“Ei Kite No te Pa Enua Ravarai”

“E ei kite oki kotou noku . . . e tae ua atu ki te openga o te enua ra.”​—ANGAANGA 1:8.

1. I naea e iea te akarongo mua anga te au pipi i te totou tei tataia ia Mataio 24:14?

KUA kite meitakiia te au tuatua a Iesu tei tataia ia Mataio 24:14 e kua mou ngakau ia tatou e manganui te reira. E e totou umere tikai te reira! E akamanako ana i to te au pipi manako i to ratou akarongo mua anga i te reira! Ko te 33 T.N. te mataiti. Tae rai e e toru mataiti te kapiti atu anga te au pipi kia Iesu, e i teianei kua aru mai ratou iaia ki Ierusalema. Kua kite ana ratou i tana au temeio e kua akarongo atu ana ki tana au apii. Noatu e kua rekareka ratou i te au tuatua mou akaperepereia ta Iesu i apii atu kia ratou, kua kite meitaki tikai ratou e kare te katoatoa e mareka mai ana. E au enemi ririnui e te akakeu anga maata to Iesu.

2. Eaa te au kino e te au akaaoanga ta te au pipi ka aro atu?

² I runga i te Maunga o Oliveta, e a pipi tei noo i te pae ia Iesu, te akarongo meitaki anga iaia e tuatua maira no te au kino e te au akaaoanga e aere maira ta ratou ka aro atu. I mua atu ana, kua akakite ana a Iesu kia ratou e ka tamateia aia. (Mataio 16:21) I teianei kua akamarama atu aia e ka kite katoa ratou i te patoi anga kino. “Ei reira e tuku ei ia kotou no te mate, e ka tamate ravaia kotou,” i karanga ai aia. “E e makitakitaia mai kotou e te pa enua ravarai i toku nei ingoa.” Kare ko te reira ua. Ka akavare te au peroveta pikikaa i te manganui. Ka turori keia tetai papaki e ka pikikaa e ka makitakita i tetai e tetai. Ko tetai pae, te tika anga “te rai o te tangata” ra, ka akatika i to ratou anoano i te Atua e no tana Tuatua ra kia meangiti mai.​—Mataio 24:9-12.

3. Eaa ra ta Iesu au tuatua tei kiteaia ia Mataio 24:14 i riro ei e mea umere tikai?

³ No muri ua ake i te taiku mai anga i taua au turanga akamaroiroi kore anga ra i tuatua mai ei a Iesu i tetai tuatua i te akaumere anga i te au pipi ra. Kua karanga aia e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) Ae, te angaanga ta Iesu i akamata i Iseraela ra​—kia “akakite i te tuatua-mou”—​ka tere ua atu e ka akatotoaia i te ao katoa nei. (Ioane 18:37) E totou umere tikai! E akatotoa atu ei i taua angaanga ra ki te “pa enua ravarai” ka riro mai ei akaaoanga; te rave anga i te reira i te aro atu anga tikai i te ‘makitakita a te pa enua ravarai’ tei karangaia ra e e temeio tikai. Te akatupu anga i teia angaanga maata tikai kare e te akakaka ua maira i to Iehova tu ngateitei e te mana ra kareka katoa ra tona aroa, te akaaroa, e te akakoromaki. Kapiti atu, te oronga maira ki tona au tavini ra tetai atianga kia akaari atu i to ratou akarongo e te akamorianga.

4. Koai ma tei akakiteia atu e kia rave i te angaanga akakite anga, e eaa te akapumaana ta Iesu i oronga atu?

⁴ Kare ekoko anga e kua akaruke mai a Iesu ki roto i te au rima o tana au pipi ra tetai angaanga puapinga maata tikai. I mua ake ka kake atu ei aia ki te rangi, kua mama mai a Iesu kia ratou e kua karanga atura e: “Ka rauka ra to kotou mana i te Vaerua Tapu, kia aere mai aia i rungao ia kotou; e ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.” (Angaanga 1:8) E tikai, ka kapiti mai tetai pae kia ratou. Noatu rai, tokoiti ua rai te au pipi. Mei teaa ra te pumaana i te kite anga e ka akamaroiroi mai te vaerua tapu ririnui o te Atua ra ia ratou kia akaoti i teia tukuanga angaanga no ko mai i te Atua!

