Pene 15
Akapeea ta Iehova Arataki Anga i Tana Akaaerenga?
1. Eaa te akakitekite anga te akakiteia maira e te Puka Tapu no runga i te akaaerenga a Iehova, e eaa ra i puapinga maataʼi te reira kia tatou?
NA ROTO i te au Tuatua Tapu akauruia, te oronga maira a Iehova kia tatou i etai akaraanga no tana akaaerenga umere tikai i te rangi ra. (Isaia 6:2, 3; Ezeki. 1:1, 4-28; Dani. 7:9, 10, 13, 14) Noatu rai e kare tatou e kite mata i te au mea ora vaerua, te akamatakite maira aia kia tatou i te au tu o te angaanga ta te au angera tapu e akatupu ra ki runga i te aronga akamori mou i te enua nei. (Ge. 28:12, 13; 2 Ariki 6:15-17; Sa. 34:7; Mata. 13:41, 42; 25:31, 32) Te akataka katoa maira te Puka Tapu i te tuanga akara mataia o ta Iehova ra akaaerenga e te tauturu maira ia tatou kia marama e akapeea tana arataki i te reira. Me e kite tikai to tatou i te pae vaerua i teia au mea nei, ka tauturu te reira ia tatou kia “aaere tau tikai ia Iehova ki te openga o te akamarekaanga ki tika anga iaia.”—Kolosa 1:9, 10, NW.
Akatakaanga i te Tuanga Kite Mataia
2. Mei te Penetekote 33 T.N. eaa te putuputuanga a te Atua?
2 No te 1,545 mataiti ko te iti tangata Iseraela te putuputuanga a te Atua. Inara kare ratou i mou i te Ture koreromotu e kua kopae ke i ta te Atua uaorai Tamaiti. No reira kua akatupu mai a Iehova i tetai putuputuanga ou, e kua akono aia i te koreromotu ou kia ratou. Ko teia putuputuanga te akatakaia maira i te au Tuatua Tapu ei “vaine akaipoipo ou” na Karaiti, e 144,000 te katoatoa tei ikiia e te Atua kia taokotaiia atu ki tana Tamaiti i te rangi. (Ephe. 5:22-32; Apokalupo 14:1; 21:9, 10) Kua akatainuia te aronga mua i te vaerua tapu i te tuatau o te Penetekote, 33 T.N. Na roto i te vaerua tapu ta Iehova akataka papuanga e ko teia i teianei te putuputuanga tana ka akono ei akatupu i tona akakoroanga.—Ebera 2:2-4.
3. Koai ma i teia tuatau te akaaerenga akara mataia a Iehova?
3 I teia tuatau e toenga ua o te 144,000 te vai nei i te enua. Inara, i te akatupu anga i te totou o te Puka Tapu, e urupu maata o te au “mamoe ke atu” kua apaiia mai ki roto i te angaanga pirianga kapitiia atu kia ratou. Kua kapitiia e Iesu Karaiti, koia te Tiaki Meitaki ra, teia aronga “mamoe ke atu” ma te aronga toenga katoa o tana au pipi anau ouia i te vaerua e kua riro ratou ei “anana okotai” i raro iaia i to ratou “tiaki okotai.” (Ioane 10:11, 16; Apokalupo 7:9, 10) Kua riro teia aronga katoatoa ei okotai akaaerenga taokotaiia, koia ta Iehova akaaerenga akara mataia i teia tuatau nei.
Akapapaanga Teokaratiki
4. Naai e arataki ana i te akaaerenga, e naea?
4 Te akapapu maira te takiato tuatua o te Tuatua Tapu e koai te arataki ra i te reira i te na ko anga e “ko te putuputuanga o te Atua ora ra.” E akaaerenga teokaratiki, me kare ko te Atua tona tutara. Na Iehova e oronga ana i te arataki anga no tona iti tangata na roto i tei akataoongaia ra e Ia ei upoko akara koreia no te putuputuanga, koia te Atu ra ko Iesu Karaiti, e na roto i Tana uaorai Tuatua akauruia, koia te Puka Tapu ra.—1 Timo. 3:14, 15, NW; Ephe. 1:22, 23; 2 Timo. 3:16, 17.
