Kia Rauka Tetai Vaerua Akaatinga Iaia Uaorai!

E TANGATA angaanga puapinga tikai a Rolf.a Te manako anga aia i te kimi angaanga tuku taime kia rauka iaia i te akamaata atu i tana angaanga orometua Kerititiano, kua taokotai viviki ua mai tona pu angaanga. No tetai au mataiti i reira kua rauka ia Rolf i te rekareka i tana angaanga painia. Inara i tetai ra kua taui te turanga angaanga. No tei riro a Rolf uaorai ei tangata mako i tana angaanga kua orongaia kiaia te taoonga ei manitia okooko no te kamupani. Kua riro mai te ngai angaanga ma tetai tutaki anga inangaroia e te au manakonakoanga meitaki no te tere atu anga ki mua. Inara, kare e rauka akaou no te angaanga tuku taime.

E vaine ta Rolf, e rua tamariki no te turu, e ka riro mai te moni tere atu ei mea puapinga. Noatu rai ra, kua patoi aia i te oronga anga e kua kimi atu i tetai akaou angaanga, ko tetai tei tuku iaia kia aravei atu i tana au apainga i te pae vaerua e i te pae o te moni. Kua poitirere te pu angaanga o Rolf i tana pauanga. Te kiteanga e noatu tetai oronga anga tutaki maata atu e puapinga kore rai te reira, kua taopenga tona pu e: “Te kite nei au e kare e rauka iaku i te tarere atu ki toou akarongo mou.”

Ae, kua rauka ia Rolf te akarongo mou. Inara kua rauka katoa iaia tetai atu tu​—te vaerua o te akaatinga iaia uaorai. I teianei ao noinoi e meangiti ua te aronga i teia vaerua. Inara ka arataki atu teia ki tetai oraanga tei puapinga e te merengo. Eaa te vaerua o te akaatinga iaia uaorai? Eaa te piri atura ki te reira? E eaa ta tatou kia rave no te tamou i te reira?

Umuumu Anga na te Puka Tapu

Te aite anga o te akaatinga ko te oronga anga me kare te tuku ua anga i tetai mea puapinga maata. Kua riro ana te akaatinga ei tuanga no te akamori anga ma mei te taime o te kite akono meitaki mua, ko Abela, te oronga anga “i te anaunga mua o tana ra anana” ei atinga ki te Atua. (Genese 4:4) Kua pera katoa rai te au tangata akarongo mei ia Noa e Iakoba. (Genese 8:20; 31:54) Te au atinga manu kua riro katoa rai te reira ei rave anga puapinga i roto i te Ture a Mose. (Levitiku 1:2-4) Inara i raro ake i te Ture kua raurauia te aronga akamori kia oronga i ta ratou mea meitaki tikai. Kare ratou i akatikaia kia oronga ua atu i tetai manu kino ei atinga. (Levitiku 22:19, 20; Deuteronomi 15:21) Te aati anga te au Iseraela akaruke i te akarongo i teia ture, kua ako te Atua ia ratou, te karanga anga e: “E kia apai kotou i te matapo ei atinga, kare ainei i te mea kino? e kia apai kotou i te pirikoki e tei makiia, kare ainei i te mea kino? e tenana ka apai atu na to tutara; e mareka ainei aia ia koe? . . . E āriki atu ainei au i te reira i to kotou na rima?”​—Malaki 1:8, 13.

Te kaveinga o te atinga te raveia ra te reira i roto i te akamori anga Kerititiano. Inara, i te mea e kua tutaki a Karaiti i te tutaki oko tikai, kare i reira te au atinga manu e ariki akaouia e te Atua. No reira, eaa te ka rauka i te au Kerititiano kia akaatinga e arikiia mai ei? Kua tata a Paulo ia Roma 12:1: “E teianei, e aku au taeake, te ako atu nei au ia kotou o te aroa o te Atua, kia tuku atu kotou i to kotou au kopapa ei atinga ora, e te tapu, e tau oki i te Atua, ko te akamori e tau ïa ia kotou.” Mei teaa te taui anga tuke! Kare ko te akaatingaanga i te au kopapa mate, e tau te au Kerititiano kia rave i tetai atinga ora ia ratou uaorai​—to ratou maroiroi, au apinga, e te au kite. Mei ia Iseraela rai, kare a Iehova i ariki ana i te au atinga “pirikoki,” me kare te ngakau rua. Te maro ra aia kia oronga tona aronga akamori i to ratou tei meitaki tikai kiaia, kia tavini ratou iaia ma to ratou ngakau, meta, manako, e te ririnui katoa.​—Mareko 12:30.

