Kia Matakite i Taau e Apii Ra

“Kia matakite ia koe, e taau e apii ra; e tamou tika rai i te reira: tei te akapera oki e oraʼi koe, e te aronga katoa e akarongo mai ia koe ra.”​—1 TIMOTEO 4:16.

1, 2. Eaa ra i umuumu rapurapuiai te au puapii totomapu i teia tuatau nei?

“KA AERE . . . e akariro i to te pa enua katoa ei pipi, . . . ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20) No teianei akauenga a Iesu Karaiti, ka tika e kia tau te au Kerititiano mou katoatoa kia riro ei au puapii. Te anoanoia ra te au puapii totomapu kia tauturu i te aronga ngakau tiratiratu kia kite i te Atua i mua ake ka tureiti ei. (Roma 13:11) Kua raurau maira te apotetoro ko Paulo: “E akakite ua koe i te tuatua; kia tamou marie rai, i te atianga tau, e te atianga tau kore.” (2 Timoteo 4:2) No teia te anoanoia ra te apii anga i roto e i vao i te putuputuanga. Ko te tika, te o atura ki te angaanga tutu aereanga e maata atu i te akakitekiteanga anake i te tuatua a te Atua ra. Te anoanoia ra te apiianga meitaki e kia riro mai te aronga inangaro ei au pipi.

² Te noo nei tatou i te tuatau “tupu te kino maata.” (2 Timoteo 3:1) Kua akavareia te au tangata na te au apiianga a te tangata e te au apiianga pikikaa. E manganui tei roto i te “manako akapoiriia” e kua “kite kore i te akama.” (Ephesia 4:18, 19) E au mamae manako ngakau kino to tetai papaki. Ae, e tika tikai, no te mea “kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) Inara, na te raveanga i te apii marie anga atu, ka rauka ia tatou kia tauturu atu i te aronga ngakau tiratiratu ra kia rave i te au tauianga te umuumuia ra.

Au Puapii i Roto i te Putuputuanga

3. (a) Eaa ra te kapitiia ra ki ta Iesu akauenga kia apii? (e) Tei iaai te apainga maata kia apii i roto i te putuputuanga ra?

³ Na te akanoonoo anga i te apii Pipiria i te ngutuare, kua rauka i te au mirioni ua atu te apiianga tataki tai. Inara, i muri ake i to ratou papetito anga, te umuumuia ra te tauturu anga tere atu no te aronga ou “kia akaia [ratou], e kia akatumuia i te inangaro.” (Ephesia 3:17) Ia tatou ka rave i ta Iesu akauenga tei tataia ra ia Mataio 28:19, 20 e te arataki ra i te aronga ou ki ta Iehova akaaerenga, ka puapinga ratou me apiiia mai i roto rai i te putuputuanga ra. Kia tau ki ta Ephesia 4:11-13, kua akataoongaia te au tangata kia tavini “ei tiaki, e ei orometua; Ei akatau i te aronga tapu, no te angaanga orometua, kia meitaki oki te kopapa o te Mesia ra.” I tetai taime, te o maira ki ta ratou apii marie anga atu te anoano kia “akakite ua i te apa, e ako atu, e akamaroiroi atu, ma te akakoromaki maata e te apii marie anga atu.” (2 Timoteo 4:2) No te puapinga maata o te angaanga a te au puapii ra no reira, i te tataanga ki to Korinetia ra, kua akapapa maira Paulo i te orometua i muri ua ake i te au apotetoro e te au peroveta ra.​—1 Korinetia 12:28.

4. Akapeea te kite i te apii ra i te tauturu anga ia tatou kia rave i ta Paulo akamaroiroi anga tei tataia ra ia Ebera 10:24, 25?