5. Eaa ta te au pipi kare i kite ana no runga i te angaanga akakite anga?

⁵ Kua kite te au pipi e kua akaueia mai ratou kia tutu aere i te tuatua meitaki e “e akariro i to te pa enua katoa ei pipi.” (Mataio 28:19, 20) Inara kare ratou i kite e mei teaa te meitaki me orongaia te akakite anga, e kare ratou i kite e aea ra te openga e tae mai ei. Kare katoa rai tatou. Na Iehova anake ra e akakite mai i teia au tumu nei. (Mataio 24:36) Me orongaia te akakite anga kia tau ki to Iehova merengo anga, nana e akakore i teia akatereanga o te au mea kino nei. Ei reira te au Kerititiano e kite ei e kua oti te angaanga tutu anga ta Iehova i akakoro maata maira. Kare roa taua au pipi mua i manako ana e eaa te maata me orongaia te akakite anga i teia tuatau openga nei.

Te Akakite Aere Anga i te Anere Mataiti Mua

6. Eaa tei tupu ana i Penetekote 33 T.N. e i muri ua ake i te reira?

⁶ I te anere mataiti mua, kua akatupu mai te angaanga tutu aere anga i te Patireia e te akariro anga i te tangata ei pipi ra i te au tumu anga umere. I te ra o Penetekote 33 T.N., mei te 120 pipi i roto i te pia i runga ia Ierusalema. Kua riringiia mai te vaerua tapu o te Atua ki rungao ia ratou, e kua oronga atu te apotetoro ko Petero i tetai tuatua te akataka ra i te aite anga o teia temeio, e kua riro mai etai 3,000 aronga irinaki e kua papetitoia. Ko te akamata anga ua te reira. Noatu te au tauta anga a te au arataki akonoanga kia tapu i te tutu aere anga o te tuatua meitaki ra, ‘kua kapitiia ïa e Iehova ki te au pipi ra te aronga i akaoraia ra kare e rā i tukua.’ Kare i roa ana, “ka rima atura paa tausani i te tangata kia tatau.” I muri ake i te reira, ‘e manganui rava atura ïa te aronga ra i akarongo i te Atu, tei kapiti mai kia ratou ra, te tane ma te vaine katoa oki.’​—Angaanga 2:1-4, 8, 14, 41, 47, akaaite ia NW; 4:4; 5:14.

7. Eaa ra te tauianga o Korenelio i riro ei e tupu anga puapinga maata?

⁷ Ko tetai mai tupu anga puapinga maata tei kiteaia mai i te mataiti 36 T.N.​—te tauianga e te papetitoia anga o Korenelio, e tangata Kenitara. I te arataki atu anga i te apotetoro ko Petero ki teia tangata tei mataku i te Atua ra, kua akakite atura a Iehova e ko ta Iesu akauenga ra kia “akariro i to te pa enua katoa ei pipi” kare i kotinga uaia ki te ngati Iuda i roto i te au enua ke ke. (Angaanga 10:44, 45) Eaa ra te manako o te aronga te rave ra i te arataki anga? Te kite anga te au apotetoro e te aronga pakari i Iudea e kia apaina katoaia atu te tuatua meitaki ki te au tangata o te pa enua ra​—ki te tangata kare i te ngati Iuda—​kua akakaka atura ratou i te Atua. (Angaanga 11:1, 18) I taua taime ra, kua uua mai te angaanga tutu anga mei roto mai i te ngati Iuda. I etai au mataiti i muri mai, penei ua ake mei te 58 T.N., tei kapitiia atu ki te aronga irinaki Kenitara ra ko “te ngati Iuda akarongo nei e manganui i te tausani.”​—Angaanga 21:20.

8. Akapeea te tuatua meitaki i te akakeu anga i te au tangata tataki tai?

⁸ Noatu e mea umere te au ripoti no runga i te au numero o te au tangata i roto i te au Kerititiano o te anere mataiti mua, auraka rava e ngaropoina ia tatou e te akatutu tikai maira teia numero nei i te au tangata. E ririnui te karere o te Pipiria ta ratou i akarongo ana. (Ebera 4:12) Kua taui takiri te reira i te au oraanga o te aronga tei ariki mai i te reira. Kua akono meitaki te au tangata tataki tai i to ratou oraanga, kua akakakau i te tu tangata ou, e kua akaongi atura i te Atua. (Ephesia 4:22, 23) Te tika ra te reira i teia tuatau. E te aronga tei ariki mai i te tuatua meitaki ra e manakonako anga umere pouroa to ratou no te ora e mutu kore ua atu.​—Ioane 3:16.

