To Iesu Anau​—Anga Ka Apai Mai i te Au

TE AKAKITEANGA no te ‘au i rotopu i te au tangata manako meitaki’ kare e ko te totou uaia te piri atura ki to Iesu anau anga. Kapiti atu ki ta te au angera i akakite ki te aronga tiaki mamoe umere, kua rave te au karere mei te rangi mai i te au akakiteanga tei akauruia e te Atua no runga i te pepe anau ou ko Iesu kia Maria raua ko tana tane, ko Iosepha. Na te akamanako anga i teia au karere e tauturu ia tatou kia rauka tetai akaraanga maata no to Iesu anau anga e kia kite marama i te aiteanga tikai i muri ake i te taputou a te angera no te au i rotopu i te au tangata.

I mua ake i to Iesu anau anga, e i mua katoa ake ka nui ei aia, kua atoroia mai a Maria e tetai angera ta te Pipiria i akataka mai e ko Gaberiela. “Kia ora koe, e tei akaperepere ravaia mai e! tei ia koe te Atu” ta te angera aravei anga. Me akamanako koe, kua koiriria a Maria e penei kua manga mataku rai. Eaa te aiteanga o taua aravei anga ra?

Kua akamarama a Gaberiela e: “E i na, ka to oki koe, e ka anau taau tamaiti, e naau e tapa i te ingoa ia Iesu. Ka maata aia, e ka tuatuaia i te Tamaiti na Tei Teitei: e na te Atu [“Iehova,” NW] ra, na te Atua e oronga mai i te terono o tona metua o Davida nona: Ei iaia te au i te kopu-tangata o Iakoba e tuatau ua atu, kare rava ïa e kore tona basileia.” Kua ui a Maria e akapeea teia e tupu mai ei, i te mea e e paretenia aia, kare i piri ainga ake ki tetai tane. Kua pau a Gaberiela e ka toia tetai tama na roto i te vaerua tapu o te Atua. Kare teia i te tamaiti noa ua.​—Luka 1:28-35.

Ariki Totouia

Papu e kua tauturu te au tuatua a Gaberiela ia Maria kia kite e ka riro mai te tamaiti ka anau mai aia ei tumu no te au totou i taito ra. Te akakite anga e ka oronga a Iehova ki te tamaiti a Maria i “te terono o tona metua o Davida” ka akariro iaia​—e e tika rai ki tetai ua atu tangata ngati Iuda tei matau i te au Tuatua Tapu​—i te akamanako atu i te taputou ta te Atua i papau ki te Ariki ko Davida o Iseraela.

Na roto i te peroveta ko Natana, kua akakite a Iehova kia Davida e: “E toou are e toou basileia, ka mou ïa ki mua ia koe ra e tuatau ua atu: toou terono, ka mou ïa e tuatau ua atu.” (2 Samuela 7:4, 16) Kua akakite a Iehova no runga ia Davida e: “Ka akamou au i tona ra uanga e tuatau ua atu; e tona terono, mei te au rā o te au rangi ra ïa. Ka vai rai tona uanga e tuatau ua atu, e tona terono mei te rā ïa ki mua iaku ra.” (Salamo 89:20, 29, 35, 36) No reira, kare teia i te mea tupu ua mai e e uanga a Maria raua ko Iosepha no roto mai i te ngutuare o Davida.

Kare e ko teia ua te au totou i roto i te au Tuatua Tapu Epera no runga i te tamaiti ariki a Davida. Kua matau katoa a Maria i te totou a Isaia: “Kua anau mai oki tetai tama na tatou, kua orongaia mai tetai tamaroa na tatou: ei runga i tona ra pakuivi te au vai ei: e tapaia tona ingoa ia Umere, Tumu korero, te Atua Mana, te Metua no te tuatau mutu kore, te Ariki no te au. Kare e mutu te tupu anga o tona ra basileia, e tona au, e noo aia ki runga i te terono o Davida, e ki runga i tona ra basileia, ei akatinamou, e ei akamatutu i te reira, ma te tuatua-tau, e te tuatua-tika, i teianei, e tuatau ua atu. Na te maroiroi o Iehova Sabaota e rave i te reira.”​—Isaia 9:5, 6.

No reira, e maata atu te karere ta Gaberiela i akakite kia Maria, i te anau anga temeio o tetai pepe tamaroa. Ka riro tana tamaiti ei tuanga ariki no te Ariki ko Davida​—te tuanga tinamou mutu kore ki tetai Patireia tei akamanaia e te Atua. E oonu tikai te aiteanga o ta Gaberiela au totou no runga i ta Iesu ka rave i te tuatau ki mua no tatou katoatoa.