Te vaerua akaatinga iaia uaorai e maata atu te o atura i te oronga ngoie ua i tetai uaorai ki tetai akapapa anga o te au uipaanga e te angaanga i roto i te angaanga orometua Kerititiano. Teia te aite anga ko tetai tauta anga no te rave i to Atua anoano noatu eaa te ka pou. Teia te aite anga kia vai papa ua no te mamae anga i te au tu ngata e te tau kore. “Me ka inangaro tetai ua atu i te aru mai iaku,” kua karanga a Iesu e “e akaruke aia iaia uaorai e e mou i tana rakau tamamae anga e e aru tamou mai iaku.” (Mataio 16:24, NW) Kare tetai Kerititiano e tuku i te manako angaanga nana uaorai me kare ra te au akakoro anga apinganui ei mea puapinga tikai kiaia. Te akatumuia ra tona oraanga ki runga i te kimianga na mua i te Patireia o te Atua e Tana tuatua tika. (Mataio 6:33) Me ka anoanoia, kia teateamamao aia i te “rave i tana rakau tamamae,” te mamae anga i te takinga kino anga, te akama, e pera katoa te mate!

Te Au Akameitakianga te Tupu ra no te Tu Akaatinga Iaia Uaorai

Me aro atu i teia au tu tamanamanata, penei ka manako tetai e me e puapinga rai te tu akaatinga iaia uaorai no te reira. No te aronga te aroa ra i te Atua ko Iehova e te inangaro i tona ingoa kia akangateiteiia, te tika ra ia. (Mataio 22:37) Ka tamanako ana i te akaraanga tiama tei tukuia e Iesu Karaiti. I mua ua ake i tona aere anga mai ki te enua nei, kua rekareka aia i tetai taoonga teitei i te rangi ei mea vaerua. Inara, mei tana i akakakite ki tana au pipi, kua kimi aia ‘kare i tona uaorai anoano, ko te anoano ra o te Atua ko tei tono mai iaia.’ (Ioane 5:30) No reira kua puareinga ua aia i te “akiri iaia uaorai e kua rave i te tu o tetai tavini ra e kua aere mai mei te tu o te tangata ra. Tei maata atu i te reira, te kite anga aia iaia uaorai mei te tu ra o te tangata nei, kua taakaaka aia iaia uaorai e kua akarongo e tae ua atu ki tona mate anga, ae, te mate anga i runga i tetai rakau tamamae” anga.​—Philipi 2:7, 8, NW.

Kare teia au atinga nei i riro ana ei mea uua kore. No te mea kua puareinga a Iesu no te “tuku ua i tona meta no tona au taeake,” kua rauka iaia i te tutaki i te oko, te raukaanga i te au tangata tiama kore i te tu mate kore i te au rangi ra, me kare te ora mutu kore i te enua nei. (Ioane 3:16; 15:13, NW; 1 Ioane 2:2) Na te akono tiama anga i tona tu tiratiratu, kua akatupu aia i to Iehova ingoa kia akapaapaa maataia. (Maseli 27:11) No reira a Iehova i akameitaki ei iaia no tana kaveinga akaatingaanga iaia uaorai! “I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona.”​—Philipi 2:9.

E tikai, ko Iesu ta te Atua Tamaiti anau tai. E tutaki ana rai te Atua i tetai pae atu tei rave i te au atinga nona? Ae, te akaariia maira teia e te au akaraanga e manganui i te au tuatau taito ra e i teia tuatau. Ka tamanako ana i te tua Puka Tapu no runga ia Ruta te Moabi ra. Kua apii aia ia Iehova na roto i tana tane Iseraela. I tona mate anga i muri mai, kua anoanoia aia kia rave i tetai tuku anga. Ka noo ainei aia ki roto i te enua peikani tei anauia mai aia, me ka aere atu aia ki te Enua Taputouia ma tona metua vaine ongai ruaine ko Naomi? Kua iki a Ruta i te mea openga, noatu e ka akaatinga aia i te piri anga ki tona nga metua e pera katoa te manakonako anga no te akaipoipo akaou. Noatu ra, no to Ruta kite ia Iehova, e te anoano no te akamori iaia i rotopu i tona iti tangata ikiia kua akakeu te reira iaia kia noo i te pae ia Naomi.

