Akapeea ra te Tangata i Riro ei i te Tu o te Atua Ra?

“KUA anga iora oki te Atua i te tangata i tona uaorai tu; i anga aia iaia i te tu o te Atua ra; i anga aia ia raua ko te tane e te vaine.” Ko ta te papaanga akauruia i tuatuaia maira, inara eaa ra te aite anga o te reira? I akapeea ra te tangata e te vaine mua i te anga angaia i te tu o te Atua ra?​—Genese 1:27.

E tu pae kopapa ainei to raua mei to te Atua rai? Kare, kare e tau te reira. E tangata te tangata, e tu kiko, tei angaia kia noo ki runga i te enua. E vaerua te Atua, te noo ra i tetai rangi kaka ko tei kore e manakoia atu e tei kore e aereia atu e te au tangata. (Exodo 33:18-20; 1 Korinetia 15:50) Akapeea, i reira, te tangata i te maani angaia ki to te Atua ra tu? No reira kua orongaia ki te tangata te kite kia akono i to te Atua au tu kitea meitaki atea uaia ra​—te aroa, te akava anga, te pakari, e te mana—​e pera katoa oki etai atu au tu.

Te Au Tu o Iehova

Kua akaataia mai te au tu o te Atua ko Iehova ra na roto i tana au apinga pouroa i anga, inara kua akaari katoaia ratou na roto i tana au ravenga ki nga tangata mua ra, ko Adamu e Eva. (Roma 1:20) Kua kiteaia tona aroa i tona anga anga kia tano tikai te enua no te tangata kia noo ki runga. Kua anga iora Iehova i tetai vaine apa kore na te tangata ei oa nona e ei metua vaine no tana anau. Kua tuku aia ia raua tokorua ki roto i tetai kainga manea e kua oronga atu kia raua i te au apinga katoatoa tei anoanoia ra kia ora ua atu e kia mataora. Ko te mea umere maata roa atu, kua oronga te Atua i tetai tuatau no raua kia ora e tuatau ua atu.​—Genese 2:7-9, 15-24.

Kua kiteaia to te Atua pakari i tona timataanga i nga tangata mua ra. Naringa raua i noo ei au mema no to Iehova pamiri i te ao katoa e pini ua ake e naringa raua i ora e tuatau ua atu ei nga metua no te iti tangata katoatoa, ka anoanoia raua kia riro ei akaraanga no te akarongo e te akamori tika. No reira, kua oronga a Iehova i tetai tuatau no raua kia akaari i to raua turanga ngakau i raro ake i tetai timataanga tau tikai​—kare raua e akatikaia kia kai i te rakau e kite ei i te meitaki e te kino. Mei teea ra te pakari i te tua o Iehova i te akatika anga i te au tangata kia akapapu i to ratou akarongo e te aroa nona ra i mua ake ka oronga ei kia ratou te au akameitaki anga umere tana i manako ra!

Kua kiteaia ta te Atua akava anga i tana rai maro anga no runga i te au turanga teitei no tana au mea ora e te kore anga aia e tuku ua atu i taua au turanga ra. Kua kiteaia te reira i tona orongaanga kia Adamu e Eva i tetai tuatau katoatoa kia rave i te mea tika. E i te kore anga raua i rave i te reira, kua kiteaia tana akava anga i te akautunga anga aia i raua kia mamae i te utunga no te meameaau tei akakiteia maira.

Kua kiteaia to Iehova mana na roto i tana raveanga i tana akautunga. Ko Satani, te meameaau maata, tei karanga e e pikikaa a Iehova, e kua oronga atu a Satani i te au apinga maata kia Eva me kare aia e akarongo ki te Atua. (Genese 3:1-7) Inara kare i rauka ia Satani i te akatupu i tana i koreromotu. Kare i rauka iaia i te arai ia Iehova i te tuaruanga ia Adamu e Eva mei te kainga i Edene ra, e kare rai i rauka iaia i te arai i te au tuatua akatupu anga a te Atua kia Adamu: “E one-pueu oki koe, e ka riro akaou rai koe ei one-pueu.” (Genese 3:19) Inara, kare ra a Iehova i rave viviki ana i te utunga o te mate, e pera katoa i roto i teia kua akaari aia i tona aroa. Kua akatika aia i tetai taime no Adamu e Eva kia anau tamariki mai na roto i te reira au mea e kiteaia mai ei tona akakoroanga mua no te au tangata katoatoa ra.​—Genese 1:28.