Au Oa Rave Angaanga ma te Atua

9. Eaa ra te akangateitei anga e te apainga ta te au Kerititiano mua i kite e tei ia ratou?

⁹ Kare te au Kerititiano mua i rave mai ana i te akameitaki anga no tei akatupuia. Kua kite ratou e ta ratou angaanga ei au orometua ra kua turuia e te ‘mana o te vaerua tapu.’ (Roma 15:13, 19) Ko Iehova te tumu tikai no te tupu anga i te pae vaerua. I taua taime rai, kua kite taua au Kerititiano ra e tei ia ratou te akangateitei anga e te apainga kia riro mai ei ‘oa rave angaanga no te Atua.’ (1 Korinetia 3:6-9) Tei tupu mai, e kia rotai ki ta Iesu akoanga, kua uapou ua atu ratou ia ratou uaorai i roto i te angaanga tei tukunaia mai kia rave ratou.​—Luka 13:24.

10. Eaa te au tauta anga ta etai au Kerititiano mua i rave ana i te oronga anga i tetai akakite anga ki te pa enua ravarai?

¹⁰ Ei “aposetolo a te etene,” e tauatini ua atu kiro mita to Paulo tere aere anga i runga i te enua e te tai, i te akamata anga i te au putuputuanga e manganui i roto i te ngai i Roma o Asia e i roto ia Ereni. (Roma 11:13) Kua aere katoa atu aia ki Roma e penei ua ake ki Paniora katoa. I taua taime ra, kua aere katoa atu te apotetoro ko Petero, tei iaia te apainga kia akakite aere i “te evangelia . . . [i tei] peritome ra,” ki tetai ngai ke atu kia angaanga i Babulonia, e ngai puapinga maata no te Akonoanga ngati Iuda i taua tuatau. (Galatia 2:7-9; 1 Petero 5:13) I roto i te aronga ke e manganui tei angaanga ana i roto i te angaanga a te Atu ra ko taua au vaine ra mei ia Teruphaina e Teruphosa. Ko tetai ake vaine, ko Peresi te ingoa, kua karangaia ana e kua “rave papu i te angaanga a te Atu nei.”​—Roma 16:12.

11. Akapeea a Iehova i te akameitaki anga i te au tauta anga a te au pipi?

¹¹ Kua akameitaki tikai a Iehova i te au tauta anga a taua aronga ra e a tetai aronga angaanga maroiroi ke atu. Kare i pou ake te 30 mataiti i muri ake te akakite anga a Iesu e ka raveia tetai akakite anga ki te pa enua ravarai, kua tata a Paulo e ko te “evangelia nei” kua “akakiteia akenei ki te tangata ravarai i raro ake i teianei rangi.” (Kolosa 1:23) Kua tae mai ainei i reira te openga? I roto i tetai tu, ae. Kua tae mai te reira i rungao i te akatereanga o te au mea ngati Iuda i te mataiti 70 T.N. te akapou anga te au vaeau Roma ia Ierusalema e i te iero katoa. Inara, kua akakoro katoa a Iehova e ka orongaia tetai akakite anga maata rava i mua ake ka apai mai ei aia i te openga ki to Satani akatereanga o te au mea nei i te ao katoa.

Te Akakite Anga tei Orongaia i Teia Tuatau

12. Akapeea te Aronga Apiipii Pipiria o mua ana i te marama anga i te akauenga kia tutu aere ra?

¹² I te tuanga openga o te 19 anere mataiti, i muri ake i tetai tuatau roa te autu anga te akonoanga apoteiti ra, kua akanoo akaouia te akamorianga ma. Kua marama tikai te Aronga Apiipii Pipiria, tei kiteaia e ko te Au Kite o Iehova i tera taime, i te akauenga e kia akariroia te au tangata ravarai o te enua ra ei pipi. (Mataio 28:19, 20) Tae anga ki te mataiti 1914, mei te 5,100 tei piri maroiroi atu ki roto i te angaanga tutu aere anga, e kua itaeia e te tuatua meitaki ra mei etai 68 enua. Inara, kare taua Aronga Apiipii Pipiria o mua ana i marama tikai ana i te aite anga o Mataio 24:14. Tae anga ki te openga o te 19 anere mataiti, ko te Pipiria ra, tei roto i reira te tuatua meitaki, me kore te evangeria, kua uriia e kua neneiia e tetai au taiate Pipiria ki roto i te au reo e manganui e kua tuaia takapini i te ao katoa nei. No reira, no etai ngauru mataiti, kua uriuri te Aronga Apiipii Pipiria e kua oronga takereia tetai akakite anga ki te pa enua ravarai.

13, 14. Eaa te akamarama anga taka meitaki no te anoano e te akakoroanga o te Atua tei orongaia mai i roto i tetai itiu o The Watch Tower i te 1928?