Kua tutakiia ainei a Ruta no tona tu akaatinga iaia uaorai? E tikai! I te tuatau i aereia mai, kua apai tetai ona enua iaia ko Boaza tona ingoa ei vaine nana, e kua riro mai a Ruta ei metua vaine no te tamaiti ra ko Obeda tona ingoa, tei akariro iaia ei tupuna no Iesu Karaiti.​—Mataio 1:5, 16.

E tau rai kua rekarekaia ana te au akameitakianga e te au tavini o te Atua tei akaatinga ia ratou uaorai i teia au tuatau. Ei akaraanga, i te 1923, kua akaruke a William R. Brown, tei kitea meitakiia ko “Puka Tapu” Brown, i tona kainga i te tua Opunga Ra o Initia no te akamaata i te angaanga tutu aere i te tua Opunga Ra o Aperika. Tei aru iaia ko tana vaine e te tamaine. I te openga kua neke atu aia ki Naiteria, te ngai koi akamata ua akera te angaanga tutu aere i te uua. I te pae i te tangata Marike kerekere ko Vincent Samuels e tetai atu Kite Initia no te tua Opunga Ra ko Claude Brown tona ingoa, kua rave a “Puka Tapu” Brown i tetai apainga angaanga puapinga i te akamata anga o te angaanga i te tua Opunga Ra o Aperika.

I teia ra, kua tere atu i te 187,000 au papuritia te tavini ra i Tiera Reone, Riperia, Kana, e Naiteria, e au ngai anake tei painiaia e “Puka Tapu” Brown e tona au taeake. I mua ake i tona matenga i te 1967, kua karanga a “Puka Tapu” Brown e: “Mei teaa te rekareka i te kite i te au tane e te au vaine te akarongo anga i te tuatua meitaki o te Patireia o te Atua!” Ae, kua akameitaki maataia aia no tona kaveinga akaatinga iaia uaorai.

Te Au Mataara no te Akaatinga Anga ia Koe Uaorai

Eaa etai au mataara ka rauka ia tatou i te akaari i taua tu vaerua i teia tuatau? Ko tetai ko te piri anga atu ki te angaanga orometua mei tera are i tera are i te au epetoma ravarai. (Angaanga 20:20) Na te raveanga i teia, i muri ake tikai i tetai epetoma roiroi i te ngai angaanga, penei e kare i te mea ngoie ua. Penei ka umuumuia te ako anga e te akapapaanga meitaki. Inara e maata atu te au rekareka i tetai ua atu tu tau kore ka mamaeia. Ka rauka ia koe te akameitaki anga o te tauturuanga i tetai ua atu kia riro mai ei “leta ïa a te Mesia . . . kare ra i tataia i te inika, na te Vaerua ra o te Atua ora ra; kare ra i runga i te papa toka, i runga ra i te papa tangata ra i te ngakau.”​—2 Korinetia 3:3.

Na te rave meitaki anga i te “taporoporo marie i te tuatau,” penei mei te ngai angaanga me kare te tamataora anga, kua akamaata etai pae i to ratou tuanga o te angaanga tutu aereanga. (Ephesia 5:16) E manganui tei akanoo i ta ratou au papaanga e raukaʼi i te rekareka i te angaanga painia tauturu i te okotai taime i te mataiti. Tetai pae kua rauka ia ratou i te painia tauturu tamou me kare te tavini ei au painia tamou. Tetai atinga no te akamanako ko te nekeanga ki te au ngai tei anoano maataia atu te au papuritia o te Patireia. Te maata anga o te taime ka o mai te au taui anga tuke takiri o te tu noo anga o te oraanga, te akakoromaki anga i te tu tau kore, te akatanotanoanga ki te au peu ou e te au akono anga o te enua. Inara na te au akameitakianga o te piri anga atu kia maata ta ratou tuanga o te tauturuanga i tetai pae kia rauka te ora e akatupu i teia au atinga kia puapinga.