5. (a) Akapeea te kitea anga te arataki anga mei te rangi mai i te putuputuanga i te anere mataiti mua ra? (e) Eaa te akaari maira e ko Iesu rai te upoko o te putuputuanga?
5 Kua taka meitaki te reira arataki anga teokaratiki i te akaoraora angaia e te vaerua tapu te au mema mua o te putuputuanga kia rave i te angaanga i te Penetekote o te 33 T.N. (Angaanga 2:1-4, 32, 33) Kua kitea katoa oki i te arataki anga te angera a Iehova i te au apinga i tupu ra tei taki atu ki te akatotoaanga i te tuatua meitaki ki roto ia Aperika. (Angaanga 8:26-39) Pera katoa oki, i te oronga angaia e te reo o Iesu te arataki anga i te akaariuanga ia Saula o Tareso ra e pera katoa i te akamata anga i te angaanga evangeria i rotopu i te au Kenitara ra. (Angaanga 9:3-7, 10-17; 10:9-16, 19-23; 11:12) Inara kare te arataki anga katoa tei anoanoia i orongaia mai na te reira tu mataara umere tikai. I muri mai kare e au reo i akarongoia ana mei te rangi mai, kare e au angera i mama mai ana ki te tangata e kare atu e au apinga semeio oronga uaia mai e te vaerua. Mari ra kua taputou a Iesu ki tana au pipi mou ra: “I na, tei vaitata ua ra au ia kotou, e tae ua atu ki te openga o teianei ao,” e te akaari maira te au tika e te vaitata maira aia. (Mata. 28:20; 1 Kori. 13:8) Kare te mea e te akatika ua ra te Au Kite o Iehova i tona upoko anga, mari ra te papu ra e kare e rauka ia ratou i te rave tamou i te akakitekite aere i te tuatua no te Patireia i roto i te au takinokino anga pakari roa naringa kare tana tauturu mai.
6. (a) Koai ma te “tavini akono meitaki e te pakari,” e no teaa ra? (e) Eaa tana angaanga i oronga na te reira “tavini”?
6 I mua poto ua ake i to Iesu matenga kua tuatua aia ki tana au pipi no runga i te “tavini akono meitaki e te pakari” te ka riro nana, na te Pu e oronga atu te apainga taka ke. I ta Iesu akatutu anga no te reira “tavini,” te vaira i te akaruke anga o te Atu no te rangi, e ka vai rai e te ora ra i te tuatau o te oki akaou mai anga o Karaiti. Kare e tau te reira akatutu anga ki te tangata okotai ua nei. Mari ra te tau ra ki te putuputuanga o te au pipi tiratiratu a Karaiti tei akatainuia ra me akaraia ei pupu okotai. Kua kite a Iesu e ka oko aia ia ratou i tona uaorai toto, no reira kua tau tana tuatua anga ia ratou katoa ei “tavini” nana. Kua oronga atu aia i te angaanga na ratou kia rave, ma te akaueanga ia ratou katoatoa kia akariro i te au tangata ei pipi e ka angai tamou ei i te reira aronga i te pae vaerua, i te orongaanga i te “kai [vaerua] na ratou i te ora mou ra.” Kua akatinamouia to ratou iki anga e te vaerua tapu i te Penetekote 33 T.N.—Mata. 24:45-47; 28:19, 20; 1 Kori. 6:19, 20; akaaiteia atu kia Isaia 43:10.
7. (a) Eaa te apainga maata ta te “tavini” e rave nei i teianei? (e) Eaa ra i puapinga maataʼi no tatou kia rave i te au ikuiku anga no roto mai i teia mataara?
7 I te oki akaou mai anga o te Pu, me te akono meitaki ra te “tavini” i tana angaanga, ei reira orongaiaʼi kia maata atu te apainga nana. Te tuatau tei aru mai ra kua riro ei tuatau no te tutu aere i te Patireia i te ao katoa, e e “urupu maata” o te aronga akamori ia Iehova ra te ka akaputuputuia ma te manakonako kia akaoraia ratou i te “mate maata.” (Mata. 24:14; Apokalupo 7:9, 10) Ka anoano katoaia te kai vaerua na teia aronga, e na te pupu “tavini” taokotaiia, koia te au tavini a Karaiti tei akatainuia i te vaerua ra, e oronga i te reira na ratou. E marekaʼi a Iehova, ka tau tatou kia ariki i te apiianga te oronga maira aia na roto i teia mataara e e akono katoa kia rotai ki te reira.