¹³ Kua oronga marie mai a Iehova i tetai akamarama anga taka meitaki ki tona au tangata no tona anoano e te akakoroanga. (Maseli 4:18) Te karanga ra The Watch Tower o Titema 1, 1928, e: “Ka rauka ainei ia tatou i te karanga e kua akatupu [te] tuaanga o te Pipiria ra i te tutu aere anga tei akakiteia mai no te evangeria o te patireia ra? Papu e kare! Noatu teia tuaanga o te Pipiria ra te anoanoia ra rai e te pupu meangiti o te au kite o te Atua i te enua nei ra i te nenei i te au puka te akataka maira i to te Atua [akakoroanga] e kia atoro atu i te au are tei akarukenaia ana teia au Pipiria nei. Me kare oki ka vai kite kore ua te au tangata no runga i te akanoo anga o te kavamani o te Mesia i to tatou tuatau nei.”

¹⁴ Kua akakite katoa mai taua itiu o The Watch Tower e: “I te 1920, . . . kua marama mai te Aronga Apiipii Pipiria i te totou tikai a to tatou Atu te vai ra i roto ia Mataio 24:14. Kua kite mai i reira ratou e ko ‘teia evangelia’ te ka tutu aereia i te ao katoa ra ei akakite anga ra ki te au Kenitara me kore ki te pa enua ravarai ra, kare e e evangeria no tetai patireia kare i tae mai ake mari ra e evangeria tei akakite tikai mai e kua akamata te Ariki Mesia ra i tana tutara anga i rungao i te enua nei.”

15. Akapeea te angaanga akakite anga i te akatotoaia anga mei te 1920?

¹⁵ Kare taua “pupu meangiti o te au kite” i te 1920 i vai meangiti ua ana. I te au ngauru mataiti ka aereia mai, kua akatakaia mai e kua akamataia te “aronga maata rava” o te “mamoe ke atu” i te akaputuia mai. (Apokalupo 7:9; Ioane 10:16) I teia tuatau, te vai ra e 6,613,829 aronga akakite i te tuatua meitaki i roto i te 235 enua. E akatupu anga umere tikai no te totou! Kare rava “te evangelia o te basileia nei” i tutu aereia ana i mua ana i roto i tetai tuanga maata. Kare rava i tetai tuatau i aite ana te maata o te au tavini akarongo mou o Iehova i runga i te enua nei.

16. Eaa ra tei akatupuia i te mataiti tavini anga i topa akenei? (E akara i te tiati i te kapi 27-30.)

¹⁶ Kua rave kapiti teia urupu maata o te Au Kite i te angaanga maata i te mataiti tavini anga 2005. Kua tere atu e pirioni au ora tei akapouia i te akakitekite anga i te tuatua meitaki i roto i te 235 enua. E mirioni ua atu te au atoro akaou anga tei raveia, e kua raveia e mirioni ua atu au apii Pipiria. Na te Au Kite o Iehova i akatupu i teia angaanga, tei oronga rangatira ua mai i to ratou taime e te au apinga kia oronga atu i te Tuatua a te Atua ki tetai ke. (Mataio 10:8) Na roto i tona vaerua tapu e te ririnui, te akamaroiroi nei rai a Iehova i tona au tavini kia akatupu i tona anoano.​—Zekaria 4:6.

Angaanga Pakari Anga i te Oronga Anga i Tetai Akakite Anga

17. Akapeea te au tangata o Iehova i te ariu anga ki te au tuatua a Iesu no runga i te tutu aere anga i te tuatua meitaki?

¹⁷ Noatu e vaitata e 2,000 mataiti i topa i to Iesu tuatua anga e ka tutu aereia te tuatua meitaki, kare akerai i meangiti mai te maroiroi o te au tangata o te Atua no te angaanga. Kua kite tatou e na roto i to tatou tamou marie anga i te raveanga i te mea meitaki, te akaata ra tatou i to Iehova ra au tu no te aroa, akaaroa, e te akakoromaki. Mei iaia rai, kare tatou e inangaro i tetai ua atu kia tamateia inara te inangaro ra i taua tangata ra kia tataraara e kia akaongi atu kia Iehova. (2 Korinetia 5:18-20; 2 Petero 3:9) Kua akamaroiroiia e te vaerua o te Atua, te akakite maroiroi nei te Au Kite o Iehova i te tuatua meitaki ki te openga o te enua. (Roma 12:11) Tei tupu mai, te ariki maira te au tangata i te au ngai ravarai i te tuatua mou e te aru ra i ta Iehova aratakianga aroa. E akamanako ana i tetai au akaraanga tokoiti ua.

18, 19. Eaa te au tupuanga ka rauka ia koe i te akakite mai no etai tei ariu mareka mai ki te tuatua meitaki?

