Akapeea a Iesu Karaiti me Tauturu ia Tatou

KO TA Iesu Karaiti i rave ei tauturu i te tangata iaia i runga i te enua e mea meitaki tikai. Kua tika maata oki teia e i muri ake i te tareanga i te au tupu anga e manganui no te oraanga o Iesu, kua tuatua tetai kite mata e: “E manganui atu rai ta Iesu peu i rave, naringa i ope katoa i te tataia, te manako nei au, kare e tika i to te ao katoa nei kia āriki mai i taua au buka ra, naringa i tataia.” (Ioane 21:25) I te mea e maata ta Iesu i rave i te enua nei, penei ka ui tatou: ‘Akapeea aia e riro ei ei tauturu no tatou i te rangi ra? Ka puapingaia ainei tatou mei to Iesu tu tangi aroa i teianei?’

E pumaana e te akapapuanga te pau anga. Te akakite maira te Pipiria kia tatou e “tei te rangi mou ra [a Karaiti], kia akakite aia iaia uaorai ki mua i te aroaro o te Atua no tatou i teianei rai.” (Ebera 9:24) Eaa tana i rave no tatou? Te akamarama maira te apotetoro ko Paulo: “Kare oki ma te toto puaka-nio e te toto punua puakatoro, ma tona uaorai ra toto, i te tomo anga [a Karaiti] okotai i roto i te ngai-tapu ra [“rangi ra”], ma te ora mutu kore te rauka anga no tatou.”​—Ebera 9:12; 1 Ioane 2:2.

Mei teaa atura te reira tuatua meitaki! Koi kore ei i akaoti i ta Iesu angaanga meitaki no te tangata ra, kua akariro tona kake anga ki runga i te rangi ra iaia kia rave maata atu no te tangata ravarai. Ko tera te tumu no te mea kua iki te Atua ia Iesu, no tona takinga meitaki maata, kia tavini ei “taunga”​—ei taunga teitei​—“te noo ra i te pae katau i te terono o Tei Maata i runga i te rangi.”​—Ebera 8:​1, 2.

“E Taunga”

I te rangi ra, ka riro a Iesu ei tavini papuriki no te tangata ravarai. Ka rave aia i tetai angaanga mei tei raveia e te kau taunga o Iseraela no te aronga akamori i te Atua i te tuatau taito ra. Eaa oki te angaanga? Te akamarama maira a Paulo: “I akatakaia oki te kau taunga nunui katoa ra, e apai i te atinga e te tarangaara ra; ei apinga katoa oki ta teianei taunga [ta Iesu Karaiti tei kake ki runga ra], kia apai e tikaʼi.”​—Ebera 8:3.

E apinga ta Iesu ka oronga atu tei teitei ra ki ta te taunga maata i taito i oronga ra. Me ka rauka “i te toto puakatoro e te toto puaka-nio” i te apai mai i te tu ma i te pae vaerua kia Iseraela taito, “ka tangaʼi oki i te toto o te Mesia ra, . . . e maata atu ïa te mā o to kotou akava-ngakau i te angaanga mate, kia akamori i te Atua ora ra!”​—Ebera 9:​13, 14.

E tavini papuriki meitaki tikai a Iesu no te mea kua orongaia kiaia te mate kore. I Iseraela taito e “manganui oki to ratou i riro ei taunga, no te mea kare ratou e ora tamou i te mate.” Inara akapeea a Iesu? Te tata maira a Paulo: “Kareka aia . . . kare tona taoonga taunga e riro ia etai ke. E teianei e tika meitaki rava atu iaia kia akaora i te aronga e na reira atu iaia ra i te aere ki te Atua ra, e tika oki aia i te ora anga e tuatau ua atu ei pati i ta ratou.” (Ebera 7:​23-25; Roma 6:9) Ae, tei ia tatou i to te Atua rima katau i te rangi ra tetai tavini papuriki tei ‘ora ra ei pati no tatou.’ Ka akamanako ana e eaa te aite anga o te reira no tatou i teianei!

