Te Kaka Maata Roa o to Iehova Are

“E akaki oki au i teianei are ki te kakā, te tuatua mairā Iehova Sabaota ra.”​—HAGAI 2:7.

1. Akapeea te pirianga o te vaerua tapu ki te akarongo e te angaanga oki?

I TE tutuanga mei tera are ki tera are, kua aravei atu tetai o te Au Kite o Iehova i tetai vaine akonoanga Penetekote tana tei tuatua maira, ‘E vaerua tapu to matou, inara ko kotou te aronga te rave nei i te angaanga.’ Kua akataka makoia atura kiaia, e ko tetai tei iaia ra te vaerua tapu, ko te tikaanga tikai, ka akakeuia kia rave i ta te Atua ra angaanga. Te tuatua ra a Iakobo 2:17: “Te akarongo, kare e angaanga, e mea mate ïa.” Ma te tauturu a te vaerua o Iehova ra, kua tatanu tona Au Kite i te akarongo maroiroi, e kua ‘akaki aia i tona are ma te kakā’ na te akanooanga ia ratou i te raveanga i te au angaanga tuatua tika​—te mea maata ko ‘te tutuanga i teia tuatua meitaki o te Patireia e kako rava ake te ao katoa nei; ei kite no te pa enua ravarai.’ Me oti ana teianei angaanga i te raveia kia tau ki to Iehova merengo anga, “ko te openga iora ïa i reira ra.”​—Mataio 24:14.

2. (a) Eaa te akameitakianga te ka tupu mai me ka tuku takiri ia tatou uaorai ki roto i ta Iehova ra angaanga? (e) Eaa tatou ka tau ei kia mataora no tetai ua atu akara anga “tavarevare”?

² Mei teianei au tuatua mai na Iesu, ka kite tatou e ka tika ta tatou angaanga i teia tuatau nei kia tukuia ki runga i te tutuanga ki etai ke ra i “te evangelia kakā o te Atua kakā,” tei tukuia mai kia tatou nei. (1 Timoteo 1:11) Te maata atu to tatou tuku anga mataora ia tatou uaorai ki roto i ta Iehova angaanga, ko te viviki atu ia te tae mai te openga i te akaraanga nei. Ia Habakuka 2:2, 3, ka tatau tatou i ta Iehova au tuatua: “Ka tata ana i te orama, e kia kitea uaia ki runga i te au papa, kia oro ua te tangata kia tatau ra. No te tuatau i akonoia ra taua orama nei, ei te openga ra e tuatua mai ei e kare e pikikaa; roa iti, ka tapapa atu rai; e tae tika mai ïa, e kare e tavarevare.” Ae, “te orama” ka tika ia noatu e “roa iti” ia. I teianei ko te 83 mataiti ia o to Iesu tutara anga Patireia, penei ka manako tetai papaki e tei roto tatou i tetai tuatau roa iti i teianei tikai. Kare ainei e tau kia mataora tatou, noatu, e kare te openga i tae mai ake? I teianei ngauru mataiti o te 1990 nei, kua akakoreia te arairai anga i te tutuanga i te tuatua meitaki, i te akaraanga mei te mea rai e temeio ia i Europa Itinga Ra, i etai tuanga o Aperika, e i etai atu enua ke. Ko te “roa iti” i te akaraanga te akatika tuatau ra no te “au mamoe” e manganui kia akaputuia mai i teianei au ngai tei akatuera uaia akenei.​—Ioane 10:16.

3. Eaa i tau ei to tatou kiteanga ou no runga i “teianei uki” kia akakeu ia tatou kia rave rapurapu i te angaanga a te Atua ra?