8, 9. (a) Eaa te akapapaanga i te anere mataiti mua ra no te akatikatika anga i te au uianga no runga i te apiianga e te oronga anga i te arataki anga i te tutu aere anga i te tuatua meitaki? (e) Eaa te akapapaanga mei te reira te tu i teia tuatau?
8 Inara, i etai tuatau, penei ka tu mai e au uianga no runga i te apiianga e te akonoanga. Ka akapeea i reira? Te akakite maira te pene 15 o Angaanga i akapeea te akatikatika anga i tetai maroanga no runga i tei umuumuia no te aronga Kenitara tei riro mai ei Kerititiano. Kua tukuia te reira ki te au apotetoro e te aronga pakari i Ierusalema, ko ratou te pupu akaaere i rotopu ra. Kare te reira aronga pakari i te apa kore ua; kare ratou i te au tangata tei kore i rave i te tarevake. (Akaaiteia atu kia Galatia 2:11-14.) Inara kua taangaanga te Atua ia ratou. Kua uriuri ratou i ta te au Tuatua Tapu akauruia i tuatua no runga i te tumu i tuatuaia ra e pera katoa oki te akapapuanga i te angaanga a te vaerua o te Atua ra i te akatueraanga i te tuanga Kenitara ra, i reira ratou i tuku ei i te tika. Kua akameitakiia e te Atua te reira akapapa anga. (Angaanga 15:1-29; 16:4, 5) Mei te reira pupu i rotopu ra, kua tonoia atu etai kia akatotoa atu i te tutu aere anga i te tuatua meitaki kia tau ki ta te Atu uaorai i akaue ra.—Angaanga 8:14; Gala. 2:9.
9 I to tatou tuatau nei kua akanooia mai te Pupu Akaaere no te au taeake akatainuia ki te vaerua no te au enua ke ke mai. Kua akaputuia te reira ki te opati maata o te ao no te Au Kite o Iehova. Na roto i te tu tiratiratu te akatere atura i te au apinga no te akamori tika i raro ake i te upoko anga o Iesu Karaiti. Te taokotai atura teia au taeake ki te manako o te apotetoro ko Paulo, iaia i tuku atura i te ako i te pae vaerua ki te au taeake Kerititiano, na te tata anga e: “Kare ra mei te mea e ko matou te atu o to kotou akarongo, ei tauturu ra matou i to kotou rekareka: e mou akarongo oki to kotou.”—2 Kori. 1:24.
10. (a) Akapeea te akapapu anga e koai ma ka riro ei aronga pakari me kare ei tavini orometua? (e) Eaa ra i tau ei no tatou kia taokotai meitaki tikai ki te aronga akataoongaia no te reira au turanga?
10 Te arikiia ra teia akapapaanga teokaratiki e te Au Kite o Iehova i te ao katoa nei. Pouroa to ratou au putuputuanga te angaanga mou piri ra i te taokotai anga atu ki te reira. Te akara atura ratou ki te Pupu Akaaere ei oronga mai i te akataoonga anga i te aronga pakari e te au tavini orometua ei akono kia meitaki te akonoanga o te au putuputuanga. Eaa te tumuanga e ikiiaʼi te aronga no te reira taoonga? Te taka meitaki ra te au umuumuanga i roto i te Puka Tapu. Te aronga pakari te tuku ra i te au manako akatika e te aronga akamana katoa oki i te akataoonga anga e apainga teimaa tikai ta ratou ki mua i te Atua i te akono i te reira. (1 Timo. 3:1-10, 12, 13; 5:22; Tito 1:5-9) Kare e ikianga i rotopu i te au mema o te putuputuanga e kare katoa oki e votianga na te putuputuanga. Mari ra, kia tau ei ki tei raveia ra e te au apotetoro i te rave anga i te akataoonga anga i te anere mataiti mua ra, te aronga pakari na ratou ra te apainga i te manako akatikaanga, e te aronga rave i te akataoonga anga i muri akera, ka pure ratou no te tauturu a te vaerua o te Atua e ka kimi i te arataki anga mei tana Tuatua akauruia. (Angaanga 6:2-4, 6; 14:23; akaaiteia atu kia Salamo 75:6, 7.) Na to tatou aru i te arataki anga ta te aronga pakari e oronga maira, ka akaari tatou i ta tatou ariki anga i ta Karaiti ra akapapaanga aroa i teia aronga “oronga ua maira te meitaki i te tangata nei” ei tauturu ia tatou katoatoa kia rauka “te akarongo okotai.”—Ephe. 4:8, 11-16.
