Pene 108

Kare i Rauka ia Ratou te Akataii ia Iesu

NO TE mea i apii ana a Iesu i roto i te iero e koi oti ua ake ra tana tuatua anga ki tona au enemi o te akonoanga atua i e toru akatutuanga tei akakite maira i ta ratou rave anga kino, kua riri te au Pharisea ra e kua kimi iora i te tuatua kia akataii ratou iaia kia tuatua i tetai apinga e tau ei kia tapekaia aia. Kua akapapa i ta ratou ravenga e kua tono atura i ta ratou aronga pipi, ma te au Herodiani, e tamata kia turori aia.

“E te Orometua,” e na ratou ei, “kua kite matou, e tuatua-tika taau, e te apii nei koe i te tuatua na te Atua ma te tuatua-mou; kare koe i mataku i te tangata, e kare koe i akono i to te tangata nei tu. E teianei, Ka akakite mai koe kia matou i toou manako: E tika aina i te ture kia apai matou i te apinga uipa na Kaisara, e auraka aina?”

Kare a Iesu i vareia i te tuatua akareka ua. Kua kite aia e me karanga aia, ‘Kare, kare i tau i te ture kare e tika kia tutaki i teia tero,’ ka apa aia i te kauraro kore i te mana o Roma. Inara, me ka karanga aia, ‘Ae, ka tau koe kia tutaki i te reira tero,’ ka riri te ngati Iuda iaia, no te mea kare ratou e akatika kia kauraro ratou i te mana o Roma. No reira kua pau atura aia: “Eaa kotou e timata mai ei iaku, e te aronga pikikaa e? Ka akakite mai na i tetai moni taūnga.”

I ta ratou apainga mai i tetai kiaia, kua ui atura aia: “Noai te tu i rungao e te tuatua?”

“No Kaisara,” ta ratou ia i pau.

“E apai mari i ta Kaisara kia Kaisara; e ta te Atua ra, e apai ïa ki te Atua.” I na, i te akarongo anga taua aronga ra i ta Iesu pauanga tau tikai, kua umere iora ratou. Aere ke atura ratou e kua akaruke ua mai iaia ra.

I te kiteanga e kare i rauka i te au Pharisea tetai apinga e taii ei a Iesu, kua aere maira te au Sadukea kiaia, ko ratou te karanga ra e kare e tuakaouanga, e kua ui maira kiaia: “E te Orometua e, i tuatua mai a Mose, ‘Kia mate tetai tangata kare e tamariki, e akaipoipo te teina i tana vaine, e akaanau tama ei tamariki na te tuakana.’ Toko itu puke tamaroa i o matou nei i te kopu-tangata okotai; akaipoipo iora te tama mua i te vaine, e mate atura, kare e tamariki, vaio iora tana vaine na te teina: Koia katoa, te toko rua, pera katoa oki te toko toru, e tae ua atura ki te toko itu. E i te openga iora, mate katoa atura te vaine. E teianei, kia tae ki te tuakaouanga ra, e riro aia ei vaine naai i taua toko itu ra? kua akaipoipo oki ratou ravarai iaia.”

Kua karanga atura a Iesu: “Kare aina teia te mea e tarevake ei kotou, ko to kotou kite kore i te tuatua i tataia ra, e te mana o te Atua? Kia tu akaou oki ratou mei te mate maira, kare ïa e akaipoipo, kare oki e oronga kia akaipoipoia, e tau ratou i te au angela i te ao ra. I te tuatua ra i te tuakaouanga o tei mate ra, kare aina kotou i tatau i roto i te buka a Mose ra, e i tuatua mai te Atua kiaia i roto i te pu ngangaere ra, na ko maira, ‘Ko au te Atua no Aberahama, e te Atua no Isaaka, e te Atua no Iakoba?’ Kare te Atua i te Atua no tei mate, no tei ora ra: e tarevake maata ta kotou.”

Kua umere taua aronga tini ra i ta Iesu pauanga. Kua na ko maira tetai papaki o te aronga tata tuatua: “E te Orometua e, e tuatua tika tikai taau.”

I te kite anga te au Pharisea e kua muteki ua ia Iesu te au Sadukea ra, kua aere pupu okotai maira ratou kiaia. Ei timata akaou anga iaia, kua ui maira tetai o ratou ra: “E te Orometua, ko teea te akauenga i maata o te ture?”

Kua karanga atura a Iesu e, te mea mua, “ ‘E akarongo mai koe, e Iseraela; Ko to tatou Atua ra ko Iehova, okotai oki Iehova: E anoano atu koe i toou Atua ia Iehova ma to ngakau katoa, e ma to [meta, NW] katoa, e ma to manako katoa, e ma to ririnui katoa: . . . ’ Mei te reira katoa oki te rua, ‘E aroa atu koe i toou tangata tupu, mei te aroa ia koe uaorai.’ Kare rava e akauenga maata i te reira,” Kua tuatua kapiti katoa atura a Iesu: “Te Ture katoa, e te au Peroveta ra, tei teianei puke ture e rua nei.”

“E tuatua-tika tikai taau i tuatua mai nei, e te Orometua,” kua akatika maira tetai tata tuatua. “Okotai rava oki Atua; kare atu, Koia anake rai: E te anoano atu iaia ma te ngakau katoa, e ma te kite katoa, . . . e te ririnui katoa, e te aroa atu i te tangata tupu mei te aroa iaia uaorai, e maata ïa i te au atinga karakaratio katoa ra, e te au atinga kai oki.”

I te kiteanga e e pauanga kite ta te tata tuatua ra, kua na ko atura a Iesu kiaia: “Kare koe i atea ke atu i te basileia o te Atua ra.”

No te toru ra i teianei i apii ei a Iesu i te iero ra​—i te Tapati, Monite, e te Ruirua. Kua rekareka te au tangata i te akarongo anga kiaia, inara ko te au arataki o te akonoanga atua ra kua anoano e ta iaia, tera ra kare i tupu ta ratou au tauta anga. Mataio 22:​15-40; Mareko 12:​13-34; Luka 20:​20-40.

▪ Eaa te ravenga tei akapapaia e te au Pharisea ra ei akataii ia Iesu, e eaa te ka tupu naringa aia i pau atu e ae, me kare, e kare?

▪ I akapeea ta Iesu akakore anga i te au tauta anga a te au Sadukea i te akataii iaia ra?

▪ Eaa tetai atu tauta anga a te au Pharisea i te timata ia Iesu, e eaa tei tupu?

▪ I tana angaanga openga ki Ierusalema, e ia ra a Iesu i ako ei i te iero ra, e eaa tei tupu?