Kia Maroiroi To Kotou Rima
“Kia maroiroi to kotou rima, e tei akarongo i teianei au rā i teianei au tuatua i te vaa o te au peroveta.”—ZEKARIA 8:9.
1, 2. Eaa ra te au puka a Hagai raua ko Zekaria i tau ei kia akamanako tatou?
KUA tataia te au totou a Hagai raua ko Zekaria mei etai 2,500 mataiti i topa, inara e puapinga tikai to te reira ki toou oraanga. Te au tataanga Pipiria tei kiteaia i roto i teia nga puka kare i te tuatua enua ua. E tuanga te reira no “te au tuatua ravarai oki i tataia i muatangana, . . . kia kite tatou.” (Roma 15:4) Te maataanga i ta tatou e tatau ra i roto i te reira te akakeu ra ia tatou i te akamanako i te au turanga tikai tei tupu mai mei te akanooia anga te Patireia i te rangi i te 1914.
2 I te tou anga ki te au tupuanga e te au turanga tei kiteaia e to te Atua iti tangata i te au tuatau roa i topa, kua karanga te apotetoro ko Paulo: “Rokoia iora ratou e taua au mea katoa ra, ei akaraanga: e ei ako mai oki ia tatou, i te aronga i rokoia mai i te openga o te au tuatau nei, i tataiaʼi.” (1 Korinetia 10:11) No reira penei ka manako mai koe, ‘Eaa te puapinga o te nga puka a Hagai raua ko Zekaria ki to tatou tuatau?’
3. Eaa te apinga ta Hagai raua ko Zekaria i akamou ki runga?
3 Mei ta te atikara i mua atu i akakite mai, te o maira ki te au totou a Hagai raua ko Zekaria te tuatau i oki atu ei te ngati Iuda ki to ratou enua orongaia e te Atua i muri ake i to ratou akarangatira angaia mei te tuikaa i Babulonia. Kua oronga nga peroveta e rua i te akamanakoanga ki te patu akaou anga i te iero. Kua tuku te ngati Iuda i te tango o te iero ki raro i te 536 M.T.N. Noatu e kua akamou etai ngati Iuda ruaine ki runga i te tuatau i topa, i te katoaanga e maata te “maeva nui i te rekareka.” Inara, te tikaanga, e apinga umere roa atu tetai tei tupu i to tatou tuatau nei. Akapeea ra?—Ezera 3:3-13.
4. Eaa tei tupu i muri poto ua mai i te Tamaki I o te Ao?
4 I muri ua mai i te Tamaki I o te Ao, kua akarangatiraia te aronga akatainuia o Iehova mei te tuikaa ki Babulonia Maata. Kua akatutu mai te reira i tetai akakiteanga maata o to Iehova turuanga. I mua atu ana i te akaraanga kua tapu te au arataki akonoanga e to ratou au taeake poritiki i te angaanga tutuanga e te apiianga a te Aronga Apiipii Pipiria. (Ezera 4:8, 13, 21-24) Inara, kua akaatea ke te Atua ko Iehova i te au araianga ki te angaanga tutuanga e te akariro anga i te au tangata ei pipi. I te au ngauru mataiti mei te 1919, kua tupu ruperupe te angaanga Patireia e kare i rauka ana i tetai apinga i te tapu i to te reira tereanga ki mua.
5, 6. Ki teea akatupuanga maata ta Zekaria 4:7 i tou atu?
5 Papu ia tatou e ka aere ua atu rai te tutuanga e te apiianga tei raveia e te au tavini akarongo o Iehova i to tatou tuatau ma tana turuanga. Ia Zekaria 4:7, ka tatau tatou: “E nana e apai mai i te toka tiavā ma te maeva, Ko te aroa, te aroa, tei te reira.” Ki teea akatupuanga maata i to tatou tuatau nei ta teia e tou atura?
