A Iehova e Atua no te Au Koreromotu

“E papau ei au i te ngutuare o Iseraela, e i te ngutuare o Iuda, i tetai koreromotu ou.”​—IEREMIA 31:31.

1, 2. (a) Eaa te akono anga ta Iesu ra i akamata i te po o Nisana 14, 33 T.N.? (e) Eaa te koreromotu ta Iesu i taiku i te tuanga ma tona matenga ra?

I TE po o Nisana 14, 33 T.N., kua akono a Iesu i te Pasa ma tana au apotetoro e 12. I te mea kua kite aia e ko te reira tona kaikai anga openga ma ratou katoa ra e kare e roaia ka mate atu ei aia i nga rima o tona au enemi ra, kua akono a Iesu i taua atianga ra kia akataka i te au tumu puapinga maata e manganui ki tana au pipi piri vaitata kiaia.​—Ioane 13:1–​17:26.

² No taua tuatau ra, i muri ake i te akaateaanga a Iuda Ikariota, kua oronga maira Iesu i te oroa okotai ua no te akonoanga mataiti tei akaueia mai no te au Kerititiano​—koia te Akamaara Anga i tona matenga. Te tuatua ra te tataanga: “E te kaikai ra ratou, kua rave iorā Iesu i te manga, e kua akameitaki atura, vavaʼi iora, tuku atura ki te au pipi, na ko atura, Ka rave, ka kai; ko toku kopapa teia. Kua rave iora aia i te kapu, akameitaki atura, tuku atura kia ratou ra, na ko atura, Ka inu na kotou ravarai; Ko toku ïa toto teia, no te koreromotu ou ra, tei akamaringiia no te tangata e manganui, kia matara te ara.” (Mataio 26:26-28) Kua umuumuia te au pipi a Iesu kia akamaaraara i tona matenga na roto i tetai tu mama ua, e te tapu mou oki. E kua taiku atura Iesu i tetai koreromotu tei kapitiia atura ma tona matenga. I te tataanga ia Luka ra, kua tapaia te reira “ko te koreromotu ou.”​—Luka 22:20, NW.

3. Eaa te au uianga te uiia ra no te koreromotu ou ra?

³ Eaa te koreromotu ou? Me ko te koreromotu ou ia, ka riro ainei te aite anga e e koreromotu taito tetai? Te piri atura ainei etai atu koreromotu ki te reira? Ko teia etai uianga puapinga maata no te mea kua tuatua a Iesu e ko te toto o te koreromotu ka akamaringiia “kia matara te ara.” Te umuumu maataia ra taua akakoreanga ara no tatou ravarai.​—Roma 3:23.

Tetai Koreromotu ma Aberahama Ra

4. Eaa te taputou taito te tauturu maira ia tatou kia kite meitaki i te koreromotu ou ra?

⁴ E kite meitaki ei i te koreromotu ou, ka tau tatou kia oki ki muri e vaitata i te 2,000 mataiti i mua ake i ta Iesu angaanga orometua i te enua nei ki te tuatau i aere atu ei a Tera e tona ngutuare tangata​—kapiti katoa a Aberama (koia Aberahama, i muri iora) e te vaine a Aberama, ko Sarai (koia Sara, i muri iora)​—mei Ura apinganui o te Kaledea ra ki Harana i te apatokerau o Mesopotamia. Kua noo ratou ki reira tae roa ki te matenga o Tera. I reira, i ta Iehova ra akauenga, kua aere atura Aberahama e 75 ra mataiti ki tetai pae o te Kauvai Eupharati e kua aere atu ki te opunga apatonga ki te enua o Kanaana kia noo puakapa i tetai oraanga tuitarere. (Genese 11:31–​12:1, 4, 5; Angaanga 7:2-5) I te 1943 M.T.N te reira. Ia Aberahama te vaira i Harana, kua tuatua a Iehova kiaia: “E akariro oki au ia koe ei iti-tangata maata, e ka akameitaki au ia koe, e akamaata atu au i to ingoa; e ka riro koe ei meitaki. E ko te aronga e akameitaki ia koe ra, ko taku ia e akameitaki; e ko te akakino ia koe ra, ko taku ïa e taumaa: e ei ia koe e meitaki ei te au kopu-tangata katoa o te ao nei.” I muri iora, i to Aberahama aere anga ki roto ia Kanaana, kua tuatua atu a Iehova: “Ka oronga au i teianei enua no toou ra uanga.”​—Genese 12:2, 3, 7.