³ “E kare e tavarevare,” ko ta te peroveta i tuatua maira. Kua tuatua a Iesu e kare e ope teianei uki rave kino e ope ei “teianei au tuatua ravarai i te tupu.” (Mataio 24:34) Te riro ra ainei te aite anga o to tatou kiteanga i teianei e kare ta tatou angaanga tutuanga i te mea tau kia rave rapurapuia?a Te akaari maira te au tika e ko te tuke ra te tika ia! Te tomo atu nei te uki o to tatou tuatau nei ki roto i tetai tu rave kino e te viivii oki kare i aiteia i etai atu tuatua enua katoa kua topa. (Akaaite ia Angaanga 2:40.) Ka tau tatou kia rave rapurapu i ta tatou angaanga. (2 Timoteo 4:2) Pouroa te au totou no runga i te tuatau no te mate maata te akaari maira e ka rokoia viviki mai, kare e taroaroaia, ka tae​—mei te keia ra. (1 Tesalonia 5:1-4; Apokalupo 3:3; 16:15) “E teianei kia vai teateamamao rai kotou, no te mea, ei te ora manako koreia e kotou, e tae mai ei te Tamaiti a te tangata.” (Mataio 24:44) I te oripu uaanga teianei uki atua kore o te tangata ki runga i te tapa o te akapouanga, e tika tikai kare tatou e tau kia anoano kia pei ke atu i to tatou manakonako anga oko maata no te ora mutu kore na te oki akaou anga ki “te takaviri anga i te vari” o te au ravenga tau kore o teianei ao!​—2 Petero 2:22; 3:10; Luka 21:32-36.

4. Eaa te turanga tei anoanoia ra kia akamaataia atu te au tuanga “kai i te tuatau tau” ra, e akapeea te akono anga i teia umuumu anga?

⁴ Tau tikai ki ta Iesu i totou, i te 1914 e “momua anake teia katoa au mea nei no te mate” i te tomo anga te au tangata ki “te openga o teianei ao.” Te au tu mii, au tupuanga tumatetenga, e te au akono kore i te ture kua tupu kia maata tae mai ki teia tuatau nei. (Mataio 24:3-8, 12) I taua tuatau katoa ra, kua akaue a Iehova i te aronga akatainuia o te tavini akono meitaki e te pakari ra kia oronga i te ‘kai vaerua i te tuatau tau’ no te ngutuare o to ratou Pu, koia a Karaiti. (Mataio 24:45-47, NW) Mei tona terono mai i te au rangi ra, te arataki maira teianei Ariki Mesia i tetai porokarama angaianga umere i te pae vaerua takapini te enua katoa nei.

E Maata te “Tuanga Kai”

5. Eaa te rave anga te akonoia ra no te “kai” tumu anga ra?

⁵ E akamanako ana i te teateamamao anga i te “tuanga kai.” (Luka 12:42) Te apinga tumuanga i runga i te papa anga kai na te Kerititiano ko te Tuatua a te Atua ia, koia te Pipiria. E raukaʼi te apii meitaki i te Pipiria ka umuumuia tetai urianga taka meitaki me tatauia ko te tika oki ei mea maata ia. I te au mataiti kua topa kua akatupu marieia mai teianei umuumu anga, e maata oki i te akamataanga o te 1950 i te oronga angaia mai te New World Translation of the Christian Greek Scriptures i te reo Engarani. I te 1961 kua rauka mai te New World Translation o te Pipiria katoa ra, e kare i roaia kua mama mai etai atu au urianga i roto i etai atu reo mamaata ra. No te 3 au voriumu tei orongaia maira i te mataiti angaanga o te 1996 kua tae te katoatoa ki te 27, te 14 o te reira ko te Pipiria katoa ia. Kia oti ei te rave i teia angaanga i runga i te Pipiria, pera katoa te au puka tauturu apii i te Pipiria, te rave angaanga nei etai 1,174 au Kerititiano akatapuia i te urianga i teianei i te au enua e 77.

6. Akapeea ta te Taiate raveanga kia rava te au puka Pipiria te anoanoia ra?

⁶ I te turuanga a teianei nuku rave angaanga urianga, kua tere roa atu te maata o te au puka neneiia i te au 24 opati manga o te Taiate Punanga Tiaki ra. No teia akakoro anga, kua tamouia atu te au matini nenei anga viviki i te au manga maatamaata. Te maani anga i te au makatini Punanga Tiaki e te Awake! kua tupu i tera marama i tera marama, kua itae ki te 943,892,500 au kopi katoatoa, ko tetai 13.4 patene te tupu anga i teia mataiti. Ko te katoatoa o te au Pipiria e te au puka vai maro tei maaniia i Itaria, i Korea, i Meiko, i Paratiri, i Tiamani, i Tiapani, i Vinirani, e Unaite Teite ua kua tupu e 40 patene mei te 1995 ki te 76,760,098 au kopi i te 1996. Kua maata katoa oki te tauturu anga a etai atu au opati manga i te tupu anga o te maani anga puka katoa ra.