6 Te tou ra a Zekaria 4:7 ki te tuatau e apainaia ai ei te akamorianga mou o te Atu Ngateitei ki to te reira tu akaotianga meitaki i roto i te au paepae enua o tona iero pae vaerua. Ko taua iero ko ta Iehova akanoonooanga no te akavaitata anga kiaia i roto i te akamorianga tei akatumuia ki runga i te atinga tarangaara o Iesu Karaiti. E tikai, i vai ana te iero maata pae vaerua mei te anere mataiti mua T.N. Inara, ko te akamorianga mou i roto i to te reira paepae enua te tiaki nei kia akaoti meitakiia. E au mirioni ua atu aronga akamori te tavini ra i teianei i roto i te paepae enua o te iero pae vaerua. Ko teia aronga e te au urupu tangata akatuakaouia ka akaokiia mai ki te tu apa kore i te tuatau o te Tutara Anga Tauatini Mataiti o Iesu Karaiti. I te openga o te tauatini mataiti, ko te aronga akamori mou anake ua o te Atua te ka toe mai ki runga i te enua tamaia.
7. Eaa ta Iesu tuanga angaanga no runga i te apai anga mai te akamorianga mou ki to te reira tu akaotianga meitaki i to tatou tuatau, e eaa ta tatou ka kite mai ei akamaroiroianga?
7 Te reira te Kavana ko Zerubabela raua ko te Taunga Maata ko Iosua tei kite i te akaotianga o te iero i te 515 M.T.N. Kua totou a Zekaria 6:12, 13 i ta Iesu tuanga angaanga aiteite i te apai anga mai te akamorianga mou ki to te reira tu akaotianga meitaki: “Te na ko mairā Iehova Sabaota ra, i te tuatua anga mai; I na, ko taua tangata ra, ko te rara tona ra ingoa, e tupu maira aia no roto i tona ngai; e nana e patu i te nao o Iehova: . . . e nana uaorai e apai i te kakā; e ka noo aia ma te mana ki runga i tona terono, e ei taunga aia ki runga i tona terono.” I te akamanako anga i te tika e ko Iesu, tei runga i te rangi ra e tei akatupu i te uanga ariki o Davida kia rara mai, te turu ra i te angaanga Patireia i te iero pae vaerua, i toou manako ka rauka ainei i tetai tangata i te arai i to te reira tereanga ki mua? Kare rava! Kare ainei teia e akamaroiroi ia tatou kia aere ua atu rai ki mua i roto i ta tatou angaanga orometua, auraka e akatapae keia e te au manamanata i te au ra ravarai?
Au Mea Mua
8. Eaa tatou ka akariro ei i te angaanga i te iero pae vaerua e ko te apinga mua i roto i to tatou oraanga?
8 E rauka ai ta Iehova turuanga e te akameitakianga, kia akariro tatou i te angaanga i te iero pae vaerua e ko te apinga mua i roto i to tatou oraanga. Kare mei te ngati Iuda rai tei karanga e, “Kare i tae te tuatau,” kia maara tatou e te noo nei tatou i roto i “taua tuatau openga ra.” (Hagai 1:2; 2 Timoteo 3:1) Kua totou a Iesu e ka tutu aere tana au pipi tiratiratu i te tuatua meitaki no te Patireia e ka akariro i te tangata ei au pipi. Kia matakite tatou e auraka e akaruke i ta tatou angaanga akaperepere. Ko te angaanga tutuanga e te apiianga tei tapu poto uaia e te patoianga a te ao nei kua akamata akaouia i te 1919, inara kare rai i akaoti meitakiia ake. Inara, kia papuia koe, e ka tupu tikai te reira!
9, 10. Tei runga i teaa ta te Atua akameitakianga, e eaa te aiteanga kia tatou?
9 Te maata atu i ta tatou tamou ua atu rai i te angaanga maroiroi, ka akameitakiia tatou—ei iti tangata e ei aronga tataki tai. E akara ana i ta Iehova taputou e rauka ai ia tatou te akapapuanga. I te oki roa atu anga te ngati Iuda ma te akamori ngakau katoa e kua akamata maroiroi akaou i ta ratou angaanga i runga i te tango o te iero, kua karanga a Iehova: “Mei teianei rā ra au e akameitaki atu ei ia kotou.” (Hagai 2:19) Ka rekareka ratou i te rauka katoa anga tana akaperepereanga. I teianei e akamanako i te au akameitakianga tei kiteaia i roto i ta te Atua taputou: “E tupu oki te ua, e ua mai te vine i tona ua, e tuku mai oki te rangi i te au; e i te toenga o teianei au tangata, taku ïa e o atu i teia katoa nei au mea.”—Zekaria 8:9-13.
