Au Uianga a te Aronga Tatau
E taringa turi ainei e te murare a Zakaria te metua tane o Ioane Papetito, mei ta Luka 1:62 i akaari mai?
Kua manako papu etai e, kua riro katoa mai a Zakaria e taringa turi. Ka tatau tatou i te tata anga Puka Tapu e: “I inangaro ratou i te tapa [i te tamaiti] ia Zakaria, i te ingoa o tona metua. Kua tuatua maira tona metua vaine, na ko maira, Eiaa, e tapa ra iaia ia Ioane. Kua karanga atura ratou kiaia, Kare rava toou kopu-tangata i tapaia i te reira ingoa. Kua tungou atura ratou ki te metua tane, i tana ingoa i anoano i te tapa iaia. Kua pati maira aia i tetai tataanga tuatua; e tata iora ki rungao, na ko akera, Ko Ioane tona ingoa.”—Luka 1:59-63.
No reira, kare e apinga i roto i teia tataanga te karanga tau tikai ra e e taringa turi a Zakaria no etai tuatau roa.
I mua atu kua akakite mai te angera ko Gaberiela kia Zakaria e, ka anauia mai tetai tamaiti e tapa i tona ingoa ko Ioane. E ngata te reira no te tangata ruaine ko Zakaria kia irinaki. Kua na ko maira te angera e: “E ina, ka akamurareia koe, e kare e tau i te tuatua e tae ua atu ki te rā e ope ei teianei tuatua i te tupu, ko koe kare i akarongo i taku tuatua nei, ka tupu ïa kia tae ki tona tuatau.” (Luka 1:13, 18-20) Kua tuatua maira te angera e ko ta Zakaria reo tuatua, kare tona akarongoanga, e tamanamanataia.
Kua karanga atura te tata anga e: “E kua tae maira aia ki vao [i te nao], kare atura i tau iaia kia tuatua atu [ki te au tangata e tiaki ra]: te kite ra oki ratou e, e orama te kitea e ia i roto i te nao ra; nana uaorai oki i tungou mai kia ratou, e kua murareia atura aia.” (Luka 1:22) Ko te aiteanga o te tuatua Ereni i konei “murareia” kua taiku maira e kua tamanamanataia te reo tuatua, te akarongoanga, me kare te kapiti anga te nga mea e rua. (Luka 7:22) Akapeea i reira a Zakaria? Inara e akamanako i tei tupu i tona meitaki anga mai. “E putata akera tona reo i reira, e matara akera tona arero, kua tuatua iora aia ma te akameitaki i te Atua.” (Luka 1:64) Kua akamarama mai te reira e, ko to Zakaria rave anga i te tuatua tei tamanamanata anake uaia.
No reira, eaa ra tetai pae i ui atu ei kia Zakaria ‘ma te tungou i tana ingoa i anoano i te tapa [no te tamaiti]’? Te taiku ra etai aronga uri reo i teia ko “te reo tungou” me kare “te taangaanga anga i te reo tungou.”
Mei te taime i akakite ei te angera e ka murare a Zakaria, e maata te taime kua rave aia i te au akatutu anga rima, mei tetai reo tungou rai no te akakite atu iaia uaorai. Ei akatauanga, “i tungou mai” aia kia ratou i te iero ra. (Luka 1:21, 22) Te pati anga aia i muri mai i tetai tataanga tuatua, kua rave tikai aia i te au tungou me kare te au akatutu anga rima. (Luka 1:63) Penei, ko tei takapini iaia i te tuatau o tona murare angaia, kua rave katoa ratou i te au akatutu anga rima.
No reira, ko tetai akamaramaanga tau tikai no te au tungou tei taikuia ia Luka 1:62. Kua akakite a Elizabeta i te reira taime tona manako no runga i te ingoa o tana tamaiti. No reira, ma te kore e patoianga iaia, penei kua rave ratou i te takainga tau kia rauka mai te tuku anga manako o tana tane. Ka rauka ia ratou i te rave i te reira ma tetai takirikiri anga i te upoko me kare te akatutu anga tungou rima. Ko te tika tikai e kare ratou i tata i ta ratou uianga no Zakaria kia tatau i te au tuatua penei e tika anga te reira e kua rongo aia i te au tuatua a tana vaine. E no reira, te takirikiri anga i te upoko me kare tetai tungou anga kiaia penei ko te aite anga e, ‘Ko tatou katoatoa (te kapitianga mai ia koe, e Zakaria) kua rongo tatou katoatoa i tana i anoano inara eaa taau manako openga no runga i to te tamaiti ingoa?’
E i muri ua ake kua tupu akaou tetai temeio, te akaokianga mai i te turanga. “E putata akera tona reo i reira, e matara akera tona arero, kua tuatua iora aia.” (Luka 1:64) Kare e anoanoia kia taikuia tona akarongoanga no te mea kare te reira i tamanamanataia ana.