Apiiia kia Rave i to Iehova Anoano

“E apii mai koe iaku kia rave au i to inangaro; ko koe oki toku Atua.”​—SALAMO 143:10.

1, 2. (a) Ko teea te tuatau tau kia apiiia tatou, e eaa te manakoanga tika tikai? (e) Eaa ra i puapinga maataʼi kia apiiia e Iehova?

I TE au ra ravarai te ora ra tetai tangata e te rave angaanga ra, ka rauka kia apii atu iaia i tetai apinga puapinga. Ko te tika te reira i toou turanga, e te tika katoa ra i to etai atu oki. Inara eaa te ka rokoia i te matenga? Kare e rauka kia apiiia i tetai ua atu apinga me kare kia kite i roto i taua turanga ra. Te akataka meitaki maira te Pipiria e “kare ra a te aronga i mate ra e tuatua i kitea.” Kare e kite i Teoro, koia te tanumanga o te tangata nei. (Koheleta 9:5, 10) Te riro ra ainei te aite anga o teia e to tatou apii angaia, te akaputuanga i te kite, e mea puapinga kore ia? Tei runga te reira i te apinga tei apiiia ra tatou e akapeea tatou i te taangaanga i taua kite ra.

² Me ka apiiia tatou i te au apinga anake ua o teianei ao, kare o tatou tuatau mutu kore ki mua. Inara, e mea mataora, e au mirioni ua atu te au tangata i te pa enua ravarai te apiiia ra i te anoano tu-Atua ma tetai manako anga i te ora mutu kore. Te vaira te tumuanga no teia manakonako anga ki roto i te apii anga na Iehova, koia te Tumu o te kite oronga mai i te ora anga.​—Salamo 94:9-12.

3. (a) Eaa i raukaʼi kia tuatuaia e ko Iesu te mea mua tei apiiia e Iehova? (e) Eaa te akapapuanga ia tatou e ka apiiia te au tangata e Iehova, e eaa te tupu anga?

³ Ta te Atua ra Tamaiti anau mua, ei tei apiiia mua e Ia ra, kua apiiia kia rave i te anoano o tona Metua. (Maseli 8:22-30; Ioane 8:28) Pera katoa oki, kua akakite mai a Iesu e e au manotini ua atu te au tangata te ka apiiia e tona Metua. Eaa ra te au manakonako anga no te aronga o tatou nei te ka apiiia mei ko mai i te Atua ra? Kua tuatua a Iesu e: “Kua tataia oki i roto i te au peroveta ra e, ‘Ka ope takiri ratou i te apiiia e te Atua.’ E teianei, ko te akarongo e te apiiia e te Metua ra, ko te ka tae mai ïa kiaku nei. . . . Tika, tika tikai taku e karanga atu kia kotou, Ko te akarongo mai iaku nei, e ora mutu kore tona.”​—Ioane 6:45-47.

4. Eaa te tupu anga ki te au tangata e mirioni ua atu na te apiianga tu-Atua ra, e eaa to ratou manakonako anga?

⁴ Te taiku maira a Iesu ia Isaia 54:13, tei tuatuaia ra ki te vaine akatutuia a te Atua, koia Ziona i te rangi ra. Ko taua totou ra e akapiri anga tikai tona ki tana au tamariki, koia te 144,000 au pipi anauia i te vaerua o Iesu Karaiti. E toenga to taua au tamariki vaerua ra te rave angaanga nei i teia tuatua, i te aratakianga i te porokarama apiianga i te ao katoa nei. Ei tetai tupu anga, e au mirioni ua atu etai ke ra no te “aronga maata rava” te puapinga katoaia ra mai i taua apii anga a Iehova ra. Tei ia ratou te manakonako anga taka ke no te apiianga ma te kore e matenga ei arai i taua raveanga ra. Akapeea ra? Ina, te papa ra ratou kia ora atu i te “mate maata” te vaitata viviki mai nei e kia rekareka i te ora mutu kore ki runga i tetai enua parataito.​—Apokalupo 7:9, 10, 13-17.

Akaketaketa Maata i Raveanga i to te Atua Anoano

5. (a) Eaa te irava mataiti no te 1997? (e) Eaa te manako tau no tatou no runga i te aereanga ki te au uipaanga Kerititiano?