7. Akapeea ta Isaia 54:2 akakite anga i te tu rapurapu maata i teianei?

⁷ Kua umuumuia te tupu anga kia maata i te au 1990 ra no te akakore anga i te au arairai anga i runga i te Au Kite o Iehova i te Europa Itinga Ra e i Aperika oki. E maata te onge no te kai vaerua i teianei au ngai. No reira kua tangi maira te kapiki anga ma te rapurapu maata: “E akaatea ana i to turanga puakapa; kia totōia te paruru o to nooanga ki te atea ke: auraka e taporoporo; e akaroa i to au taura, e akamou piri tikai i to au titi.”​—Isaia 54:2.

8. Eaa te tu oronga ua te tauturu nei i te oronga turu anga i te pae o te moni?

⁸ No reira, kua umuumuia kia akatotoa i te au ngai angaanga i te au opati manga e manganui o te 104 au opati ra. No te kino o te au turanga i te pae o te puapinga i te maata anga o te au ngai ou tei akatueraia maira, ko tetai tuanga maata o te moni akapouia no teianei akatotoa anga te riro nei na te au tauturu i te angaanga i to ao katoa nei no ko mai i te au enua e meitaki ake to ratou turanga na ratou i tutaki. E mea mataora ra, te oronga maira te au putuputuanga e te aronga tataki tai oki ma te ngakau katoa, i te vaerua o ta Exodo 35:21 ra: “E kua aere maira ratou, te tangata katoa i tae tona ngakau, te aronga katoa i tika to ratou ngakau, kua apai maira ratou i te atinga na Iehova no te angaanga.” Ka akono matou i teianei atianga ei akameitaki atu i te katoatoa o te aronga tei rave ra i teia orongaanga maoraora.​—2 Korinetia 9:11.

9. Akapeea te akatupu anga ia Roma 10:13, 18 i teia tuatau nei?

⁹ I te tuatau o te 1996 kua akakaka tika maira te au puka a te Taiate Punanga Tiaki i te ingoa o Iehova e tana au akakoro anga ki te au openga o te enua katoa nei. Kua tau te reira mei ta te apotetoro ko Paulo i akakite maira. I te taikuanga i ta Ioela totou e ta Salamo 19 ra, kua tata aia: “‘Ko te kapiki i te ingoa o [“Iehova,” NW] ra e ora ïa.’ Teia ra taku tuatua, Kare rai ratou i kite? Kua kite ïa; ‘Kua tae ra to ratou reo ki te pa enua katoa, e ta ratou tuatua ki te kotinga o teianei ao.’” (Roma 10:13, 18) No reira na te akateiteianga i te ingoa oko maata o Iehova, kua rave tona au tangata i tetai tuanga puapinga maata i te akakianga i tona are akamori anga ma te kaka. Inara, i akapeea, teianei akakite anga i puapinga maataiaʼi i te tuatau o te 1996 nei? E akara matatio ine, i te papaanga te aru mai nei i nga kapi 18 ki te 21 ra.

Kokotianga i te Ao Katoa Ra

10. Eaa te au tu meitaki taau e kite ra i te angaanga a te au tangata o Iehova, tei akakiteia maira i te papaanga i nga kapi 18 ki te 21 ra?

¹⁰ Kare i maata atu i mua ana te mana o ta Iesu au tuatua te kiteia ra ia Luka 10:2: “Te maata ua nei te mou, te iti nei ra te aronga e kokoti: e teianei, e pure kotou i te Atu o te mou, kia unga mai aia i tetai aronga ei rave i taua mou nana ra.” Te akarongo ra ainei koe i taua kapiki ra? E au mirioni ua atu takapini i teianei ao te rave ra. Te akakiteia maira teia e te take ou e 5,413,769 au papuritia Patireia tei ripoti ra i te angaanga tutu aere i te 1996 ra. Pera katoa, e 366,579 te au tungane e te au tuaine ou tei papetitoia. Mei teaa ra ta tatou akaperepere anga i “tei inangaroia e te au enua katoa ra,” ko ratou te kapiti maira i teianei i ‘te akaki anga i te are akamori o Iehova ma te kakā’!​—Hagai 2:7.

