Te Tuatua Meitaki o te Patireia​—Eaa te Reira?

I te mataiti i topa akenei i roto i te 235 enua takapini i te ao, kua akapou e 6,035,564 tangata, te mapu e te ruaine, e 1,171,270,425 ora i te tuatuaanga ki tetai no runga i te reira. I te pae mai i te akakite anga i te reira na te tuatuaanga, kua akaruke ratou ki roto i te au rima o te papuriki e maata atu i te 700 mirioni au puka neneiia kia akakitekite e kia akamarama i te reira. Kua tua katoa ratou i te au tauatini ua atu au tepe rekotiia e te au tepe vitio no te akakitekite i te reira. Eaa “te reira”?

KO TE tuatua meitaki o te Patireia o te Atua “te reira.” E tikai, kare rava i roto i te tuatua enua o te tangata “te evangelia o te basileia nei” i tutu aereia ana i ta tatou e kite nei i teia tuatau.​—Mataio 24:14.

Ko te aronga e rave nei i teia angaanga tutuanga e te apiianga i te ao katoa e aronga oronga ua ratou. Mei to te pae angaanga manako, penei kua akaraanga e kare ratou i tau no te angaanga. Eaa, i reira, te tumu no to ratou tu mataku kore e te manuia anga? Ko te mana o te tuatua meitaki o te Patireia tetai tumu maata, no te mea e tuatua te reira no runga i te au akameitakianga te ka tupu ki te tangata ravarai. E au akameitakianga teia te umuumu ra te au tangata ravarai​—te mataora, te rangatira anga mei te turanga ngata i te pae moni, te kavamani meitaki, te au e te tinamou, e tetai atu apinga kare te maata anga i manako ana​—te ora mutu kore! E tuatua meitaki tikai teia ki te au tangata te kimi ra i te aiteanga e te akakoroanga o te oraanga. Ae, pouroa teia au akameitakianga e te maata atura ka riro e noou me ariu mai koe e me ariki meitaki mai ki te akakitekite anga o te tuatua meitaki o te Patireia.

Eaa Oki te Patireia?

Eaa oki, te Patireia te akakiteia ra ei tuatua meitaki? Ko te Patireia ia tei apiiia ki te au mirioni ua atu kia pure na roto i teia au tuatua matauia: “E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.”​—Mataio 6:​9, 10.

Ko te Patireia ia tei tuatuaia e te peroveta Epera ko Daniela e tere atu i te 25 anere mataiti i topa akenei i te tataanga aia: “E akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.”​—Daniela 2:44.

No reira, te tuatua meitaki no runga ia i te Patireia, me kare te kavamani a te Atua, te ka takore pouroa i te kino e oti ka tutara ma te au ki rungao i te enua nei. Ka akariro te reira e kia tika tikai te akakoroanga mua a Tei Anga ra no te tangata ravarai e no te enua ra.​—Genese 1:28.

“Te Vaitata Mai nei oki te Basileia o te Ao”

Vaitata i te 2,000 mataiti i topa, kua akakite muaia ki te tangata te tuatua meitaki o te Patireia e tetai tangata akatapuia ko tona tu akaraanga kua tau kia manako uaia atu. Ko Ioane Papetito te reira tangata, e tamaiti ia na te kau taunga ngati Iuda ko Zekaria raua ko tana vaine, ko Elizabeta. Kua aao a Ioane i tetai kakau uruuru kamera, ma tetai tatua kiri puaka takapini i tona taukupu, mei te tu rai o te peroveta ko Elia, tei komono maira iaia. Inara ko tana tuatua akakite tei akakeu atu i te manganui. “E tataraara kotou,” i akakite ei aia, “te vaitata mai nei oki te basileia o te ao.”​—Mataio 3:​1-6.

E au ngati Iuda te aronga tei akarongo atu kia Ioane, tei akakite ua e te akamori ra i te Atua mou ko Iehova. Ei iti tangata, kua rauka ia ratou te Ture koreromotu na roto ia Mose vaitata i te 1,500 mataiti i mua atu ana. Te vaira rai i Ierusalema te iero mekameka, i reira te orongaia ra te au atinga tei tau ki te Ture. Kua papu i te au ngati Iuda e te tau ra ta ratou akamori anga i roto i nga mata o te Atua.

