E Tika Tikai Ainei Ta Karaiti Arataki Anga kia Koe?

“Auraka kotou kia tapaia i te arataki; okotai o kotou Arataki, ko te Mesia.”​—MATAIO 23:10.

1. Koai anake te Arataki o te au Kerititiano mou ra?

I TE Ruirua, ia Nisana 11. E toru ra i muri akera, ka tamateia a Iesu Karaiti. Ko teianei tona aere anga openga ki te iero ra. I taua ra nei, kua tuatua atura Iesu i tetai apiianga puapinga maata ki te au urupu tei akaputu atura ki reira e ki tana au pipi oki. Kua tuatua aia: “Kareka kotou, auraka kia tapaia ia Rabi; okotai rai oki o kotou Orometua, ko te Mesia: e taeake anake oki kotou katoa na, Auraka kotou e akametua i tetai tangata i teianei ao: okotai rai oki o kotou Metua, ko tei noo i te rangi. Auraka kotou kia tapaia i te arataki; okotai o kotou Arataki, ko te Mesia.” (Mataio 23:​8-10) Te taka meitaki ra, ko Iesu Karaiti te Arataki o te au Kerititiano mou ra.

2, 3. Te akarongoanga kia Iehova e te arikianga i te Arataki tana i akataoonga eaa te tupu anga ki to tatou oraanga?

² Eaa te au tupu anga puapinga o ta Iesu ra arataki anga ki runga i to tatou oraanga me ariki tatou i te reira! I te totouanga i te aerenga mai o teianei Arataki, kua akakite maira te Atua ko Iehova na roto i te peroveta ko Isaia: “E te aronga katoa i kaki ra e! ka aere mai ki te vai nei; e te aronga moni kore ra, ka aere mai, e oko, e e kai; koia ïa, e aere mai, e oko ua i te wina e te u, auraka ei moni, auraka oki ei oko. . . . ka akarongo meitaki mai ana iaku, ka kai ei i te mea meitaki; e kia mareka to kotou vaerua i te kai matu ra. . . . I na, kua oronga au iaia ei Kite no te au tangata nei, ei Arataki, e ei Tutara no te au tangata nei.”​—Isaia 55:​1-4.

³ Kua taiku a Isaia i te au mea inu tei matauia​—te vai, te u, e te uaina​—ei au tuatua akakite ei akaari akapeea te tupu anga o to tatou uaorai oraanga me akarongo atu tatou kia Iehova e kia aru oki i te Arataki e te Tutara tana i oronga mai no tatou. Te tupuanga e mea akaangaroi ia. Mei te inuanga rai i tetai karati vai anuanu i te ra vera. Ka akamerengoia to tatou kaki no te tuatua mou e te tuatua tika oki. Mei te u e akamaroiroi maira i te au pepe e te tauturu ra ia ratou kia tupu, ‘te u o te tuatua’ te akamatutu maira ia tatou e te akakeu ra i to tatou tupu anga i te pae vaerua i to tatou pirianga ma te Atua ra. (1 Petero 2:​1-3) E koai te ka patoi e te oronga maira te uaina i te rekareka anga i te au atianga kaikaianga? Na roto i te tu aiteite, te akamorianga i te Atua mou e te aruanga i te au tapuae o tana Arataki akataoongaia ra ka akariro i te oraanga kia “rekareka tika rai.” (Deuteronomi 16:15) E mea puapinga tikai, i reira, kia akaari tatou katoatoa​—tei ou e te ruaine, te tane e te vaine​—e ko ta Karaiti arataki anga e tika tikai kia tatou. Inara, akapeea, tatou me akakite i to tatou oraanga i te au ra taki tai e ko te Mesia to tatou Arataki?

Te Au Mapu​—E ‘Tupu Ua Atu i te Pakari’

4. (a) Eaa tei tupu i to Iesu e 12 ra mataiti atoroanga ia Ierusalema i te tuatau o te Pasa ra? (e) Mei teaa te meitaki i to Iesu akakite angaia e 12 ua rai mataiti?