I te openga iora, kua akakiteia mai ta te Atua ko Iehova akava anga, aroa, mana, e te pakari i roto i tana taputou kia oronga mai i tetai ua te ka takore atu i te au angaanga a Satani e te akamatara anga i te au tupuanga mii ra o taua meameaau mua ra tei tamaki i te tu ngateitei tu-Atua ra. (Genese 3:15) Mei teea ra te umere i Tei Anga ia tatou ra!

Te Au Tauta Anga i te Aru i te Atua

Noatu e kare e vai apa kore ana, ka rauka rai i te au tangata i te akaari i to te Atua au tu. No reira, kua akamaroiroi a Paulo i te au Kerititiano i tona tuatau e: “E teianei ei aru kotou i te Atua, mei te tamariki akaperepere ra.” (Ephesia 5:1) Pera katoa, i roto katoa i te tuatua enua, kua akaari mai te maata anga i te kino o te manako kore anga i to te Atua au tu. I te tae anga ki te tuatau o Noa ra, kua riro te au tangata i te tu kino no reira a Iehova i tautaʼi i te takore atu i te au tangata katoatoa auraka ra ia Noa e tona pamiri. Ko Noa “e tangata tuatua-tika [tau] . . . e te apa kore i tona uki,” e kua akaari aia i tona aroa no te Atua na te raveanga i ta te Atua au akauenga.a “Kua pera oki a Noa; i te au mea katoa ta te Atua i akaue mai iaia ra, ko tana ïa i rave marie.” (Genese 6:9, 22) Kua akaari a Noa i te aroa no tona au taeake tangata e tona piri anga ki te akava anga na te riro anga ei “tangata i ako i te tuatua-tika ra.” (2 Petero 2:5) Kua akaari aia i te pakari e te taangaanga tau anga i tona maroiroi i te pae kopapa na te aruanga i ta te Atua arataki anga kia maani i tetai araka maatamaata, i te akaputu i te kai i roto i reira, koi i te au animara, e kia tomo atu ki roto i te araka i ta Iehova ra akauenga. Kua akaari katoa aia i tona aroa no te tuatua tika i te kore anga e akatika i tona au tangata tupu kino ra kia akakino mai iaia.

E manganui etai ke ta te Puka Tapu i akataka mai tei akaari aiteite i te au tu akono Atua ra. Ko Iesu Karaiti tei maata roa atu, ko tei apa kore i to te Atua ra tu i raukaʼi te karanga e: “Ko te akara mai iaku nei, kua akara ïa i te Metua.” (Ioane 14:9) I roto i te au tu ta Iesu i akaari mai, ko tona aroa te mea maata roa atu. No te aroa i tona Metua e te au tangata i akakeu iaia kia akaruke i tona kainga i te rangi e kia noo i runga i te enua nei ei tangata. Kua akakeu te reira iaia kia akakaka i tona Metua na tona akono anga i te tuatua tika e te tutu aereanga ki te au tangata i te au tuatua meitaki o te ora. (Mataio 4:23; Ioane 13:31) No reira, na te aroa i akakeu ia Iesu kia oronga i tona oraanga apa kore ei ora no te au tangata, ko te mea puapinga maata atu, no te akatapu anga i te ingoa o te Atua. (Ioane 13:1) I te tautaanga i te aru i te Atua, e akaraanga meitaki atu ainei tetai te ka rauka i te aru atu ia Iesu Karaiti?​—1 Petero 2:21.

Akapeea e Raukaʼi ia Tatou kia Aite atu ki te Atua i Teia Tuatau?

