Pene 63

Tetai Atu Ako Akatikatika Anga

IA Iesu e tana au apotetoro te noo ra i roto i te are i Kaperenauma, kua uriuri manakoia tetai apinga i te pae ke atu i te taumaroanga a te au apotetoro e koai tei maata rava ia ratou ra. Penei e apinga teia tei tupu katoa ia ratou i oki ei ki Kaperenauma, kare ra a Iesu i reira. Kua akakite maira te apotetoro ko Ioane e: “I akara atura matou i tetai tangata i te tuaru anga i te demoni i toou na ingoa e kua tauta matou i te arai iaia, no te mea kare aia i aru mai ia tatou nei.”

I te akara anga te manako ra a Ioane i te au apotetoro e e pupu no ratou anake ua te mana ei aronga akaora. No reira kua manako aia e te rave tau kore ua ra te reira tangata i te angaanga mana no te mea kare aia i te tuanga no to ratou pupu.

Inara, kua ako atura Iesu: “Auraka e tauta i te akakore atu iaia, kare rava tetai e rave i te angaanga mana i toku nei ingoa, e akakino vave mai iaku, ko tei kore oki i patoi maira, no tatou ia. Ko tei oronga mai oki i tetai kapu vai e inu na kotou no te mea, no te Mesia kotou, koia mou taku e karanga atu kia kotou na, kare aia e ngere i tana tutaki.”

Kare oki i anoanoia e na te aru kopapa tikai teia tangata ia Iesu e tau ei e tei tona tua aia ra. Kare oki i akanooia ake te putuputuanga Kerititiano, no reira kare te aiteanga i te mea kare aia i te tuanga no to ratou pupu e, e putuputuanga takake aia ra. E akarongo tikai to te reira tangata i roto i te ingoa o Iesu e no reira kua rauka iaia te tuaru i te au temoni. Kua rave aia i tetai apinga tei tau ki ta Iesu i tuatua ra e ka tika kia tutakiia. Kua akaari maira a Iesu e no te rave i te reira, kare e kore tona tutaki.

Inara ka peea me turoriia te reira tangata i te au tuatua e te au angaanga a te au apotetoro ra? Ka riro te reira ei apinga kino roa! Kua karanga a Iesu: “Ko tei akatarevake i tetai o teianei au tangata rikiriki tei irinaki, e ngari ake aia kia riia tetai toka tavirianga mei to runga i te atini ki runga i tona kaki, e kia titiriia ki raro i te tai.”

Kua karanga a Iesu e ka tau tana au pipi kia tipu atu i tetai apinga akaperepere maataia i to ratou oraanga mei te rima rai, te vaevae, me kare te mata te ka akaturori ia ratou ra. E meitaki atu te ngere i te reira apinga akaperepereia e ka tomo atu ei ki te Patireia o te Atua, i te mou i te reira e kia tiria ki Keena (te putunga teita tutungiia i te pae ia Ierusalema ra), tei akatutu maira i te akapouanga mutukore.

Kua akamatakite katoa maira a Iesu: “Kia matakite ko te akavaavaa aea kotou i tetai o teianei aronga tangata rikiriki, te karanga atu nei au kia kotou, ko to ratou au angela i te rangi, e tika ïa i te akara anga i te mata o taku Metua i te ­[rangi, NW] ra.” I reira kua akatutu maira aia i te puapinga maata o te “aronga tangata rikiriki” i tana tuatua anga i tetai tangata e tai anere ana mamoe kua aere ke ra tetai. Ka vaoo ua te reira tangata i te 99 ra e ka aere e kimi i tei aere ke ra, kua akataka maira Iesu, e kitea atura e ia e maata tona rekareka i te reira, i te au mamoe e 99 ra. Kua akaoti maira Iesu i tana tuatua: “Koia katoa to kotou Metua i te ­[rangi, NW] ra, kare ïa i inangaro e kia mate tetai o teianei au tangata rikiriki.”

Penei no te manako i te taumaro anga tana au apotetoro ia ratou uaorai, e kua raurau atura Iesu: “Kia vai mairai te miti i roto ia kotou, e tamou oki i te au ia kotou uaorai.” Ka reka atu te manga reka kore ra me tamitiia. No reira, na te miti akatutuia ra e akariro kia ngoie ua te ariki i te apinga e tuatuaia ra e tetai. Na te reira tu miti e tauturu kia vai marie te au.

Inara no te tu apa ua o te tangata nei, i etai tuatau ka tupu ra te pekapeka. Kua oronga katoa maira a Iesu i te au kaveinga no te akono i te reira. Kua karanga a Iesu e: “Me rave to taeake i tetai ara, e aere e akakite atu i tana apa korua anake ua. E kia akarongo mai aia ra, kua rauka ia to taeake ia koe.” Me kare aia i akarongo ia koe, kua ako a Iesu e, “arataki atu i tetai me kore e toko rua ake, kia taka tikai te au tuatua katoa i te vaa o nga kite toko rua e toko toru ra.”

Ei mea openga roa, e na Iesu ei, e akakite atu ki “te putuputuanga” koia oki ki te au akaaere ikiia o te putuputuanga na ratou e rave te tuku anga tika. Me kare tei rave i te ara e akono i ta ratou tika i tuku ra, kua karanga a Iesu, “kia riro atu aia ei tangata o te pa enua e ei tangata koi tero ra.”

I te tuku anga i te reira tika, ka tau te au akaaere kia akono piri atu ki te au apiianga no te Tuatua a Iehova. No reira, kia kitea e ratou e kua apa tetai e kua tau kia akautungaia, ‘kua oti ke ana te reira akavaanga te akamouia i te rangi ra.’ E ta ratou e “tuku i te enua nei,” koia oki, kia kitea kare e apa o tetai, e “tuku katoaia ia i runga i te rangi ra.” I te reira uriuri akavaanga, kua karanga a Iesu i “te ngai e putuputu ei e toko rua e toko toru i toku nei ingoa, tei rotopu katoa au ia ratou i reira.” Mataio 18:​6-20, NW; Mareko 9:​38-50, NW; Luka 9:​49, 50.

▪ Eaa ra i kore ei i anoanoia i to Iesu tuatau ra kia aere kapiti katoa ma ia ra?

▪ Eaa te maata o te kino i te akaturori anga i te au tangata rikiriki ra, e akapeea ta Iesu akatutu mai anga i te puapinga maata o te reira aronga tangata rikiriki ra?

▪ Penei na teaa i akakeu i ta Iesu akamaroiroi anga i te au apotetoro ra kia akono i te miti i rotopu ia ratou uaorai?

▪ Eaa te tumu maata no te ‘akamou anga’ e te ‘tuku anga’?