Ka Akara Ana! To Iehova Tavini Rekarekaia

“Ka akara ana i toku tavini, . . . kua rekareka rava toku ngakau iaia.”​—ISA. 42:1.

1. Eaa te akamaroiroiia maira to Iehova iti tangata kia rave, i te mea tikai e te vaitata maira te Akamaaraanga, e no teaa ra?

I TE tuatau no te akamaaraanga i te mate o Karaiti e vaitata maira, e mea meitaki tikai no te iti tangata o te Atua kia aru i te akoanga a Paulo kia “akara tamou kia Iesu i te tumu e te akaoti i to tatou akarongo.” Kua karanga katoa atu a Paulo e: “Akamaara marie oki iaia, ko tei akakoromaki i te reira tu akakino a te aronga rave ara iaia uaorai, kia kore kotou e akaroiroi, kia kore oki e taitaia to kotou ngakau.” (Ebe. 12:2, 3) Na te akara tamou anga i to Karaiti oraanga akarongo mou tei taopenga mai ki tana akaatingaanga, e tauturu i te au Kerititiano akatainuia e to ratou au oa te au mamoe ke atu kia tavini atu rai ia Iehova ma te akarongo mou e kia paruru ia ratou ‘kia kore e akaroiroi.’​—Akaaite ia Galatia 6:9.

2. Eaa ta tatou ka mou mai mei te au totou a Isaia e piri atura ki te Tamaiti a te Atua?

² Na roto i te peroveta ko Isaia, kua akauru mai a Iehova i tetai au totou e piri tika atura ki tana Tamaiti. Ka tauturu teia au totou ia tatou “kia akara tamou kia Iesu i te tumu e te akaoti i to tatou akarongo,” koia oki te Karaiti ko Iesu.a Te oronga maira teia i te akamaramaanga no runga i tona tu, i te au tu kino tana i kite, e i tona akangateitei angaia ei Ariki e ei Akaora no tatou. Ka akamaata atu te reira i to tatou marama no runga i te Akamaaraanga ta tatou ka akono i teia mataiti a te Paraparau, ra 9 o Aperira, muri ake i te opunga ra.

Akatakaia mai te Tavini

3, 4. (a) I roto i te puka o Isaia, eaa ta te kupu “tavini” e taiku maira? (e) I akapeea te Pipiria uaorai i te akataka mai anga i te Tavini tei taikuia mai i roto ia Isaia pene 42, 49, 50, 52, e te 53?

³ Ko te kupu “tavini” e maata te taime e taikuia maira i roto i te puka o Isaia. I tetai au taime te tuatua ra te reira no runga i te peroveta uaorai. (Isa. 20:3; 44:26) I tetai au taime te tuatua ra te reira no runga i te iti tangata o Iseraela, me kore ia Iakoba. (Isa. 41:8, 9; 44:1, 2, 21) Inara peea i reira te au totou umeremere tikai no runga i te Tavini tei rekotiia i roto ia Isaia pene 42, 49, 50, 52, e te 53? Te akataka meitaki maira te au Tuatua Tapu Ereni kia tatou e koai te Tavini o Iehova tei akakiteia mai i roto i taua au pene ra. Te mea umere ra, te tatau ra te opita Etiopia tei taikuia mai i roto i te puka o Angaanga i taua au totou ra i te arataki anga te vaerua i te tangata tutu evangeria ko Philipa kia aravei atu iaia. I te mea e kua tatau ana te opita i te papaanga Pipiria ta tatou ka kite i roto ia Isaia 53:7, 8, kua ui atura aia kia Philipa e: “Ka akakite mai ana koe, noai ta te peroveta nei tuatua? nona uaorai ainei? e no tetai tangata ke ainei?” I reira rai kua akamarama atu a Philipa i ta Isaia i tuatua mai no runga i te Mesia, ko Iesu.​—Anga. 8:26-35.