⁴ E akamanako ana i te akatauanga ta to tatou Arataki i akanoo no te aronga ou. Noatu e meangiti ua tei kiteia no to Iesu tamariki anga, e maata te akakiteia maira no tetai tupuanga. Ia Iesu e 12 mataiti ra, kua apai atu tona nga metua iaia ki ta ratou atoroanga mataiti ki Ierusalema no te Pasa. I teia atianga kua o atu aia ki roto i tetai uriurianga Tuatua Tapu, e kua akaruke manako kore uaia maira aia e tona pamiri. E toru ra i muri mai kua kitea aia e tona nga metua taitaia ra, e Iosepha raua ko Maria, i roto i te iero, “te noo ra i rotopu i te au orometua, te akarongo atura e te ui atura kia ratou.” Pera katoa oki, “umere anake iora te aronga katoa i akarongo iaia ra i tona kite e tana tuatua.” E tamanako ana, e 12 ua ona mataiti, kare i rauka anake ia Iesu i te ui atu i te au uianga akakeu manakoanga pae vaerua mari ra kua oronga katoa oki i te au pauanga kite! Kare e ekoko anga, e kua tauturuia aia e te terenianga a nga metua.​—Luka 2:​41-50.

5. Akapeea ta te aronga ou ra manako anga i to ratou tu akono i te apii Pipiria a te pamiri ra?

⁵ Penei ko koe tetai tangata ou. Me e nga tavini mou toou nga metua no te Atua ra, penei e porokaramu apii putuputu tetai na te pamiri i te Pipiria i toou ngutuare. Eaa toou tu akono i te apii a te pamiri? Eaa i korei e akaata ki runga i te au uianga: ‘Te turu ra ainei au ma te ngakau katoa i te akanoonoo anga no te apii Pipiria i toku nei pamiri? Te taokotai atura ainei au ma te reira, na te kore e rave i tetai apinga kia akakino i taua ravenga ra?’ (Philipi 3:16) ‘Te rave ra ainei au i tetai tuanga i roto i taua apii ra? Me te tau ra, te ui ra ainei au i te au uianga no runga i te au tumu apiiia e te pau ra i runga i etai au pirianga? Iaku e tere ra ki mua i te pae vaerua, te tatanu ra ainei au i te tongi anga no “te kai pakari ra, na te tangata pakari ïa”?’​—Ebera 5:​13, 14.

6, 7. Eaa te puapinga o te porokaramu tatauanga Pipiria a te au mapu i te au ra tataki tai?

⁶ E mea puapinga katoa oki tetai porokaramu tatauanga Pipiria i te au ra taki tai. Kua imene te tata taramo ra: “E ao to te tangata, kare e aaere i te ako a te akono kore i te Atua, . . . ko tei inangaro ra i te ture a Iehova; e tei tana ture tona manako anga i te po e te ao.” (Salamo 1:​1, 2) Ko Iosua tei mono ra ia Mose, ‘kua akamaara tikai i te buka ture i te po e te ao.’ Na teianei i raukai iaia te rave pakari e kia autu i te raveanga i tana angaanga orongaia atu e te Atua ra. (Iosua 1:8) Kua tuatua to tatou Arataki, ko Iesu Karaiti, e: “Kua tataia, ‘Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.’” (Mataio 4:4) Me te umuumu ra tatou i te kai kopapa i te au ra ravarai, mei teaa ra te maata atu o to tatou umuumuanga i te kai vaerua i te au taime ravarai!

⁷ I te kiteanga i tona umuumuanga i te pae vaerua, kua akamata a Nicole e 13 mataiti i te tatau i te Pipiria i te au ra ravarai.a I teianei, e 16 mataiti, kua oti iaia te tatau i te Pipiria e tai taime e te vaitata nei i te apa te rua o te taime. E mama ua tana ravenga. “Kua akamanako au kia tatau e okotai pene i te ra,” tana i tuatua. Akapeea tana tatauanga i te Pipiria i te au ra takitai i te tauturu anga iaia? Kua pau aia: “Te maata nei te au mana kikino i teia tuatau. Te rokoia nei au e te au taomianga i te apii e etai atu ngai i te au ra taki tai te akaao maira i toku akarongo. Na te tatau anga i te Pipiria i tauturu viviki mai iaku kia maara i te au akauenga Pipiria e te au kaveinga oki tei akamaroiroi maira iaku kia kopae atu i teianei au taomianga. Ei tupu anga, te manako ngakau piri vaitata nei au kia Iehova e kia Iesu oki.”