⁵ A te tuatau o te 1997, i roto i te au putuputuanga e te tere atu i te 80,000 i te ao katoa, ka akapiri vaitata te Au Kite o Iehova ki to ratou manako i te au tuatua akamataanga o Salamo 143:10: “E apii mai koe iaku kia rave au i to inangaro.” Ko te reira te irava mataiti no te 1997. Kia akaari meitakiia taua au tuatua ra ki roto i te au Are Uipaanga Patireia, ka riro ei tetai akamaara anga e ko tetai ngai tau tikai e raukaʼi te kite apiianga tu-Atua ko te au uipaanga putuputuanga, te ngai e raukaʼi ia tatou te rave kapiti i tetai porokarama no te apii anga tamouia. I te kapitianga ma to tatou au taeake i te au uipaanga putuputuanga kia apiiia e to tatou Puapii Mekameka, ka manako tatou mei te tata taramo, tei tata ra: “Mareka rava akera au e te aronga i tuatua mai kiaku e, Taki aere tatou ki te are o Iehova.”​—Salamo 122:1; Isaia 30:20.

6. I roto i ta Davida au tuatua, eaa ta tatou ka kite?

⁶ Ae, te anoano nei tatou kia apiiia kia rave i to te Atua ra anoano e kare i te anoano o tei patoi mai ia tatou koia te Tiaporo me kare te anoano o te au tangata apa ua nei. No reira, mei ia Davida rai, ka akatika tatou i te Atua ta tatou e akamori e te tavini ra: “Ko koe oki taku Atua: kia aratakiia au e toou Vaerua meitaki i te enua o te aronga tiratiratu.” (Salamo 143:10) Kare e kia anoano kia kairo atu ma te au tangata tarevakaua, kua iki a Davida kia vai aia ki te ngai raveia ra te akamori anga ia Iehova. (Salamo 26:4-6) Ma to te Atua ra vaerua ei arataki i tona takai anga, kua rauka ia Davida tona aerenga na te au arataa tuatua tika.​—Salamo 17:5; 23:3.

7. Akapeea te angaanga a te vaerua o te Atua ki runga i te putuputuanga Kerititiano?

⁷ Kua akapapu maira a Iesu Karaiti, koia te Davida Maata ra, i te au apotetoro e na te vaerua tapu e apii mai ia ratou i te au mea katoa e akakite akaou mai oki ki to ratou manako i te au apinga katoatoa tana i tuatua atu kia ratou. (Ioane 14:26) Mei Penetekote mairai, kua akakite marie mai a Iehova i “te au mea oonu rai o te Atua ra” i roto i tana Tuatua tataia ra. (1 Korinetia 2:10-13) Kua rave aia i teia na roto i tetai aerenga akara mataia koia ta Iesu i karanga ra ko “te tavini akono meitaki e te pakari.” Te oronga maira ia i te kai vaerua te akamanakoia ra i roto i te porokarama apiianga no te au putuputuanga o te au tangata o te Atua ra i te ao katoa.​—Mataio 24:45-47.

Apiiia i to Iehova Anoano i ta Tatou Au Uipaanga

8. Eaa ra i puapinga maataʼi te raveanga i te Apii Punanga Tiaki?

⁸ E putuputu te Apii Punanga Tiaki epetoma i te putuputuanga ra i te uriuri anga i te aiteanga o te au kaveinga Pipiria. Te tauturu maira teia ia tatou kia akono i te au apiapi o te oraanga. I etai atu au apiianga te akamanakoia ra te au tuatua mou i te pae vaerua e manganui me kare te au totou Pipiria. Mei teaa ra te maata to tatou tei apiiia i taua au apii anga ra! I te au enua e manganui te ki takiri ra te au Are Uipaanga Patireia no teia au uipaanga. Inara i etai au enua, kua topa te aronga akaputuputu mai. No teaa ra, i to manako? Te tuku ra ainei tetai papaki i ta ratou angaanga kia arairai i to ratou akaputuanga putuputu kia “akamaroiroi atu ei kia maata te aroa, e i te angaanga memeitaki ra”? Me kare penei e manganui te au ora te akapouia ra i te au angaanga tamataora me kare i te akarakara tivi, ma te akariroanga kia pipiri roa te akapapa anga no te aere ki te au uipaanga katoatoa? E akamanako ana i te apiianga akauruia ra ia Ebera 10:23-25. Kare ainei e tere atu te puapinga o te akaputuputu anga no te apiianga tu-Atua i teianei no te mea te “akara na [tatou] i taua rā ra i te vaitata anga mai”?

