Apiiia e Iehova Tae Roa Mai ki Teia Tuatau

“Kua oronga mai te Atu ra ko Iehova kiaku i te arero o te aronga i apiiia.”​—ISAIA 50:4.

1, 2. (a) No teaa a Iehova i akateateamamao ei i tana i apii akaperepere ra, e eaa te tupu anga? (e) Akapeea a Iesu i te akakite anga i te Tumu o tana au apiianga?

E PUAPII te Atua ko Iehova mei tona riro anga mairai ei Metua. No tetai tuatau i muri ake i te meameaau anga etai o tana tamariki, kua akateateamamao aia i tei apii akaperepereia e ia ra, koia tana Tama mua, no te angaanga orometua i te enua nei. (Maseli 8:30) Te akakite totou maira a Isaia pene 50 i teia tei apiiia ra i te na ko anga: “Kua oronga mai te Atu ra ko Iehova kiaku i te arero o te aronga i apiiia; kia tika iaku kia tauturu atu i tei roiroi ki te tuatua.” (Isaia 50:4) Ko te tupu anga no te akonoanga i te apiianga a tona Metua iaia i te enua nei, kua riro a Iesu ei tumu no te akaangaroianga ki te aronga katoa tei ‘roiroi e te teiaa i te apainga.’​—Mataio 11:28-30.

² E manganui te au angaanga mana ta Iesu i rave i te tuatau o te anere mataiti mua ra. Kua akatuera aia i te mata o te matapo e kua akatu katoa i tei mate ra, inara ko te apinga maata tei matauia aia e te au tangata o tona tuatau e orometua aia. Kua tapaia aia e tana au pipi e pera katoa oki te aronga i patoi iaia e e orometua aia. (Mataio 8:19; 9:11; 12:38; 19:16; Ioane 3:2) Kare a Iesu i rave i te meitaki nona uaorai no tana i apii mari ra kua akakite taakaaka aia: “Kare taku uaorai i taku e apii nei, nana ra, na tei tono mai iaku nei.” “Ko ta taku Metua ra i apii mai iaku ra, ko taku ïa e tuatua nei.”​—Ioane 7:16; 8:28; 12:49.

Pirianga Tau o te Orometua e Tei Apiiia

3. I akapeea ta Isaia totou i te akakite anga i to Iehova ra manako maata i te aronga tana e apii ra?

³ Ka akono te orometua meitaki i te manako akono tau, e te aroa i te aronga tataki tai tana e apii ra. Te akakite maira a Isaia pene 50 e tei te Atua ra ko Iehova te reira tu manako i te aronga tana e apii ra. “Te akaara nei aia iaku i tera popongi i tera popongi,” te akakite maira te totou e, “te akaara nei aia i toku taringa, kia akarongo au mei te aronga i apiiia ra.” (Isaia 50:4) Te akakite maira te tuatua i konei i tetai puapii tei akaara vave i tana aronga apiiia ra i te popongi kia apii atu ia ratou ra. I te tuatuaanga no te aite anga o taua totou ra, kua akakite mai tetai tangata apiiia i te Puka Tapu ra e: “Ko teia te manako, e ko Tei oko mai koia . . . tetai, i te aite anga, tei roto i te apii a te Atua ra; e ka tau ei oronga i te apiianga ki etai ke ra. . . . Ko te Mesia ra te ka tau tikai, na te apiianga Tu Atua, ei puapii no te au tangata nei.”

4. Akapeea to Iesu akarongo anga ki te apiianga a tona Metua ra?

⁴ Kua tika rava, te akarongo ra te aronga apiiia i te apiianga a to ratou puapii. I akapeea ta Iesu akarongo anga i te apiianga a tona Metua? Kua rotai tona akarongo anga ma ta tatou i tatau ana ia Isaia 50:5: “Kua akaputata te Atu ra ko Iehova i toku taringa, e kare oki au i akarongo ngata; kare oki au i kotoe ki muri.” Ae, e anoano maata to Iesu kia apii. Kua riro aia, mei tei tuatuaia ra e, e taringa katoa. E tere atu i te reira, kua mareka ua aia kia rave noatu eaa ta tona Metua i akaue atu iaia. Kare aia i meameaau; mari ra, kua tuatua aia: “Kia tupu ra toou anoano, auraka toku.”​—Luka 22:42.