⁴ E tika, kare ko te au Kerititiano katoatoa ra ka tavini ei aronga pakari me kare ei au akaaere. Tera ra, te akamaroiroi katoatoaia ra “kia maata te aroa, e i te angaanga memeitaki ra.” (Ebera 10:24, 25) I te raveanga i te reira i te au uipaanga te o maira i te au pauanga papa meitaki no te ngakau maira te ka apii e ka akamaroiroi oki i etai atura. Penei katoa oki ka akamaroiroi atu te au papuritia Patireia kite ra ‘i te angaanga memeitaki ra’ na te akakiteanga i to ratou kite e te karape ma te aronga ou ra i te angaanga kapitianga ma ratou katoa i te angaanga tutu aereanga. I taua au taime e tetai au tuatau kare i akapapaia ka rauka ua te tuaanga i te apiianga puapinga. Ei akatauanga, te raurauia ra te au vaine pakari kia riro “ei aronga apii atura i te tuatua memeitaki.”​—Tito 2:3.

Akakeuia kia Irinaki

5, 6. Akapeea te tuke anga o te Kerititiano mou ma te akamori pikikaa ra? (e) Akapeea ta te aronga pakari tauturu anga i te aronga ou ra kia rave i te au ikianga pakari?

⁵ No reira te tuke takiri ra te akonoanga Kerititiano mou ma te au akonoanga pikikaa ra, e manganui ia ratou te kimi ra i te akatere i te manako o to ratou au mema. Ia Iesu i te enua nei, kua kimi te aronga arataki akonoanga ra kia akatere vaitata i te au turanga ravarai o te oraanga tangata na roto i te au peu takinga kino tei maaniia e te tangata nei. (Luka 11:46) E putuputu te au orometua o Kerititome i te rave aiteite i te reira.

⁶ Inara, ko te akamori mou, e ‘akamori tapu’ ia ta tatou e oronga ra ma ‘te tau oki’ ia tatou. (Roma 12:1) Te “akakeuia ra kia irinaki” te au tavini o Iehova ra. (2 Timoteo 3:14, NW) I etai taime, penei ka umuumuia te aronga arataki ra kia akono i etai au kaveinga e te au ravenga no te taangaanga meitaki i te putuputuanga. Inara kare e kia kimi i te rave i te au iki anga no te au taeake Kerititiano ra, ka apii atura te aronga pakari ra kia kite ratou “i te meitaki e te kino.” (Ebera 5:14) Ka rave te aronga pakari i teia na te akamatutuanga i te putuputuanga ma “te tuatua i akarongoia nei, i taua tuatua meitaki” ra.​—1 Timoteo 4:6.

Kia Matakite i Taau e Apii Ra

7, 8. (a) Akapeea te au tangata e meangiti ua te kite i raukai kia tavini ei au puapii? (e) Eaa te akakite maira e te umuumuia ra te tauta anga na tetai kia riro ei puapii meitaki?

⁷ Inara, e oki akaou tatou, ki ta tatou angaanga apii ra. Te umuumuia ra ainei etai au tu karape taka ke, te kite apiianga, me kare te au kite raveanga i teia angaanga? Kare e umuumuia. No te tuanga maata, te raveia nei teia angaanga apiianga i te ao katoa e te aronga tangata noa nei kare i kite maata. (1 Korinetia 1:26-29) Te akataka maira Paulo: “Te āriki nei ra matou i taua apinga nei [i te angaanga orometua] i te āriki karakaraea nei [au kopapa apa ua nei], kia riro te mana maata meitaki nei ki te Atua, auraka kia matou.” (2 Korinetia 4:7) Ko te puapinga maata tei rekarekaia i te angaanga tutu aereanga Patireia i te ao katoa nei e akakiteanga ia i te mana o te vaerua o te Atua ra!

⁸ Inara, te anoanoia ra te tauta anga pakari a tetai ra kia riro “ei rave angaanga kare e akama anga, e te tika oki i te tua i te tuatua-mou ra.” (2 Timoteo 2:15) Kua raurau atura Paulo ia Timoteo: “Kia matakite ia koe, e taau e apii ra; e tamou tika rai i te reira: tei te akapera oki e oraʼi koe, e te aronga katoa e akarongo mai ia koe ra.” (1 Timoteo 4:16) Akapeea tikai tetai i te matakite anga i tana apiianga, me i roto me kare i vao i te putuputuanga? Na te raveanga i te reira te umuumuia ra ainei etai au kite karape me kare te au ravenga apiianga?