10 Mei ia Iehova rai i te akameitaki anga i taua aronga ngati Iuda i te pae vaerua e te pae materia, ka akameitaki katoa aia ia tatou ia tatou e rave maroiroi ra, e ma te ngakau mataora, i te angaanga tana i tuku mai kia tatou. Te o maira i roto i teia au akameitakianga te au i rotopu ia tatou uaorai, te tinamou, te puapinga, e te tupuanga pae vaerua. Inara, ka papu ia koe ta te Atua akameitakianga tamou tei runga te reira i ta tatou rave anga i te angaanga i te iero pae vaerua na roto i te mataara e inangaro ra a Iehova kia raveia te reira.
11. Akapeea tatou i te akara matatio anga ia tatou uaorai?
11 Ko teia te taime i te ‘akamaaraara i to tatou na au aerenga.’ (Hagai 1:5, 7) Kia tuku taime tatou i te akara matatio i ta tatou au mea mua i roto i te oraanga. Ta Iehova akameitakianga i runga ia tatou i teianei tei runga te maata i ta tatou akakaka anga i tona ingoa e te neke anga ki mua i roto i ta tatou angaanga i tona iero pae vaerua. Penei ka ui koe ia koe uaorai: ‘Kua taui ainei taku au apinga mua? Akapeea toku maroiroi no Iehova, no tana tuatua mou, e tana angaanga me akaaiteia atu ki te maroiroi i rauka iaku i toku papetitoia anga? Te akatuke ra ainei te inangaro i roto i tetai oraanga meitaki tikai i te akamanakoanga taku e oronga ra kia Iehova e ki tona Patireia? Te tu mataku i te tangata—te manakoanga eaa ta tetai ka manako mai—te tapu ra ainei iaku ki muri?’—Apokalupo 2:2-4.
12. Eaa te turanga i rotopu i te ngati Iuda tei akakiteia mai ia Hagai 1:6, 9?
12 Kare tatou e inangaro e kia tapu te Atua i tana akameitakianga nui no ta tatou akaruke anga i te angaanga akakaka anga i tona ingoa. E akamaara ana e i muri ake i tetai akamataanga meitaki, ko te ngati Iuda tei akaoraia “te oro ra te tangata ravarai ki te are nona uaorai,” mei ta Hagai 1:9 i ripoti maira. Kua varenga ua ratou ki to ratou uaorai au inangaro e te tu oraanga i te au ra tataki tai. Tei tupu, “e iti ra tei apaiia mai,” e meangiti ua te kai meitaki, te vai, e te kakau maana. (Hagai 1:6) Kua akaatea a Iehova i tana akameitakianga. E apiianga ainei tetai i roto i teia no tatou?
13, 14. Akapeea tatou i te akono anga i te apii tei kiteaia mei ia Hagai 1:6, 9, e eaa ra teia i puapinga ai?
13 Kare ainei koe e akatika e kia rekareka tamou ua atu rai te au akameitakianga tu-Atua, ka tau tatou kia kopae i te kimi anga i te au apinga no tatou uaorai i te akaruke anga i ta Iehova akamorianga? Ko te reira ia noatu te angaanga me kore te inangaro e akaanga ke ra i to tatou manako e ko te aruaruanga i te apinga nui, te au parani kia ona vave i roto i tetai tuatau poto ua, te au parani no te apii teitei kia rauka tetai angaanga meitaki tikai i roto i teia akatereanga, me kore te au porokaramu i te akatupuanga i to tetai uaorai au anoano.
14 Penei kare taua au apinga uaorai e tarevake ana. Inara, kare ainei koe e kite ana e mei te turanga no te ora mutu kore, e “angaanga mate” tikai taua au apinga ra? (Ebera 9:14) Na roto i teea tu? E apinga mate te reira i te pae vaerua, pauna kore, e te puapinga kore. Me maro ua atu rai tetai i te reira, penei ka taki atu taua au angaanga ki te mate pae vaerua. Kua tupu te reira ki tetai o te au Kerititiano akatainuia i te tuatau o te au apotetoro. (Philipi 3:17-19) Kua tupu te reira ki tetai i to tatou tuatau. Penei kua kite koe i tetai tei akaariu ke marie ua ia ratou mei te au angaanga Kerititiano e mei te putuputuanga; i teianei kare ratou e akaari mai ana i te akakeuanga kia oki akaou mai ki ta Iehova angaanga. Te inangaro nei tatou e kia oki mai taua aronga ra kia Iehova, inara ko te tika koia oki ko te aruaru anga i te “angaanga mate” ka akatupu i te ngereanga i ta Iehova akaperepereanga e te akameitakianga. Te kite ua atura koe mei teaa te tu tangi o taua tupuanga. Te aiteanga koia oki ka ngere i te rekareka e te au ta te vaerua o te Atua e akatupu ra. E akamanako ana i te ngere te ka tupu me kare e piri mai ana ki roto i te taokotaianga taeake Kerititiano!—Galatia 1:6; 5:7, 13, 22-24.