5. (a) Eaa te akakite maira e kua kite a Iesu i mua akera i te au timataanga tana ka mamae i te enua nei? (e) I akapeea te akatupu anga i te totou ia Isaia 50:6?

⁵ Kua akakite maira te totou e kua akakiteia ki te Tamaiti ra te au apinga penei ka tupu no tana raveanga i te anoano o te Atua. Te akaariia maira teia na te tuatua a tei apiiia ra: “Kua tuku ua atu au i taku tua ki te aronga i pāpā mai, e oku paparinga ki te aronga i utiuti i te kumikumi: kare au i uuna ke atu i toku mata i te akavaavaa, e i te tutua uavare.” (Isaia 50:6) Mei ta te totou i akakite maira, kua takinga kinoia a Iesu i te enua nei. “Kua tutua atura ratou i te uavare ki tona mata,” ta te apotetoro ko Mataio i tata. “E tetai aronga, kua papaki atura i te paparinga.” (Mataio 26:67) Kua raveia teia e nga rima o te au arataki akonoanga i te po o te Pasa i te 33 T.N. I tera mai ra kua tuku ua atu a Iesu i tona tua ki te aronga i papa mai, i te papa anga tangi kore te au vaeau o Roma ra iaia i mua ake i te patitianga iaia ki runga i te rakau kia mate atu.​—Ioane 19:1-3, 16-23.

6. Eaa te akaari maira e kare i ngaro ana to Iesu irinaki anga i tona Puapii ra, e i akapeea te tutaki angaia tona irinaki anga?

⁶ Kua apii meitakiia te Tamaiti i mua akera, e kare i kore tona irinaki anga i tona Puapii. Te akaariia maira teia i tana i tuatua i muri akera kia tau ki ta te totou: “E tauturu mairai te Atu ra ko Iehova iaku; i kore ei au i akama.” (Isaia 50:7) Kua tutaki maataia to Iesu irinaki anga i te tauturu a tona Puapii ra. Kua akateitei akera tona Metua iaia, ma te akameitakianga iaia ma tetai turanga teitei ki runga atu i etai atu tavini katoa o te Atua ra. (Philipi 2:5-11) Te vai maira te au akameitakianga mekameka no tatou katoa oki me ka akono akarongo meitaki tatou i ta Iehova ra au apiianga e “kare oki [tatou] i kotoe ki muri.” E akara tatou e i akapeea taua apiianga ra i te akapapa angaia tae roa mai ki to tatou tuatau nei.

Tetai Porokarama Apiianga Akatotoaia

7. I akapeea ta Iehova ra rave anga i tana apiianga i te enua nei?

⁷ Mei ta tatou i kite ana i mua akera, kua taangaanga a Iehova i tona Komono i te enua nei, koia a Iesu Karaiti, kia rave i te apiianga tu Atua i te tuatau o te anere mataiti mua ra. (Ioane 16:27, 28) Kua tou tamou atu a Iesu ki te Tuatua a te Atua ra ei mana no tana apiianga, ma te akanooanga i te akatauanga no te aronga tana i apii ra. (Mataio 4:4, 7, 10; 21:13; 26:24, 31) I muri akera, kua raveia ta Iehova apiianga i runga i te enua nei na te angaanga orometua a taua aronga apiiia ra. Kia maara e kua akaue atura Iesu kia ratou: “E teianei, ka aere kotou, e akariro i to te pa enua katoa ei pipi . . . ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20) I te riroanga te au tangata ei pipi, kua riro mai ratou ei tuanga no te “are o te Atua ra, ko te ekalesia o te Atua ora ra.” (1 Timoteo 3:15) Kua akapapa katoaia ratou ki roto i etai putuputuanga tataki tai tei apiiia maira ratou e Iehova. (Angaanga 14:23; 15:41; 16:5; 1 Korinetia 11:16) Kua rave tamouia ainei te apiianga tu Atua na roto i te reira tu e tae roa mai ki to tatou tuatau nei?