¹⁸ E tangata tanutanu a Charles i Kenia opunga. I te 1998 kua oko atu aia mei te 8,000 kiro avaava e kua orongaia tetai pepa i te tapaia anga aia ra ko te Tangata Tanutanu Avaava Meitaki Roa Atu. I taua taime rai, kua akamata aia i te apii i te Pipiria. Kare i roa ana kua kite mai aia e ko tetai tangata te piri atura ki roto i te maani anga i te avaava te aati ra i ta Iesu akauenga kia aroa atu i to tetai tangata tupu ra. (Mataio 22:39) I tona kite anga e ko ‘te tangata tanutanu avaava meitaki roa atu’ ‘te tangata ta kino roa atu’ tikai ra, kua pipi a Charles i tana ngai tanutanu anga avaava ki te poitini. Kua tere atu aia ki mua ki te akatapuanga e te papetito anga e i teianei e painia tamou e e tavini orometua.

¹⁹ Kare ekoko anga e te akangaueue nei a Iehova i te pa enua na roto i te akakite anga tei orongaia i te ao katoa, e ko te au mea tei inangaroia—​te au tangata ra​—te aere mai nei ki roto. (Hagai 2:7) Kua tomo atu a Pedro, te noo ra i Potukara, ki roto i tetai ngai apii anga te tae anga tona mataiti ki te 13. Tona akakoroanga ra kia riro mai ei mitinari e te apii atu i te Pipiria. Inara, i muri ua ake i te reira, kua akaruke aia i te ngai apii anga no te mea kare te Pipiria e apiiia ana i roto i tona pupu apii. E ono mataiti i muri mai te apii ra aia i te apiianga i te pae manako i ko i tetai apii teitei i Lisbon. E noo ana aia ma tona aniti, ko tetai Au Kite o Iehova, tei akamaroiroi atu iaia kia apii i te Pipiria. I taua taime ra, kare i papu ana ia Pedro e te vai ra te Atua, kare katoa i rauka iaia i te iki e me ka apii i te Pipiria me kare ra. Kua tuatua atu aia ki tona poropeta no te apii i te pae manako no runga i te tu papu kore. Kua karanga te poropeta e te apii ra te apiianga i te pae manako e ko te au tangata kare e rauka ana i te rave i te au ikianga ra e aronga akakino tikai ia ratou uaorai. No reira, kua iki papu a Pedro i te rave i tetai apii Pipiria. Koi papetitoia akenei aia e i teianei te rave katoa ra aia i te au apii Pipiria.

20. No teaa ra tatou ka rekareka ai e te oronga maataia nei tetai akakite anga ki te pa enua?

²⁰ Kare tatou i kite ake e mei teaa te atea te orongaia anga te akakite anga ki te pa enua, e kare katoa tatou i kite i te ra e te ora me tae mai te openga. Kua kite ua tatou e kare e roa atu ana. Te rekareka nei tatou e te tutu maata aere anga i te tuatua meitaki ra e ko tetai uaia au akakite anga e manganui e te vaitata maira te tuatau e mono ei te Patireia o te Atua i te au kavamani a te tangata. (Daniela 2:44) I te au mataiti e topa ra, te orongaia nei ki te au mirioni ua atu tetai atianga kia akarongo mai ki te tuatua meitaki, e te akakaka ra teia i to tatou Atua, ko Iehova. Kia riro ua rai te reira ei tauta anga na tatou kia vai akarongo mou e kia angaanga maata i te pae i to tatou au taeake i te ao katoa nei i roto i te angaanga no te akakite anga ki te pa enua ravarai. Na te rave anga i te reira, ka akaora tatou ia tatou uaorai e te aronga te akarongo maira kia tatou.​—1 Timoteo 4:16.

Maara Ainei ia Koe?

• Eaa ra a Mataio 24:14 i riro mai e e totou umere tikai?

• Eaa te au tauta anga ta te au Kerititiano mua i rave ana i roto i te tutu aere anga, e eaa ra tei tupu mai?

• Akapeea te Aronga Apiipii Pipiria te marama anga mai kia akakite aere ki te pa enua ravarai?

• I te akamanako anga i te au angaanga a te au tangata a Iehova i te mataiti tavini anga i topa akenei, eaa te mea te akaumere ra ia koe?

[Mapu/Au Tutu i te kapi 25]

E tauatini ua atu kiro mita to Paulo tere aere anga i runga i te enua e te tai i te tutu aere anga i te tuatua meitaki

[Tutu i te kapi 24]

Na Iehova i arataki ia Petero kia akakite atu kia Korenelio e ki tona ngutuare tangata