Akamaroiroianga i to Tatou Irinaki Anga i to te Atua Tu Tuatua Tika

“Kia irinaki rai koe ia Iehova, i akakite atu ei au ia koe.”​—MASELI 22:19.

1, 2. (a) Eaa ra te Au Kite o Iehova i akakite ei i te irinaki anga ia Iehova? (Maseli 22:19) (e) Eaa te akakite maira e te tau ra etai takitai kia akamaroiroi i to ratou irinaki anga ia Iehova?

KUA akameitakiia te au Kerititiano mou ma te kite tika ia Iehova e i tana au akakoro anga oki. Te oronga aroa maira tetai “tavini akono meitaki e te pakari” kia ratou i te “kai [vaerua] na ratou i te ora mou ra.” (Mataio 24:45) Na te kite e rauka ra ia ratou e oronga kia ratou i tetai pange ketaketa ei akatumu anga i te irinaki anga i te Atua ra. No reira, ei tetai pupu, te akakite ra te Au Kite o Iehova i te irinaki anga meitaki ia Iehova e i tona tuatua tika oki.

² Inara, i te akara anga, e ei aronga takitai penei te umuumu ra tetai papaki Au Kite kia akamaroiroiia taua irinaki anga ra. I etai atianga te rauka maira i te Taiate etai pepa te akakite ra i te tu ekokoanga no te au akatakaanga te orongaia ra ki roto i tana au puka. Ko teia au ekoko anga penei e tupu anga ki te au akatikatika anga i te maramaanga, me kare penei te akono ra i te au tumu te akatuki atura ki tei uiui ra, e maata oki na roto i tetai tu manako ngakau ra.​—Akaaite ia Ioane 6:60, 61.

3. Eaa te ka rauka kia tupu noatu rai ki te au tavini tiratiratu o Iehova ra, e no teaa ra?

³ Noatu ra ko te au tavini mou o Iehova te kite ra i te tika o te tuatua ia Koheleta 9:11: “E manganui oki toku kite anga i te ao nei e, kare tei te vaevae viviki te emo e emo ei, e kare tei te maroiroi e riro ei te re, e kare tei te aronga pakari te kai, e kare tei te aronga kite meitaki te apinga, e kare tei te karape te kiteia mai; e tuatau ra, e te manuia ua, to te tangata katoa ra.” Penei akapeea teia e tikai i roto i tetai tu totoaia, me kare pae vaerua? Penei kua kite tatou i etai au Kerititiano tei viviki ra i te raveanga ako Pipiria, e maroiroi i te paruruanga i te tuatua mou, e pakari i te raveanga i te au kaveinga Pipiria, e totomapu i te aruaru anga i te kite tika ra. Inara, no te “tuatau ra, e te manuia ua,” penei kua kite tetai papaki ia ratou uaorai i teianei e kua kotingaia ei tupu anga no tetai tumatetenga me kare no te ruaine anga. Penei te manako ra ratou me ka tomo atu ratou ki te ao ou a te Atua ra ma te kore ua e mamae anga i te mate anga.

4, 5. Eaa ra i kore ei e tau tetai ua atu tumu no te au Kerititiano kia ngere i to ratou irinaki anga i te tuatua tika o Iehova ra?

⁴ Me taka ke te tokorua o tetai Kerititiano, e kino te mamae e te tu ngere anga. Penei ei nga tokorua, kua tavini kapiti raua ia Iehova no etai mataiti me kare no etai raungauru mataiti. Kua kite te oa te ora ra e kua tipuia te tapeka o te akaipoipoanga i te matenga.a (1 Korinetia 7:39) I teianei, ei arai i te akakino anga i tona irinaki anga, ka tika aia kia akatere i tona au manako ngakau.​—Akaaite ia Mareko 16:8.

⁵ Eaa te pakari kia manako i te matenga o tetai oa, metua, tamaiti, me kare oa Kerititiano ei tetai tuatau no te akaari i te irinaki anga i to Iehova ra tu tuatua tika! Noatu ra e ka aro atu i te ngere anga, ka rauka kia irinaki tatou e kare a Iehova i te tuatua tika kore. Ka rauka ia tatou te irinaki anga e ko te aronga ravarai e rauka ia ratou te ora mutu kore​—me na te ora atu anga me kare na te tuakaouanga​—ka mataora ra ratou. Kua tuatua te tata taramo, no te Atua: “To oora nei koe i to rima, e te akamerengo nei i te kaki o te au mea ora katoa nei. E tuatua tika ta Iehova i tona katoa ra au aerenga; e te takinga-meitaki i tana katoa ra au angaanga. Te vaitata mairā Iehova i te aronga i kapiki atu iaia ma te pikikaa kore. E akatika aia i te anoano o te aronga i mataku iaia; ka akarongo mai aia i ta ratou kapiki, e ka akaora oki aia ia ratou.”​—Salamo 145:16-19.