Inara, i te akarongoanga kia Ioane, kua akamata tetai au tangata i te kite e kare ta ratou akonoanga e ko tei manakoia e ratou. Kua kairo mai te peu e te apiianga Ereni ki roto i te au apiianga akonoanga a te ngati Iuda. Kua akakinoia te ture tei rauka mai mei te Atua na roto ia Mose i teianei, e kua akapuapinga koreia, e te au irinakianga a te tangata e te au peu. (Mataio 15:6) Kua arataki keia e to ratou au ngakau ketaketa e te au arataki akonoanga aroa kore, kare te maata anga i akamori ariki ua i te Atua. (Iakobo 1:27) Kua anoanoia ratou kia tataraara no ta ratou au ara i te Atua e i te Ture koreromotu.

I taua taime ra, e manganui te au ngati Iuda te tapapa ra i te Mesia tei taputouia kia mama mai, me kare ia Karaiti, e kua manako tetai no runga ia Ioane: “Ko te Mesia aina aia me kare aina?” Inara, kua patoi a Ioane, e koia ia e kareka ra kua arataki atu ia ratou ki tetai tangata ke, no runga iaia te tuatua ra aia: “Kare au e tau kia tatara i te itiki i tona tamaka.” (Luka 3:​15, 16) Te akaaravei anga ia Iesu ki tana au pipi, kua akakite a Ioane: “Ka akara na i te Punua-mamoe a te Atua, ko tei apai ke atu i te ara a to te ao!”​—Ioane 1:29.

E tuatua meitaki tikai te reira, no te mea te tou tika atura a Ioane ki te tangata i te mataara ki te ora e te mataora​—ko Iesu, “ko tei apai ke atu i te ara a to te ao.” Ei au uanga na Adamu raua ko Eva, kua anau pouroaia mai te au tangata ravarai ki raro ake i te mana kino o te ara e te matenga. Te akamarama maira a Roma 5:19: “Mei te tangata katoa e manganui i akariroia ei tangata ara i te akono kore o te tangata okotai [ko Adamu] ra, manganui oki tei akariroia ei tangata tuatua-tika i te akono a te tangata okotai [ko Iesu] ra.” Ko Iesu, mei tetai mamoe akaatingaia te ka ‘apai ke i te ara’ e ka taui i te turanga kino o te tangata ra. “E utunga te mate no te ara,” i akamarama ei te Pipiria, “kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.”​—Roma 6:23.

Ei tangata apa kore​—e tika oki, te tangata maata roa tei ora ana​—kua rave a Iesu i te tutuanga i te tuatua meitaki. Te akakite maira te tataanga Pipiria ia Mareko 1:​14, 15 kia tatou e: “E kia tapekaia rā Ioane, aere aturā Iesu ki Galilea, i te tuatua aere anga i te evangelia o te basileia o te Atua ra, Na ko atura, Kua tae ki te tuatau, kua vaitata mai nei te basileia o te Atua; e tataraara kotou, e ka akarongo i te evangelia nei.”

Ko te aronga tei ariu mai ki te tuatua akakite a Iesu e tei akono ra i te akarongo i roto i te tuatua meitaki kua akameitakiia tikai. Te karanga ra a Ioane 1:12 e: “Te aronga katoa ra i āriki atu [ia Iesu], i o maira aia i te tika ia ratou kia riro ei tamariki na te Atua, koia te aronga i akarongo i tona ingoa.” I te riro anga ei au tamariki, na te Atua, te tau ra ratou e kia rauka te tutaki anga o te ora mutu kore.​—1 Ioane 2:25.

Inara kare i kotinga uaia te tika anga e kia rauka te au akameitakianga o te Patireia ki te au tangata i te anere mataiti mua. Mei tei taikuia i mua ana, te akakiteia ra e te apiiia ra te tuatua meitaki o te Patireia o te Atua i te enua katoa i teia tuatau. No reira te rauka nei rai te au akameitakianga o te Patireia. Eaa i reira taau ka rave e raukai taua au akameitakianga? Ka akamarama te atikara ka aru mai.