Pene 39

Te Aronga Parau e te Aronga Akaaka

I MURI ake i te taikuanga i te au tu meitaki o Ioane Papetito ra, kua ariu atura te manako o Iesu ki te aronga parau ra, koia te au tangata oripu ua ra te manako tei takapini iaia ra. Kua karanga aia e: “Te aite nei teianei uki ki te tamariki ou e noo ra i te ngai okoanga te kapiki atura ki to ratou taeake tarekareka, i te na ko anga e, ‘I akatangi atu matou i te koê na kotou, inara kare kotou i ura mai; i aue ana matou, e kare kotou i papa ia kotou uaorai no te mii.’ ”

Eaa te aite anga o ta Iesu tuatua? Kua akataka maira aia: “Kare a Ioane i aere mai ma te kaikai ra e te inu ra, inara kua tuatua te tangata e, ‘E Temoni tona’; i aere mai te Tamaiti a te tangata ma te kaikai ra e te inu ra, kua tuatua rai te tangata, ‘Ka akara na! E tangata kaikai maata tikai e te inu uaina ra, e taeake no te au tangata koi tero e te aronga ara.’ ”

Kare e rauka kia akamerengo i te au tangata katoa ra. Kare e apinga e marekaʼi ratou. Kua noo a Ioane ma te oraanga turetureia o te akakore anga iaia uaorai ei Nazira, kia tau ki ta te angera i akakite maira e “auraka rava aia e inu i te uaina e te vai inu pakari ra.” Inara kua karanga te au tangata ra e e temoni tona. I tetai tua, kua noo a Iesu mei etai atu tangata katoa ra, kare aia e rave ana te tureture kua akaapaia ra aia no te kakai e te inu maata tikai.

Mei teaa ra te ngata kia akamareka i te au tangata katoa ra! Te aite ra ratou ki te au taeake kangakanga, kare tetai papaki e ura me akatangi etai atu tamariki ra i te koe me kare, kare e mii me aue anake to ratou taeake. Tera ra kua karanga a Iesu e: “Na te au angaanga e akapapu i tona pakari no te tuatua tika.” Ae, na te akapapu anga​—⁠koia te au angaanga⁠—​e akataka e e tarevake te au akaapa anga ia Ioane raua ko Iesu ra.

Kua rave ua atura a Iesu i te akakite i te kino o nga oire e toru ko Korazina, Betesaida, e Kaperenauma, te ngai i rave ei aia i te maata anga o tana angaanga mana ra. Naringa aia i rave i taua au angaanga ra i nga oire i Turia e Sidona, kua tataraara takere ana ratou ma te kakau akaevaeva e te reu ai, i na Iesu ei. I te akaapaanga ia Kaperenauma, tei matauia e ko tona kainga noo ia i te tuatau o tana angaanga ei orometua, kua karanga a Iesu: “E meitaki atu te enua i Sodoma ra i toou, a te Ra Akavaanga.”

I muri akera kua akapaapaa a Iesu i tona Metua i te rangi ra ki mua i te au tangata ra. Kua akakeuia aia kia rave i te reira no te mea kua uuna te Atua i te au tuatua mou meitaki o te pae vaerua mei te aronga pakari e te kite e kua akakite i te reira au mea umere ki te aronga akaaka, e te aronga rikiriki te tu.

I te openga, kua oronga a Iesu i te patianga akatenga e: “Aere mai ki aku nei, kotou katoatoa e roiroi ra e tei teiaa te apainga, e ka akaoraora au ia kotou na, e apii mei iaku nei, e tu maru toku e te akaaka i te ngakau, e ka kite kotou i te akaoraora anga i to kotou ra au meta. Te maru nei taku amo e te mama nei taku apainga.”

Akapeea ta Iesu oronga mai anga i te akaangaroianga? Kua rave aia i te reira na te orongaanga i te tu rangatira mei te tapekaanga a te au apiianga ta te au arataki akonoanga atua i akateiaa ra i te au tangata, ei akaraanga kua kapiti katoa i te ture no te akono i te Tapati ra. Kua akaari katoa mai aia i te mataara tatara mai i te aronga tei kite ra i te teiaa no te tutaraanga a te aronga mana poritiki e pera katoa te aronga kite i te teiaa i to ratou ara na roto i te akava ngakau tei takinoia ra. Te akakite atura aia ki te reira aronga tei takinoia ra e akapeea e raukai i te akakore i ta ratou ara e akapeea e raukai ia ratou te rekareka i te pirianga meitaki ma te Atua.

Ko te amo maru ta Iesu e oronga maira ko te akatapuanga takiri ki te Atua ra, kia tavini atu i to tatou Metua aroa ua ma te takinga meitaki i te rangi ra. E ko te apainga mama ta Iesu e oronga maira ki te aronga tei aere mai kiaia ra koia oki ko te akarongoanga i te au akauenga a te Atua no te oraanga, koia Tana au akauenga tei papaia ki roto i te Puka Tapu. E kare te akarongoanga i te reira i te mea teiaa. Mataio 11:​16-30, NW; Luka 1:15, NW; Luka 7:​31-35, NW; 1 Ioane 5:⁠3.

▪ Akapeea te aronga parau, te au tangata oripu ua ra te manako o to Iesu uki i aite ei ki te tamariki?

▪ Eaa i akakeuiaʼi a Iesu kia akapaapaa i tona Metua i te rangi ra?

▪ Na teea au mataara te akateiaa angaia te au tangata ra, e eaa te tatara anga ta Iesu i oronga atu?