I te kite anga a Iosepha e kua nui tana vaine i momokoia, kua inangaro aia i te tatara ia raua. Kua kite aia e kare taua tama ra e nana no te mea kare roa raua ko tana vaine tapao i piri ainga ana. Ka rauka ia koe i te akamanako e penei e e ngata ia Iosepha i te irinaki i ta Maria akataka anga e kua nui aia. Te akakite maira te papaanga Evangeria e: “Kua mama maira tetai angela a te Atu [“Iehova, NW”], kua akairimoe maira iaia, kua na ko maira, E Iosepha te tamaiti a Davida ra, auraka koe e mataku i te arataki mai i to vaine ia Maria ki o ou ra: no te Vaerua Tapu i nui ei aia. E tamaiti tana e anau, e ko Iesu te ingoa taau e tapa nona: e akaora oki aia i tona au tangata i ta ratou ara.”​—Mataio 1:20, 21.

Mei teaa te maata o to Iosepha kite marama anga e akapeea te tama i te ‘akaora anga i tona au tangata i ta ratou ara ra,’ kare te Pipiria i akakite mai ana. Noatu rai, kua rava ua teia karere ei akapapu kia Iosepha e kare te metua vaine te ka anau i apa no tetai ravenga tarevake. Kua rave aia i ta te angera i akaue mai e kua apai atu ia Maria ki te kainga, e ravenga te aiteite ra ki tetai akaipoipoanga.

Kia akameitakiia te akakiteanga tei kiteaia i tetai atu au ngai i roto i te au Tuatua Tapu, e marama ai tatou e eaa ta te angera e akakite maira. I te akamata anga te tuatua enua o te au tangata, kua akaao tetai angera meameaau i to Iehova tu ngateitei. Te akaari maira te au Tuatua Tapu Epera e kua karanga teia meameaau, kapiti atu ki tetai au mea, e kare e tau ana te tutara anga a te Atua e kare e rauka i tetai tangata i te akono tamou i te tu tiratiratu kia Iehova me timataia. (Genese 3:2-5; Iobu 1:6-12) Ko Adamu tetai kare i vai tiratiratu ana. Tei tupu mai no tana ara, kua tu te au tangata ravarai i te ara, e tei tupu mai no taua ara ra ko te mate. (Roma 5:12; 6:23) Inara, kua anau ara koreia mai a Iesu, no te mea i tona to angaia mai kare i na roto i tetai metua tangata. Na te oronga puareinga anga i tona oraanga tangata apa kore ei atinga tau tikai i tei ngaro ia Adamu, kua rauka ia Iesu i te akaora i te au tangata mei ta ratou au ara e kia oronga kia ratou te manakonako anga no te ora mutu kore.​—1 Timoteo 2:3-6; Tito 3:6, 7; 1 Ioane 2:25.

I te tuatau o tana angaanga orometua i te enua nei, kua oronga mai a Iesu i tetai akakite anga no te tuatau ki mua e eaa te aite anga me akaateaia te au tupu anga a te ara. Kua akarangatira aia i te au tangata mei te au maki ravarai i te pae kopapa e kua akaora katoa mai i te aronga tei mate. (Mataio 4:23; Ioane 11:1-44) E ata taua au temeio no tana ka rave i te tuatau ki mua. Kua karanga a Iesu e: “Te vaitata mai nei oki te ora, e akarongo ei te aronga katoa i roto i te rua i [toku] reo, E kua aere mai ki vao.”​—Ioane 5:28, 29.

Te akamarama maira taua totou i tetai tuakaouanga i te tuatau ki mua e eaa te anau anga​—e te mate anga katoa​—o Iesu i riro ei ei mea puapinga maata rava kia tatou. Kua tono mai te Atua i tana Tamaiti ki teianei ao “kia ora ra to te ao iaia,” i karanga ai a Ioane 3:17. Te akamaara maira teia nuti umere kia tatou i te akakiteanga tei orongaia ki te au tiaki mamoe te tiaki ra i ta ratou anana i te po i anauia ai a Iesu.