9. Eaa tei puapinga maata roa atu i te au kite matauia ra?

⁹ Kua akakite tika maira Iesu i tetai mou anga meitaki roa no te au ravenga apiianga i tana Tuatua rongonui i runga i te maunga ra. I te oti anga tana tuatua anga, “kua va ua te tangata i tana tuatua.” (Mataio 7:28) Inara, kare e rauka i tetai o tatou nei kia apii meitaki mei ta Iesu i rave ra. Inara, kare tatou e umuumuia kia riro ei aronga karape i te tuatua anga kia riro e ei au puapii meitaki. No teaa ra, kia tau ki ta Iobu 12:7, noatu rai ko “te au puaka” e “te au manu o te reva nei” ka rauka kia apii muteki ua mai! Kapiti atu ki etai au kite matauia me kare te au tu karape o tatou, ko te mea puapinga tikai koia oki e ‘mei te aa ra to tatou tu e tikaʼi’​—eaa te au tu tau tei ia tatou e te au ravenga i te pae vaerua ta tatou i tatanu te ka rauka i te aronga apiiia kia aru.​—2 Petero 3:11; Luka 6:40.

Aronga Apiipii i te Tuatua a te Atua

10. Akapeea ta Iesu ra akanoo anga i tetai akatauanga meitaki e ko tetai tei apiiia ra i te Tuatua a te Atua?

¹⁰ Ka tika tetai puapii meitaki i te au tuatua mou o te Tuatua Tapu kia riro ei tangata apiipiiia i te Tuatua a te Atua. (Roma 2:21) Kua akanoo maira Iesu Karaiti i tetai akatauanga meitaki i teianei tu. I te tuatau o tana angaanga orometua, kua taiku a Iesu me kare kua akakite i te au manako tei aiteite atura ki te au tataanga e vaitata i te apa o te au puka no te au Tuatua Tapu Epera ra.a Kua kiteaia tona kiteanga i te Tuatua a te Atua ra iaia e 12 mataiti, i tona kitea anga “te noo ra i rotopu i te au orometua, te akarongo atura e te ui atura kia ratou.” (Luka 2:46) Ei tetai kua pakari, ko te mea matauia no Iesu e kua aere aia ki te tunako, te ngai i tatauiai te Tuatua a te Atua ra.​—Luka 4:16.

11. Eaa te au ravenga meitaki no te apii te ka tau tetai puapii kia tatanu?

¹¹ Ko koe ainei tetai tei maroiroi i te tatau i te Tuatua a te Atua ra? Na te koanga ki roto i te reira “ei reira koe e kite ei i te mataku ia Iehova, e e rauka ia koe te kite i te Atua.” (Maseli 2:4, 5) No reira e akatupu i te au ravenga meitaki no te apii. E tamata i te tatauanga i tetai tuanga o te Tuatua a te Atua ra i te au ra ravarai. (Salamo 1:2) E akariro e ei tu matau kia tatau i te itiu tataki tai o Te Punanga Tiaki e te Awake! me rauka ua maira. Kia tamanako matariki i te au uipaanga putuputuanga ra. E apii kia rave i te kimikimi anga matakite. Na te apiianga i te kimi ‘kia kitea puia e koe te au tuatua katoa,’ ka rauka ia koe kia kopae atu i te au akamaata anga e te au tarevake me ka apii atu koe.​—Luka 1:3.

Aroa e te Akangateitei no te Aronga tei Apiiia Ra

12. Eaa to Iesu ra tu akono ki tana au pipi?

¹² Ko tetai atu tu puapinga maata ko te tu akono i te aronga taau e apii atura. E manako riri to te au Pharisea no te aronga tei akarongo atura kia Iesu. “Teianei au tangata tei kore i kite i te ture nei, kua taumaaia ïa.” (Ioane 7:49) Inara e aroa oonu to Iesu e te akangateitei oki no tana au pipi. Kua tuatua aia: “Kare atura au e karanga kia kotou e, e tavini; kare oki te tavini i kite i ta tona pu e rave ra: kua karanga ra au kia kotou e, e oa; kua akakite oki au kia kotou i te au tuatua ravarai taku i kite i taku Metua ra.” (Ioane 15:15) Na teia i akakite e akapeea te au pipi a Iesu ra i te rave anga tau i ta ratou angaanga apiianga ra.