Au Manako Ngakau no te Mamae Anga Umuumu Koreia

6, 7. (a) Eaa ra etai Au Kite tei mamae ra i te tuatau kua topa i tuke ei to ratou kiteanga i teianei? (e) Eaa ra tatou i kore ei e tau kia manako e tuatua tika kore a Iehova no te tuku ua anga i taua mamaeanga ra i te tuatau i topa ra?

⁶ I te tuatau kua topa, kua mamae tetai papaki o te Au Kite no te kopaeanga i te rave i tetai angaanga ta to ratou akava ngakau penei ka akatika i teianei. Ei akatauanga, penei ko ta ratou iki anga teia i te au mataiti kua topa no etai au angaanga i roto i te komuniti. Penei ka manako ngakau tetai taeake i teianei e ka rauka ua iaia te rave i taua angaanga ra ma te kore e apa i tona turanga taka ke no runga i teianei akatereanga o te au mea nei.

⁷ E tuatua tika kore ainei i ta Iehova ra tuanga kia tuku iaia kia mamae no te kopaeanga i tana penei ka rave ua i teianei ma te kore e taitaia? Te maata anga o tei tupu kia ratou te reira kare e manako akapera. Mari ra, ka rekareka ratou e i rauka ia ratou te tuatau no te akakiteanga taka meitaki ki te au tangata e e manako papu to ratou kia ngaueue kore no te maroanga i tei ngateitei o te ao katoa e pini ua ake. (Akaaite ia Iobu 27:5.) Eaa ua tetai tumu no tetai kia mii no te aru anga tona akava ngakau i te raveanga i tetai turanga ngaueue kore no Iehova ra? Na te mou tiratiratuanga i te au kaveinga Kerititiano ta ratou i marama me kare na te raveanga i te au akakeu anga o te akava ngakau, kua akapapu ratou i te tu tau no to Iehova ra oa anga. E tika ra, e pakari ia kia kopae ke i tetai aerenga te ka akatupu taitaia no te akava ngakau o tetai uaorai me kare penei ka akariro kia turori etai ke ra. Ka rauka ia tatou kia tamanako no teia tu i te akatauanga ta te apotetoro ko Paulo i akanoo maira.​—1 Korinetia 8:12, 13; 10:31-33.

8. Eaa ra i kore ei e tumu no te au Kerititiano ngati Iuda ra, tei mou ra i te Ture i mua ana, kia ekoko i to Iehova tu tuatua tika?

⁸ Kia raukaʼi te akamareka ia Iehova, kua umuumuia te au ngati Iuda kia akono i te Ture Ngauru e pera katoa tetai tu atea e vaitata i te 600 au ture tei kapitiia mai. I muri iora, i raro ake i te akanoonoo anga Kerititiano, kare te akarongo anga ki teianei au ture i tetai umuumu anga no te tavinianga ia Iehova, kare katoa oki no te au ngati Iuda kopapa ra. Kare te au ture i vai ei tapekaanga kapiti katoa to te akonoanga i te peritome anga, te akono Tapati, te oronga anga te au atinga manu, e te akonoanga i etai ture no te kai. (1 Korinetia 7:19; 10:25; Kolosa 2:16, 17; Ebera 10:1, 11-14) Te au ngati Iuda​—kapiti katoa te au apotetoro ra​—tei riro ra ei au Kerititiano kua akamataraia mai i te apainga kia akono i te au ture tei umuumuia ra ratou kia rave ia ratou i raro ake i te Ture koreromotu ra. Kua koumuumu ainei ratou e e tuatua tika kore ta te Atua umuumu anga ia ratou kia rave i taua au apinga kare ra i anoanoia i muri iora? Kare, kua rekareka ratou i te kiteanga atea atu i ta Iehova ra au akakoroanga.​—Angaanga 16:4, 5.

