Pene 44
Akamarinoanga i te Uriia Matakuia
KUA ki to Iesu ra i rave angaanga, kapiti katoa te akoanga i te aronga tini i taatai e i muri akera kua akataka atura i te au akatutuanga ki tana au pipi anake ra. Aiai iora, kua na ko atura aia: “E ano tatou ki tera pae.”
I te taatai i te pae itinga ra o te Tai o Galilea ra ko te ngai tei tapaia ko te Dekapoli ra, no te tuatua Ereni deʹka, tona aiteanga e “tai ngauru,” e ko te poʹlis, tona aiteanga e “oire.” E ngai no te peu Ereni te au oire o te Dekapoli ra, kare e ekoko anga e e manganui te ngati Iuda i noo ana ki reira. Inara, kua kotinga ravaia ta Iesu ra angaanga i tera ngai. Pera katoa i taua tere ra, mei ta tatou ka kite a muri akenei, kia kore e roa tona nooanga ki reira.
I ta Iesu pati anga kia aere ratou ki tetai pae, kua rave atu tana au pipi iaia na te pai. Inara, kua kitea to ratou akaruke anga. E kare i roa kua aru atura tetai papaki na to ratou pai e kua kapiti atura kia ratou. Kare i mamao no te aere atu ki tetai pae. Ko te Tai o Galilea ra mei te roto maata rai e vaitata e 21 kiro mita te roa e ko te ngai atea rava e 12 kiro mita.
E tika rai e kua roiroi a Iesu. No reira, i muri poto ake i to ratou akaruke anga, kua takoto atura aia ki raro i te kotoe o muri i te pai kua urunga ki runga i te pute, e kua moe tinai aia. E aronga karape tetai papaki o te au apotetoro ra i te akatere pai, no te maata o to ratou tautai anga i te Tai o Galilea ra. No reira kua rave ratou i te akatere i te pai ra.
Inara kare te reira i riro ei tere ngoie ua. No te maanaana o runga i te roto ra, e vaitata i te 213 mita ki raro ake i te vaito o te moana ra, e ko te matangi anu o te au maunga i vaitata maira, kua arara maira te matangi pakari ki raro e kua tupu viviki te uriia ki taua roto ra. Ko te reira tei tupu mai. Kare i roa kua papaki mai te au ngaru i te pai ra e kua tomo mai ki roto, no reira kua vaitata ia i te tomo atu ki raro. Inara, kua moe ua atu a Iesu!
Kua rave pakari te reira aronga karape i te akatere i te pai kia tika. Kare e ekoko anga e kua aere ana ratou na roto i te uriia i mua ana. Inara i teianei kua tae ratou ki te openga o tei rauka ia ratou kia rave. I te matakuanga no to ratou oraanga, kua akaara atura ratou ia Iesu. ‘E te Atu kare aina koe e akono mai? Te tomo nei tatou!’ ta ratou ia i tuatua. ‘E akaora ia tatou, ko te maremo aea tatou!’
Tu akera aia ki runga, kua kauvae atura Iesu i te matangi e te tai: “Kua oti ana, kia aki!” E kua akaoti te matangi ririnui ra e kua marino te tai. Kua ariu atura ki tana au pipi, kua ui atura aia: ‘Eaa kotou i mataku ei? Kare ainei o kotou e akarongo?’
Kua mou maira tetai mataku tuke ki te au pipi ra. ‘Koai tikai teia tangata?’ ta ratou ia i ui kia ratou uaorai, ‘kua akarongo te matangi e te vai iaia.’
Mei teaa ra te mana ta Iesu i akakite mai ra! E akapapu anga tikai kia kite e e mana to to tatou Ariki ki rungao i te au apinga nei e kia akatika aia i tona manako ki runga i to tatou enua nei i te tuatau o tona tutara i te Patireia, ka noo rai te au tangata ravarai ma te tinamou kare e mataku i te au apinga e tumatetengaʼi!
I muri ake i te akamutu anga te uriia ra, kua tae meitaki atura Iesu e tana au pipi ki taatai i te itinga ra ra. Penei kua ora katoa etai au pai ra i taua uriia pakari ra e kua tae meitaki ki to ratou kainga. Mareko 4:35–5:1; Mataio 8:18, 23-27; Luka 8:22-26.
▪ Eaa te Dekapoli ra, e i teea ngai ia?
▪ Eaa te au tumu i akatupu mai ei i te au uriia pakari i te Tai o Galilea ra?
▪ I te kore anga ratou e ora i to ratou tu karape i te akatere pai, eaa ta te au pipi i rave?