13. Akapeea to Paulo ra manako ngakau no tana aronga i apii atura?

¹³ Ei akatauanga, kare a Paulo i tamou marie i tetai pirianga anu mei te pitiniti rai ma tana aronga i apii ra. Kua tuatua aia ki to Korinetia: “Raungauru ua atu rai i te tausani anga o to kotou orometua i te Mesia nei, kare e rainga to kotou metua: naku oki kotou i anau ei pipi na te Mesia ra na Iesu, i te evangelia nei.” (1 Korinetia 4:15) I etai taime, kua akatae roimata a Paulo iaia e akamaroiroi ra i te aronga tana i apii atu ra! (Angaanga 20:31) Kua akakite katoa aia i te akakoromaki maata e te takinga meitaki. No reira kua rauka iaia te tuatua atu ki to Tesalonia: “I maru ua ra matou i rotopu ia kotou: mei te metua i matuapuru i tana tamariki.”​—1 Tesalonia 2:7.

14. Eaa ra tetai manako atu anga i ta tatou e apii atura i te Pipiria i puapinga maatai? E Akatutu mai.

¹⁴ Te aru ra ainei koe ia Iesu raua ko Paulo? Ko te aroa ngakau tae no ta tatou aronga e apii ra ka maata atu te akaki anga no tetai ua atu ngere anga i te au tu kite penei te vaira ia tatou. Te kite ra ainei ta tatou aronga e apii Pipiria ra e e manako ngakau tae to tatou kia ratou tataki tai? Te akataka ra ainei tatou i tetai tuatau kia akamatau atu ia ratou ra? I te tupu anga te tu ngata ki tetai vaine Kerititiano i te tauturu anga i tetai tei apiipiiia ra kia tere ki mua i te pae vaerua, kua ui takinga meitaki atura aia: “E apinga ainei tetai te tamanata maira ia koe?” Kua akamata taua vaine ra i te riringi mai i tona ngakau, ma te akakite anga i etai au tu taitaia e te au apiapi oki. Kua riro taua uriuri anga manako aroa ra ei tetai ariu ke anga no taua vaine ra. I taua au atianga e mea tau te au manako Tuatua Tapu e te au tuatua pumaana e te akamaroiroianga. (Roma 15:4) Inara, e tuatua akamatakite tetai: Penei te tere viviki ra ki mua tetai te apiiia ra i te Pipiria mari ra penei te vaira etai au tu no te akaruke kare ra i tau i te Kerititiano. No reira penei kare i te pakari kia piri vaitata roa e kia oaoa ma taua tangata ra. Ka tau te au kotinga Kerititiano tika kia tamou marieia.​—1 Korinetia 15:33.

15. Akapeea ka raukai ia tatou kia akakite i te ngateitei no ta tatou e apii atura i te Pipiria?

¹⁵ Te akangateitei i ta tatou aronga e apii ra te kapiti ra i te kore anga tatou e tauta kia akatere i to ratou oraanga tataki tai. (1 Tesalonia 4:11) Ei akatauanga, penei te apii ra tatou ma tetai vaine te noo ra ma tetai tangata kare ra raua i akaipoipoia. Penei kua anau e tamariki na raua. I te rauka anga te kite tika i te Atua, kua anoano te vaine ra kia akatikatika i tona tu ma Iehova ra. (Ebera 13:4) Ka tau ainei aia kia akaipoipo i taua tangata ra me kare kia akataka ke mai iaia ra? Penei ka manako ngakau ketaketa tatou e ko te akaipoipoanga i tetai tangata e meangiti ua me kore kare ua e manako pae vaerua ka arairai i tona tereanga ki mua i te tuatau ki mua ra. I tetai pae, penei ka manako taitaia tatou no te meitaki o te tamariki e ka manako e e meitaki ake aia kia akaipoipo iaia ra. I tetai ua atu tupu anga, e akangateitei kore e te aroa kore oki kia o atu ki roto i te oraanga o tei apiiia ra e kia tauta i te oronga i ta tatou uaorai manako anga i taua au tumu ra. No te mea, koia te ka tika kia noo ma te au tupu anga no taua iki anga ra. Kare ainei i te mea meitaki i reira, kia tereni atu i taua vaine apiiia ra kia taangaanga i tona uaorai ‘matau i kite ei tona ngakau’ e kia iki nana uaorai eaa tana ka rave?​—Ebera 5:14.