9. Eaa te tika ra no etai Au Kite, inara eaa i kore ei a ratou tumu no te mii?

⁹ I teianei au tuatau, te vaira tetai papaki Au Kite tei rave ketaketa ra i to ratou manako no ta ratou ka rave me kare ka kore e rave. No te reira tumu kua maata to ratou mamae anga i to etai ke ra. I muri iora, kua tauturu to ratou kite maata atu ia ratou kia akatotoa atu i to ratou manako no te au tumu ra. Inara kare a ratou tumu no te mii i te rave anga i mua akera kia rotai ma to ratou akava ngakau, noatu rai me kua apai mai teia kia tere atu te mamae anga. E mea tika tikai kia akapaapaaia e kua akakite ratou i te mareka anga kia mamae no te tiratiratu kia Iehova ra, e “no te evangelia i peraʼi.” Te akameitaki ra Iehova i taua tu akono tau ra i te Atua. (1 Korinetia 9:23; Ebera 6:10) Kua tata te apotetoro ko Petero ma te kite oonu: “Kia mate ra kotou ma te akono meitaki, ka akakoromaki ei kotou, e mea meitaki ïa i te Atua.”​—1 Petero 2:20.

Apiianga Mei ia Iona Maira

10, 11. I akapeea ta Iona ra akaari anga i te ngere i te irinaki anga ia Iehova (a) i te oronga anga te akauenga kia aere ki Nineve? (e) i to Iehova kore anga e akapou i to Nineve ra?

¹⁰ I te akaue angaia kia aere ki Nineve, kua akaari a Iona i tetai ngere anga i te ariki anga no te irinaki anga ta Iehova ra i tuku ki runga iaia. I muri ake i tetai tupuanga mataku tana uaorai i apai mai no tona kore i akarongo, kua rako tangata maira Iona, kua kite i tona tarevake, kua ariki i tana angaanga ki tetai enua ke ra, e kua akamatakite atu i to Nineve i te akapou anga te aere maira. I reira kua tupu mai tei kore ra i manakoia: No te tu manako tataraara o to Nineve ra, kua akakore a Iehova i te akapou anga no ratou.​—Iona 1:1–​3:10.

¹¹ Te tupu anga kia Iona? Kua reka kore aia, e kua akaapa aia ki te Atua na roto i te pure. Te tumu o tona mamae ngakau koia oki: ‘Kua manako rai au e ka riro ko teia te tu. No reira au kare i anoano kia aere mai ki Nineve i te akamata anga ra. I teianei, i muri ake i taku au apinga katoa i rave, kapiti katoa te tu mataku e te taakaaka i te apuku anga e tetai ika maatamaata, e i muri ake i taku angaanga ngata i te akamatakiteanga i to Nineve no te akapou anga te aere maira, ko teia tei tupu! Pouroa taku angaanga e te mamaeanga oki kare e puapinga! Angari oki iaku te mate i te ora!’​—Iona 4:1-3.

12. Eaa ta tatou i kite mei tei tupu ra kia Iona?

¹² E tumu tau ainei to Iona no te akaapa anga? E tuatua tika kore ainei a Iehova i te orongaanga i te aroa ki te aronga rave tarevake tei tataraara ra? Ko te tika, e mea tau kia rekareka a Iona; e rau ngauru ua atu tauatini te au tangata tei akaoraia i te akapouanga! (Iona 4:11) Inara kua akaari tona tu akangateitei kore, e te akaapa anga e kare aia i akakite ana i te irinaki anga maata i to Iehova ra tu tuatua tika. Kua maata roa tona manako anga nona uaorai e meangiti roa no etai ke ra. E apii tatou kia kite mei ia Iona mai na te tuku ia tatou uaorai e to tatou au manako ngakau ki te tuanga i muri ra. Kia irinaki tatou e ko te akarongoanga ia Iehova, te aruanga i te arataki anga tei orongaia na roto i tana akaaerenga e te arikianga i tana au iki anga, ko te mea tika ia kia rave. Kua irinaki tatou e “e meitaki to te aronga i mataku i te Atua.”​—Koheleta 8:12.

Ko Teia te Tuatau kia Akamaroiroi i to Tatou Irinaki Anga!

13. Akapeea e raukaʼi ia tatou katoatoa kia akamaroiroi i to tatou irinaki anga ia Iehova ra?

¹³ Te akamaroiroianga i to tatou irinaki anga ia Iehova te aerenga pakari ia. (Maseli 3:5-8) Inara, ka tika tatou kia rave kia tere atu i te pure ua e kia tauturu a Iehova ia tatou kia maata atu te irinaki anga. Ka tupu te irinaki anga tei akatumuia ki runga i te kite tika, no reira ka tika tatou kia rave i ta tatou uaorai apii Pipiria, te tatauanga i te Pipiria e te au puka akatakaanga Pipiria oki, ei tuanga no ta tatou raveanga i te au ra taki tai. E puapinga maata te aere putuputu ki te au uipaanga ra, mei te teateamamao anga meitaki oki e te rave anga i te tuanga te ka rauka. Ma te akariroanga i te reira ei ravenga kia tua atu i te au tuatua mou o te Pipiria kia etai ke, ma te pauanga tano i te akakoreanga i te au patoianga, ka akaoonu katoa i to tatou irinaki anga ia Iehova e i tana Tuatua oki. Na reira ka tere atu to tatou kapiti anga kiaia na runga i tetai tumuanga i te au ra taki tai ra.