11. Eaa ra te tumu no tatou katoatoa kia rekareka maata roa?

¹¹ Te au ripoti o te akatotoa anga i te au ngai ou tei akatueraia maira kare i te mea umere koreia. Te vareae nei ainei etai o tatou i taua aronga te rekareka nei i teianei i taua tupu anga ra? Ei tuke rai, te rekareka nei tatou ma ratou katoa ra. Pouroa te au enua e akamata anga iti ua to ratou. Kua tata te peroveta o to Hagai tuatau ra, koia a Zekaria: “Koai tei akavaavaa i te rā o te au mea rikiriki ra?” (Zekaria 4:10) Te rekareka maata roa nei tatou e i te au enua kua rave meitakiia te angaanga akakitekite aere, e au mirioni ua atu te au papuritia Patireia i teianei, e te oti putuputu ra ta ratou ngai, i te au epetoma ravarai i te au oire mamaata e manganui ra. E tumu ainei to tatou no te akaparuparu i te rima ia Iehova e oronga mai nei i te tuatau no te ora ki te au ngai tei kore ra i akatikaia i mua ana? Kare rava ia! “Te kainga ra, koia teianei ao,” ta Iesu i tuatua. (Mataio 13:38) Ka tika te akakitekite marie anga kia rave atuia, mei ta te au pipi mua i rave ra i te akakitekite marie anga i te openga o te akatereanga ngati Iuda o te au mea ra.​—Angaanga 2:40; 10:42; 20:24; 28:23.

Aere Tika Ua Anga ki Mua

12. Eaa te akakeu anga ia tatou kia aere ‘tika ki mua’? (Akara katoa i te pia, “Kokotianga ‘Mei te Au Openga Mai o te Enua Nei.’”)

¹² Ae, ka tika tatou kia aere tau atu, ma te aereanga ‘tika ki mua’ ma te kariota angera o Iehova i te rangi ra. (Ezekiela 1:12) Te maara nei ia tatou te au tuatua a Petero: “Kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.” (2 Petero 3:9) E tuku na te maroiroi akatauanga a to tatou au taeake i te au enua putaua ra e akakeu ia. Ko tetai ua atu tu akaraanga e e taroaroa i te rokoia maianga e Aramakito te akatika ra i te akaputu angaia mai e au anere ua atu tauatini i teia au enua e pera katoa oki te aronga e manganui i te au ngai angaanga putuputuia ra. Auraka e manako tarevake no te reira: “Kua vaitata te rā maata o Iehova, kua vaitata, e te rapurapu roa maira.” (Zephania 1:14) Ka tau katoa oki tatou kia rapurapu i ta tatou tuanga i te oronga anga i tetai akakitekite anga openga tikai!

13, 14. (a) Eaa te ka rauka kia tuatuaia no te tua anga i te au puka i te 1996 ra? (e) Eaa te au parani taka ke te ka tau te au putuputuanga kia rave i te au mataiti tataki tai, e akapeea taau paranianga kia rave i te reira?

¹³ Noatu rai e kare te au akakite anga i mama mai i te papa anga angaanga, e tupu anga maata kitea uaia to te tua anga te au Pipiria, au puka, e te au makatini i te mataiti i topa akenei. Ei akatauanga, te akakiteia maira te au makatini tei tuaia i te ao katoa nei e 19 patene te kake anga, e 543,667,923 katoa au kopi tei tuaia ra. Te tau nei ta tatou au makatini no te tutuanga​—i te au arataa, i te au paka, i te tapu anga pati, i te ngai pitiniti. Te akakite maira te au ripoti e i etai ngai te rave putuputuia ra te tutuanga Patireia, kua mareka mai te au tangata mana taoonga ra na te akaraanga mako tikai i ta tatou makatini e te ariki ra i te au apii Pipiria.