5. Te kapitiia ra te taputou a Iehova kia Aberahama ki teea totou tuatua enua ra?

⁵ Kua piri atu te taputou kia Aberahama ra ki tetai atu o ta Iehova ra au taputou. E tika, kua akariro te reira ia Aberahama ei tetai taviri maata i te tuatua enua tangata nei, ei tetai kapiti anga ki te akatupu anga o te totou mua tei tataia ra. I muri io i to Adamu raua ko Eva ara anga i te kainga i Edene ra, kua akakite atura Iehova i te akavaanga ki runga ia raua tokorua ra, e i taua atianga rai, kua tuatua atu aia kia Satani, tei akavare ra ia Eva, i te na ko anga: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Genese 3:15) Kua akakite ta Iehova ra koreromotu ma Aberahama e ko te Uanga te na roto maira iaia te takore takiri anga i te au angaanga a Satani ka mama mai no roto i te kopu o taua pateriareka ra.

6. (a) Na roto iaai ta Iehova taputou kia Aberahama ra e akatupuiaʼi? (e) Eaa te koreromotu kia Aberahama ra?

⁶ I te mea te piri atura ta Iehova taputou ki tetai uanga, kua umuumuia tetai tamaiti na Aberahama e na roto mai ei iaia taua Uanga ra. Inara kua tupu atu raua ko Sara kia ruaine e te vaira kare e tamaiti. Inara, i te openga, kua akameitaki a Iehova ia raua, na te akaoraanga temeio i to raua mana kia anau mai, e kua anau maira Sara i tetai tamaiti na Aberahama, koia Isaaka, na te reira i vai ora mai ei taua taputou ra no tetai uanga. (Genese 17:15-17; 21:1-7) I etai mataiti i muri iora, i muri ake i te timata angaia to Aberahama akarongo​—tae roa ki te tu timata anga i tona akatika anga kia oronga i tana tamaiti akaperepere, ia Isaaka, ei atinga​—kua tuatua akaou a Iehova i tana taputou kia Aberahama: “E akameitaki roa au ia koe na, e akamaata rava au i toou uanga, mei te etu o te rangi ra, e mei te onetea i taatai ra; e ka rauka te ngutupa oire o to ratou au enemi i toou ra uanga; E ka meitaki te pa enua katoa o te ao nei i toou ra uanga; ko koe i akarongo mai i toku reo nei.” (Genese 22:15-18) E putuputu teianei taputou tei akatotoaia maira te tapaia ko te koreromotu kia Aberahama, e ko te koreromotu ou o muri maira te piri vaitata ra ia ki te reira.

7. I akapeea te uanga o Aberahama i te akamata te tupu anga te numero, e eaa te au turanga tei taki atu ia ratou kia noo ki Aiphiti?

⁷ I muri maira, kua anau mai nga tamaroa maanga na Isaaka, ko Esau raua ko Iakoba. Kua iki a Iehova ia Iakoba ei tupuna no te Uanga Taputouia ra. (Genese 28:10-15; Roma 9:10-13) E 12 a Iakoba tamaroa. Kua taka meitaki e, ko te reira te tuatau no te uanga o Aberahama ra kia akamata te tupu anga kia maata. I te riro anga kia pakari mai te au tamaroa a Iakoba ra, e manganui o ratou ra e au pamiri ta ratou uaorai, kua riro na te onge ratou katoatoa i aere atu ei ki Aiphiti te ngai, na te arataki anga tu-Atua, kua teateamamao mai te tamaiti a Iakoba ko Iosepha ra i te aerenga. (Genese 45:5-13; 46:26, 27) I muri ake i etai mataiti tokoiti ua, kua meitaki mai taua onge kai ra i Kanaana. Inara kua noo atu te pamiri a Iakobo ki Aiphiti​—i te akamata anga ei manuiri inara i muri akera ei au tuikaa. No te tae anga ki te 1513 M.T.N., e 430 mataiti i muri ake i to Aberahama ra aere anga ki tetai pae o te Eupharati, i arataki atu ei a Mose i te au uanga o Iakoba ki vao i Aiphiti ki te tu rangatira ra. (Exodo 1:8-14; 12:40, 41; Galatia 3:16, 17) I teianei kua oronga a Iehova ra i te manako anga taka ke ki tana koreromotu ma Aberahama ra.​—Exodo 2:24; 6:2-5.

