Pene 131

Te au Mama Anga Openga, e te Penetekote 33 T.N.

I TETAI ngai kua akapapa a Iesu kia uipa mai tana au apotetoro e 11 ma ia katoa i tetai maunga i Galilea ra. Penei kua akakitea katoaia ki etai atu o te au pipi i taua uipaanga ra, e kua akaputu mai e tere atu i te 500 au tangata katoa. Mei teaa ra te mataora o teia uruoaanga i to Iesu mama anga mai e kua akamata te apiianga ia ratou!

I roto i etai au mea katoa, kua akataka atura Iesu ki taua urupu maata ra e kua tukuia mai e te Atua te mana katoa kiaia o to te rangi e to te enua katoa nei. “E teianei, e aere kotou,” ko tana i akamaroiroi atu, “e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou.”

E tamanako ana i te reira! Te au tane, te au vaine, e te tamariki katoa kua orongaia atu kia ratou teia akauenga tikai kia rave i taua angaanga akariro ra i te au tangata ei pipi. Ka tamata ra te aronga patoi i te tapu i ta ratou tutuanga e te apiianga, inara kua akapumaana atura Iesu ia ratou: “I na, tei vaitata ua ra au ia kotou, e tae ua atu ki te openga o te [akatereanga o te au mea nei, NW].” Ka vai mai rai a Iesu ma tana au pipi katoa na roto i te vaerua tapu, ei tauturu ia ratou i te akatupu anga i ta ratou angaanga.

I muri ake i tona tuakaou anga e 40 katoa ra to Iesu akaari anga ki tana au pipi e te ora ra aia. I teia au mama anga mai kua apii atura aia ia ratou no runga i te Patireia o te Atua, e kua akaketaketa atura aia i ta ratou au apainga ei au pipi nana ra. I tetai atianga kua mama atura aia ki tona apa teina kia Iakobo e kua akapapu atura i te manako o teianei tangata kare ra i akarongo ana e Koia tikai te Mesia ra.

E te vaira te au apotetoro i Galilea, kua akaue atura Iesu ia ratou kia oki atu ki Ierusalema. I tona araveianga ia ratou ki reira, kua karanga atu aia kia ratou: “Auraka e akaruke i Ierusalema, e tatari ra i ta te Metua i tuatua maira, kua kite ana oki kotou iaku: Kua bapetizo rai oki a Ioane ki te vai, e bapetizoia ra kotou ki te Vaerua Tapu i eianei puke rā.”

I muri akera kua aravei akaou a Iesu i tana au apotetoro e kua arataki atu ia ratou ki vao mai i te oire e tae atura ki Betania, i te pae itinga ra o te Maunga i Oliveta ra. E mea umere ra, e noatu tana au akakite anga katoa e kare e roa atu ka akaruke atu aia no te rangi ra, te vaira to ratou irinaki anga e ka akanooia tona Patireia ki runga i te enua nei. E no reira kua ui maira ratou: “E te Atu, ei teianei aina koe e akaoki mai ei i te [Patireia, NW] kia Iseraela?”

Kare a Iesu i akatikatika atu i to ratou manako tarevake, kua pau ua atura aia: “Kare ïa i akonoia kia kite kotou i te taime e te tuatau, ta te Metua i vaoo iaia uaorai.” Ei reira, i te akaketaketa akaou mai anga i te angaanga tau na ratou kia rave, kua karanga aia: “Ka rauka ra to kotou mana i te Vaerua Tapu, kia aere mai aia i rungao ia kotou; e ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.”

Ia ratou e akara atura, kua akamata a Iesu i te kake atu ki te rangi, e kua araiia maira aia e te tiao ngaro atura i to ratou mata. I muri ake i tona takoreanga i tona kopapa tangata, kua kake atura aia ki te rangi ei peretana vaerua. I te akara matariki anga taua aronga 11 ra ki te rangi, kua mama maira e toko rua puke tangata ma te kakau teatea i te pae ia ratou ra. Kua tuatua maira teia nga angera tei akakopapa maira ia raua: “E te au tangata Galilea nei, eaa kotou i tu uaʼi, e i akara tamou ei ki runga i te rangi ra? Ko Iesu nei rai tei raveia akenei i roto ia kotou ki runga i te rangi, ka oki mai ïa mei te reira katoa, mei ta kotou i kite atu iaia i te aere anga atu ki runga i te rangi ra.”

Ko te tu o to Iesu akaruke mai anga i te enua nei kare e e maata te aronga matakitaki atu, ko tana au pipi tiratiratu anake ra tei akara atu. E no reira ka oki akaou mairai aia mei te reira te tu​—⁠kare e maata te tangata e matakitaki atu ka riro ko tana au pipi tiratiratu anake ua te ka kite e kua oki akaou mai aia ra e kua tupu tona taenga mai i tona mana Patireia.

Kua eke maira te au apotetoro i te Maunga i Oliveta, e kua aere atu ki tetai pae i te O i Kiderona ra, e kua tomo akaou atura ki Ierusalema. Kua noo ratou ki reira mei ta Iesu i akaue atura ra. E tai ngauru ra i muri iora, i te Oroa ngati Iuda o te Penetekote 33 T.N., vaitata i te 120 au pipi tei akaputu atu ki tetai pia i runga ra i Ierusalema, kua aruru maira mei te matangi viviki maata ra, e kua ki rava akera te are katoa. Kua mama maira te au arero mei te ai ra te tu, e kua to iora ki rungao ia ratou tataki tai katoa i reira ra, e kua akamata iora te au pipi katoatoa i te tuatua i te au reo ke ke. Ko te riringi anga mai teia i te vaerua tapu ta Iesu i taputou maira! Mataio 28:​16-20; Luka 24:​49-52; 1 Korinetia 15:​5-7; Angaanga 1:​3-15; 2:​1-4.

▪ Kua tuatua maira Iesu i tana au akauenga akarukeanga mai kiaai ma i tetai maunga i Galilea ra, e eaa te reira au akauenga?

▪ Eaa ta Iesu akapumaana anga i tana au pipi ra, e akapeea aia e vai mai ei kia ratou katoa ra?

▪ Eaa te roa i to Iesu mama anga ki tana au pipi i muri mai i tona tuakaou anga, e eaa tana i ako atu ia ratou ra?

▪ Ko teea peretana kare ra i riro mai ake ei pipi i mua ake i to Iesu matenga, ta Iesu i mama atura?

▪ Eaa nga uipaanga openga e rua ta Iesu i rave ra ma tana au apotetoro, e eaa tei tupu i taua nga atianga ra?

▪ Akapeea to Iesu oki akaou mai anga i taua tu rai o tona akaruke anga ra?

▪ Eaa tei tupu ia Penetekote 33 T.N.?