8. I akapeea ta Iesu akakite anga e ka aratakiia te angaanga apiianga i te enua nei i mua ake i te taenga mai te openga?

⁸ E tika rava, kua pera! E toru ra i mua ake i tona matenga, kua totou mai a Iesu e i mua ake i te openga o teia akatereanga o te au mea nei, ka raveia tetai angaanga tutuanga maata. “E tutu aereia te evangelia o te basileia nei, e kako rave ake te ao katoa nei; ei kite no te pa enua ravarai,” tana i tuatua, “ko te openga iora ïa i reira ra.” Kua akataka maira a Iesu i te apinga ei arataki i te porokarama tutu aereanga e te apiianga i te ao katoa nei. Kua tuatua aia no “te tavini akono meitaki e te pakari” te ka rave ei tetai aerenga mai, me kare apinga, ei oronga i te kai vaerua ki Tona au tavini. (Mataio 24:14, 45-47) Kua taangaanga te Atua i teia “tavini” ei akaaere i te au apinga no te Patireia i te ao katoa nei.

9. Koai ma te tavini akono meitaki e te pakari?

⁹ I teia tuatau, ko te tavini akono meitaki e te pakari ko te toenga o te aronga tuanga no te Patireia ra. E au Kerititiano akatainuia ratou, ko te toenga i runga i te enua nei o te ­144,000, na “Karaiti ra ratou” e e tuanga no te “uanga o Aberahama.” (Galatia 3:16, 29; Apokalupo 14:1-3) Akapeea koe me akataka i te tavini akono meitaki e te pakari? Te mea maata na te angaanga ta ratou e rave ra e na to ratou akono piri vaitata i te Tuatua a te Atua ra, koia te Puka Tapu.

10. Eaa te au apinga ta te pupu tavini ka taangaanga ei rave i ta Iehova ra au apiianga?

¹⁰ Te taangaanga nei a Iehova i teia “tavini” ei apinga nana ei apiianga i tona au tangata i teia tuatau nei. Kua rave te aronga o taua pupu tavini ra i te ingoa e Au Kite o Iehova i te 1931. Mei reira mairai e au mirioni ua atu tei piri mai kia ratou e kua ariki i taua ingoa ra e kua kapiti atu i te akakitekiteanga i te Patireia o te Atua ra. Ko teia makatini, Te Punanga Tiaki Akakiteanga i te Patireia o Iehova, ko te apinga maata ia te raveia nei e te “tavini” i te angaanga tutu aere. Inara, te taangaanga katoaia ra etai atu au puka, te au puka mamaata, te au puka rikiriki, au poroutia, au aenga pepa, e te makatini Awake!

11. Eaa te au apii ta te “tavini” ra i akono, e eaa te akakoro anga a teia au apii tataki tai e rave ra?

¹¹ Kapiti katoa oki, kua akapapa te “tavini” i etai au apii ke ke. Kapiti atu ki te reira ko te Apii Punanga Tiaki Puka Tapu o Gileada, e apii no te rima marama ei teateamamao i te au orometua ou no te angaanga mitinari i te enua ke, e te Apii Terenianga Orometua no te rua marama, ei tereni i te aronga pakari takaua e te au tavini orometua no te au angaanga teokaratiki taka ke. Te vai katoa ra te Apii Angaanga Orometua Patireia, no te apii anga i etai tuatau akatakaia i te aronga pakari Kerititiano e te au tavini orometua, i ta ratou au apainga i te putuputuanga, e te Apii Tavini Anga Painia, tei akapapa ra i te aronga tutu evangeria i te au tuatau ravarai kia meitaki atu i ta ratou angaanga tutu aereanga.

12. Eaa te tuanga epetoma a te porokarama apiianga ra?

¹² Ko tetai atu tuanga o te porokarama apiianga ko nga uipaanga e rima i te epetoma te raveia ra e tere atu i te 75,500 putuputuanga o te au tangata o Iehova i te ao katoa nei. Te puapinga maataia ra ainei koe i teia au uipaanga? Na toou manako anga meitaki i te apiianga te orongaia maira, te akaari ra ainei koe e te irinaki papu ra koe i te reira, mei te mea rai tei roto i te apii na te Atua ra? Te akakite ra ainei ki etai atu toou tere anga ki mua i te pae vaerua e tei ia koe “te arero o te aronga i apiiia”?​—Isaia 50:4; 1 Timoteo 4:15, 16.

