Pene 24
Eaa a Iesu i Aere Mai ei ki te Enua Nei
E MAATA te angaanga i to Iesu ra ma tana au pipi i Kaperenauma ra, e akaope atura i te kaveanga mai to Kaperenauma i ta ratou maki ravarai kia akaoraia i taua aiai ra. Kare e tuatau no te noonoo ua.
I teianei kua tae ki te mamaiata i tetai popongi maira. Te poiri ua ra, kua tu a Iesu ki runga e kua aere atura ki vao koia anake ua. Kua aere aia ki tetai ngai motutaa kia pure aia ki tona Metua koia anake ua. Inara kare i roa to Iesu noo anga koia anake ua no te mea i te kiteanga a Petero e etai katoa ra e kua ngaro ke atu aia, kua aere ratou no te kimianga iaia.
I te kitea anga a Iesu e ratou, kua karanga atura a Petero: “Te kimi nei te tangata tini ravarai ia koe.” Kua anoano te au tangata o Kaperenauma kia noo a Iesu kia ratou ra. Kua ariki tikai ratou i tana i rave no ratou! Inara i aere mai ainei a Iesu ki te enua nei e ko te tumu maata e rave i te reira au akaoraanga semeio ra? Eaa tana i tuatua no te reira?
I tetai tataanga Puka Tapu, kua karanga atura a Iesu ki tana au pipi: “Ka taki aere tatou i te au oire i vaitata nei, kia apii katoa atu au i to reira; ko toku ïa tere i aere mai ei au nei.” Noatu rai e kua raurau te au tangata ra kia noo mai a Iesu, kua karanga atura aia kia ratou: “E tutu aere rai au i te evangelia o te basileia o te Atua i te au oire ke atu e tikaʼi; i tonokia mai ei oki au.”
Ae, kua aere mai rai a Iesu ki te enua nei e tutu aere i te Patireia o te Atua, na te reira e akatika i te ingoa o tona Metua ra e ka akakore takiri atu i te au maki ravarai o te tangata nei. Inara, ei akapapu anga e na te Atua i tono mai iaia, kua rave a Iesu i te au semeio no te akaoraanga ra. Mei te reira katoa ta Mose i rave, i te au anere mataiti i mua ana, ei akapapu i tona akataoonga angaia ei tavini no te Atua.
I teianei, i to Iesu akaruke anga ia Kaperenauma kia tutu aere ki etai atu oire ra, kua aru katoa tana nga pipi e a iaia ra. Ko teia aronga toko a ko Petero e tona taeake ko Anederea, e ko Ioane e tona taeake ko Iakobo. Ka maaraia e koe e i te epetoma ua i mua akera, kua patiia atu ratou ei nga taeake mua no Iesu no te angaanga tutaka aere.
Kua riro taua tere tutu aere o Iesu ma tana nga pipi toko a ra ei mea puapinga tikai! Ko te tika e kua totoa te tuatua no tana au angaanga tae roa atu ki Suria ra. E au urupu mamaata no Galilea, no Iudea, e no tetai pae i te Kauvai i Ioridana tei aru ia Iesu e tana nga pipi ra. Mareko 1:35-39; Luka 4:42, 43; Mataio 4:23-25; Exodo 4:1-9, 30, 31.
▪ Eaa tei tupu i te popongi i muri ake i to Iesu ra angaanga maata ra i Kaperenauma?
▪ Eaa a Iesu i tonokia mai ei ki te enua nei, e eaa te akakoroanga i raveia e tana au semeio ra?
▪ Koai ma tei aru atu ia Iesu i tona tere tutu aere i Galilea ra, e eaa te tu i te arikianga ki ta Iesu au angaanga ra?