¹⁴ I te marama o Aperira i te mataiti tataki tai, e mea matauia kia akapapa te au putuputuanga i te rave te tua anga makatini, ma te akataka anga i tetai ra roa no te aere i tera are i tera are e i te au ngai tangata oki. Ka rave ainei toou putuputuanga i teia ia Aperira 1997? Kua teateamamaoia te itiu o Aperira o Te Punanga Tiaki e te Awake! e ka tau ta raua orongaanga i te ao katoa nei i tetai akairo! I te airani o Kupero, ko te au putuputuanga, te rave ra i ta ratou tuatua kia “itae atu i te aronga ravarai te ka rauka ma te tuatua Patireia,” kua rave ua atu i te au marama ravarai ma te angaanga makatini akapapaia ra, e kua rauka tetai take ou e 275,359 tei tuaia no te mataiti, e 54 patene te tere atu anga.

Ta Hagai Au Tuatua Openga

15. (a) Eaa ra a Iehova i tuku atu ei i etai atu tuatua na roto ia Hagai? (e) Eaa te apiianga tau no te toru o ta Hagai ra tuatua anga kia tatou?

¹⁵ E 63 ra i muri ake i te rua o ta Hagai ra tuatua anga, kua tono akaou atura Iehova iaia ma te toru o te akakite anga ta tatou te ka tau kia tuku ki to tatou ngakau i teia tuatau. Kua tuatua a Hagai mei te mea rai e te akanoo ra te au ngati Iuda i te pange o te iero, kua oti ke ra ia ratou i te akanoo e 17 mataiti i mua akera. Kua kite akaou a Iehova i te tau kia rave i tetai tamaanga. Kua akaparuparu mai te kautaunga e te au tangata ra e no reira kua viivii ratou ki mua i te aroaro o Iehova ra. Kua riro ainei e kua akaparuparu tetai papaki o to Iehova ra au tangata i to ratou rima i teia tuatau, ma te raveanga ratou uaorai i te au ravenga e te au tu noinoi apinga ra? E mea rapurapu ia e e akamaaraara ana tatou “mei teianei rā e i muri atu oki” i te apai maianga i te kaka ki te ingoa o Iehova ra, ma te irinaki anga i tana taputou: “Mei teianei rā ra au e akameitaki atu ei ia kotou.”​—Hagai 2:10-19; Ebera 6:11, 12.

16. Eaa te ‘akangaueueanga’ te vaitata maira, e eaa te ka tupu mai?

¹⁶ I taua ra rai, kua tae mai te tuatua a “Iehova Sabaota ra” kia Hagai ko te a taime ia e te openga oki. Kua akakite atura aia e eaa te kapitiia atura ki Tana ‘akangaueueanga i te au rangi, e te enua,’ i te na koanga: “E uritumu au i te terono o te au basileia, e te ririnui o te au basileia, i te au enua ra, e pou ïa iaku; e e tatipoki au i te au kariota, e te aronga i noo ki roto ra; e te au oroenua ma te au akaoro ra, e inga ïa ki raro, ratou ravarai ki te koke a tona uaorai taeake.” (Hagai 2:6, 21, 22) Ka itae te ‘akangaueueanga’ ki tona take me oti takiri ia Iehova te tama anga i te enua ia Aramakito ra. I reira kua tae katoa mai “tei inangaroia e te au enua katoa ra,” kia riro ei akamata anga no tetai taiate tangata no te ao ou ra. Mei teaa ra te au tumu no te rekarekaanga e te orongaanga akapaapaa anga kia Iehova!​—Hagai 2:7; Apokalupo 19:6, 7; 21:1-4.