Akapeea e raukaʼi ia tatou, i teia tuatau i te akaari i te au tu o te Atua e te angaanga anga i reira i roto i to te Atua tu? Ina, e akamanako ana na mua i te tu o te aroa. Kua karanga atura Iesu e: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” Akapeea tatou i te akaari anga i te aroa no te Atua? Kua pau mai te apotetoro ko Ioane e: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.”​—Mataio 22:37; 1 Ioane 5:3.

Ko te tika ia, e tau kia akarongo ki ta Iehova au akauenga, kia kite tatou ia ratou. Kia o mai te tatauanga, te apiianga, e te manakonakoanga no runga i ta te Atua Tuatua, koia te Puka Tapu, e te puka Puka Tapu. Mei te tata taramo, ka rauka ia tatou i te karanga e: “Te maata rava nei toku inangaro i taau ra ture! ko toku ïa maaraara anga i te au rā katoa nei.” (Salamo 119:97) Ia tatou e o oonu atura e te kite oonu anga i te Tuatua a te Atua, kua riro te reira e i akakeu ia tatou i to te Atua ra arataa o te manakoanga. Kua inangaro oki tatou i te tuatua tika e te rikarika i te kino. (Salamo 45:7) Ko te reira te ngai i tarevake ei a Adamu. Kua kite aia i ta Iehova ture, inara kare roa aia i inangaro ana i te piri ki te reira. I te tatauanga i te Tuatua a te Atua, ka tau tatou kia ui putuputu kia tatou uaorai, ‘Akapeea teia i tano ei ki aku? Eaa taku ka rauka i te rave i te maani anga i toku tu akono kia rotai maata atu ma te au tu o te Atua?’

Kua tuatua katoa a Iesu e: “E aroa atu koe i toou tangata tupu mei te aroa ia koe uaorai.” (Mataio 22:39) Te inangaro ra te tangata manako tau iaia uaorai e te inangaro ra i te meitaki nona uaorai. Kare te reira e tarevake ana. Inara te akaari ra ainei tatou i te aroa aiteite ki to tatou au tangata tupu? Te aru ra ainei tatou i te akauenga Puka Tapu e: “Auraka koe e tāpu i te meitaki i te tangata e tau iaia ra, e tei to rima rai taua meitaki ra kia o atu”?​—Maseli 3:27; Galatia 6:10.

Akapeea ra te tu o te pakari? I to tatou kimianga kia akaari i teia tu te aratakiia atura tatou kia apii i te Puka Tapu no te mea tei reira te ngai no te pakari o te tu-Atua. Te tatau ra a Salamo 119:98-100 e: “E kite maata toku ia koe i te au akauenga naau ra, i to toku au enemi ra; e tika oki i te vai marie anga i vaitata iaku. E kite maata toku i to taku au orometua katoa ra: no te mea te akaeatu nei au i taau au tuatua-akakite. E kite maata toku i to te aronga taito ra; no te mea te akono nei au i taau ra au ikuiku anga.” Ia Maseli 3:18, te akatakaia ra te pakari mei “te rakau ora.” Me rauka ia tatou te pakari e te taangaanga i te reira, ka orongaia mai kia tatou te mareka anga o te Atua e te tutaki o te oraanga mutu kore.​—Koheleta 7:12.

Akapeea ra te akava anga? I roto i teia ao kino nei, e mea puapinga maata tikai te akava anga no te aronga tei akamareka i te Atua. Kua inangaro a Iesu i te tuatua tika (akava anga) e kua rikarika i te kino. (Ebera 1:9) Te rave ra rai te au Kerititiano i teia tuatau i te reira. Te akakeu ra te akava anga ia ratou kia ariki i te au tu tika. Te kopae ra ratou i te au tuatua tika kore o teianei ao e te raveanga i te maani anga i to te Atua anoano ko te mea puapinga maata roa atu i roto i to ratou au oraanga.​—1 Ioane 2:15-17.