8. Eaa ta Iesu peu no runga i te tunako, e akapeea e raukai i te aronga ou kia aru iaia?

⁸ Kua rave a Iesu i te akarongoanga e te tatauanga oki i te Tuatua Tapu i te tunako ra. (Luka 4:16; Angaanga 15:21) Mei teaa ra te meitaki no te aronga ou kia aru i taua akatauanga ra na te aereanga putuputu ki te au uipaanga Kerititiano, i te ngai e tatauiai te Pipiria e apiiiai oki! I te akakiteanga i te arikianga no taua au uipaanga ra, kua tuatua a Richard e 14 mataiti ra: “E puapinga te au uipaanga kiaku. Te akamaaraara tamouia maira au i reira i tei meitaki e tei kino ra, te mea tau e te tau kore, te mea aite kia Karaiti e te mea kare i aite. Kare au i kimi i te reira na te aerenga ngata​—na te tupu anga.” Ae, “te tuatua-akakite a Iehova, e mea mou ïa, e pakari ei te kamakura.” (Salamo 19:7) Kua tauta katoa a Nicole kia tae ki te au uipaanga putuputuanga katoa e rima i te au epetoma ravarai. Te akapou katoa ra aia mei te rua ki te toru ora i te teateamamao anga no te reira.​—Ephesia 5:​15, 16.

9. Akapeea e raukai i te aronga ou ‘te tupu ua atu i te pakari’?

⁹ Ko te mapu anga te tuatau meitaki kia kimi i te ‘kite i te Atua mou ra, e ia Iesu i te Mesia, i taau i tono maira.’ (Ioane 17:3) Penei te kite ra koe i te aronga ou te akapou ra i te maata anga o te taime i te tatauanga i te au puka takatakata, te akara tivi, te kangaanga i te vitio kangakanga, me kare te akaraanga i te Internet. Eaa oki koe ka aru ei ia ratou me te rauka ua ra ia koe te aru i te akatauanga apa kore a to tatou Arataki? Iaia e tamaiti ra, kua mareka aia i te apiianga no Iehova. E eaa te tupu anga? No tona inangaro i te au mea vaerua ra, “tupu aturā Iesu i te maata anga e te pakari.” (Luka 2:52) Ka rauka katoa ia koe.

“E Kauraro Kotou Tetai ki Tetai”

10. Eaa te ka tauturu i te oraanga pamiri kia riro ei tumu no te au e te mataora?

¹⁰ Ka rauka kia riro te ngutuare ei akapuanga no te au e te maru oki me kare ei ngai tamaki anga no te pekapeka e te taumaro anga. (Maseli 21:19; 26:21) Na ta tatou ariki anga i ta Karaiti aratakianga ka tauturu i te akatupu i te au e te mataora i roto i te pamiri. Ko te tika, ko to Iesu ra akaraanga, te akatauanga no te au pirianga o te pamiri. Te tuatua maira te au Tuatua Tapu: “E kauraro kotou tetai ki tetai i te matakuanga ia Karaiti. E tuku i te au vaine kia kauraro i ta ratou au tane mei te Atu, no te mea ko te tane te upoko o tana vaine mei te Karaiti katoa ei upoko i te putuputuanga, koia ei akaora no teia kopapa. . . . E te au tane, e tamou ua atu i te aroa i ta kotou au vaine, mei te Karaiti katoa i aroa i te putuputuanga e te oronga iaia uaorai no te reira.” (Ephesia 5:​21-25, NW) Kua tata atu te apotetoro ko Paulo ki te putuputuanga i Kolosa ra: “E te au tamariki e, e akarongo i to kotou au metua i te au mea katoa nei, e mea mareka te reira na te Atu.”​—Kolosa 3:​18-20.