17. Akapeea te akanoo anga ia Iesu ei tetai “tapeka akairo”?

¹⁷ Ei akaotianga i tana totou, kua tata a Hagai: “Ei taua rā ra, te tuatua mairā Iehova Sabaota ra, e rave ei au ia koe, e taku tavini, e Zerubabela . . . , e e akariro au ia koe mei te akairo; ko koe oki tei ikiia e au ra, te tuatua mairā Iehova Sabaota ra.” (Hagai 2:23) Ko Iesu Karaiti i teianei ta Iehova Ariki Mesia tikai e tana Taunga Maata, ma te kapitianga ki te au rangi ra i nga taoonga opita ta te Kavana ko Zerubabela raua ko te Taunga Maata ko Iosua i akono takitai ra i Ierusalema i te enua nei. Mei tetai tapeka akairo i runga i te rima katau o Iehova ra, ko Iesu tei riro mai e “Koia” ta Iehova ra apinga i te apaianga mai kia tika tikai “ta te Atua i tuatua mai” e manganui ra. (2 Korinetia 1:20; Ephesia 3:10, 11; Apokalupo 19:10) Te akaketaketa maira te tuatua totou katoa o te Pipiria ki runga i ta Iehova oronga anga mai ia Karaiti ei Ariki e ei taunga Oko.​—Ioane 18:37; 1 Petero 1:18, 19.

18. Akapeea te akatupu anga meitaki no te akaopeanga o tei “tuatua mairā Iehova Sabaota ra”?

¹⁸ E tika tikai i to tatou tuatau nei, ka kiteia te kaka maata rava ki roto i to Iehova iero vaerua kaka ra! Kare e roaia, i muri ake i ta Iehova takore takiri anga i te akatereanga katoa a Satani ra, ka tupu meitaki mai ta Hagai 2:9 i tuatua: “Ei teianei ngai au e oronga atu ei i te au, te tuatua mairā Iehova Sabaota ra.” E au i te openga ra!​—e au tinamou, i te ao katoa e pini ua ake, tei akapapuia mai e to Iehova ra “tapeka akairo,” koia Iesu Karaiti, “te Ariki no te au,” ko tei tataia ra nona: “Kare e mutu te tupu anga o tona ra basileia, e tona au . . . Na te maroiroi o Iehova Sabaota e rave i te reira.” (Isaia 9:5, 6) No te tuatau mutu kore ua atu ka akaataia mai te kaka o te are akamorianga ia Iehova i roto katoa i tona ngai ponuiaau i tona ngateitei i te ao katoa e pini ua ake. Kia vai tamou marie tatou ki roto i taua are ra!​—Salamo 27:4; 65:4; 84:10.

[Tataanga Rikiriki i Raro]

Ka Rauka Ainei ia Koe te Akataka?

◻ Akapeea, i teia tuatau nei, te ‘akaki anga i te kakā’ ki to Iehova ra are?

◻ Eaa ra i kore ei i aiteia te tu rapurapu maata kia tutu aere i te tuatua meitaki?

◻ Eaa te akakeu anga kia rapurapu te tutu aere te orongaia maira i te Ripoti Angaanga Mataiti o te 1996?

◻ Akapeea ta Karaiti tavinianga ei “tapeka akairo” no Iehova ra?

[Pia i te kapi 15]

Kokotianga “Mei te Au Openga Mai o te Enua Nei”

IA Isaia 43:6, ka tatau tatou i ta Iehova akauenga: “Auraka e tāpuia: e arataki mai i taku au tamariki tamaroa mei te au ngai mamao mai, e taku au tamaine mei te au openga mai o te enua nei.” Te tupu maata nei teia tuatua tapu i Europa Itinga Ra i teia tuatau. Ei akatauanga, te enua Komuniti i mua ana ko Morotova. E au oire etai e vaitata i te apa te au tangata e Au Kite i teianei. E mamao to ratou aereanga kia kitea te ngai no te tutuanga, inara te rave ra ratou i te tautaanga! E manganui te au papuritia i teianei au putuputuanga e anaunga no te au metua tei tuikaaia ra ki Tiperia i nga mataiti mua o te 1950 ra. I teianei te arataki ra ta ratou au anau i te angaanga kokoti anga. To te au 12,565 papuritia ra, e 1,917 tei papetitoia i teia mataiti i topa. E a ngauru ma toru au putuputuanga ma te vaitata i te 150 au papuritia takitai ra i roto, e kua tupu ua atu te au kotinga mei te a ki te varu i te mataiti ou o te angaanga.

