Akangoie ua i Toou Mata
1. Eaa te aiteanga e kia ngoie ua te mata, e eaa teia i puapinga ai?
1 I roto i tana Tuatua i runga i te Maunga, kua taiku a Iesu i te akakeuanga maata ta te mata akatutu me kore pae vaerua ka akatupu ki runga i to tatou oraanga katoa. Kua tuatua aia: “Te [“ngoie ua,” NW] ra to mata, kua mārama ïa to kopapa katoa: Kia kino ra toou mata, ka poiri ïa to kopapa katoa.” (Mata. 6:22, 23) Ko te mata ngoie ua koia oki ko tetai tei akara tamou ki runga i te akakoroanga okotai—te rave anga i te anoano o te Atua—kare i akaariu keia e te apiapianga o te au apinga materia. (Mata. 6:19-21, 24-33) Eaa te ka tauturu ia tatou i te akono marie kia ngoie ua te mata?
2. Eaa te manako no te au apinga materia ta te Tuatua a te Atua e akamaroiroi maira?
2 Tatanu Anga i te Tu Mareka Ua: E apainga Tuatua Tapu te akono anga ma te tau tikai i te au anoano ngutuare o tetai. (1 Timo. 5:8) Inara kare teia e umuumu maira e kia piri tatou ki tetai kimianga openga kore no te au apinga meitaki roa atu e te ou ua. (Maseli 27:20; 30:8, 9) Inara, te akamaroiroi maira te au Tuatua Tapu ia tatou kia mareka ua i te ‘kai e te kakau,’ i te au mea tei anoanoia no te oraanga. (1 Timo. 6:8; Ebera 13:5, 6) Ka riro te akono anga i teia akoanga ei tauturu ia tatou kia tamou marie i to tatou mata.
3. Eaa te ka tauturu ia tatou i te kopae i te au apainga naau uaorai i akatupu?
3 E pakari ia to tatou kia kopae i te akateimaa anga ia tatou uaorai ki te au kaiou kare e anoanoia e ki te au apinga me kore te au aruaruanga ka umuumu maataia te taime e te akono anga. (1 Timo. 6:9, 10) Akapeea tatou me rave i teia? I te tamanako anga i te ka rave, e pure ma te akamanako meitaki i te reira e te kimi tikai e me ka tamanamanata rai te reira i te au aruaruanga pae vaerua. E akapapu tikai e kia tuku ua rai i te au apinga pae vaerua na mua i roto i toou oraanga.—Philipi 1:10; 4:6, 7.
4. Eaa tatou ka kimi ei i te au mataara no te akangoie ua anga i to tatou tu oraanga?
4 Akangoie ua i Toou Tu Oraanga: Tetai tauturu ke mai no te patoi anga atu i te inangaro apinga materia koia oki ko te kimi anga kia akangoie ua i toou tu oraanga. Tetai taeake tei kite e kua rauka i tona pamiri i te noo meitaki ua ma te kore e maata te au apinga materia kua akakite e: “E maata atu i teianei taku ka rauka i te rave i roto i te putuputuanga i te tavini i toku au taeake. Kua irinaki tikai au e ka akameitaki a Iehova i tona au tavini pouroa me tuku ratou i te akamorianga mou na mua ake i te au umuumuanga uaorai.” Ka rekareka ainei koe i te au akameitaki anga maata atu na te akangoie ua anga i toou tu oraanga?
5. Eaa i umuumuia ai te tautaanga putuputu kia akangoie ua rai i to tatou mata?
5 Ka anoanoia te tautaanga putuputu i te patoi atu i te mana akakeu o Satani, tona ao anoano apinga materia, e to tatou uaorai tu apa ua o te kopapa. Auraka e akatika i to tatou nga mata kia ori aere, e tamou marie ra tatou i te reira ki runga i te rave anga i te anoano o te Atua e ki runga i to tatou manakonakoanga akaperepere no te oraanga mutu kore.—Maseli 4:25; 2 Kori. 4:18.