“Te Koreromotu Taito”

8. Eaa ta Iehova ra i papau ma te au uanga o Iakoba i Sinai ra, e eaa ta te reira rave anga ma te koreromotu kia Aberahama ra?

⁸ I te aere atu anga a Iakoba e tana au tamaroa ki Aiphiti ko tetai pamiri akatotoaia ratou, inara kua akaruke atu to ratou au uanga ia Aiphiti ei tetai pupu maata no te au kopu tini ra. (Exodo 1:5-7; 12:37, 38) I mua ake i ta Iehova ra apai mai anga ia ratou ki Kanaana, kua taki atu aia ia ratou na te pae apatonga ki raro ake i tetai maunga tei tapaia ra ko Horeba (me kare, Sinai) i Arapia ra. I reira, kua papau aia i tetai koreromotu ma ratou katoa ra. Kua tapaia teia ko “te koreromotu taito” me akapiriia atu ki “te koreromotu ou” ra. (2 Korinetia 3:14) Na te koreromotu taito ra, kua rave a Iehova na tetai tu akatutu anga i te akatupu anga i tana koreromotu kia Aberahama ra.

9. (a) Eaa nga apinga e a ta Iehova i taputou na roto i te koreromotu kia Aberahama ra? (e) Eaa etai atu manakonako anga ta te koreromotu a Iehova ra ma to Iseraela i akatuera mai, e na runga i teea turanga?

⁹ Kua akataka atura Iehova ki to Iseraela i te au tumu o teia koreromotu: “Kia akarongo tikai kotou i toku reo, e kia akono i taku ra koreromotu, ka riro ïa kotou ei apinga akaperepere maata naku, i te au tangata ravarai ra: noku uaorai oki te ao katoa nei: E riro rai kotou ei basileia taunga naku, e ei iti tangata tapu.” (Exodo 19:5, 6) I taputou a Iehova e ko te uanga o Aberahama (1) ka riro ei tetai iti tangata maata, (2) ka autu ki rungao i to ratou au enemi, (3) ka riro ia ratou te enua o Kanaana, e te (4) ka riro ei tetai tumu anga no te akameitakianga i to te pa enua ravarai. I teianei kua akakite aia e ka akatuangaia ratou uaorai i teia au akameitakianga ei iti tangata taka ke, koia Iseraela ra, “ei basileia taunga [nana], e ei iti-tangata tapu,” me ka akono ratou i tana au akauenga. I akatika ainei to Iseraela kia tomo atu ki roto i teianei koreromotu? Kua tuatua tai ua maira ratou: “Te au tuatua ravarai ta Iehova i tuatua, ka rave ïa matou.”​—Exodo 19:8.

10. Akapeea ta Iehova ra akapapa anga i to Iseraela ra ei tetai iti tangata, e eaa tana i manakonako mai ia ratou?

¹⁰ No reira, kua akanoonoo a Iehova i to Iseraela ei tetai iti tangata. Kua oronga atu aia i te au ture akapapaanga i ta ratou akamori anga e te ora anga ei iti tangata. Kua oronga katoa aia i te tapenakara no ratou (i muri iora, ko tetai iero i Ierusalema) e tetai kautaunga ei akono i te tavini anga tapu i te tapenakara ra. Ko te mouanga i te koreromotu e akarongoanga i te au ture a Iehova ra e, maata atu oki, kia akamori iaia anake ra. Ko te mea mua o te Ture Ngauru ra ko te reira ra te akatumu anga o taua au ture ra koia oki: “Ko au toou Atua ra ko Iehova, ko tei arataki mai ia koe mei te enua maira mei Aiphiti, mei te ngutuare i tavini ei ra. Auraka rava toou ei atua ke atu iaku nei.”​—Exodo 20:2, 3.

Au Akameitakianga na Roto i te Ture Koreromotu

11, 12. Na roto i teea au tu te akatupu angaia te au taputou i te koreromotu taito ra ki to Iseraela?

