Kua Rave Ratou i to Iehova Anoano

Kua Akapou a Iesu i te Tuatau ma te Au Tamariki

KUA vaitata ta Iesu angaanga orometua e toru e te apa mataiti ki tona openga. Kare e roa atu ka tomo aia ki Ierusalema e ka mamae i tetai tamamae anga kino tikai. Kua kite meitaki aia e eaa te vaira i mua, no te mea kua akakite aia ki tana au pipi e: “E tukuia te Tamaiti a te tangata nei i te rima tangata, e e ta takiri ratou iaia.”​—Mareko 9:31.

E mea papu, te inangaro ra a Iesu i te rave maata i te au ra tataki tai, te ora tataki tai, te au tuatau tataki tai e vaira. Te anoano ra rai tana au pipi i te ako anga. Kua kite katoa a Iesu e te inangaro ra ratou i te ako anga pakari no runga i te anoano o te tu akaaka e te vai ua anga te kino no te akatarevake anga. (Mareko 9:35-37, 42-48) Te anoano katoa ra ratou i te ikuiku anga no te akaipoipo, te kopae anga, e te takaua. (Mataio 19:3-12) Te kiteanga e kare e roa atu ka mate aia, kare e ekoko anga kua tuatua a Iesu ki tana au pipi ma te akamarama anga e ma tetai manako anga rapurapu. E puapinga oki te tuatau​—ko tetai tumu ta Iesu i rave i muri mai e mea umere maata roaia.

Kua Ariki a Iesu i te Au Tamariki

Te karanga ra te papa anga Pipiria e: “Kua apai maira ratou i te tamariki ou kiaia, kia akatukia mai aia ia ratou.” Te kite anga te au pipi i teia, kua akakite viviki atu ratou i to ratou mareka kore. Penei kua manako ratou e e puapinga maata tikai a Iesu me kare te angaanga maata ra ma te kore e manako atu i te au tamariki. Ka akamanako ana i to te au pipi tu poitirere, te mainaina anga a Iesu ia ratou! “Ka tuku mai ana i te tamariki mea riki, kia aere ua mai kiaku nei,” tana i akakite atu kia ratou. “Auraka e akakoreia atu; mei ia ratou nei oki to te basileia o te Atua.” No reira kua tuatua katoa a Iesu: “Koia mou taku e karanga atu kia kotou na, Ko tei kore e āriki i te basileia o te Atua mei te tamariki mea riki ra, kare takiri aia e o ki reira.”​—Mareko 10:13-15.

Kua kite a Iesu i roto i te au tamariki te au tu meitaki. E inangaro kite e te tu irinaki anga to ratou. Ka ariki ratou i te au tuatua a to ratou au metua e ka paruru atu ia ratou i mua i tetai au tamariki. E puapinga tikai kia aruia to ratou tu ariki anga e te apii anga e te aronga te anoano ra i te tomo ki roto i te Patireia o te Atua. Mei ta Iesu i tuatua, “mei ia ratou nei oki to te basileia o te Atua.”​—Akaaite ia Mataio 18:1-5.

Inara kare a Iesu e taangaanga ua i teia au tamariki no tetai akatutu ua anga. Te akataka maira te papa anga e te inangaro tikai ra a Iesu i te kairo kia ratou. Kua ripoti mai a Mareko e “kua rave atura [a Iesu] ia ratou, kua ikiiki iora, kua tuku atura i tona rima ki rungao ia ratou, akaora atura ia ratou.” (Mareko 10:16) Na Mareko anake ua te papa anga tei kapiti pumaana mai te tu koia oki kua “rave atura [a Iesu] ia ratou, kua ikiiki iora.”a No reira kua maata atu te manako anga no te aronga mamaata ia Iesu, tei apai mai i teia au tamariki kia Iesu penei ua kia “akatukia” mai aia ia ratou.

Eaa ra te puapinga o to Iesu “tuku atura i tona rima” ki rungao i te au tamariki? Kare oki tetai oroa tu akonoanga ua i akakiteia mai i konei, mei tetai papetito anga rai. No runga i etai au atianga, te aite anga no te tukuanga i te rima koia oki te tukuanga i tetai iki anga, no etai mea te akakite ua ra i te orongaanga i tetai akameitakianga. (Genese 48:14; Angaanga 6:6) No reira penei te tuku ua ra a Iesu i tetai akameitakianga ki runga i te au tamariki.

I tetai ua atu tu, kua taangaanga a Mareko i tetai tuatua pakari no te “akameitakianga” (ka·teu·lo·geʹo), te akakite anga i te mana maroiroi. Te akakite nei teia e kua akameitaki akatenga ma te maru e te maana a Iesu i te au tamariki. Te taka meitaki ra, kare aia i manako ana i te au tamariki e ei apainga kaimoumou taime ua.

Ei Apiianga no Tatou

Kare te tu ravenga o Iesu ki nga tamariki e te aronga mamaata e mea tamataku anga me kore e mea akataakaaka ia. “Kua katakata ngoie ua aia e te reka anga te kata,” te karanga ra tetai angaanga akapapa anga. No reira te au tangata o te au mataiti katoatoa i manako ngakau maru uai iaia. Te akaataanga i to Iesu akaraanga, ka ui tatou kia tatou uaorai, ‘Te kite ra ainei etai i te aravei mai iaku?’ ‘Te akara anga te angaanga maata ra ainei au kia kore e manamanata atu i te au angaanga e te au manako anga o etai ke ra?’ Na te tatanuanga i tetai manako tika tikai no te au tangata ra ka akakeu ia tatou kia oronga atu ia tatou uaorai, mei ta Iesu i rave. Ka kite etai i to tatou manako tika tikai e ka akapiri mai kia tatou.​—Maseli 11:25.

Mei tei akaariia mai e te papa anga a Mareko, kua rekareka a Iesu te noo i te pae i te au tamariki. Mei tei reira rai, kua akapou aia i te tuatau na te akarakara ia ratou e kanga ra, no te mea kua taiku aia i ta ratou au kangakanga i roto i tetai o tana au akatutu anga. (Mataio 11:16-19) Penei paa e rikiriki ua etai au tamariki ta Iesu i akameitaki no te ariki anga e koai aia e eaa tana i apii. Inara kare teia i akariro iaia kia manako e te kaimoumou ua ra aia i tona taime. Kua akapou aia i te tuatau ma te au tamariki no te mea no tona inangaro ia ratou. Penei, ko te au tamariki e manganui tei aravei ia Iesu i te tuatau o tana angaanga orometua kua akakeuia i muri mai kia ariki i tona aroa te riro mai anga ei au pipi nana.

Me kua akapou a Iesu i te tuatau ma te au tamariki i te au epetoma tumatetenga openga o tona ra oraanga, e mea tika e ka rauka ia tatou te maani i tetai tuatau no ratou i roto i te akapapa anga angaanga maata a tatou. E mea tau ia tatou kia tamanako tikai i te aronga e au anoano takake to ratou, mei te au tamaroa e te au tamaine matiroeroe. E tikai, ka tupu te au tamariki katoatoa me akonoia ratou, e ko to Iehova anoano ia kia oronga tatou kia ratou katoatoa te aroa e te tauturu te ka rauka ia tatou.​—Salamo 10:14.

[Tataanga Rikiriki i Raro]