Pene 41

E Ngai no te Taumaro Anga

I MURI poto ake i tona akamanuiri angaia i te kainga o Simona, kua akamata a Iesu i te rua o tona tere tutu aere i Galilea ra. I tona tere i te reira ngai i mua akera, kua kapiti atu kiaia tana nga pipi mua ra, ko Petero, Anederea, Iakobo, e Ioane. Inara i teianei ko te 12 apotetoro, e etai vaine tei kapiti atu kiaia. I roto ia ratou ko Maria Magadala, Susana, e Ioana, ko tana tane e tangata mana na te Ariki ko Heroda.

I te tupu anga kia maata ta Iesu ra angaanga, kua pera katoa te taumaro anga no tana angaanga. Kua apaiia mai kia Iesu tetai tangata tei oia ra e te temoni, e matapo e kua murare ia. I ta Iesu akaora anga iaia, kia matara aia i te mana o te temoni ra e kua tuatua aia e kua akara, kua va ua te tangata tini i reira. Kua akamata ratou i te tuatua e: “Kare ainei teia i te tamaiti a Davida?”

E aronga tini tei akaputu atu tei koropini i te are i reira ra a Iesu i te noo anga e kore akera aia e tana au pipi i kaikai manga. Kapiti katoa ki te aronga tei manako ra e penei koia te “tamaiti a Davida” tei totouia maira, ko te au tata tuatua e te au Pharisea katoa etai tei aere mai no Ierusalema roa mai i te akaapa iaia ra. I te rongo anga to Iesu au kopu tangata i te maniania tei koropini ra ia Iesu, kua aere maira ratou e mou iaia. No teaa te tumu?

Ina noatu ko to Iesu uaorai au teina kare i irinaki ake e koia te Tamaiti a te Atua. Pera katoa, ko te maniania e te oripu ua tana i akatupu ra e tuke roa i ta te Iesu ta ratou i matau ana iaia e tupu akera i Nazareta. No reira kua irinaki tikai ratou e e apinga tarevake maata kua tupu ki to Iesu ra manako. “Kua auouoia aia nei,” ta ratou ia i tuatua, kua inangaro ratou i te mou iaia e kia rave ke atu iaia ra.

Tera ra te taka meitaki ra te akapapuanga e na Iesu i akaora i te tangata oia e te temoni ra. Kua kite te au tata tuatua e te au Pharisea e kare e rauka ia ratou i te akakore i te reira tika. No reira ei akakino ia Iesu kua karanga ratou ki te au tangata ra e: “Kare teia tangata i tuaru i te demoni ki vao, mari ra, i te mana o te demoni maata ra o Belezebuba.”

I te kiteanga i to ratou manako, kua kapiki atura Iesu i te au tata tuatua e te au Pharisea kia aere mai kiaia e kua tuatua atura: “Ko te basileia i mavete e rave iaia uaorai, e pou ïa; e te oire oki e te kopu-tangata i mavete ra e rave iaia uaorai, kare ïa e mou. E kia tuaru a Satani ia Satani ki vao, kua mavete aia e rave iaia uaorai; eaa iora tona basileia e mou ei?”

Mei teaa ra te tarevake te reira manako! I te mea te karanga ra te au Pharisea e ko te aronga no to ratou uaorai pupu te tuaru ra i te au temoni ki vao, kua ui katoa a Iesu: “E te tuaru nei au i te demoni ki vao i te mana o Belezebuba ra, i te mana noai i tuaru ei ta kotou tamariki?” Mei te reira te tu, ko ta ratou akaapa ia ia Iesu ra e ka tau katoa oki ratou mei iaia rai. Kua akamatakite atura a Iesu e: “Te tuaru nei ra au i te au demoni ki vao i te Vaerua o te Atua, kua rokoia io nei kotou e te basileia o te Atua.”

Ei akatutu anga e ko tana tuaruanga i te au temoni ki vao e akapapu anga i tona mana ki runga ake ia Satani, kua karanga a Iesu: “Eaa oki e tikaʼi kia tomo i te are o te tangata maroiroi, e aō atu i tana apinga, kia kore aia e na mua i te tapeka i taua tangata maroiroi ra? ei reira e tikaʼi kia āru atu i tona are. Kare aia i ko nei iaku nei, ko toku ïa enemi, e te kore e akaputuputu katoa mai, kua akapueurikiriki ke ïa.” E mea taka papu e te patoi ra te au Pharisea ia Iesu, te akakite ra ia ratou uaorai e e au rima rave no Satani. Te akapueurikiriki ra ratou i to Iseraela kia mavete atu iaia.

E no reira, kua akamatakite atura a Iesu i teia aronga patoi a Satani e “kare ra te akakino i te Vaerua Tapu e akakoreia.” Kua akataka atura aia: “E ko te tuatua kino ki te Tamaiti a te tangata nei, e tika kia akakore i tana ara; kareka te tuatua i te Vaerua Tapu, kare tana e akakoreia i teianei ao, kare oki i te ao a muri atu.” Kua apa taua aronga tata tuatua ra e te au Pharisea katoa oki i te reira ara kare ra e akakoreia na te orongaanga rikarika kia Satani i tei taka meitaki ra e e raveanga semeio na te vaerua tapu o te Atua. Mataio 12:​22-32; Mareko 3:​19-30; Ioane 7:⁠5.

▪ Eaa te tuke anga o te rua o to Iesu tere ki Galilea mei te mea mua ra?

▪ Eaa ra to Iesu kopu tangata i tautaʼi kia mou iaia ra?

▪ Akapeea ta te au Pharisea tauta anga kia akakore i ta Iesu au semeio ra, e i akapeea ta Iesu ako atu ia ratou ra?

▪ Eaa te apinga i apa ra taua au Pharisea ra, e no teaa ra?