Apiiia i te Au Uipaanga Putuputuanga

13. (a) Eaa tetai mataara puapinga maata ta Iehova e apii nei i tona au tangata i teia tuatau? (e) Akapeea tatou me akaari i to tatou ariki anga no Te Punanga Tiaki?

¹³ Te apii maata maira a Iehova i tona au tangata na te apii epetoma i te Puka Tapu, i te taangaanga anga i Te Punanga Tiaki ei tauturu i te apiianga. Te manako ra ainei koe i teia uipaanga ei tetai ngai e raukaʼi kia apiiia koe e Iehova? Noatu rai e ko Iesu te mea mua te taikuia ra ia Isaia 50:4, ka tau katoa oki kia akapiriia atu ki te aronga katoa te ka akatano ia ratou uaorai no te au akapapa anga a te Atua kia rauka “te arero o te aronga i apiiia.” Ko tetai mataara e raukaʼi ia koe i te akaari e te manako maata ra koe i Te Punanga Tiaki na te tatauanga i te au itiu tataki tai i muri ua ake i te rauka anga ia koe. I reira, i te apii anga i Te Punanga Tiaki i te putuputuanga, ka rauka ia koe i te akaari kia Iehova i toou arikianga na te aereanga ki reira pera katoa na te akapapa anga kia rave i te tuatua anga i toou manakonako anga.​—Ebera 10:23.

14. (a) Eaa ra te pauanga i te au uipaanga i riro ei ei tetai raveanga puapinga maata? (e) Eaa te tu pauanga na te aronga ou te akamaroiroi maata maira?

¹⁴ Te ariki ra ainei koe e na taau au pauanga i te au uipaanga, ka o atu koe i tetai tuanga o te porokarama apiianga mekameka a Iehova ra? Kare e ekoko anga no te reira, te paupauanga i te au uipaanga ko tetai mataara puapinga maata ia e raukaʼi ia tatou i te akamaroiroi atu tetai ki tetai “kia maata te aroa, e i te angaanga memeitaki ra.” (Ebera 10:24, 25) Ka rauka ainei kia rave katoa oki te tamariki i tetai tuanga i teia porokarama apiianga? Ae, ka rauka ia ratou. E putuputu te akamaroiroianga ki te aronga kua pakari na te au pauanga a te aronga ou no to ratou ngakau maira. I etai tuatau, te akakeuia ra te aronga ou i ta tatou au uipaanga na te au pauanga a te tamariki kia akamanako meitaki i te tuatua mou o te Puka Tapu. Ko tetai papaki o te au tamariki te tatau ua maira i ta ratou au pauanga no roto tika mai i te parakarapa me kare ka tuatua ua i ta tetai kua pakari ra i koumuumu atu i to ratou taringa. Inara, e mea akamaroiroi tikai me teateamamao meitakiia ta ratou au pauanga. Na taua tu pauanga ra e apai tika mai i te akangateitei anga ki to tatou Puapii Mekameka e tana porokarama akateiteiia no te apiianga.​—Isaia 30:20, 21.

15. Eaa te ka rauka i te au metua kia rave ei tauturu kia meitaki atu te pauanga a te tamariki?

¹⁵ E mea rekareka tikai kia kite i te anoanoanga te tamariki kia piri atu ki te akapaapaaanga i to tatou Atua. Kua ariki meitaki a Iesu i te au akakite anga akapaapaa anga mei ko mai i te aronga ou ra. (Mataio 21:15, 16) Kua akakite maira tetai o te aronga pakari Kerititiano: “Iaku e tamaiti ra, kua anoano au i te pau i te Apii Punanga Tiaki ra. I muri ake i tana tauturuanga iaku i te teateamamao anga i tetai pauanga, kua umuumu toku metua kia akamatau au i te pauanga e itu taime i te tuatua anga i te reira.” Penei i ta kotou apii anga Puka Tapu na te ngutuare, ka rauka ia kotou i te au metua i te tauturu i ta kotou tamariki kia teateamamao i te au pauanga i ta ratou uaorai au tuatua i te au parakarapa ikiia i Te Punanga Tiaki. E tauturu ia ratou kia ariki i te angaanga meitaki ta ratou e piri atura i te porokarama apiianga a Iehova.