11. (a) Eaa te au angaanga puapinga te raveia ra e te au vaine i roto i te akapapaanga a te Atua? (e) I teea taime ratou e tau ei kia tapoki i to ratou upoko, e no teaa ra?
11 Te taki maira te au Tuatua Tapu e ko te au turanga akaaere i rotopu i te putuputuanga na te aronga tane e akono. Kare te reira i te akataakaaka i te au vaine, no te mea e manganui i o ratou ra te kapitiia ra ki roto i te aronga tuanga no te Patireia no te rangi ra. Na te tu akono mako, e te ma e te akono meitaki i ta ratou tamariki, ka tauturu katoa te au vaine Kerititiano i te tuatua meitaki no te putuputuanga. (Tito 2:3-5) E putuputu te tupu anga na ratou te maataanga o te angaanga kimi anga i te aronga manako ariki ou e te apai mai ia ratou kia aravei i te akaaerenga. (Sa. 68:11) Inara na te aronga tane tei akataoongaia ra e akono te akoanga i roto i te putuputuanga. (1 Timo. 2:12, 13) Me kare e tane tau i te uipaanga tei akapapaia e te putuputuanga, ei reira tetai vaine e tapoki ei i tona upoko i te takianga me kare te pureanga.a Na reira aia i te akaari anga i te kauraro i ta Iehova ra akapapaanga, mei ta Iesu i akanoo maira i te akaraanga no te katoatoa i te kauraro anga i tona Metua.—1 Kori. 11:3-16; Ioane 8:28, 29.
12. (a) Eaa te manako e manono maira te Puka Tapu i te aronga pakari kia rave no runga i to ratou turanga? (e) Eaa te angaanga meitaki na tatou ravarai ka tau kia rave?
12 I teianei ao ko te tangata e mou ra i te turanga teitei te manakoia ra e puapinga maata aia, mari ra i roto i ta te Atua akaaerenga ko te tika e: “Tei mea ngiti rava i roto ia kotou na, ko te ka maata ïa.” (Luka 9:46-48; 22:24-26) No reira te ako maira te au Tuatua Tapu i te aronga pakari kia matakite auraka ma te akaueue ua ki runga i te aronga tuanga a te Atua ra, mari ra, ei kaveinga no te anana. (1 Pe. 5:2, 3) Kare ko tetai papaki iti ua tei ikiia, mari ra ko te katoatoa o te Au Kite o Iehova, te tane e te vaine, e apainga meitaki ta ratou i te mono i te Ngateitei o te ao katoa e pini ua ake, ma te tuatua taakaaka anga i roto i tona ingoa e te akakiteanga ki te au tangata i te au ngai ravarai i tona ra Patireia.
13. E uriuri manako i te au uianga tei akapapaia i te openga o teia parakarapa, ma te taangaanga anga i te au irava i tataia ra.