16. Akapeea e raukai i te aronga pakari te akakite i te aroa e te ngateitei no te anana a te Atua ra?

¹⁶ E mea puapinga maata no te aronga pakari o te putuputuanga kia akono i te anana ra ma te aroa e te ngateitei oki. I te tataanga kia Philemona, kua tuatua Paulo: “E teianei, tika ua rai iaku i te Mesia nei kia akaue atu ia koe i te mea tau, no te aroa ra i tuatua meitaki ua atu ei au ia koe.” (Philemona 8, 9) I etai tuatau, penei ka tu mai etai au turanga manamanata i roto i te putuputuanga ra. Penei ka umuumuia te tu ngaueue kore. Kua raurau atu Paulo kia Tito “e ako viviki ua atu koe [i te aronga rave tarevake], kia tika to ratou akarongo i te tuatua nei.” (Tito 1:13) Noatu rai, ka tika te aronga akaaere kia matakite auraka kia tuatua aroa kore ki te putuputuanga. “Kare oki te tavini o te Atu nei e tika kia māro;” ta Paulo i tata, “kia maru ra aia i te tangata katoa nei, e te tau oki kia apii ia etai ke, e te akakoromaki marie.”​—2 Timoteo 2:24; Salamo 141:3.

17. Eaa te tarevake ta Mose i rave, e eaa ta te aronga pakari te ka kite mai i te reira?

¹⁷ Ka tika te au akaaere kia akamaaraara tamou ia ratou uaorai e te akono ra ratou i “te anana a te Atua.” (1 Petero 5:2) Noatu rai te taakaaka o Mose, kua poto ua te ngaro keanga teia tu. To Iseraela “kua akaongoongo oki ratou i tona ngakau, i tuatua tau kore ei tona vaa.” (Salamo 106:33) Kua mareka kore tikai te Atua i teianei akono kinoanga i Tana anana, noatu rai e e mamao ke atu ratou i te tiama. (Numero 20:2-12) Me aro atu ma te akaaoanga aiteite i teia tuatau nei, ka tau te aronga pakari kia tauta i te apii e te ako ma te kite oonu e te takinga-meitaki. Te akarongo meitaki maira to tatou au taeake me ka akonoia ratou ma te manako meitaki e ei aronga tataki tai te umuumu tauturu ra, kare e mei te aronga kare e rauka kia rapakauia. Ka tau te aronga pakari ra kia tamou marie i te manako tau mei to Paulo ra i tana tuatua anga: “E te irinaki nei matou i te Atu ia kotou, e te rave na kotou e ka rave rai kotou, i ta matou e akaue atu ia kotou na.”​—2 Tesalonia 3:4.

Akono kia Tau i tei Umuumuia no Ratou

18, 19. (a) Akapeea te akono tau na tatou i te au umuumu anga no te aronga apiiia ra i te Pipiria ma te au kite kotingaia ra? (e) Penei ka akapeea tatou i te tauturu anga i te aronga apiiia te kite ra i te tu ngata ma etai au tumu ra?

¹⁸ Te mareka ra te puapii meitaki kia akatau atu ki te au tu kite e te au kotinga oki o tana e apii atu ra. (Akaaite ia Ioane 16:12.) I ta Iesu akatutu anga no te au tareni, kua oronga atura te pu i “tei tau katoa i aua nga tangata ra.” (Mataio 25:15) Ka rauka ia tatou kia aru i te akaraanga aiteite me te akono ra i te au apii anga Pipiria. Te mea matauia, e mea anoanoia kia oti tetai puka akatumuia ra ki runga i te Pipiria i tetai tuatau poto tei tau ra. Inara, ka tika kia akamanakoia, e kare te katoatoa i tu katau i te tatauanga me kare te kite kia akono viviki i te au manako ou ra. No reira, ka anoanoia te kite karape e aea e neke atu mei tetai manako ki tetai apii anga me te ngata ra te aerenga o te aronga tataki tai kia aru atu i tetai apiianga viviki. E maata atu te puapinga kia tauturu i te aronga apiiia kia kite i te aiteanga o ta ratou e apii ra i to te maata te ngai i oti i tetai apiianga akanooia ra.​—Mataio 13:51.