¹¹ I akatupuia ainei te au taputou i te Ture koreromotu ki to Iseraela ra? I riro ainei to Iseraela ei “tetai iti-tangata tapu”? Ei au uanga no Adamu ra, e aronga ara to Iseraela. (Roma 5:12) Inara, i raro ake i te Ture, kua orongaia te au atinga ei tapoki i ta ratou ara. No runga i te au atinga tei orongaia ra i te Ra Tapokiangaara mataiti, kua tuatua a Iehova: “Ei te reira oki rā ka apai ei te taunga maata i te tapokiangaara na kotou, e tamā ia kotou i ta kotou au ara katoa, kia mā kotou ki mua i te aroaro o Iehova.” (Levitiku 16:30) No reira, me tiratiratu ratou, kua riro to Iseraela ei iti tangata tapu, tei tamaia no te tavini anga ia Iehova. Inara tei runga teia tu ma i to ratou akonoanga i te Ture e te orongaanga tamou marie i te au atinga ra.

¹² I riro ainei to Iseraela “ei basileia taunga”? Mei te akamata anga maira, kua riro ia ei tetai patireia, ma Iehova ei Ariki i te rangi ra. (Isaia 33:22) Pera katoa oki, kua kapiti te Ture koreromotu i te au apinga no tetai taoonga ariki tangata, kia riro i muri ake na te au ariki tei tutara ki Ierusalema ra e komono ia Iehova. (Deuteronomi 17:14-18) Inara i riro ainei to Iseraela ei tetai patireia taunga? E, kautaunga tona tei rave ra i te tavini anga tapu i te tapenakara. Ko te tapenakara (i muri akera, ko te iero) ko te ngai ia no te akamori anga ma no te ngati Iseraela e te aronga kare i te ngati Iseraela katoa oki. E ko taua iti tangata ra te aerenga okotai mai no te tuatua mou akakiteia ki te au tangata katoa ra. (2 Paraleipomeno 6:32, 33; Roma 3:1, 2) Pouroa te au ngati Iseraela tiratiratu ra, kare ko te kautaunga ngati Levi anake ra, e “kite” anake no Iehova. Ko to Iseraela “te tavini,” o Iehova ra tei akapapaia kia ‘akameitaki mai iaia.’ (Isaia 43:10, 21) E manganui te au tangata ke akaaka ra i kite i to Iehova mana ki rungao i tona au tangata e kua inangaro i te akamori anga ma. Kua riro ratou ei poroteraita. (Iosua 2:9-13) Inara e okotai ua kopu tei tavini tikai ei kautaunga akatainuia.

Au Poroteraita i Iseraela Ra

13, 14. (a) Eaa ra i raukaʼi kia tuatuaia e kare te au poroteraita ra i te aronga kapitiia ki roto i te Ture koreromotu ra? (e) I akapeea te au poroteraita ra i riro ei ki raro ake i te Ture koreromotu?

¹³ Eaa te turanga o taua aronga poroteraita ra? I ta Iehova ra akanoo anga i tana koreromotu, ko to Iseraela anake ra tei piri atu ki roto; ko te aronga “tangata ke ke katoa e manganui i te iro katoa anga,” noatu rai i reira ratou, kare i tapaia ei tuanga angaanga. (Exodo 12:38; 19:3, 7, 8) Kare ta ratou au tama mua i kapitiia atu ki roto i te tatau angaia te aronga i okoia no te au tama mua o Iseraela ra. (Numero 3:44-51) I te au raungauru mataiti i muri akera i te kotingaia te enua o Kanaana i rotopu i te au kopu ngati Iseraela ra; kare e ngai i akatakaia no te aronga akarongo kare ra i te ngati Iseraela. (Genese 12:7; Iosua 13:1-14) No teaa ra? No te mea kare te Ture koreromotu ra i akapapaia ma te aronga poroteraita ra. Inara kua peritomeia te au tane poroteraita kia tau ki ta te Ture ra. Kua akono ratou i te au ikuiku anga a te reira, e kua puapingaia ratou mei te au apinga no te reira mai. Kua riro te au poroteraita pera katoa te au ngati Iseraela ki raro ake i te Ture koreromotu ra.​—Exodo 12:48, 49; Numero 15:14-16; Roma 3:19.