11. Akapeea e raukai i te tane i te akaari e ta Karaiti arataki anga e tika tikai kiaia?

¹¹ Te aiteanga o te aruanga i teia akoanga e ka arataki te tane i te pamiri, ka turu tiratiratu atu tana vaine iaia, e ka akarongo atu te tamariki i to ratou nga metua. Inara, te taoonga upoko o te tangata, ka akatupu anake i te mataora anga me ka akono tikaia te reira. Ka tika te tane pakari kia apii e akapeea te akono i te taoonga upoko na te aruanga i tona uaorai Upoko e te Arataki, ia Iesu Karaiti. (1 Korinetia 11:3) Noatu rai e i muri akera kua riro a Iesu “ei upoko i rungao i te au mea katoa i te ekalesia,” kua aere mai aia ki te enua nei, ‘kare kia taviniia tona, ei tavini ra.’ (Ephesia 1:22; Mataio 20:28) Na roto i te tu aiteite, ka akono te tane Kerititiano i tona taoonga upoko, kare no te au tu noinoi, mari ra kia akono i te au mea o tana vaine e te tamariki​—ae, te pamiri katoa ra. (1 Korinetia 13:​4, 5) Ka kimi aia kia aru i te au tu tau i te Atua ra o tona upoko, ko Iesu Karaiti. Mei ia Iesu rai, e maru aia e te ngakau akaaka. (Mataio 11:​28-30) Te au tuatua mei “te mii nei au” me kare “e tika taau” kare i te mea ngata nana kia tuatua me tarevake aia. Na tana akatauanga meitaki e akariro kia ngoie no tetai vaine kia riro ei “tauturu tau,” ei “akaki,” e ei “tokorua” ki taua tangata ra, i te apiianga mei iaia mai e te raveanga angaanga i te pae iaia ra.​—Genese 2:20, NW; Malaki 2:14.

12. Na teaa e tauturu i te vaine kia ariki i te kaveinga o te taoonga upoko?

¹² Te vaine, i tona tuanga, ka tau kia kauraro ki tana tane. Inara, me te mana ra te vaerua o teianei ao ki runga iaia, penei ka akamata teia i te akaparuparu i tona manako no te kaveinga upoko anga, e ko te manako no te riroanga kia kauraro ki tetai tangata kare aia e mareka. Kare te au Tuatua Tapu e akakite mai ana e ka tau te tane kia rave i te tutara anga, mari ra te umuumu maira te reira e kia kauraro te au vaine ki ta ratou au tane. (Ephesia 5:24) Te mou katoa maira te Pipiria e ko te tane me kare te metua tane te umuumuia ra kia rave i tana apainga i roto i te pamiri, e me ka akonoia tana akoanga, ka tauturu teia i te au e te tu mako i roto i te pamiri.​—Philipi 2:5.

13. Eaa te akatauanga no te kauraroanga ta Iesu i oronga no te tamariki?

¹³ Ka tau te tamariki kia akarongo ki to ratou nga metua. I roto i teianei tu, kua akanoo maira Iesu i te akatauanga meitaki roa. I muri ake i te tupu anga i te iero ra ia Iesu e 12 ra mataiti i te akaruke angaia ki muri no nga ra e toru, “e oki maira aia [ma tona nga metua] katoa ki Nazareta, akarongo atura ia raua.” (Luka 2:51) Te tauturu ra te kauraro anga o te tamariki i to ratou nga metua i te au e te rotai i roto i te pamiri. Me kauraro te aronga katoatoa i roto i te pamiri ra ki ta Karaiti arataki anga, te tupuanga ko tetai pamiri mataora.

14, 15. Eaa te ka tauturu ia tatou kia autu me te aro atura ki tetai turanga akaaoanga i te ngutuare? E oronga mai i te akatauanga.