⁴ I te taime e pepe ua ra a Iesu, kua akakite tetai tangata tuatua tika ko Simeona tona ingoa, i roto i te mana o te vaerua tapu e ka riro mai “te tamaiti ra ia Iesu” ei “turama, ei akamārama mai i te au etene” mei tei totouia i roto ia Isaia 42:6 e te 49:6. (Luka 2:25-32) Tetai, kua totou katoaia mai te taakamaanga ta Iesu i kite i te po i akaapaia ai aia, i roto i te totou a Isaia 50:6-9. (Mata. 26:67; Luka 22:63) I muri ake i te Penetekote mataiti 33 T.N., kua akataka meitaki mai te apotetoro ko Petero e ko Iesu te “Tavini” o Iehova. (Isa. 52:13; 53:11; tatau ia Angaanga 3:13, 26.b) Eaa ta tatou ka mou mai mei teia au totou o te Mesia?

Apii a Iehova i Tona Tavini

5. Eaa ra te apiianga tei rauka i te Tavini?

⁵ Tetai o ta Isaia au totou no runga i te Tavini o te Atua te akamarama maira te reira no runga i te pirianga tumanava i rotopu ia Iehova e tana Tamaiti anau tai i mua ake ka riro mai ei te Tamaiti ei tangata. (E tatau ia Isaia 50:4-9.) Te akakite maira te Tavini uaorai e kua apii ua atu rai a Iehova iaia, i te na ko anga e: “Te akaara nei aia i toku taringa, kia akarongo au mei te aronga i apiiia ra.” (Isa. 50:4) I roto i taua tuatau pouroa ra, kua akarongo to Iehova Tavini ki tona Metua e kua kite mai mei tana apiianga, e kua riro mai ei pipi kauraro ua. E tikaanga ngateitei tikai kia apiiia e Tei Anga mai i te ao katoa nei e pini ua ake!

6. I akapeea te Tavini i te akaari mai anga i tona tu kauraro apa kore ki tona Metua?

⁶ I roto i te totou, te tuatua ra te Tavini no runga i tona Metua e ko “te Atu ra ko Iehova.” Te akaari maira teia e kua ariki te Tavini e ko Iehova te Tutara Ngateitei o te ao e pini ua ake. I te akaari anga i tona tu kauraro apa kore ki tona Metua, kua akakite aia e: “Kua akaputata te Atu ra ko Iehova i toku taringa, e kare oki au i akarongo ngata; kare oki au i kotoe ki muri.” (Isa. 50:5) “Tei vaitata katoa uaorai,” aia ia Iehova “[“ei pu rave angaanga,” NW]” i te anga mai anga i te ao katoa nei e i te tangata. Ko teia “pu rave angaanga” kua ‘rekareka marie ua aia i mua i te aroaro o Iehova, i te rekareka marie anga i te enua e nooia e te tangata nei, e tei te au tamariki a te tangata ra to te tamaiti a te Atua mataora anga.’​—Mase. 8:22-31.

7. Eaa te akaari maira e kua papu tikai i te Tavini te turuturuanga a tona Metua i te tuatau o tona au timataanga?

⁷ Kua riro teia apiianga tei rauka i te Tavini e pera tona inangaro akaperepere i te tangata nei, ei akapapa iaia me aere mai aia ki te enua nei e me aro atu aia i te patoianga. E mea mareka roa nana kia rave ua atu rai i te anoano o tona Metua, noatu me rokoia e te takinokino maata. (Sala. 40:8; Mata. 26:42; Ioa. 6:38) I te au tuatau katoa o tona au timataanga i te enua nei, kua papu tikai ia Iesu te akaperepereanga a tona Metua e tana turuturuanga. Mei tei akakiteia i roto i te totou a Isaia, kua rauka ia Iesu kia karanga e: “Ko te akatika mai iaku nei, te vaitata nei ïa; koai te ka māro mai iaku? . . . I na, na te Atu ra na Iehova e tauturu maira iaku.” (Isa. 50:8, 9) E tika rava e kua tauturu a Iehova i tona Tavini akarongo mou i te tuatau katoa o tana angaanga orometua i te enua nei, mei ta tetai totou ke mai a Isaia e akaari maira.