15. Akapeea a Hagai 2:14 i te akaari anga i te tu puapinga tikai o ta tatou akamorianga?
15 E tumu manako pakari tikai teia. E akara ana mei ia Hagai 2:14 e akapeea a Iehova i te manako anga i te ngati Iuda tei akaruke i tona are akamorianga ei tupau i te auvaro anga i to ratou uaorai au are, i te tu tika tikai me kore i te tu akatutuanga. “Mei te reira katoa teianei au tangata, mei te reira oki teianei enua, ki mua iaku nei, te tuatua mairā Iehova, e mei te reira rai oki te au angaanga katoa a to ratou rima, e tei apaiia e ratou ki reira, e mea viivii ïa.” Noatu eaa te atinga meangiti ua ta te ngati Iuda kare i tae te ngakau i oronga i runga i te atarau no te tuatau poto ua i Ierusalema kare i arikiia me ka akaruke ua atu rai ratou i te akamori mou.—Ezera 3:3.
Turu Anga Akapapu Tikaiia
16. Akatumuia ki runga i te au orama tei rauka ia Zekaria, eaa te apinga tei papu i te ngati Iuda?
16 Te ngati Iuda akarongo tei angaanga i te patu akaouanga i te iero o te Atua kua akapapuia mai te turuanga tu-Atua, mei ta te Atua i akakite mai i roto i tetai putunga orama e varu tei rauka ia Zekaria. Te mea mua kua akapapu mai i te akaotianga o te iero e te tu puapinga kia Ierusalema e Iuda me rave ua atu rai te ngati Iuda ma te akarongo i te angaanga ta ratou ka rave. (Zekaria 1:8-17) Te rua o te orama kua taputou mai i te openga o te au kavamani katoatoa te patoi ra i te akamorianga mou. (Zekaria 1:18-21) Tetai atu au orama te akapapu ra i te paruruanga tu-Atua no te angaanga patuanga, te aere mai anga te au tangata ki roto mei te au pa enua e manganui ki to Iehova are akamorianga tei oti i te maani, te au e te tinamou tikai, te akaatea anga o te au araianga akaraanga maata tikai ki te angaanga tei orongaia mai e te Atua, te akaatea anga i te kino, e te akaaereanga e te turuturuanga a te au angera. (Zekaria 2:5, 11; 3:10; 4:7; 5:6-11; 6:1-8) Ka marama ua koe e ma taua au akapapuanga tikai no te turuanga tu-Atua, kua taui te aronga akarongo i to ratou tu oraanga e kua akamou i to ratou manako ki runga i te angaanga ta te Atua i akarangatira mai ia ratou kia rave.
17. I te akamanako anga i te akapapu anga tikai tei rauka ia tatou nei, eaa ta tatou ka ui kia tatou uaorai?
17 Mei te reira katoa, te akapapuanga tei ia tatou o te autuanga tikai no te akamorianga mou ka tau kia akakeu ia tatou kia angaanga e te akakeu katoa ia tatou kia akamanako pakari no runga i to Iehova are akamorianga. E ui kia koe uaorai: ‘Me te irinaki ra au e ko teia te tuatau kia rave i te angaanga no te tutu anga i te tuatua meitaki o te Patireia e te akariro anga i te au tangata ei pipi, te rotai ra ainei toku au akakoroanga e te tu oraanga ki toku irinakianga? Te akapou meitaki ra ainei au i tetai tuatau tau i te apiianga i ta te Atua Tuatua totou, te akariro anga i te reira ei manakoanga naku, e te pukapuka anga no runga i te reira ma te au taeake Kerititiano e pera katoa ma tetai atu taku ka aravei?’
