Pene 67

Kare i Rauka ia Ratou te Opu Iaia

TE RAVE iara te Oroa Patia Puakapa, kua tono atu te au arataki akonoanga i te au opita akava e tapeka ia Iesu. Kare ra aia i uuna iaia uaorai. Mari ra, kua rave ua atura a Iesu i te ako anga i te ngai tangata, i te na ko anga: “Koi noonoo ake au ki o kotou nei, e te aere nei au kiaia i tei tono mai iaku nei. E kimi kotou iaku nei, kare ra kotou e kite iaku; e te ngai e nooia e au ra, kare kotou e tae ki reira.”

Kare ra te ngati Iuda i marama, e kua kimikimi manako ratou ratou uaorai: “Ka aere ra aia kiea, ka kore tatou e kite atu ei iaia? Ka aere ainei aia ki te aronga i ngaro ke ki o te Eleni ra, ka apii atu ei i te Eleni? Eaa teianei tuatua tana i karanga mai nei e, ka kimi kotou iaku, e kare kotou e kite iaku: e te ngai e nooia e au ra, kare rava kotou e tae ki reira?” Inara, te tuatua ra a Iesu no tona matenga te vaitata maira e tona tuakaouanga ki te oraanga i te rangi ra, te ngai kare tona au enemi e aru atu iaia.

Tae akera ki te itu ra te openga o te oroa ra. I te au popongi tatakitai o te oroa ra, kua riringi tetai kau taunga i te vai, tana i rave mai i te Vai pai i Siloama ra, e kua tae atura ki raro ake i te atarau. Penei ei akamaaraara atu i te au tangata i teia akono anga i te au ra tatakitai, kua kapiki maira Iesu: “Te tangata e kaki vai ra, ka aere mai aia kiaku nei inu ei. Te akarongo mai iaku nei ra, ka taʼe te vai ora no roto iaia, mei tei akakiteia mai e te tuatua i tataia ra.”

Ko te tika rai, te tuatua ra a Iesu no te apinga meitaki te ka tupu i te riringi anga mai te vaerua tapu. I te mataiti i muri maira kua tupu teia i te riringi anga o te vaerua tapu ia Penetekote ra. I reira, e au kauvai vai ora tei taʼe mai i te tuatua anga te 120 au pipi ra ki te au tangata katoa. I mua ake i te reira, kare e vaerua i teia tu e kare te au pipi a te Mesia ra i akatainuia ake i te vaerua tapu e kia kapikiia ki te oraanga i te rangi ra.

I te akarongo anga i ta Iesu ra ako anga, kua akamata tetai pae i te tuatua e: “Ko taua Peroveta mou rai teia,” e mea papu te taiku ra i te peroveta maata atu ia Mose ra, ko ia tei totouia e te aere maira. Kua karanga tetai pae: “Ko te Mesia teia.” Inara kua patoi maira tetai aronga: “No Galilea mai ainei te Mesia? Kare ainei i na ko te tuatua i tataia ra e, no te uanga o Davida te Mesia, no Betelehema ra no te oire no reira Davida ra?”

No reira kua tupu te ke anga i rotopu i te au tangata ra. Te inangaro ra tetai pae e opu ia Iesu, inara kare e tangata i amiri atu iaia ra. I te oki atu anga te aronga taoonga kare a Iesu ia ratou, kua ui atura te kau taunga nunui e te au Pharisea katoa oki: “Eaa kotou i kore ei i arataki mai iaia?”

Kua karanga atura taua aronga taoonga ra: “Kare rava e tangata e tau te tuatua i ta tera ra tangata.”

No te ki i te riri, kua tupou atura te au arataki akonoanga e tuatua taeke, e akakinoanga, e tapaanga ingoa ke. Kua aviri ratou: “Kua vavare katoa ainei kotou? Kua akarongo ainei tetai o te ui rangatira, e o te au Pharisea, iaia? Kareka teianei au tangata tei kore i kite i te Ture nei, kua taumaaia ïa.”

I reira, a Nikodemo, e Pharisea e e tutara ngati Iuda (koia oki e mema no te Sunederi), kua tuatua mataku kore atura no Iesu. Penei te maara ra ia koe e e rua e te apa mataiti i mua akera i aere atu ei a Nikodemo kia Iesu i te po e akakite i tona akarongo kiaia ra. Kua na ko atura Nikodemo: “Ka tika aina i ta tatou nei ture kia akaapa atu tatou i te tangata, kare e timata na i te akarongo atu i tana tuatua, e kia kitea?”

Kua kino roa atu te riri o te au Pharisea ra no tei paruru to ratou uaorai ia Iesu. Kua mura atura ta ratou tuatua. “No Galilea katoa aina koe? Ka kimi ana, kia kite koe, kare rava e peroveta i tupu i Galilea.”

Noatu rai e kare te au Tuatua Tapu i akakite tika tikai e ka aere mai tetai peroveta no Galilea mai, te tou atura ki te Mesia e ka aere mai mei reira, i te na ko anga i “te marama maata” ka kitea i te reira ngai. Pera katoa oki, i anauia a Iesu ki Betelehema, e e uanga aia no Davida. Noatu rai e kua kite te au Pharisea i te reira, kua rave ua atura ratou i te akatotoa anga i te au manako tarevake no Iesu ta te au tangata i irinaki ra. Ioane 7:​32-52; Isaia 9:​1, 2; Mataio 4:​13-17.

▪ Eaa tei raveia i te au popongi ravarai o te oroa ra, e i akapeea ta Iesu taki anga i te manako ki te reira?

▪ Eaa ra i kore ei i rauka i te aronga taoonga i te opu ia Iesu, e eaa ta te au arataki akonoanga i tuatua?

▪ Koai a Nikodemo, eaa tona tu manako no Iesu, e akapeea te akono a tona au taeake Pharisea iaia ra?

▪ Eaa te akapapu anga e ka aere mai te Mesia mei Galilea mai ra?