Angaanga Orometua a te Tavini i te Enua Nei

8. Eaa te akapapu maira e ko Iesu “tei ikiia” e Iehova, mei tei totouia i roto ia Isaia 42:1?

⁸ Te akakite maira te rekoti a te Pipiria kia tatou e eaa tei tupu i te papetitoia anga a Iesu i te mataiti 29 T.N. e: ‘Kua eke maira te vaerua tapu ki rungao iaia . . . e kua tae maira tetai reo mei runga mai i te rangi, i te na ko anga mai, Ko taku tamaiti akaperepere koe; kua mareka rava au ia koe.’ (Luka 3:21, 22) No reira, kua akataka meitaki mai a Iehova i “tei ikiia” e ia, tei taikuia mai i roto i te totou a Isaia. (E tatau ia Isaia 42:1-7.) I te tuatau o tana angaanga orometua i te enua nei, kua akatupu a Iesu i teia totou na roto i tetai mataara umere roa. I roto i te papaanga o tana Evangeria, kua taiku mai a Mataio i te au tuatua ka kiteaia i roto ia Isaia pene 42:1-4 e kua taangaanga i te reira ki runga ia Iesu.​—Mata. 12:15-21.

9, 10. (a) I akapeea ra a Iesu i te akatupu anga ia Isaia 42:3 i te tuatau o tana angaanga orometua? (e) I akapeea ra a Karaiti i te ‘akatinamou anga i te tuatua-tika’ iaia i te enua nei, e aea aia e ‘akatinamou ei i te tuatua-tika i te enua nei’?

⁹ E akavaavaa ana te au arataki akonoanga o te ngati Iuda i te tangata noa ua nei i rotopu i te ngati Iuda. (Ioa. 7:47-49) E takinga kinoia ana te tangata, e ka tau rai kia akaaiteia ki te ‘kakao paruparu’ me kore ki te ‘lamepa matemate’ e akapou atura te ka. Kareka ra a Iesu, kua akaari aia i te ngakau aroa ki te aronga putaua e tei rokoia e te kino. (Mata. 9:35, 36) Kua oronga atu aia i tetai patianga aroa ki taua aronga ra i te na ko anga e: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi.” (Mata. 11:28) Tetai, kua ‘akatupu a Iesu i te [“tuatua-tika,” NW]’ na te apii anga i to Iehova au turanga no te tika e te tarevake. (Isa. 42:3) Kua akaari katoa atu aia e ka anoanoia kia taangaanga i te Ture a te Atua ma te tu tau e te aroa. (Mata. 23:23) Kua akaari katoa a Iesu i te tu tuatua tika na te tutu aere anga ma te akavaavaa kore ki te aronga apinga nui e te aronga putaua.​—Mata. 11:5; Luka 18:18-23.

¹⁰ Kua totou katoa mai a Isaia e ka ‘akatinamouia te [“tuatua-tika,” NW] i te enua nei’ e “tei ikiia” e Iehova. (Isa. 42:4) Ei Ariki no te Patireia o te Mesia, kare e roa atu ana ka rave aia i teia, me takore pouroa aia i te au patireia poritiki e me mono ia ratou ki tana tutaraanga tuatua tika. Ka apai mai aia i tetai ao ou, i reira “te vai tika anga o te tuatua-tika ra.”​—2 Pete. 3:13; Dani. 2:44.

“Ei Turama” e “Ei Koreromotu”

11. I roto i teea tu i riro ei a Iesu “ei turama no te etene” i te anere mataiti mua, e i akapeea ra aia i riro ei e ko te reira i teia tuatau nei?

¹¹ I roto i te akatupuanga o Isaia 42:6, kua riro tika mai a Iesu “ei turama no te etene.” I te tuatau o tana angaanga orometua i te enua nei kua apai mai aia i te marama pae vaerua ki te ngati Iuda tikai. (Mata. 15:24; Anga. 3:26) Inara kua akakite a Iesu e: “Ko au te mārama o teianei ao.” (Ioa. 8:12) Kua riro mai aia ei marama no te ngati Iuda e no te pa enua, na te apai mai anga te marama pae vaerua e pera katoa na te oronga anga i tona oraanga tangata apa kore ei oko no te tangata ravarai nei. (Mata. 20:28) I muri ake i tona tuakaouanga, kua akaue aia i tana au pipi kia riro ei au kite nona “e tae ua atu ki te openga o te enua.” (Anga. 1:8) I te tuatau o ta raua angaanga orometua, kua taiku katoa mai a Paulo raua ko Banaba i te tuatua, “turama no te etene” e kua taangaanga i te reira ki runga i te angaanga tutuanga ta raua e rave ra i rotopu i te aronga kare i te ngati Iuda. (Anga. 13:46-48; akaaite ia Isaia 49:6.) Te raveia nei rai taua angaanga ra e to Iesu au taeake akatainuia i te enua nei, e to ratou au oa katoa, ia ratou e akatotoa aere ra i te tuatua meitaki e te tauturu anga i te tangata kia tuku i to ratou akarongo ki roto ia Iesu, te “turama no te etene.”