18. Eaa te tu maira ki mua, kia tau kia Zekaria pene 14?
18 Kua tou atu a Zekaria ki te akapouanga o Babulonia Maata aru mai i te tamaki o Aramakito. Ka tatau tatou: “Te vai ra oki tetai rā, kua kitea e Iehova te reira, kare e aoia, e kare rai e po; e riro ra ei te aiai e māramaʼi.” Ae, ka riro to Iehova ra ei ra poiri, e te taitaia no tona au enemi i te enua nei! Inara ko te aiteanga i reira ka rauka ua i te aronga akamori tiratiratu no Iehova te marama e te akaperepereanga tamou. Te akamarama katoa maira a Zekaria e akapeea te au apinga katoatoa i roto i te ao ou e akakitekite i to Iehova tu tapu. Te akamorianga mou ua i te iero pae vaerua maata o te Atua te tu akamorianga anake ua i runga nei i te enua. (Zekaria 14:7, 16-19) E akapapuanga umere tikai! Ka kite mai tatou i te tupuanga i tei totouia e ka kite mai i te akatapuanga i to Iehova tu ngateitei. Mei teaa tikai te tu umere rava o taua ra ra kia Iehova!
Au Akameitakianga Tinamou
19, 20. Eaa koe i manako ei ia Zekaria 14:8, 9 ei akamaroiroianga?
19 Aru mai taua akatupuanga umere rava, ka kotingaia a Satani e tana au temoni ki tetai vaarua takere kore no te angaanga kore. (Apokalupo 20:1-3, 7) Ka maringi ua mai i reira te au akameitakianga i te tuatau o to Karaiti Tutara Anga e Tauatini Mataiti. Te karanga ra a Zekaria 14:8, 9: “E riro oki i taua rā ra, e taʼe atu ei te vai ora na Ierusalema atu, tetai pae ki te tai itinga, e tetai pae ki te tai opunga, ka pera ua rai i te akaū e te paroro. Ka riro oki ko Iehova te ariki ki runga i te enua katoa nei, i taua rā ra, ko Iehova anake ïa, e tona ingoa anake.”
20 “Vai ora,” me kore “tetai vai ora, e vai tae oki,” te akatutu maira i ta Iehova akanoonooanga no te ora, ka tae ua mai mei te ngai nooanga o te Patireia o te Mesia. (Apokalupo 22:1, 2, NW) Tetai urupu maata no te aronga akamori o Iehova, tei ora mai ia Aramakito, ka puapingaia na te akamataraia mai anga mei te utunga no te mate a Adamu. Noatu te aronga tei mate takere ka puapingaia na roto i tetai akatuakaouanga. Ei reira e akamata ai tetai tuanga ou no te tutara a Iehova i rungao i te enua nei. Ka kite te au tangata i te enua katoa ia Iehova e ko te Ngateitei i te Ao Katoa e Pini Ua Ake, te atua anake ua tei tau kia akamoriia.
21. Eaa to tatou akakoroanga?
21 I te akamanako katoatoa anga i ta Hagai raua ko Zekaria i totou e te au apinga katoatoa tei akatupuia, e tumu ketaketa to tatou kia neke ki mua i roto i te angaanga ta te Atua i oronga mai kia tatou kia rave i roto i te au paepae enua o tona iero pae vaerua. Kia apai roaia mai te akamorianga mou ki to te reira akaotianga meitaki, e aruaru ua atu rai tatou kia akono i te au inangaro Patireia e ko te apinga mua. Te raurau maira a Zekaria 8:9 ia tatou: “Kia maroiroi to kotou rima, e tei akarongo i teianei au rā i teianei au tuatua i te vaa o te au peroveta.”
Maara Ainei ia Koe?
• Eaa te tuatua enua aiteite tei akariro i nga puka a Hagai e Zekaria kia tau ki teia tuatau?
• Eaa te apiianga ta Hagai raua ko Zekaria e oronga maira kia tatou no runga i te au mea mua?
• Eaa ra te akamanako anga ia Hagai e Zekaria e oronga maira kia tatou i te tumu no te irinakianga no runga i te tuatau ki mua?
[Tutu i te kapi 26]
Kua akamaroiroi a Hagai raua ko Zekaria i te ngati Iuda kia angaanga ma te ngakau katoa e rauka ai i reira tetai akameitakianga
[Au Tutu i te kapi 27]
‘Te oro ra ainei koe ki te are noou uaorai?’
[Tutu i te kapi 28]
Kua taputou a Iehova i tetai akameitakianga, e kua oronga mai aia i te reira