Ei manako mamao atu i te mana, pouroa tatou e tuanga tetai no teia. Tei ia tatou te tu pae kopapa e te mana o te manako i matauia, e te tupu ua atu anga tatou ei au Kerititiano, te akatupu ra tatou i te mana i roto i te manako pae vaerua. Na Iehova e akarava i to tatou mana ma tona vaerua tapu ki te maata anga e noatu e te akaraanga paruparu ra tatou, ka rauka rai i te akatupu i to Iehova anoano. Kua karanga a Paulo e: “E tika iaku te au mea ravarai nei i te Mesia, ko tei akamaroiroi mai iaku nei.” (Philipi 4:13) Te vai ua ra taua maroiroi ra kia tatou me ka pure tatou no to Iehova vaerua.

Tutu Aereanga i te Tuatua Meitaki

Ia tatou i te akaarianga i te au tu maata e a o te Atua ra kua kitea meitakiia i roto ia tatou te akarongoanga i te akauenga: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou: e i na, tei vaitata ua ra au ia kotou, e tae ua atu ki te openga o teianei ao.” (Mataio 28:19, 20) Te apai maira taua angaanga apii anga i te ora kia ratou tei ariki mai. Mei teea ra te akaari anga memeitaki o te aroa no ratou, no te tuanga maata atu, kua akamata na te riro anga mai ei au tangata manene kia tatou!

Pera katoa, ko taua apiianga te mataara o te pakari. Kua apai mai te reira i te ua te ka ora ua atu. No teaa ua atu etai angaanga te ka rauka i te tuatuaia e: “Te akapera oki e oraʼi koe, e te aronga katoa e akarongo mai ia koe ra”? (1 Timoteo 4:16) Kare e aronga ruti i roto i te angaanga maanianga pipi. Ko aua aronga tei akarongo e te aronga tei apii mai te ka rauka i te au akameitakianga mutu kore.

E no te akava anga ra, te apii ra te au Kerititiano i te mea tau e te au kaveinga tuatua tika ki ta ratou aronga apiipii Puka Tapu. Te tauturu nei oki tatou ia ratou kia tavini ia Iehova, “te Atua o te akava anga ra.” (Malaki 2:17, NW) Ko ratou tei akatapu i to ratou au oraanga kia tavini ia Iehova i teia tuatau e te aru ra na roto i te tiratiratu kua akatika uaia e e tuatua tika, e tu tau, te aratakianga ki to ratou ora anga ia Aramakito.​—Roma 3:24; Iakobo 2:24-26.

Mei teaa atura te akaari anga o te mana i te tutu aereanga e te apiianga o te tuatua meitaki i te ao katoa! (Mataio 24:14) Te anoanoia ra te akakoromaki anga roa kia tamou i te tutu aere i te au ngai e au ngai kare te maataanga e inangaro i te akarongo mai. Inara kua oronga mai a Iehova, na roto i tona vaerua, i te maroiroi tei anoanoia kia ora atu ki te openga.​—Isaia 40:30, 31; Mataio 24:13; Luka 11:13.

Ko te tika, ei anau apa na Adamu, kare e rauka ia tatou i te taangaanga apa kore ua i teia au tu memeitaki. Inara, e akamaara, kua maaniia te tangata i roto i te tu o te Atua, e me ka tauta tatou kia aite maata roa atu ki te Atua, i reira te akatupu ra tatou i te tuanga o te tumu no to tatou ora. (Koheleta 12:13) Me ka maroiroi tatou uaorai i te rave i te mea meitaki ka rauka ia tatou e te pati kia akakoreia mai me topa ake tatou, no reira ka rauka ia tatou te manakonako kia ora atu ki roto i to te Atua ao ou tuatua tika ra, te ngai e raukaʼi ia tatou te tu apa kore. I reira, tei roto tatou i tetai enua parataito tei kiia e te au tangata apa kore ra, pouroa te akaari ra i to te Atua ko Iehova au tu ki te ki anga. Mei teea ra te rekareka! I te openga iora, i roto i te manako vaerua ki katoa anga o te tuatua, ka riro te au tangata i te tu o te Atua.

[Au Tataanga Rikiriki i Raro]

[Tutu i te kapi 25]

Kua akaari mai a Iesu kia tatou e akapeea i te tatanu anga i to Iehova au tu tu-Atua

[Tutu i te kapi 26]

I te openga iora, ka riro te au tangata i te manako vaerua ki katoa anga i te tu o te Atua ra