14. Eaa ra te au tangata o te Atua ka umuumuiaʼi kia akakite i to ratou irinaki anga ia Iehova kare e roaia ma tetai tu kare i aiteia i mua ana?

¹⁴ A te tuatau vaitata ki mua, ka akamata viviki mai te tuatau mate maata rava te ka rokoia ki te au tangata katoa nei. (Mataio 24:21) Me tupu mai te reira, ka tau te au tavini o te Atua kia akakite i te irinaki anga i te tuatua tika o Iehova e i te arataki anga oki a tana akaaerenga mei tei kore ra i aiteia i mua ana. Na roto i tetai tu akatutu anga, ka akarongo irinaki ratou i ta te Atua ra akauenga: “E aere mai, e taku iti-tangata e, e tomo ki roto i to au pia ra, e topiri marie i toou au pa ia koe: e pipini ei koe i tetai manga tuatau iti kia okotai ake kamoanga mata, kia ngaro ke atu taua riri otooto nei.” (Isaia 26:20) Kua tomo ke ana ratou i teianei ki roto i te reva paruru anga e tere atu i te 85,000 putuputuanga i te 232 au enua ra. Noatu me eaa te kapitiia ra ki taua akauenga kia “tomo ki roto i to au pia ra,” ka rauka ia tatou kia irinaki e ka tauturu a Iehova ia tatou kia rave i te reira.

15. Akapeea ra te tumu no te irinaki anga i te akaketaketa angaia i te 1998, e eaa i tikai te reira?

¹⁵ E mea umuumuia ra kia akamaroiroi tatou i to tatou irinaki anga i teianei. Me kare e irinaki anga i to tatou au taeake Kerititiano, i ta Iehova akaaerenga e, i runga ravao, ia Iehova uaorai, kare e rauka te akaora anga. No reira mei teaa ra te tau e i te tuatau o te 1998, kua akamaaraara putuputu te Au Kite o Iehova takapini te ao katoa nei, i te au tuatua o ta ratou irava mataiti, e “Ko te kapiki i te ingoa o [“Iehova,” NW] ra, e ora ïa”! (Roma 10:13) No te reira ka tika tatou kia tamou marie i te irinaki anga. Me ka kite tatou i tetai tuanga iti ua no te ekoko anga i teianei irinaki anga, ka tau tatou kia rave i te akatikatika anga i te reira i teianei tikai, ae, i teianei ra.

Ka Riro ta Iehova Akavaanga ei Tuatua Tika

16. Eaa te ka rauka kia tupu ki te irinaki anga me ka kore te reira e tatanuia, e akapeea e raukaʼi ia tatou kia arai atu i te reira tupuanga?

¹⁶ Ia Ebera 3:14, kua akamatakiteia te au Kerititiano akatainuia e: “E puapinga oki ta tatou i te Mesia ra, kia tamou marie ra tatou i to tatou irinaki mua ra ma te maroiroi, e tae ua atu ki te openga ra.” Ei kaveinga, te tau katoa ra teianei au tuatua ki te au Kerititiano e manakonako anga to ratou no te enua. Ka kino ra te irinaki anga mua ra me kare te reira e akatupuia. Mei teaa ra te puapinga maata e kia aruaru ua atu tatou i te kite tika, e kia akamaroiroi atu i te pange tei akatumuia ra to tatou irinaki anga ki rungao!

17. Eaa ka raukaʼi ia tatou kia irinaki e no te akaora anga, ka akava tika a Iesu?

¹⁷ Kare e roa atu ka akara matatioia to te au pa enua ravarai e Karaiti kia rauka ai iaia te “akataka ia ratou, mei te tiaki mamoe e akataka i te mamoe e te puaka-nio ra.” (Mataio 25:31-33) Ka rauka ia tatou kia irinaki e ka rave tuatua tika a Karaiti i te akavaanga koai te tau ra no te akaora anga. Kua oronga a Iehova kiaia i te pakari, te kite oonu, e etai atu tu umuumuia “e akava mai ei aia i to te ao katoa nei ma te tuatua-tika.” (Angaanga 17:30, 31) E tuku i to tatou irinaki anga kia aite ki to Aberahama, tei tuatua ra: “Auraka roa oki koe [Iehova] e akapera, e ta katoaia te tangata tuatua-tika e te akono kore i te Atua; e kia okotai katoa arite i te tangata tuatua-tika e te akono kore i te Atua, auraka rava ïa. Kare ainei e mea tika ta te Akava i to te ao katoa nei e rave?”​—Genese 18:25.