¹⁹ Ka rauka katoa kia tuatuaia te reira no te aronga apiipiiia ra i te Pipiria tei kite ra i te tu ngata no etai tumu mei te Toru Tai ra me kare te au orote akonoanga ra. Noatu me ko te mea matauia e kare e umuumuia kia kapitiia atu tetai kimikimi anga apinga i ta tatou au apii, penei i etai atianga ka rave tatou i te reira me ka taka meitaki e e puapinga ia. E mea tau kia akonoia te manako anga meitaki kia kore e taroaroa puapinga kore ua i te tere anga o tetai te apiiia ra ki mua.

Kia Oraora!

20. Akapeea ta Paulo akanoo anga i tetai akatauanga i te akakiteanga oraora e te irinaki anga i tana apiianga?

²⁰ “Kia maroiroi oki te ngakau,” ta Paulo i tuatua. (Roma 12:11) Ae, me te akono ra tatou i tetai apii Pipiria i te ngutuare me kare te rave kapiti ra i tetai tuanga i te uipaanga putuputuanga, ka tau tatou kia rave i te reira ma te totomapu e te oraora oki. Kua tuatua a Paulo ki to Tesalonia: “Kare ta matou evangelia i tae tuatua vaa ua atu ia kotou na, ma te mana katoa ra, e na te Vaerua Tapu, e ma te kite pu tikai.” (1 Tesalonia 1:5) No reira kua oronga atu Paulo ratou ko tona au oa “i te evangelia a te Atua ia kotou na, e auraka oki i te reira anake ko [ratou] katoa uaorai oki.”​—1 Tesalonia 2:8.

21. Akapeea e raukai ia tatou kia tamou marie i tetai tu akono oraora ki ta tatou au angaanga apiianga ra?

²¹ Te aere maira te oraora tika tikai mei te irinaki anga ngaueue kore e te anoanoia ra ta tatou aronga apiiia ra i te Pipiria kia akarongo i ta tatou e tuatua atura. Auraka rava tatou e manako i tetai ua atu rave anga apiianga ei mea tupu ua mai. Kua manako tikai te tata tuatua ko Ezera i tana apiianga i teianei tu. “Kua akonokono ua ana oki a Ezera i tona ngakau e kimi, e e rave, i te ture a Iehova, e apii oki ia Iseraela.” (Ezera 7:10) Ka tau tatou kia rave pera na te teateamamao meitaki e te akaataanga ki runga i te puapinga maata o te tumu ra. E pure tatou kia Iehova kia akaki ia tatou ma te akarongo e te irinaki anga oki. (Luka 17:5) Ka rauka i to tatou tu oraora kia tauturu i te aronga apiiia ra i te Pipiria kia akatupu i tetai inangaro tikai no te tuatua mou. Inara, na te matakite anga i ta tatou apiianga te o maira penei i te taangaanga i te au ravenga apiianga akataka meitakiia. Ka uriuri manakoia etai o teianei au tu i ta tatou atikara te aru mai nei.

[Tataanga Rikiriki i Raro]

Maara Ainei ia Koe?

◻ Eaa ra i umuumuiai te au puapii Kerititiano karape i teia tuatau?

◻ Eaa te au ravenga apii meitaki ka rauka kia tatanu tatou?

◻ Eaa ra i puapinga maatai te aroa e te akangateitei no te aronga ta tatou e apii ra?

◻ Akapeea e raukai ia tatou kia akono atu i te au mea anoanoia no ta tatou aronga e apii atura?

◻ Eaa ra i puapingai te tu oraora e te irinaki anga me te apii atura ia etai ke?

[Tutu i te kapi 10]

Te au puapii meitaki e aronga apiiia ratou uaorai e te Tuatua a te Atua

[Tutu i te kapi 13]

Kia akamanako meitaki atu i te aronga apiiia i te Pipiria ra