“Tuatua Meitaki ei Rekareka Anga Maata”

Kua riro tikai e ko “tetai tuatua meitaki ei rekareka anga maata” no te au tangata ravarai i te akakite anga te au angera i te anau anga o “tetai Akaora, ko Karaiti te Atu.” (Luka 2:10, 11, NW) Ka riro mai teia tama nei ko te Mesia, te Peroveta maata e te Tutara ta te au tangata o te Atua i tapapa takere ana. (Deuteronomi 18:18; Mika 5:2) Ka riro mai tona oraanga e te mateanga i te enua nei ei tuanga maata i te akatika anga i to Iehova tu ngateitei i te ao katoa e pini ua ake, i rauka ai i te au angera i te karanga e: “Kia akakakaia te Atua i te ngai teitei i runga ra.”​—Luka 2:14, NW.

Kua akaari mai a Iesu, ta te Pipiria i kapiki e “te Adamu openga,” e ka rauka i tetai tangata kia akarongo kia Iehova i raro ake i te timata anga pakari roa atu. (1 Korinetia 15:45) No reira kua akapapu mai aia e e pikikaa kino a Satani. E tumu anga rekareka teia i te rangi i rotopu i te au angera akarongo.

Inara, e oki akaou tatou ki te uianga e, “E manakonakoanga tika tikai ainei tetai e ka akatupuia te akakiteanga a te angera i te po i anauia ai a Iesu?” Te pauanga koia oki e mea papu tikai e ae! E turanga puapinga maata te au i roto i te akatupu anga i te akakoroanga a te Atua no te enua nei, te kapiti maira i te akaoki akaou anga mai i te au turanga parataito. Me akatupuia te reira i te ao katoa, ka akakeu pouroaia te au tangata ravarai e te aroa e te tapu mou. No reira, ko te aiteanga katoa i te akatupu i to Iehova akakoroanga ko te takore anga i te patoi anga katoatoa i tona tu ngateitei. Kare teia i te tuatua meitaki no te aronga tei turu ia Satani i te karanga anga e e kino te au turanga a Iehova. No ratou, e akapouanga te aiteanga.​—Salamo 37:11; Maseli 2:21, 22.

E akara ana e kare te au angera i akakite ana ki te aronga tiaki mamoe i te au e te manako meitaki ki te au tangata ravarai. Mari ra, kua akakite ratou e ‘ei au i rotopu i te au tangata manako meitaki ra.’ Koia oki, i rotopu i te aronga tei arikiia e te Atua e kua rauka mai tona manako meitaki. Te aronga tei akakite i te akarongo tika tikai kia Iehova ka riro mai ei au pipi akarongo e e aronga aru ia Iesu. Te inangaro ra taua au tangata e te au vaine i te akaari i te tu oronga ua e te tu oaoa ki tetai ke, kare e i nga ra tokoiti ua i te au mataiti tataki tai, mari ra i te au ra ravarai.

E Vaerua Kerititiano i te Au Ra Ravarai?

Te mana no te tuatua meitaki ta Iesu i tutu aere ra kua akakeu i te au oraanga o te au tangata tataki tai e manganui. E manganui tei ariki i te au kaveinga Kerititiano i roto i te au tu ravarai o to ratou oraanga. Ko te au tangata i manako ana ia ratou uaorai kua akamata i te ui e eaa ta Iesu ka rave naringa tei roto aia i to ratou turanga. Ko etai papaki tei akanoo i to ratou oraanga ki runga i te au apinga e te au navenave kua kite mai i te puapinga maata o te au mea pae vaerua e te oronga anga i teia ki to ratou tangata tupu. Te au tangata te rave ra i teia te tauta ra i te akaari i te tu oronga ua e te takinga meitaki i te au ra ravarai. Kare ainei e ko tera taau e manako ra no te au Kerititiano mou?

Naringa te au tangata ngakau tae katoatoa e tapu ana i te akamanako e eaa te aiteanga o te karere a te angera no te au e te aru rotai i taua akamanako anga ra, papu e ka riro mai te ao nei ei ngai meitaki.

Te akapapu maira te au totou no runga i to Iesu anau anga ki te aronga tei rauka mai to te Atua manako meitaki e ka rekareka ratou i te au tika tikai e tuatau ua atu. Kare ainei e ko tera taau e inangaro ra? Ka papu ia tatou e ka akatupu takiri ravaia te au akakiteanga kaka tei totouia no te au tei akakiteia mai e te au angera i to Iesu anau anga. Kare i te au tuatua puapinga kore ua i te tuatau Kiritimiti, papu e ka riro mai te au ei mea tika tikai ma te mutu kore.

[Au Tutu i te kapi 7]

E mea tau e kia akaariia te vaerua Kerititiano i te au ra ravarai