18. Eaa tatou ka kore ei e tau kia akamanako maata rava no te au apinga penei kare tatou i kite ake i teianei?

¹⁸ Ma te irinaki anga takiri i to Iehova ra tu tuatua tika, kare tatou e tau kia manamanata i te kimianga i te pauanga ki te au uianga mei: ‘Akapeea ra te au pepe e te au tamariki rikiriki i te akava angaia? Kare ainei tetai numero maata o te au tangata e itaeia ma te tuatua meitaki me tae mai a Aramakito? Ka peea oki te aronga maki te manako? Ka peea oki . . . ?’ E tika ra, penei i teianei kare tatou e kite e akapeea ta Iehova ra akono anga i teianei au tumu. Inara, ka rave aia i te reira, na roto i tetai tu tuatua tika e te tu akaaroa. Kare tatou e tau kia ekoko i te reira. Ko te tika, penei ka umere tatou e ka mareka oki kia kite i tana akono anga ia ratou na roto i tetai tu kare rava ra tatou i akamanako ana.​—Akaaite ia Iobu 42:3; Salamo 78:11-16; 136:4-9; Mataio 15:31; Luka 2:47.

19, 20. (a) Eaa ra i kore ei i te tarevake kia ui i te au uianga tau ra? (e) Aea a Iehova ka oronga mai i te au pauanga umuumuia ra?

¹⁹ Kare te akaaerenga a Iehova e akakore ana i te au uianga tau, ma te ngakau tae ra, mei ta etai aronga patoi e tuatua tarevake ra. (1 Petero 1:10-12) Inara, te ako maira te Pipiria e ka kopae ke tatou i te ui anga neneva ra, e te au uianga puapinga kore ua. (Tito 3:9) Te uianga i te au uianga tau e te kimianga i te Tuatua a te Atua ra e te au puka Kerititiano ra kia kitea te au pauanga Tuatua Tapu ka rauka kia akatupu i to tatou kite tika e ka rauka kia akamaroiroi i to tatou irinaki anga ia Iehova. Te aru ra te akaaerenga i ta Iesu akatauanga. Kua kore aia e pau i te au uianga kare ra i tae ki te tuatau tika no te pauanga. Kua akataka aia: “E manganui ra taku tuatua e akakite atu kia kotou, kare ra e tika ia kotou i teianei.” (Ioane 16:12) Kua akakite katoa oki aia e e au apinga etai kare aia uaorai i kite i taua tuatau ra.​—Mataio 24:36.

²⁰ Te vaira e maata ta Iehova kia akakite mai. Mei teaa ra te pakari kia tapapa atu kiaia, ma te irinaki anga e ka tau te tuatau no tana akakiteanga i tana au akakoroanga ka tika oki no te umuumu anga no taua atianga ra. Ka rauka ia tatou te irinaki anga e me tae mai ki ta Iehova tuatau tau ra, ka tupu kia tatou te rekareka anga i te raukaanga te kite oonu kapitiia mai ki roto i tana au ravenga. Ae, ka tutakiia tatou, me ka akono tatou i te irinaki anga takiri ia Iehova ra e i te akaaerenga oki tana e taangaanga ra. Te akapapu maira Maseli 14:26 kia tatou: “Tei te mataku i te Atua te manako matutu: e riro oki aia ei akapuanga no tana ra au tamariki.”

[Tataanga Rikiriki i Raro]

Eaa Toou Manako?

◻ Eaa ra i pakari kore ei kia tuku i to tatou au manako ngakau kia akakino i to tatou irinaki anga ia Iehova?

◻ Eaa ta tatou ka kite mei tei tupu ra kia Iona?

◻ Eaa ra te apii Pipiria e te aerenga ki te uipaanga i puapinga maata ai?

[Tutu i te kapi 16]

Noatu e ka aro atu i te ngere anga ka rauka kia irinaki tatou e e tuatua tika a Iehova

[Au Tutu i te kapi 18]

Te papu ra ainei ia koe e tei ia Iehova toou irinaki anga?