E meitaki katoa oki, te totoa anga i Arapania. E rima ki ua to te Au Kite tiratiratu tei akakoromaki i te au akonoanga takinga kino mei roto mai i etai 50 mataiti ra. Ko etai i o ratou ra kua tamateia. Te akamaara maira teia i ta Iesu taputou ra: “Auraka koe e mataku i te au mea ravarai e rokoia mai ei koe: i na, e uri te diabolo i tetai pae o kotou ki roto i te are tapekaanga, ei timata anga . . . kia mou marie ra koe e tae ua atu ki te matenga, e naku e oronga atu i te korona ora noou.” (Apokalupo 2:10; akara katoa ia Ioane 5:28, 29; 11:24, 25.) Eaa ta tatou e kite nei i teianei i Arapania? Ko tetai tupu anga tika tikai no ta Iehova ra totou te kiteia ra ia Isaia 60:22: “E riro te mea ngiti okotai ei tausani”! I te 1990 okotai ua papuritia tei ripoti angaanga i Arapania. Inara, e maata te “aronga angaanga” no Itaria e etai atu enua tei akono i te akaueanga: “Ka aere kotou, e akariro i to te pa enua katoa ei pipi, ka bapetizo atu ei ia ratou.” (Mataio 28:19; Luka 10:2) Kia tae mai ki te tuatau Akamaara Anga i to Iesu matenga i te 1996, e 773 papuritia tei rave ra i te tutu aere, e kua akaputu teia aronga e 6,523 au tangata ki ta ratou au uipaanga Akamaara Anga, e tere atu i te varu taime i te numero o te au papuritia ra! E mea umere tikai te aronga tei ripotiia tei aere atu no te au ngai taka ke ra. Noatu e kare e au papuritia o reira, ko nga oire o Kukës e ­Divjakë e 192 e te 230 tei akaputu atu ki reira. Ko Krujë e okotai ua papuritia, e 212 tei tae atu ki reira. Kua akaputu atu to Korçë 30 au papuritia ra e tere atu i te 300 ki te ngai tei tutakiia ra. I muri ake i te ki roa anga te ngai akaputu anga, kua aere ke atu tetai 200 tangata ra no te mea kare e ngai no ratou. E tika tikai e kainga ia kua tau no te kokotianga!

Mei Romania mai ko teia ripoti: “Ia matou e rave ra i te angaanga i tera are e tera are, kua aravei atu matou i tetai tangata tei karanga ra e koia tetai o te Au Kite o Iehova e te noo ra ki tetai oire rikiriki tei manakoia ra e matou e kare e Au Kite o reira. Kua akakite mai aia kia matou e i te pae atu iaia e 15 etai ke atu tei akaputu maira ki te au uipaanga i te au Paraparau e te au Tapati e kua akamata ratou i te tutuanga mei tera are ki tera are. I te ra i muri akera kua aere atu matou ki taua oire ra. Te tiaki maira ia matou i roto i nga pia e rua e 15 au tane, au vaine, e te tamariki tei rave atura e 20 au puka e e 20 o te au makatini ou ra. Kua akakite atu matou kia ratou e akapeea te akono i te au apii Pipiria. Kua imene kapiti matou e kua pau atu i ta ratou au uianga rapurapu ra. Kua aaki mai to ratou tei arataki ra i te pupu e: ‘I etai ra toko iti i mua akera, kua pure au kia Iehova ma te au roimata kia tono mai i tetai tiaki no matou, e kua pauia mai taku pure.’ Kua mataora roa matou, e i to matou akaruke anga, mei tetai matiroeroe tei kitea ra tetai metua i te openga, kua tuatua mai aia: ‘Auraka e akangaropoina ia matou ine. E oki akaou mai e atoro ia matou nei!’ Kua rave matou i te reira, i teianei e itu apii Pipiria te akonoia ra i taua oire ra. I te au ngai ou e manganui, te akamataia ra te angaanga na roto i tetai tu umere ma te au puka apii Pipiria ra, te ariki maataia mai ra, e te akaari maira teia e ko taua angaanga nei no tetai tumu tu-Atua maira ia.”

[Tutu i te kapi 18-21]

TE RIPOTI TAVINI ANGA MATAITI 1996 A TE AU KITE O IEHOVA I TEIANEI AO

(Akara i te puka)

[Au Tutu i te kapi 16, 17]

Te akaputuia maira “tei inangaroia e te au enua katoa ra” i te au Airani o te Moana ra (1), Marike Apatonga (2), Aperika (3), Asia (4), Marike Apatokerau (5), e Europa (6)