¹⁴ Ei akatauanga, me ka mate akakoro koreia tetai e tetai poroteraita ra, ka rauka iaia, mei tetai ngati Iseraela rai, kia oro ki tetai oire akapuanga ra. (Numero 35:15, 22-25; Iosua 20:9) I te Ra Tapokiangaara kua orongaia te atinga “na te uipaanga Iseraela katoa ra.” Kua akono te aronga poroteraita ra, ei tuanga no te uipaanga i te au ravenga e kua tapokiia e taua atinga ra. (Levitiku 16:7-10, 15, 17, 29; Deuteronomi 23:7, 8) No te piri vaitata te taokotai anga te aronga poroteraita ra ma to Iseraela i raro ake i te Ture ra e ia Penetekote 33 T.N. i te taangaanga angaia ‘te taviri [mua] o te basileia’ no te au ngati Iuda ra, kua puapinga katoaia te au poroteraita ra. Ei tetai tupu anga, ko “Nikolao, e pipi akonoanga ngati Iuda aia no Anetioka,” kua riro ei Kerititiano e i roto aia i te “toko itu puke tangata rongo meitaki,” tei akataoongaia kia akono i te au mea umuumuia no te putuputuanga i Ierusalema ra.​—Mataio 16:19; Angaanga 2:5-10; 6:3-6; 8:26-39.

Kua Akameitaki Iehova i te Uanga o Aberahama

15, 16. Akapeea te akatupu angaia ta Iehova ra koreromotu kia Aberahama na roto i tetai tu akatutuia i raro ake i te Ture koreromotu ra?

¹⁵ Ma te akapapa anga i te au uanga o Aberahama ra ei tetai iti tangata i raro ake i te Ture, kua akameitaki a Iehova ia ratou kia tau ki tana taputou ki te pateriareka ra. I te 1473 M.T.N., kua taki atu a Iosua, koia te mono ia Mose ra, ia Iseraela ki roto ia Kanaana. Ko te veeveeanga i te enua ki te au kopu ra kua akatupu i ta Iehova taputou kia oronga i te enua ki te uanga o Aberahama ra. I te tuatau tiratiratu ra Iseraela, kua akatupu a Iehova i tana taputou kia oronga kia ratou i te autu anga ki rungao i to ratou au enemi. Kua riro teianei ei tika tikai i te tuatau i tutaraʼi te Ariki ko Davida. Kia tae ki te tuatau o Solomona tamaiti a Davida ra, kua akatupuia te tuanga toru o te koreromotu kia Aberahama ra. “Ko Iuda, e ko Iseraela, e aronga maata ïa, mei te one taatai ra ïa i te maata, i te kai anga e te inu anga, e te akarekareka anga ia ratou.”​—1 Ariki 4:20.

¹⁶ Ka akapeea, ra, te au etene te akameitaki anga ia ratou uaorai na roto ia Iseraela, koia te uanga o Aberahama ra? Mei tei taikuia ra, e iti tangata takake a Iseraela no Iehova, tona komono i roto i to te au etene ra. I mua poto ake i to Iseraela ra aerenga ki roto ia Kanaana, kua tuatua a Mose: “Ka rekareka, e te au etene, e tona katoa au tangata.” (Deuteronomi 32:43) E manganui te au tangata ke tei akarongo. E aronga “tangata ke ke katoa e manganui i te iro katoa anga” kua aru ke ana i to Iseraela ki vao ia Aiphiti, kua kite i to Iehova mana i te metepara ra, e kua akarongo i ta Mose ra patianga kia rekareka. (Exodo 12:37, 38) I muri akera kua akaipoipo te vaine Moabi ra ko Ruta i te ngati Iseraela ra ko Boaza e kua riro ei tetai tupuna vaine no te Mesia ra. (Ruta 4:13-22) A Iehonadaba ngati Keni e tona au uanga e Ebede-meleka no Etiopia ra kua akataka ia ratou uaorai na te akono anga i te au kaveinga tika ra inara e manganui te ngati Iseraela kopapa ra tei tiratiratu kore. (2 Ariki 10:15-17; Ieremia 35:1-19; 38:7-13) I raro ake i te Patireia Peresia ra, e manganui te au tangata ke tei riro mai ei au poroteraita e kua tamaki kapiti atu ma to Iseraela i tona au enemi ra.​—Esetera 8:17.

