatou? (Isaia 55:8, 9) Kia irinaki ia Iehova te aiteanga koia oki kia tuku i tona manako kia arataki i to tatou.

²¹ Kia akatutu: Ka akamanako ana i tetai tamaiti meangiti te noo ra ki muri i te motoka, ma tona nga metua ki mua. Te akaoro ra tona papa. Me tupu te au mea manamanata i te tuatau o te tere​—penei te manako papu kore o te mataara tau me kore te manamanata o te reva me kore te turanga o te mataara—​ka akapeea tetai tamaiti akarongo ua e te irinaki ua me ariu atu? Ka ava ainei aia no muri mai e aere akapera tatou, te tuatua anga ki tona papa e ka akapeea me akaoro i te motoka? Ka ekoko ainei aia i te au ikianga a tona nga metua me kore ka patoi me akamaaraia atu e raua e kia noo tamou ua ki runga i tona nooanga? Kare, ka irinaki ua aia i tona nga metua kia akonokono i te au mea, noatu te apa ua ia raua. I roto ia Iehova, e Metua apa kore to tatou. Kare ainei e ka tau tatou i te irinaki pu tikai iaia, koia tikai me aro tatou i te au turanga akaaoanga?​—Isaia 30:21.

22, 23. (a) Eaa ra tatou ka irinaki ei ia Iehova me aro atu tatou i te au manamanata, e ka akapeea tatou me rave i te reira? (e) Eaa te ka uriuriia i roto i te atikara e aru mai nei?

²² Inara, te akakite maira a Maseli 3:6 e ka tau tatou ‘auraka e akangaropoina ia Iehova i to tatou katoa ra au aerenga,’ kare anake me aro atu tatou i te au turanga ngata. No reira ko te au ikianga o te ra ta tatou ka rave ka tau kia akaata i to tatou irinaki ia Iehova. Me tupu mai te au manamanata, auraka tatou e apiapi, e ru, me kore e patoi i ta Iehova aratakianga no te mataara meitaki i te akono i te au mea. Ka anoanoia tatou kia akara i te au timataanga ei au tuatau no te turu i to Iehova mana ngateitei, kia tauturu i te akapapu ia Satani e e pikikaa, e kia tatanu i te akarongo e tetai atu au tu te akamareka ra ia Iehova.​—Ebera 5:7, 8.

²³ Ka rauka ia tatou i te akaari i to tatou irinaki ia Iehova noatu e eaa te au arairaianga ka tu mai ki mua ia tatou. Ka rave tatou i te reira na roto i ta tatou au pure e na roto i ta tatou akara anga ki ta Iehova Tuatua e tana akaaerenga no te aratakianga. Koia tikai, ka akapeea tatou me akaari i te irinaki ki roto ia Iehova me aro atu i te au manamanata e tupu ra i roto i teianei ao? Ka akara te atikara e aru mai nei i teia tumu manako.

[Tataanga Rikiriki i Raro]

Akapeea Koe me Pau?

• Akapeea a Davida i te akaari anga e kua akariro aia ia Iehova ei irinakianga nona?

• Eaa nga tumu e toru no te mamaeanga tangata i teia tuatau, e eaa ra i meitaki ei no te akara akaou i te reira i tetai au taime?

• Kua tuku a Iehova i teea utunga ki rungao i te tangata ravarai, e eaa ra i riro ei ei utunga tau?

• Eaa te o maira ki roto i te irinaki anga ia Iehova?

[Au Tutu i te kapi 8]

Akariro a Davida ia Iehova ko tona irinakianga

[Tutu i te kapi 10]

Kua akaari a Iesu e i te inga anga tetai punanga i Ierusalema, kare a Iehova i apa