9. (a) Akapeea te Uipaanga Tavini Anga i te akapapaanga ia tatou no te angaanga orometua? (e) Eaa te tu akono tau no tatou no runga i te tutu aereanga?

⁹ Ko tetai o ta tatou au apainga puapinga roa ko te tavinianga ei au orometua na te Atua. Kua akapapaia te Uipaanga Tavini Anga ei apii ia tatou e akapeea ka raukaʼi ia tatou te rave meitaki i te reira. Ka apii tatou e akapeea te aravei anga te au tangata, eaa te ka tuatuaia atu, te tu akono meitaki me ka akarongo meitakiia mai, e eaa te mea tau kia raveia me ka kopaeia mai ta tatou tuatua e te au tangata. (Luka 10:1-11) I te uriuri anga i te au ravenga meitaki e te akakite anga i te uipaanga i teia epetoma, kua papa meitaki atu tatou kia itae atu i te au tangata kare i te aereanga anake i tera are i tera are mari katoa ra i te tutuanga i te au arataa, i te ngai pakaanga motoka, i runga i te au pati, i te ngai toanga pai rere, i te ngai pitiniti, me kare i te are apii. Kia tau ki ta tatou patianga, “E apii mai koe iaku kia rave au i to inangaro,” ka anoano tatou kia rave i te au tuatau ravarai i te raurau anga a to tatou Pu: “Koia katoa to kotou mārama, kia kakā ïa ki mua i te aroaro o te tangata nei, . . . e kia akameitaki ratou i to kotou Metua i te ao ra.”​—Mataio 5:16.

10. Akapeea tikai e raukaʼi ia tatou kia tauturu i ‘te aronga tau’?

¹⁰ I taua au uipaanga putuputuanga ra, te apiiia maira tatou kia akariro ia etai ke ra ei pipi. Me ka kitea tetai te inangaro ra me kare ka orongaia te puka, ko ta tatou akakoro anga me oki akaou atu ko te akamata i te au apii Pipiria. I tetai tu, te aite ra teia ki te au pipi i ‘te nooanga ma te aronga tau ra’ kia apii atu ia ratou i te au apinga ta Iesu i akaue ra. (Mataio 10:11; 28:19, 20) I te mea e au tauturu meitaki ta tatou mei te puka Te Kite te ka Arataki ki te Ora Mutu Kore, te papa meitaki ra tatou no te rave akaope takiri i ta tatou angaanga orometua. (2 Timoteo 4:5) I te au epetoma tataki tai ia koe e aere ra ki te Uipaanga Tavini Anga e te Apii Orometua Teokaratiki, e tauta kia mou e kia taangaanga i te au tumu tauturu te ka akatika ia koe ei tetai o ta te Atua ra au orometua tau, i te raveanga i tona anoano.​—2 Korinetia 3:3, 5; 4:1, 2.

11. Akapeea tetai papaki i te akakite anga i te akarongo i te au tuatua te kitea ra ia Mataio 6:33?

¹¹ Ko to te Atua anoano ia e “na mua ra . . . te kimi i te basileia o te Atua, e te tuatua-tika nana ra.” (Mataio 6:33) E ui ia koe uaorai, ‘Akapeea ra au i te akono anga i teia kaveinga me ka tamanata mai te au maro anga i taku ngai angaanga [me kore toku oa] ma toku aereanga ki te uipaanga?’ E manganui te aronga pakari i te pae vaerua te ka rave i te au takainga kia tuatua ki to ratou au pu angaanga no taua tumu ra. Kua akakite tetai orometua angaanga tamou i te au taime ravarai ki tona pu e te anoano ra aia i tetai taime akatakaia i te au epetoma tataki tai kia aere atu ki te au uipaanga putuputuanga. Kua akatika aia i taua patianga ra. Inara, no te kimi anga tona manako eaa te ka raveia i taua au uipaanga ra, kua pati aia me ka akatikaia kia aere atu aia. I reira kua akarongo aia i tetai akakite anga no tetai uruoaanga tapere te aere maira. Ei tetai tupu anga, kua akapapa te pu kia akapou aia i tetai ra katoa i taua uruoaanga ra. Eaa taau apiianga i rauka mai i teia akatauanga?

