Pene 13
Kiteanga Mei to Iesu au Timataanga Mairai
I MURI ua ake i tona papetito angaia, kua aratakiia atura Iesu e te vaerua o te Atua ki te metepara i Iudea ra. E maata tana apinga no te tamanako anga, no te mea i tona papetito angaia “kua veveteia akera te au rangi ra,” e no reira kua kite aia i te au apinga no te rangi. E tika rai, e maata ua atu te au mea nana kia akamanako!
Kua pou ia Iesu e 40 ra e e 40 po i te metepara e kare ana apinga i kai i te reira tuatau. Ei reira, ia Iesu kua mate pongi roa, kua akavaitata atura te Tiaporo e timata iaia, i te na ko anga: “E Tamaiti koe na te Atua ra, ka karanga atu koe ki teianei au toka kia riro ei kai.” Inara kua kite a Iesu e e tarevake kia akono aia i te au mana semeio e akamerengo i tona uaorai anoano. No reira kare rava aia i akatika kia timataia aia.
Inara kare te Tiaporo i akamutu i reira. Kua timata aia i tetai atu ravenga. Kua akaao atura aia ia Iesu kia rere atu ki raro mei runga atu i te paruru o te iero kia riro na te au angera e akaora iaia. Inara kare a Iesu i tamataia kia rave i te reira akakite anga tuke roa. Na te taiku mai anga i te au Tuatua Tapu ra, kua akaari atu a Iesu e e tarevake te timata i te Atua na teia mataara.
I te toru o te timataanga, kua akakite atura te Tiaporo i te au patireia katoa o teianei ao na tetai tu semeio e kua na ko atura: “E oronga atu au i teianei au mea katoa kia koe, kia akatopa mai koe ki raro e akamori mai iaku.” Inara kua akakore akaou atura Iesu i te reira timataanga kia rave tarevake, kua iki aia kia vai tiratiratu ki te Atua.
Ka rauka ia tatou te kite na teia au timataanga mai ia Iesu ra. Ei akatauanga te akaari maira te reira, e kare te Tiaporo i te tu kino ua, mei ta tetai papaki i manako ana, mari ra e peretana tika tikai aia, kare e akara mataia. Te akaari katoa maira te timataanga ia Iesu ra e ko te au kavamani pouroa o teianei ao na te Tiaporo katoatoa ia. No te mea akapeea ta te Tiaporo ra oronga anga ia ratou kia Iesu i riro ei ei timataanga tika tikai naringa kare nana tikai ratou?
E tamanako ana i teia: Kua karanga te Tiaporo e ka rekareka aia i te tutaki ia Iesu no te rave e okotai ua akamori anga iaia ra, e ka oronga atu kiaia i te au patireia katoa o teianei ao. Penei ka tauta katoa te Tiaporo kia timata ia tatou na teia tu mataara, penei na te tuku anga ki mua ia tatou i etai tuatau no te tamataanga kia rauka te apinganui o teianei ao, te mana, me kare turanga. Inara mei teaa ra to tatou pakari kia aru i ta Iesu akatauanga na te vai tiratiratu anga ki te Atua noatu rai eaa te timataanga! Mataio 3:16; 4:1-11; Mareko 1:12, 13; Luka 4:1-13.
▪ Eaa te au apinga ta Iesu i akamanako oonu ana i tona tuatau e 40 ra i te metepara?
▪ Akapeea ta te Tiaporo tauta anga kia timata ia Iesu ra?
▪ Eaa ta tatou ka kite mei to Iesu au timata anga mairai?