13 E mea meitaki na tatou kia ui ia tatou uaorai: “Te manako ariki tika ra ainei tatou i ta Iehova ra aratakianga i tana akaaerenga akara mataia? Te akaata maira ainei to tatou tu akono, te tuatua e te angaanga i te reira?” Ka rauka ia tatou tatakitai i te rave i te reira uriurianga na te akamanako anga i te au tumu te aru mai nei:
Me te kauraro tika ra tatou kia Karaiti ei upoko no te putuputu anga, eaa ta tatou ka rave i reira mei tei akakiteia maira i te au irava i muri akenei? (Mata. 24:14; 28:19, 20; Luka 21:34-36; Ioane 13:34, 35)
I ta ratou tauta anga kia riro ei Kerititiano uua mai, eaa te maata o te manako irinaki i te Atua e Karaiti, e tau no te aronga katoatoa e tuanga ratou no te akaaerenga? (Ioane 15:5; 1 Kori. 3:5-7)
Me ka tauta te aronga pakari i te akatikatika i te manakoanga o etai aronga kia akaraʼi ratou i te au tumu kia tau ki ta te toenga atu o te akaaerenga, noai te manako takinga meitaki ta tatou ka kite i roto i teia? (Ephe. 4:7, 8, 11-13; 2 Kori. 13:11)
Me ka ariki rekareka tatou i te au akapapaanga apinga vaerua te aere maira na roto i te pupu “tavini” e tona Pupu Akaaere, te akaari ra tatou i te akangateitei noai? Inara peea me te tuatua akakino ra tatou i te reira aronga? (Luka 10:16; akaaiteia atu kia 3 Ioane 9, 10.)
Eaa ra i kore ei e tau kia tuatua akaapa ua tatou i te aronga pakari tei akataoongaia ra? (Angaanga 20:28; Roma 12:10)
14. (a) Eaa ta tatou e akakite ra na roto i to tatou tu akono i te akaaerenga a te Atua? (e) I teia tu, eaa te au tuatau te vai maira no tatou i te akapapu e e pikikaa te Tiaporo e i te akatupu i te rekareka ki te ngakau o Iehova ra?
14 Te akono nei a Iehova ia tatou i teia tuatau na roto i tana akaaerenga akaraia i raro ake ia Karaiti koia te upoko akataoongaia ra. No reira na to tatou tu akono ki teia akaaerenga e akataka mai na roto i te mataara papu i te turanga ta tatou e akono ra no runga i te maroanga no te ngateitei. (Ebera 13:17) Te taumaro ra a Satani e na te anoano i te puapinga no tatou uaorai i akakeu ana ia tatou katoatoa, e ko to tatou manako maata no runga ia tatou uaorai. Inara me ka oronga rekareka ua tatou ia tatou uaorai i te rave angaanga i te au mataara ravarai te anoanoia ra, ma te kopaeanga i te tuatuaanga e te raveanga i te au mea te ka taki mai i te manako no tatou uaorai, te akapapu ra tatou e e pikikaa te Tiaporo. Me te inangaro ra tatou e te kauraro ra i ‘te aronga arataki’ i rotopu ia tatou, ma te aruanga i to ratou akarongo, auraka ra e akatika kia riro ei tangata tei ‘akarekareka ra i te tangata kia rauka te apinga nona uaorai,’ ka akatupu tatou i te rekareka ki to Iehova ngakau. (Ebera 13:7; Iuda 16) Na te tatanuanga i te akangateitei tau no ta Iehova akaaerenga e te raveanga i te angaanga tana e ikuiku maira, te akapapu ra tatou e ko Iehova tikai to tatou Atua e te taokotai ra tatou i te akamori anga iaia.—1 Kori. 15:58.
[Au Tataanga Rikiriki i Raro]
a Inara kare e anoanoia te tapokianga upoko no te vaine, i te tutu aere anga mei tera are ki tera are, i te mea tei runga i te au Kerititiano ravarai te apainga kia tutu aere i te tuatua meitaki. Inara me no runga i etai tu ka anoanoia nana e rave te apii Puka Tapu i te ngutuare e tei reira tana tane (koia ra tona upoko, noatu rai me kare i te Kerititiano), ka tau aia kia tapoki i tona upoko. Pera katoa oki, penei, e tupu anga takitai ua ake, e mema tane tei akatapuia tetai no te putuputuanga te vaira i reira, iaia e rave ra i te apii Puka Tapu i te ngutuare tei akapapaia i mua ake, ka tau aia kia tapoki i tona upoko, mari ra e mea tau na tera mema tane e rave i te pure.
Uriuri Akaou Anga
● Eaa ta Iehova akaaerenga akara mataia i teia tuatau? Eaa tana akakoroanga?
● Koai te upoko akataoongaia no te putuputuanga? Na roto i teea akapapaanga akara mataia tana oronga mai anga i te arataki anga aroa no tatou?
● Eaa te tu akono tau meitaki ki te apainga e ki te aronga katoa oki i roto i te akaaerenga te ka tau kia tatanu tatou?