Ko John Cutforth tei anauia ki Kanata, kua kite tikai aia i teia. I muri ake i te karatuati anga mei te Apii Punanga Tiaki o Gileada, kua tukuia atu aia ei tangata evangeria ki Otereria. “Mei teaa te mamao o te aerenga mei te kainga!” i maara ei i te Taeake a Cutforth. “Ka oki akaou ainei au ki Kanata no te akara i toku nga metua e te au taeake i mua ake ia Aramakito? Te mataara anake ua rai e kiteaʼi e aere au.” Kua aere te Taeake a Cutforth, e kare rava aia i manako ana i te au atinga tana i rave. I te au mataiti i muri mai kua akamaata aia i te angaanga tutu aere i Papua Nu Kini, te ngai te tavini ra rai aia ma te maroiroi, te akaoti anga e 50 au mataiti i roto i te angaanga tamou. Kua tuatua ana aia e: “Te kimi ua anga i te aru i ta Iehova aratakianga, te arikianga i tetai ua atu tuku anga angaanga tana i tau no te oronga mai, te apai maira te reira i te rekareka, te mataora, te merengo anga, e te au taeake kare e rauka i te tare.”

E tikai, te au turanga mei te turanga matutu, i te pae o te moni, e te au apainga i te ngutuare penei ka kotinga te reira i taau ka rauka i te rave; kare e rauka anake pouroa i te tavini ei au painia e te au tangata evangeria. Noatu rai e tauta kia rave maata atu i tetai tuanga i roto i te au uipaanga e te tutu aere, kare e tuku ua i te au tu tau kore rikiriki, mei te reva kinokino, i te tapu ia koe. (Ebera 10:24, 25) Penei ka rauka ia koe i te akaatinga e maata atu te taime no te apii naau uaorai i te Tuatua na te Atua. Te pera ra etai au ngutuare tangata na te kotingaanga i te taime tei akapouia ki runga i te akarakaraanga i te au porokarama Tivi, penei te akanoo anga i tetai po i te epetoma “kare e akarakara Tivi” me kare ra auraka e akono i te Tivi. Na te kimianga i te tuatau no te apii naau uaorai, te “apai i te atinga ra, i te akameitaki” koia oki taau “akapaatu anga i tona ingoa” i te au uipaanga e i te angaanga tutu aere kua riro rai aia ei tu atinga meitaki tikai.​—Ebera 13:15.

E akamaara ana e tei te tuanga openga i teianei te angaanga tutu aere. Kare e roa atu ana ka apai mai te Atua i tana akava anga ki rungao i teianei ao noinoi e te merengo iaia uaorai. (Zephania 2:3) Te rave tamou i ta te Atua mareka anga, kare tatou e tau kia akonokono ua ia tatou uaorai. Kia ‘tuku atu i to tatou au kopapa ei atinga ora, e te tapu, e tau oki i te Atua.’ (Roma 12:1) Ka apai mai teia tu vaerua i te mataora maata e te merengo anga. Ka tauturu te reira ia tatou kia rauka te rekareka maata i roto i ta tatou angaanga orometua. E ka akarekareka i te ngakau o te Atua ra ko Iehova!​—Maseli 27:11.

No reira e tamou i tetai vaerua akaatinga ia koe uaorai! Auraka e tapupu i te tuku ia koe uaorai no te tauturu i tetai atu e te turu anga i te au inangaro o te Patireia. Te raurau ra a Paulo e: “Kareka te takinga-meitaki e te oronga, eiaa rava ïa e akatopaia: te pereperekavana ra oki te Atua i te reira atinga.”​—Ebera 13:16.

[Au Tataanga Rikiriki i Raro]

[Tutu i te kapi 26]

Kimianga i te tuatau no te apii naau uaorai e te tutu aere anga, penei ka anoanoia te akaatinga, inara ka riro ia ei tutaki anga

[Tutu i te kapi 28]

Kua akameitakiia a W. R. Brown e John Cutforth no ta raua kaveinga akaatinga ia raua uaorai