16. Eaa te puapinga i tupu ana no te Apii Orometua Teokaratiki, e koai ma te ka tau kia o atu i taua apii ra?

¹⁶ Ka tau katoa kia akamanako meitakiia te apiianga i etai atu uipaanga Kerititiano katoa ra, te aronga tei oronga ra i te akakitekite anga e pera katoa te aronga akarongo atu i te apiianga te orongaia maira. No te tere atu i te 50 mataiti i teianei, kua taangaanga a Iehova i te Apii Orometua Teokaratiki epetoma ra ei tereni anga i te au tane e te au vaine e mirioni ua atu kia kite meitaki i te oronga anga i te tuatua no te Patireia. Te aronga te piri atura i te apiianga ma te putuputuanga ka akatikaia kia o atu ki te apii, kapiti katoa te aronga kare i roa ana te akamata anga i te aere ki te au uipaanga, me te akono ra ratou i te ora anga te rotai ra ma te au kaveinga Kerititiano.

17. (a) Eaa te akakoroanga tikai i akanooiaʼi te Uipaanga Papuriki? (e) Eaa etai tumu te ka tau te aronga vaa tuatua kia tamou i to ratou manako?

¹⁷ Ko tetai atu tuanga kua roa, o te porokarama apiianga ko te Uipaanga Papuriki. Mei ta tona ingoa i akakite maira, kua akanooia teia uipaanga ei akamatau anga i te aronga kare i te Au Kite i te au apiianga tumu o te Puka Tapu. No reira, ko te tangata nana e oronga i te tuatua ka tau kia oronga mai i te akakite anga kia maramaia e te aronga te akarongo atura i tana tuatua ra no te taime mua. Ko te aiteanga o teia kia akataka i te au tuatua mei “te au mamoe ke atu,” “au taeake,” e “te toenga,” te au tuatua kare ra te aronga kare i te Au Kite e marama. I te mea ko te au tangata te ka aere atu ki te Uipaanga Papuriki penei e irinaki anga me kare e tu oraanga tei tuke ra ki to te au Tuatua Tapu​—inara te arikiia ra i roto i te totaiete o teia tuatau—​ka tau te vaa tuatua kia mako e auraka kia aviri i taua au irinaki anga ra me kare te au tu oraanga.​—Akaaite ia 1 Korinetia 9:19-23.

18. Eaa etai atu au uipaanga epetoma a te putuputuanga, e eaa te au akakoro anga ta ratou e rave ra?

¹⁸ Te Apii Puka Putuputuanga ko tetai uipaanga e apiiiaʼi te au puka i raro ake i te arataki anga a te tavini akono meitaki e te pakari i te au epetoma tataki tai ma te Puka Tapu. Ko te puka Revelation​—Its Grand Climax At Hand! te apiiia nei i teianei i te au enua e manganui. Kua akapapaia te Uipaanga Tavini Anga ei teateamamao i te au tangata o Iehova kia maata te rave i te tutuanga i te tuatua meitaki o te Patireia e kia akariro i te au tangata ei pipi.​—Mataio 28:19, 20; Mareko 13:10.

Apiiia i te Au Uipaanga Maata Atu

19. Eaa te au akaputu anga maata atu ta te “tavini” e akanoonoo ra i te au mataiti tataki tai?

¹⁹ No te tere atu i tetai anere mataiti, kua akanoonooia e te “tavini akono meitaki” te au uruoaanga e te au akaputuputuanga no te apiianga e te akamaroiroi anga taka ke i te au Kerititiano mou ra. E toru aua uipaanga maata atu ra te akonoia ra i teianei i te au mataiti tataki tai. Ko te akaputu anga no tetai ra okotai te uipa atura tetai pupu o te au putuputuanga no tetai kotinga. I roto katoa i taua mataiti ra, ka akono katoa te au kotinga tataki tai i tetai akaputu anga no nga ra e rua tei tapaia ra e akaputu anga kotinga. Kapiti katoa oki, e akaputu anga tetai tei tapaia e uruoaanga tapere, ko etai au kotinga te ka aere atu ki te reira. I etai mataiti penei ka akonoia te uruoaanga pa enua. Ko teia au akaputu anga mamaata ma te Au Kite manuiri no etai au enua e manganui e akamaroiroianga akarongo tikai no te au tangata o Iehova!​—Akaaite ia Deuteronomi 16:16.