Umuumuia Tetai Koreromotu Ou

17. (a) Eaa ra a Iehova i kopae ke ei i nga patireia apatokerau e te apatonga o Iseraela ra? (e) Eaa tei taki atu ki te kopae anga takiri i te au ngati Iuda ra?

¹⁷ Inara, e raukaʼi te akatupu takiri i te taputou a te Atua ra ka anoanoia te iti tangata taka ke o te Atua ra kia tiratiratu. Kare ra ia i pera. E tika, e au ngati Iseraela akarongo meitaki etai. (Ebera 11:32–​12:1) Inara, i te au atianga e manganui kua ariu atu taua iti tangata ra ki te au atua peikani ra, ma te manakonako anga i te au puapinga pae kopapa. (Ieremia 34:8-16; 44:15-18) Kua akono tarevake etai aronga tataki tai i te Ture me kare kua manako kore ua i te reira. (Nehemia 5:1-5; Isaia 59:2-8; Malaki 1:12-14) I muri ake i to Solomona matenga, kua riro a Iseraela kia akatakaia ei patireia apatonga e te apatokerau. I te akakite papu anga te patireia o te apatokerau i te tu meameaau takiri kua akakite a Iehova e: “No te mea kua kopae koe i te kite, e kopae katoa au ia koe, auraka koe ei taunga naku nei.” (Hosea 4:6) Kua akautunga ketaketa katoa ia oki te patireia apatonga no tona pikikaaanga ki te koreromotu ra. (Ieremia 5:29-31) I to te au ngati Iuda ra kopae anga ia Iesu ei te Mesia, kua kopae katoa oki a Iehova ia ratou ra. (Angaanga 3:13-15; Roma 9:31–​10:4) I te openga, kua rave a Iehova i tetai akanoonoo anga ou kia akaaere i te tupu anga takiri no te koreromotu kia Aberahama ra.​—Roma 3:20.

18, 19. Eaa te akanoonoo anga ou ta Iehova ra i akono kia raukaʼi te akatupu anga kia oti takiri te koreromotu kia Aberahama ra?

¹⁸ Te akanoonoo anga ou ko te koreromotu ou ia. Kua totou mai a Iehova i teia i tana tuatua anga: “I na, e tae maira te au rā, te tuatua mairā Iehova, e papau ei au i te ngutuare o Iseraela, e i te ngutuare o Iuda, i tetai koreromotu ou: . . . Teia ra te koreromotu taku e papau i te ngutuare o Iseraela, i muri i te reira au rā, te tuatua mairā Iehova, e tuku au i taku ture ki roto ia ratou, e tataia e au ki runga i to ratou ngakau; e e riro au ei Atua no ratou, e riro oki ratou ei tangata noku.”​—Ieremia 31:31-33.

¹⁹ Ko teia te koreromotu ou ta Iesu i taiku ra ia Nisana 14, 33 T.N. I taua atianga ra, kua akakite aia e ko taua koreromotu taputouia ra kua vaitata i te akaotiia i rotopu i tana au pipi e Iehova, ma Iesu oki ei rotopu. (1 Korinetia 11:25; 1 Timoteo 2:5; Ebera 12:24) Na roto i teia koreromotu ou, ka rauka kia maata atu te kaka e te tinamou te tupu anga ta Iehova ra taputou kia Aberahama, mei ta tatou ka kite i te atikara te aru maira.

Ka Rauka Ainei ia Koe te Akataka?

◻ Eaa ta Iehova i taputou i te koreromotu kia Aberahama ra?

◻ Akapeea ta Iehova akono anga ki te Iseraela kopapa ra i te tupu anga te koreromotu kia Aberahama ra?

◻ Akapeea te au poroteraita ra i puapingaiaʼi mei te koreromotu taito ra?

◻ Eaa ra i umuumuiaʼi tetai koreromotu ou?

[Tutu i te kapi 9]

Na roto i te Ture koreromotu, kua akono a Iehova i tetai akatupu anga akamata anga i te koreromotu kia Aberahama ra