¹⁴ Noatu rai me ka tu mai te au turanga akaaoanga ki roto i te ngutuare, ko te taviri ki te autu anga ko te aruanga ia Iesu e te arikianga i tana aratakianga. Ei akatauanga, te akaipoipo anga o Jerry e 35 mataiti ra kia Lana, te metua vaine o tetai tamaine mapu ra, kua apai mai i tetai akaaoanga kare tetai o raua i tamanako ana. Kua akataka maira Jerry: “Kua kite au e e riro ei ei upoko meitaki, ka tau au kia akono i te au kaveinga Pipiria te apai maira i te autu anga ki etai atu pamiri. Inara kare i roaia kua kite au e ka tau au kia akono i te reira ma te pakari maata atu e te kite oonu.” Kua akamanako tana tamaine angai iaia ei tangata tei aere ua maira ki rotopu ia raua ko tona metua vaine e kua makitakita maata atura iaia. Kua tau a Jerry kia kite oonu e ko teianei tu akono ka akatupu i ta taua tamaine ra ka tuatua e ka rave oki. Akapeea tana akono anga i taua turanga ra? Te pau maira Jerry: “Kua akatika maua ko Lana e no taua tuatau ua ra, na Lana e akono te akoanga ei metua iaku e akara atura i te patuanga i tetai pirianga meitaki ma taku tamaine angai. I te openga, kua apai mai teianei raveanga i te au tupu anga meitaki.”

¹⁵ Me aro atu i te au turanga ngata i te ngutuare, ka tau tatou kia akara oonu atu kia kite eaa te au mema pamiri i tuatuai e i rave ei oki i te aerenga ta ratou e rave ra. Ka umuumu katoa oki tatou i te pakari kia akono tika i te au kaveinga tau i te Atua ra. Ei akatauanga, ko Iesu, kua kite taka meitaki eaa te vaine tei makiia ra i te atekeria i akatukia atu ei iaia ra, e kua akono pakari atura aia iaia e ma te aroa oki. (Levitiku 15:​25-27; Mareko 5:​30-34) Ko te pakari e te kite oonu te au tu o to tatou Arataki. (Maseli 8:12) Ka mataora tatou me ka rave i te aerenga tana ka rave.

“Na Mua ra Kotou i te Kimi i te Basileia”

16. Eaa te ka mou ia rotopu i to tatou au oraanga, e akapeea ta Iesu akaari anga i te reira na tona akatauanga?

¹⁶ Kare a Iesu i akaruke mai i te ekoko anga e eaa te ka mou ia rotopu i te au oraanga o te aronga tei ariki ra i tana arataki anga. Kua tuatua aia: “E na mua ra kotou i te kimi i te basileia o te Atua, e te tuatua-tika nana ra.” (Mataio 6:33) E na tana ra akatauanga, kua akaari mai aia kia tatou e akapeea te rave anga i teia. I te openga o te tuatau e 40 ra o tona akakore anga kai, te tamanakoanga, e te pureanga tei aru maira i tona papetito anga, kua rokoia a Iesu e tetai timataanga. Kua oronga atura Satani te Tiaporo kiaia i te tutara anga i rungao “i te au basileia katoa o te ao nei.” E tamanako ana i te oraanga ka rauka ia Iesu naringa aia i ariki i te oronga anga a te Tiaporo ra! Inara, kua akara atura Karaiti ki runga i te raveanga i te anoano o tona Metua. Kua kite katoa oki aia, e ko taua tu oraanga i roto i to Satani ra ao no te tuatau poto ua. Kua kopae atura aia i ta te Tiaporo oronga anga, i te na koanga: “Kua oti oki i te tataia, ‘Ko toou Atua ra ko Iehova taau e akamori, e koia anake rai taau e akarongo.’ ” I muri poto akera, “i reira to Iesu akamata anga i te ako, i te na ko anga e, Ka tataraara: te vaitata mai nei oki te basileia o te ao.” (Mataio 4:​2, 8-10, 17) No te toenga o tona oraanga i te enua, kua riro a Karaiti ei orometua i te au tuatau ravarai i te akakitekite anga i te Patireia o te Atua.