Na Nga Metua Tau i te Atua i Apii to Iehova Anoano

12. No te au tamariki kia apiiia i to Iehova ra anoano, eaa ta te au metua Kerititiano ka tau kia rave ma te akakoromaki e te ngaueue kore?

¹² Inara kare ko te au uipaanga putuputuanga e te au uruoaanga anake ua te apinga no te apii anga kia rave i te anoano tu-Atua ra. Te akaueia ra te au metua tau i te Atua ra kia tereni, kia ako, e kia akono i ta ratou tamariki kia akapaapaa ia Iehova e kia rave i tona anoano. (Salamo 148:12, 13; Maseli 22:6, 15) Te raveanga i te reira ka umuumuia kia rave tatou i ta tatou “tamariki” ki te au uipaanga te ngai e ‘akarongo ei e te apii ei,’ inara ka peea te apiianga ia ratou mei te au tataanga Tapu i te kainga? (Deuteronomi 31:12; 2 Timoteo 3:15) E manganui te au ngutuare tangata kua akamata tikai i te au porokarama no te apii putuputu i te ngutuare tangata i te Pipiria, kare ra i roaia kua tukuia kia topa ki roto i te manako koreia. Kua tupu ainei kia koe taua tu ra? Ka manako ainei koe e ko taua akatika anga kia rave i tetai apii putuputu e tau kore me kare e tuke toou ngutuare tangata e kare ua e puapingaia i toou turanga? Noatu rai eaa te turanga, e akamanako akaou kotou te au metua i nga atikara “Ta Matou Tuanga Apinganui i te Pae Vaerua” e “Te Au Tutaki o te Tu Aruaru” i roto i Te Punanga Tiaki o Aukute 1, 1995, ine.

13. Akapeea e puapingaiaʼi te au ngutuare tangata mei te akamanakoanga i te irava no te au ra tataki tai?

¹³ Te akamaroiroiia ra te au ngutuare tangata kia akono ei ravenga te akamanakoanga i te irava no te au ra tataki tai mei te puka Examining the Scriptures Daily. Te meitaki ra te tatau uaanga e te uriuri anga i te irava, inara e maata te puapinga na te uriurianga i te irava e te akonoanga oki i te reira. Ei akatauanga, me te akamanako ra ia Ephesia 5:15-17, ka rauka i te au mema ngutuare i te tamanako e akapeea te ‘taporoporo marie i te tuatau’ no te apii a tetai, kia rave i etai tu no te angaanga orometua i te au tuatau ravarai, e kia akono oki i etai atu au angaanga teokaratiki. Ae ka rauka i tetai uriuri anga ngutuare tangata i te irava no te ra tataki tai kia taki atu i tetai me kare i te manganui “kia kite [maata tikai] ra kotou i to te Atu ra anoano.”