12. I akapeea a Iehova i te oronga anga i tona Tavini “ei koreromotu na te au tangata”?

¹² I roto i taua totou ra, kua akakite a Iehova ki tona Tavini ikiia e: “E tiaki oki au ia koe, e e oronga ia koe ei koreromotu na te au tangata.” (Isa. 42:6) Kua tauta ua atu rai a Satani i te takore ia Iesu e i te arai iaia mei te akaoti anga i tana angaanga orometua i te enua nei, inara kua paruru a Iehova iaia e tae ua atu ki te tuatau tei akatakaia nona kia mate. (Mata. 2:13; Ioa. 7:30) I reira kua akatuakaou a Iehova ia Iesu e kua oronga iaia “ei koreromotu” me kore ei tia, ki te tangata i te enua nei. Kua oronga mai taua taputou puapinga mou ra i te akapapuanga e ka riro ua atu rai te tavini akarongo mou o te Atua ei “turama no te etene,” i te akarangatira anga mai ia ratou mei te poiri pae vaerua.​—E tatau ia Isaia 49:8, 9.c

13. Na roto i teea mataara i akaora mai ei a Iesu i “te aronga i noo i te poiri” i te tuatau o tana angaanga orometua i te enua nei, e te akapeea nei aia i te rave ua atu anga rai i te reira?

¹³ Kia rotai ki teia koreromotu, ka riro na to Iehova Tavini e “akapuera i te mata o te matapo,” “kia tukua mai te tuikaa i tapekaia ra,” e kia akaora mai i “te aronga i noo i te poiri.” (Isa. 42:7) I te tuatau o tana angaanga orometua i te enua nei, kua rave a Iesu i teia na te akakite atea ua anga i te au peu a te akonoanga pikikaa e, i te tutu aere anga i te tuatua meitaki o te Patireia. (Mata. 15:3; Luka 8:1) I reira kua akaora mai aia i te ngati Iuda tei riro mai ei au pipi nana, mei roto i te tuikaaanga pae vaerua. (Ioa. 8:31, 32) Na roto rai i taua mataara ra kua tauturu a Iesu i te mirioni ua atu o te aronga kare i te ngati Iuda kia kite i te tuatua mou. Kua akaue aia i tana au pipi kia “aere . . . e akariro i to te pa enua katoa ei pipi,” i te taputou anga e ka vaitata ua rai aia i tana au pipi “e tae ua atu ki te openga o teianei ao.” (Mata. 28:19, 20) Mei tona turanga mai i runga i te rangi, te akatere maira a Iesu i te angaanga tutuanga i te ao katoa nei.

Akateitei a Iehova i te “Tavini”

14, 15. Eaa ra te tumu i akateitei ei a Iehova i tona Tavini, e i akapeea aia i te rave anga i te reira?

¹⁴ I roto katoa i tetai totou ke mai no runga i te Tavini ko te Mesia, te na ko ra a Iehova e: “I na, e manuia toku tavini; ka akateiteiia aia, ka apaiia aia ki runga, e e akateitei rava akeraia.” (Isa. 52:13) No runga i te tu kauraro tiratiratu o tana Tamaiti ki Tona mana ngateitei e tona tu akarongo mou i raro i te timataanga pakari rava atu, kua akateitei a Iehova iaia.

