Au Apiianga Tei Akatupu i te Manakonakoanga

Ka Tipu ke te Atua i te Aronga Kino

“Me tupu te aronga kino mei te ngangaere, e me ruperupe katoa te aronga i rave i te kino ra; i ruperupe ïa, kia tipu akaruke takiri roaia ra.”​—SALAMO 92:7.

Mei ta tatou i apii i te atikara i mua , te tupu maata atura te kino. Kare e poitirere. Te tumu, kua totou takere te Pipiria i roto ia 2 Timoteo 3:1-5 e “i taua tuatau openga ra,” ka kino roa atu te tangata. Te tuatau openga o teaa? Te openga o te aronga akono kore i te Atua. Kare e roa atu, ka takore te Atua i te aronga tei kore i inangaro i te taui i to ratou aerenga kino. E oti, ka toe ua mai te aronga meitaki​—te aronga tei akarongo ki te Atua. “Ka riro te enua no te aronga tuatua-tika, ka noo tamou rai ratou i reira.”​—Salamo 37:29.

Ka Takore te Atua ia Satani

“Na te Atua ‘au e akaparuparu ia Satani.”​—ROMA 16:20.

Me akaateaia a Satani, te au temoni e te aronga kino, ka tupu te ‘au i te enua nei. Taputou mai Tei Anga ia tatou: “Kare tetai e akamataku mai [ia koe].”​—Mika 4:4.

Ka Akakore te Atua i te Maki e te Mate

“Tei ko te tangata ra te puakapa o te Atua . . . E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.”​—APOKALUPO 21:3, 4.

Ka ope te mamae e te maki no te mea ka rapakau te Atua i te kino tei akatupuia e Satani, Adamu e Eva, e to tatou uaorai tu apa. Te ka tupu, ka “kore rava te mate.” Ka ora te aronga tei inangaro e tei akarongo ki Tei Anga mai e tuatau ua atu. Ka noo ratou kiea?

Ka Akariro Tei Anga Mai ia Tatou i te Enua ei Parataito

“Te medebara, e te ngai vaiavare ua, e rekareka ïa no ratou ra; e rekareka rai te enua ngangaere, e e pua oki mei te tiare.”​—ISAIA 35:1.

Ka tupu ruperupe te enua me akaatea te Atua i te aronga kino! Ka koropiniia tatou e te au ngai taurekareka e te au kainga manea, e ka tupu maata te kai. (Salamo 72:16) Ka mā ua te moana, te tai roto e te au kauvai e ka kī ratou i te ora. Kare te tangata e tuatua akaou no runga i te enua “taʼero.” Ka noo te tangata i roto i to ratou uaorai are ta ratou i patu. Ka tu te tangata katoatoa i te ngai nooanga, kare e onge akaou e te putaua.​—Isaia 65:21, 22.

Ka Akatuakaou Mai te Atua i Tei Mate

“E tuakaouanga to tei mate.”​—ANGAANGA 24:15.

Ka inangaro ainei koe kia aravei akaou i toou au akaperepere tei mate? Ka akatuakaou mai te Atua mana katoatoa ia ratou ki runga i te enua Parataito. Ka kite viviki ua koe koai ratou e ka kite katoa mai ratou koai koe. Akamanako i toou mataora e to ratou me aravei akaou kotou! Eaa te tumu ka irinaki papu tatou i teia manakonakoanga? No te mea kua oronga mai te Pipiria i te akaraanga no te aronga mamaata e te tamariki ta te Atua i akatuakaou mai e kua aravei akaou i to ratou ngutuare tangata, e kua tupu teia i mua i te manganui. (Luka 8:49-56; Ioane 11:11-14, 38-44) Ae, e tika te au mea pouroa i te Atua Mana Katoatoa!