14. Eaa te au tu puapii ta Deuteronomi 6:6, 7 ra i akakite e ka tau te au metua ra, ma te umuumuanga i teaa?

¹⁴ Ka tika te au metua kia riro ei puapii maroiroi no ta ratou tamariki. (Deuteronomi 6:6, 7) Inara kare te reira i tetai tuatua uaanga me kare akaueueanga i ta ratou anaunga. Ka tau katoa te metua tane e te metua vaine kia akarongorongo atu, na te reira tu ka meitaki atu te kite eaa te anoanoia ra kia akatakaia, kia marama, kia akatutuia, me kare kia tuatua taokiokiia. I roto i tetai ngutuare tangata Kerititiano, kua akakeu nga metua kia komunikeiti ua na te akamaroiroianga i ta raua tamariki kia uiui au uianga no runga i te au apinga ta ratou kare ra i marama me kare te akatupu ra i te manata. Na reira i kite ei raua e tu ngata to tetai tamaiti mapu ra i te kiteanga e kare o Iehova ra e akamataanga. Kua rauka i nga metua i te taangaanga i te akakiteanga mei te au puka mai a te Taiate Punanga Tiaki ra i te akaarianga e ko te tuatau e te reva oki kua arikiia e kare e openga. Na te reira i akatutu mai i te tumu, e kua akamerengo ia i ta raua tamaiti. No reira e akataka i te tuatau kia pau taka meitaki e mei roto mai i te au Tuatua Tapu i te au uianga a ta kotou tamariki, ma te tauturuanga ia ratou kia kite e ko te apiianga i te rave i to te Atua ra anoano ka riro ei akamerengoanga maata. Eaa atu te apiiia ra i teia tuatau ki te au tangata o te Atua te aronga ou e te aronga ruaine oki?

Apiiia kia Aroa e kia Tamaki Oki

15. Penei ko teea te tuatau e timataiaʼi te tu tika tikai o to tatou aroa taeake?

¹⁵ Kia rotai ma te akauenga ou a Iesu, “kua apiiia [tatou] uaorai e te Atua i te aroa ia [tatou] uaorai.” (1 Tesalonia 4:9) Me te maru ra te au mea e te meitaki ra, penei ka manako tatou e te aroa ra tatou i to tatou au taeake ravarai. Inara eaa te tupu anga me tu mai etai au tuke anga i roto ia tatou me kare ka riri tatou no te tuatua a tetai atu Kerititiano me kare no tana i rave? I teia turanga ka tukuia te tika tikai o to tatou aroa ki te timataanga. (Akaaite ia 2 Korinetia 8:8.) Eaa ta te Pipiria e apii maira ia tatou kia rave i roto i taua au turanga ra? Ko tetai apinga kia tauta i te akaari i te aroa na roto i te tu ki katoa. (1 Petero 4:8) Kare kia akara i to tatou uaorai meitaki, te riri anga no te au apa rikiriki ua, me kare te akamoupukuanga no tetai tu mamae, ka tau tatou kia tapoki i te apa e manganui. (1 Korinetia 13:5) Kua kite oki tatou e ko teia to te Atua ra anoano, no te mea ko te reira tei apiiia mai e tana Tuatua.

16. (a) I roto i teea tu tamaki anga te apiiia ra te au Kerititiano kia rave? (e) Akapeea tatou i te akapapa angaia?

¹⁶ I te mea e manganui kare e kapiti atu i te aroa e te tamaki anga, ko te tu openga nei e apinga ke ia te apiiia maira tatou, inara ko tetai tu taka meitaki no te tamaki anga. Kua kite a Davida i tona irinaki anga kia Iehova kia apii iaia kia rave te tamaki anga, tera ra i tona tuatau ra kua kapiti te reira i te tamakianga tikai i te au enemi o Iseraela ra. (1 Samuela 17:45-51; 19:8; 1 Ariki 5:3; Salamo 144:1) Akapeea ta tatou tamaki i teia tuatau? Kare oki ta matou taoonga tamaki i ta te kopapa. (2 Korinetia 10:4) No te pae vaerua ta tatou tamaki, te umuumuia ra tatou kia akapapaia ma te rakei vaerua. (Ephesia 6:10-13) Na roto i tana Tuatua e tona au tangata akaputuputuia ra, te apii maira Iehova ia tatou kia rave i tetai tamaki anga autu i te pae vaerua.

17. (a) Eaa te au ravenga ta te Tiaporo e taangaanga ra ei akataka ke ia tatou kia tapae ke? (e) Eaa ta tatou te ka tau kia kopae pakari ke atu?