¹⁵ Kua tata te apotetoro ko Petero no runga ia Iesu e: “Ko tei riro akenei ki runga i te rangi, e tei te rima katau o te Atua ra; e kua tukuia te au angela, e te aronga mana, e te aronga au, ki raro ake iaia.” (1 Pete. 3:22) Kua tata katoa rai te apotetoro ko Paulo e: “Kua taakaaka iaia uaorai i te akonoanga e tae ua atu ki te mate, ki te mate [“i runga i tetai rakau tamamae anga,” NW]. I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona: Kia tuku te au turi katoa ki raro, to te rangi, to runga i te enua, e to raro ake i te enua, i te ingoa o Iesu; E kia aaki te au vaa ravarai e, ko Iesu Mesia te Atu, kia kakā te Atua Metua ra.”​—Phili. 2:8-11.

16. I akapeea ra a Iesu i te “akateitei rava akeraia” anga i te mataiti 1914, e eaa tana i rave mei taua taime maira?

¹⁶ I te mataiti 1914, kua akateitei rava atu a Iehova ia Iesu ki runga. Kua “akateitei rava akeraia” aia i te akaterono anga a Iehova iaia ei Ariki no te Patireia o te Mesia. (Sala. 2:6; Dani. 7:13, 14) Mei taua taime maira, kua aere atura a Karaiti i te “akavi i rotopu i [tona] au enemi ra.” (Sala. 110:2, NW) Kua na mua aia i te akavi ia Satani e tana au temoni, i te uri mai anga ia ratou ki raro nei i te enua. (Apo. 12:7-12) E oti, i roto i te turanga o Kuro Maata, kua akaora maira a Karaiti i te toenga o tona au taeake akatainuia i te enua nei mei te tuikaaanga i roto ia “Babulonia maata.” (Apo. 18:2; Isa. 44:28) Kua riro aia ei akatere no tetai angaanga tutu anga i te ao katoa nei tei taopenga mai ki te akaputuputu mai anga i “te toenga” o tona au taeake pae vaerua e oti, i te mirioni ua atu o te au “mamoe ke atu,” koia oki te au oa tiratiratu o te “anana iti.”​—Apo. 12:17; Ioa. 10:16; Luka 12:32.

17. Eaa ra ta tatou i mou mai i teianei na roto i te apii anga i te au totou o Isaia no runga i te “tavini”?

¹⁷ Kua riro tikai te apiianga i teia au totou umeremere i roto i te puka o Isaia i te akamaata rava atu i to tatou arikianga rekareka no to tatou Ariki e to tatou Akaora, i te Karaiti ko Iesu. Tona tu kauraro ei Tamaiti i te tuatau o tana angaanga orometua i te enua nei, kua akaata mai te reira i te apiianga tei rauka iaia i te pae i tona Metua i mua ake ka aere mai ei aia ki te enua nei. Kua akapapu mai aia uaorai e koia te “turama no te etene” na roto i tana uaorai angaanga orometua e na roto i tana angaanga tutuanga tana i akaaere mai ana e tae ua mai ki teia tuatau. Mei ta tatou ka kite, ka akaari mai tetai totou ke mai no runga i te Tavini ko te Mesia e ka takinga kinoia aia e ka oronga aia i tona uaorai oraanga no tatou, e au mea anake te ka tau kia “akamaara marie” tatou, i te tuatau no te Akamaaraanga i tona mate e vaitata maira.​—Ebe. 12:2, 3.

[Au Tataanga Rikiriki i Raro]

Na te Akamanako Akaou Anga

• Koai te “tavini” tei taikuia mai i roto i te au totou a Isaia, e i akapeea tatou i kite ei?

• Eaa te apiianga tei rauka i te Tavini mei ko ia Iehova?

• I akapeea a Iesu i riro ei “ei turama no te etene”?

• Akapeea te Tavini i te akateiteiia anga?

[Tutu i te kapi 21]

Kua akataka meitaki mai a Philipa i te “tavini” tei taikuia mai e Isaia e ko Iesu, te Mesia

[Tutu i te kapi 23]

Ei Tavini ikiia no Iehova, kua akaari a Iesu i te ngakau aroa ki te aronga putaua e tei rokoia e te kino

[Tutu i te kapi 24]

Kua akateiteiia a Iesu e tona Metua e kua akateronoia ei Ariki no te Patireia o te Mesia