20. Eaa te akaketaketa tamouia ra i te au akaputu anga maata atu o te Au Kite o Iehova ra?

²⁰ I te 1922, i te akaputu anga e vaitata i te 10,000 ki Cedar Point, Ohio, U.T.M., kua akauruia e te akamaroiroi anga a te vaa tuatua te au terekete: “Ko teia te ra o te au ra katoatoa. Ina, te tutara nei te Ariki! Ko kotou tona rima rave akakitekite anga. No reira e akakite, e akakite, e akakite, i te Ariki e tona patireia.” Kua rave tamou taua au uruoaanga mamaata ra i te akaketaketa anga ki runga i te angaanga tutu aereanga. Ei akatauanga, i te uruoaanga pa enua i New York City i te 1953, kua raveia tetai akakitekite anga no te akamata anga i tetai porokarama terenianga i te angaanga tutu aere mei tera are ki tera are i roto i te au putuputuanga ravarai. Kua kitea tetai tupu anga papu i te reira angaanga i te tutu aereanga i te Patireia i roto i te au enua e manganui.

Apiiia e te Atua kia Apii

21. Eaa te tu meitaki te tau ra tatou kia ariki, auraka ra kia tapae ke i tana akakoro anga?

²¹ E tika rava, e porokarama apiianga umere ta Iehova i te enua nei i teia tuatau! Pouroa te aronga te ariki ra i te reira ka rauka te apiiia e te Atua, ae, ka o atu ki roto i te au tangata tei orongaia ra “te arero o te aronga i apiiia.” Mei teaa ra te tu meitaki kia riro ki roto i te apii a te Atua ra! Inara, i te arikianga i teia tu meitaki, kare tatou e tau kia tapae ke i tana akakoro anga. Kua apii a Iehova ia Iesu kia raukaʼi iaia i te apii atu i etai ke ra, e kua apii atura a Iesu i tana au pipi kia raukaʼi ia ratou i te rave i taua angaanga rai mei tana i rave ra inara na tetai tu maata rava atu. Mei te reira katoa, te tereniia nei tatou i roto i ta Iehova ra porokarama apiianga mekameka no te akakoro anga kia apii atu ia etai ke ra.​—Ioane 6:45; 14:12; 2 Korinetia 5:20, 21; 6:1; 2 Timoteo 2:2.

22. (a) Eaa te manamanata tei tupu kia Mose raua ko Ieremia, inara i akapeea te akakore anga i te reira? (e) Eaa te akapapu anga te ka rauka ia tatou e ka akono te Atua kia oti te angaanga tutu aereanga i te Patireia?

²² Te tuatua ra ainei koe, mei ta Mose rai e, “Kare au i te tangata vaa tukatau,” me kare mei ta Ieremia i tuatua ra, “Kare au i kite i te tuatua”? Na Iehova e tauturu ia koe mei tana i tauturu ra ia raua. “Ei vaitata katoao au i toou vaa,” tana i tuatua kia Mose. E kia Ieremia kua na ko atura aia: “Auraka e mataku . . . ei vaitata katoao au ia koe.” (Exodo 4:10-12; Ieremia 1:6-8) I te anoano anga te au arataki akonoanga kia akamuteki i tana au pipi, kua na ko atura Iesu: “Kia muteki ua ratou nei, kua kapiki ua mai ïa te au toka nei i reira.” (Luka 19:40) Inara kare te au toka i kapiki ua mai i reira, e kare katoa ratou e anoanoia kia pera i teianei no te mea te taangaanga nei a Iehova i te arero o te aronga i apiiia kia rave i te tuatua no tona Patireia.

Ka Rauka Ainei ia Koe i te Pau?

◻ Eaa te pirianga tau o te Puapii e tei apiiia te akakite maataia maira ia Isaia pene 50?

◻ Akapeea ta Iehova ra rave anga i tetai porokarama apiianga maata?

◻ Eaa etai au tuanga o te porokarama apiianga a Iehova ra?

◻ Eaa ra i riro ei tetai angaanga mekameka kia o atu ki te porokarama apiianga a Iehova ra?

[Tutu i te kapi 16]

Te au pauanga a te tamariki no te ngakau mai e putuputu te akamaroiroianga i te aronga kua pakari