¹⁷ Na roto i te au tu akavare, e te kikite, e putuputu te Tiaporo i te taangaanga i te au apinga o teianei ao, te au apoteiti, e etai atu aronga patoi i te tuatua mou i tetai tauta anga kia akataka ke ia tatou ki te au maroanga i te pae ke ra. (1 Timoteo 6:3-5, 11; Tito 3:9-11) Mei te mea rai e te kite ra aia e kare e rauka iaia kia autu ki rungao ia tatou na tetai maroanga atu tika tikai, no reira ka tauta aia kia akaturori ia tatou na te akariroanga kia akakite tatou i to tatou ririanga matauia, e te au uiuianga neneva, kare ra e puapinga i te pae vaerua. Ei aronga toa maroiroi, ka tau tatou kia matakite i taua au tu kino ra mei to tatou kite rai i te au maroanga tika tikai.​—1 Timoteo 1:3, 4.

18. Eaa te kapiti tikaia ra ki to tatou kore e akono ia tatou uaorai?

¹⁸ Kare tatou e turu i te au anoano o te tangata nei me kare te anoano o te au pa enua. Kua apiiia mai tatou e Iehova na roto i ta Iesu akatauanga e ka tika tatou kia kore e akono no tatou uaorai; mari ra, kia akapapa tatou ma te manako aiteite ki to Iesu Karaiti ra e kia akono oki i to te Atua ra anoano. (2 Korinetia 5:14, 15) I te tuatau kua topa, penei kua akono ua tatou i tetai oraanga tau kore tikai, e oraanga mako kore, ma te kaimoumouanga i te taime oko maata ra. Te au peu kanga ra, te inu nui i te uaina ra, e te akaturi tei akatutu maira i teianei ao kino. I teianei kua apiiia tatou kia rave i to te Atua ra anoano, kare ainei tatou e akameitaki ana i te akataka keanga mei teianei ao viivii? E no reira e rave tatou i te tamaki anga pakari i te pae vaerua kia kopae ke i te pirianga ma te au ravenga taviivii o teianei ao.​—1 Petero 4:1-3.

Apiianga kia Puapingaʼi Tatou Uaorai

19. Te riroanga kia apiiia i to Iehova ra anoano e te raveanga i te reira ka taki atu ki teea au puapinga?

¹⁹ E mea tau ra kia kite e na te apiiia kia rave i to Iehova ra anoano ka puapinga maataia tatou. No reira ra, ka tika tatou kia rave i ta tatou tuanga na te tamanako anga matariki kia kite e kia aru oki i te au apiianga te aere maira kia tatou na roto i tana Tamaiti pera katoa na roto i tana Tuatua e te au tangata akaputuia ra. (Isaia 48:17, 18; Ebera 2:1) Na to tatou raveanga i te reira, ka akaketaketaia tatou kia tu ngaueue kore i teia au tuatau tumatetenga nei e kia ora i te au uriia i mua akenei. (Mataio 7:24-27) Noatu rai i teianei, ka akamareka tatou i te Atua na te raveanga i tona anoano e ka akapapu e ka pauia mai ta tatou au pure. (Ioane 9:31; 1 Ioane 3:22) Ka kite tatou i te tu mataora tikai.​—Ioane 13:17.

20. Ki runga i teaa te mea meitaki kia tamanako ia tatou e akara ra i te irava mataiti i roto katoa i te 1997 ra?

²⁰ I te tuatau o te 1997, ka putuputu tatou i te tatau anga e te akamanako anga i te irava mataiti, ia Salamo 143:10: “E apii mai koe iaku kia rave au i to inangaro.” Ia tatou e rave ra i teia, e taangaanga tatou i etai o te au atianga kia akamanako ki runga i te au apinga ta te Atua i rave mai no tatou kia apiiia, mei tei akanooia i runga akenei. E kia taangaanga tatou i taua tamanako anga oonu i taua au tuatua ra ei akakeu kia rave tamou marie tatou ma taua pure ra, i te kiteanga e “ko tei akono ra i to te Atua ra anoano, e tika ïa i te oraanga e tuatau ua atu.”​—1 Ioane 2:17.

Akapeea Koe me Pau?

◻ Koai ma i teia tuatau te apiiia ra kia rave i to Iehova ra anoano?

◻ Eaa te tupu anga tau no Salamo 143:10 kia tatou i te tuatau katoa o te 1997 ra?

◻ Akapeea tatou i te apii angaia kia rave i to Iehova ra anoano?

◻ Eaa te umuumuia ra i te au metua Kerititiano i te apiianga i ta ratou tamariki?