Pene 25

Aroa i Tetai Repera

I TE aere anga a Iesu e tana nga pipi e a ki te au oire i Galilea ra, kua totoa atura te nuti no te au apinga umere tana e rave ra takapini i te reira tapere. Kua tae atu te Tuatua no tana au angaanga ki tetai oire e tangata tetai tei makiia ra e repera ia. Kua akataka te taote ko Luka iaia e kua “pini rava aia i te lepera.” I te tupu anga te reira maki kia kino roa, kua akakino marie te reira maki mate i etai au tuanga o te kopapa ra. No reira ko teia repera e tu kino roa tona ra.

I to Iesu tae atu anga ki te oire ra, kua aravei atura taua repera ra iaia. Kia tau ki te Ture a te Atua ra, e tika kia kapiki te repera i te akamatakiteanga. “Kua viivii, kua viivii!” ei paruru ia etai atu kia kore e vaitata mai e ka piriia e taua maki ra. Kua tipapa iora taua repera ki raro e kua pati atura kia Iesu: “E te Atu, kia tika ïa koe, ra e mā au ia koe.”

Mei teaa ra te akarongo o te reira tangata ia Iesu! Tera ra, e kino tikai tona maki kia akara atu iaia ra! Eaa ta Iesu ka rave? Eaa taau ka rave? Na te aroa i akakeu, kua akatika maira a Iesu i tona rima akatukia atura taua tangata ra, na ko atura: “Kua tika ïa iaku, kia mā koe.” Ma atura te repera nona i reira ra.

E inangaro ainei koe i tetai mei te reira te tu aroa ei ariki noou? Na te tu o ta Iesu akono i teia repera i akapapu mai kia tatou e a Tona tutara anga i te Patireia, ka tupu i reira te totou o te Puka Tapu ra e: “Ka tangi aia i tei rikiriki e tei takaua ra, e ka akaora aia i te meta o te aronga putaua ra.” (NW) Ae, ei reira a Iesu ka akatupu ei i te inangaro o tona ngakau kia tauturu i te aronga katoatoa tei makiia.

Noatu rai i mua ake i tana akaoraanga i te repera ra, kua akatupu ke ana ta Iesu angaanga i te poitirere maata i rotopu i te au tangata ra. Ei akatupu anga i te totou a Isaia, kua akaue atura a Iesu i taua tangata i akaoraia ra: “Aua koe e tuatua ua ake ki tetai tangata.” I reira kua akaue atura aia: “E aere ra, e akakite ki te taunga ia koe uaorai, e taoi atu no to tamā anga, ta Mose i tuatua maira, ei akakite anga atu kia ratou.”

Inara no te mataora maata o taua tangata ra e kare i rauka iaia i te tapu i te reira semeio kiaia anake ua. Kua aere atura e kua akatotoa aere i te reira nuti i te au ngai ravarai, kua akatupu atura i te manako e te inangaro i rotopu i te au tangata ra e kare i rauka ia Iesu te aere atea ua atu ki roto i tetai oire. E no reira, kua noo ua a Iesu ki roto i te au ngai motutaa kare ra e tangata i reira, e kua aere maira te au tangata e pini ua ake kia akarongo iaia e kia akaoraia to ratou au maki katoa. Luka 5:​12-16; Mareko 1:​40-45; Mataio 8:​2-4; Levitiku 13:45; 14:​10-13; Salamo 72:13; Isaia 42:​1, 2.

▪ Eaa te ka rauka i te maki repera i te akatupu, e eaa te akamatakiteanga ta te repera ka tau kia akakite?

▪ Akapeea te patianga a te repera ra kia Iesu, e eaa ta tatou ka kite mei ta Iesu pauanga?

▪ Akapeea te kore anga te tangata tei akaoraia ra i te kore anga e akarongo ia Iesu, e eaa tei tupu i te reira ra?