17. Akapeea e raukai ia tatou te akaari e ko te au manako no te Patireia te ngai mua ia i to tatou oraanga?

¹⁷ Ka tau tatou kia aru i to tatou Arataki e auraka e tuku i te ao o Satani kia akavare ia tatou kia akariro i tetai angaanga tutaki teitei e te raveanga ei akakoro anga maata na tatou i te oraanga. (Mareko 1:​17-21) Mei teaa ra te neneva o te reira no tatou kia ereereia ki roto i te puereere o te au aruaru anga o teianei ao e kia riro mai te au manako anga Patireia ei tuanga rua ua! Kua oronga mai a Iesu kia tatou i te angaanga tutuanga i te Patireia e te akariro anga i te tangata ei pipi. (Mataio 24:14; 28:​19, 20) Ae, penei e pamiri to tatou me kare ko etai atu apainga kia akono, inara kare ainei tatou e mataora ana i te taangaanga i te au aiai e te au openga epetoma kia rave atu i ta tatou apainga Kerititiano i te tutu anga e te apii anga? Mei teaa ra te akamaroiroianga e i te mataiti tavini anga i te 2001, ko etai 780,000 kua rauka te tavini ei au orometua tamou, me kare ei au painia!

18. Eaa te tauturu ra ia tatou kia kite i te rekareka i roto i te angaanga orometua?

¹⁸ Te akatutu maira te au tataanga Evangeria ia Iesu ei tangata rave angaanga pera katoa ei peretana ma te manako ngakau maru. I te akaraanga i te au umuumu anga pae vaerua o te aronga tei koropini ra iaia, tangi atura aia ia ratou, e kua oronga akatenga atura i te tauturu kia ratou. (Mareko 6:​31-34) Ka riro ta tatou angaanga orometua ei rekareka anga me ka rave tatou i te reira no te aroa i etai ke ra e te anoano ngakau tae oki kia tauturu ia ratou. Inara akapeea e raukai ia tatou taua anoano ra? “Iaku e mapu ra,” i tuatua ei tetai tangata ou ko Jason, “Kare au i rekareka roa ana i te angaanga orometua.” Na teaa i tauturu iaia kia tatanu i te inangaro no teianei angaanga? Te pau maira Jason: “I toku pamiri, kua akatakaia te au popongi Maanakai ki te tavinianga tutu aere. E meitaki teia noku no te mea ko te maata atu i toku aereanga i te angaanga orometua, ko te maata atu ia i toku kite i te meitaki ta te reira i akatupu ra e ko te maata atu oki i toku rekareka anga i te reira.” Ka tau katoa oki tatou kia putuputu atu e kia maroiroi atu i te raveanga i te angaanga orometua.

19. Eaa te tau ra ei tamanako anga na tatou no runga i te arataki anga a Karaiti?

¹⁹ E akapumaanaanga tikai e te puapinga oki kia ariki i ta Karaiti aratakianga. Me rave tatou i te reira, ka riro te mapu anga ei tuatau no te tereanga te kite e te pakari ki mua. Ka riro te oraanga pamiri ei tumu no te au e te mataora, e ko te angaanga orometua ei angaanga te ka apai mai i te rekareka e te merengoanga. No reira tikai, e tamanako tatou kia akaari i roto i to tatou oraanga i te au ra tataki tai e i te au ikianga ta tatou ka rave e e tika tikai te arataki anga a Karaiti kia tatou. (Kolosa 3:​23, 24) Inara kua oronga mai a Iesu Karaiti i te arataki anga na roto katoa i tetai atu tuanga​—ko te putuputuanga Kerititiano. Na te atikara e aru mai e uriuri manako e akapeea tatou ka puapingaiai mei teianei akanoonoo anga.

[Tataanga Rikiriki i Raro]

Maara Ainei ia Koe?

• Akapeea tatou e puapingaiai i te aruanga i te Arataki akataoongaia ra e te Atua?

• Akapeea e raukai i te au mapu kia akaari e te anoano ra ratou kia aru i ta Iesu arataki anga?

• Eaa te tupuanga no te aratakianga a Karaiti ki runga i te oraanga pamiri o te aronga te kauraro ra i te reira?

• Akapeea e raukai i ta tatou angaanga orometua te akaari e e tika tikai ta Karaiti arataki anga kia tatou?

[Au Tutu i te kapi 9]

Ko te tuatau mapu te taime meitaki kia rauka te kite i te Atua e to tatou Arataki tei akataoongaia

[Tutu i te kapi 10]

Te kauraro anga ki ta Karaiti arataki anga te akatupu ra i te mataora anga o te pamiri

[Au Tutu i te kapi 12]

Kua kimi a Iesu i te Patireia na mua. Te pera ra ainei koe?