Ia Iesu i runga i te enua, kua putuputu mai te tangata kiaia no te tauturu, e kua teretere mai ratou mei te ngai mamao kia akapuapinga ia ratou mei tana tauturu anga. (Mataio 4:​24, 25) I te rangi ra, ka mama ua i te taangaanga ia Iesu no te au tangata i te au pa enua. Mei tona ngai i te rangi ra, te puareinga ua ra aia i te rave angaanga ei tavini papuriki.

Mei Teaa te Tu o Iesu ei Kau Taunga?

Te akataka anga no Iesu Karaiti tei rekotiia i roto i te au tataanga Evangeria te akakite maira kia tatou ma te kore te ekoko anga i tona tu tauturu ua e te tu tangi aroa maru. Mei teaa atura tona tu tuku atinga! E maata atu i te okotai atianga, kua tamanamanataia tona tuatau koia anake i te tauta anga aia e tana au pipi i te akaangaroi tei anoanoia ra. Kare i manako ana e kua akangereia i tona tuatau akaangaroi anga, kua “tangi atura” i te tangata tei kimi i tona tauturu. Noatu e kua roiroi a Iesu, kua matepongi, kua kaki vai, “kapo atura aia ia ratou” e kua puareinga i te akaruke i te kai me ka rauka iaia i te tauturu i te aronga ara ngakau tae.​—Mareko 6:​31-34; Luka 9:​11-17; Ioane 4:​4-6, 31-34.

Kua tangi atura, kua rave a Iesu i te au takainga tau kia akaki i to te tangata au anoano i te pae kopapa, pae ngakau, e te pae vaerua. (Mataio 9:​35-38; Mareko 6:​35-44) Pera katoa, kua apii aia ia ratou kia kimi i te maru e te pumaana mutu kore. (Ioane 4:​7-30, 39-42) Ei akaraanga, mei teaa atura te oaoa i tana pati anga: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua.”​—Mataio 11:​28, 29.

Kua maata tikai to Iesu inangaro i te tangata e kua oronga atura aia i tona oraanga i te openga ra no te tangata ara ua nei. (Roma 5:​6-8) No teia ra kua akamarama te apotetoro ko Paulo e: “Ko [te Atua ko Iehova] tei kore oki i te akaperepere i tana uaorai Tamaiti, ko tei tuku ua mai iaia no tatou katoa nei, eaa oki aia e kore ei e oronga katoa mai i te au mea ravarai no tatou? . . . Na te Mesia aina na tei mate ra; e kua tu akaou akenei ki runga, e tei te rima katau o te Atua ra, te pati ra i ta tatou?”​—Roma 8:​32-34.

Tetai Kau Taunga Akaaroa

Ei tangata, kua kite ana a Iesu i te pongi, te kaki vai, te roiroi, te riririri ua, te mamae, e te mate. Kua akapapa te taitaia e te au taomianga tana i tamou marie i tetai tu takake i te tavini anga ei Kau Taunga no te au tangata mamae ravarai. Kua tata a Paulo: “I tikaʼi [a Iesu] kia akariroia mai mei tona au taeake te tu i te au mea katoa ra, kia riro aia ei taunga maata tuatua-mou e te aroa ua, i te au mea a te Atua ra, kia tatara aia i te ara a te tangata nei. E koia uaorai oki i mate i te mea i rokoia e te timataanga ra, e tika oki iaia kia tauturu mai i te aronga i timataia ra.”​—Ebera 2:​17, 18; 13:8.

Kua akatutu mai a Iesu e kua tau aia e te puareinga ra i te tauturu i te tangata kia akavaitata ki te Atua. Inara, ko te aite anga ainei i teia e ka akakeu aia i tetai Atua kino e te aroa kore te emiemi ra i te akakore i te ara? Kare, te akapapu maira te Pipiria kia tatou “te meitaki ra oki koe, e te Atu, e kua tika ia koe i te akakore mai i te ara nei.” Te tuatua katoa ra te reira: “Kia aaki tatou i ta tatou ara, e tuatua-mou tana e te tika i te akakore anga mai i ta tatou ara, e te tamā anga ia tatou i te au tuatua-tika kore ravarai.” (Salamo 86:5; 1 Ioane 1:9) E tikai, te akaata ra ta Iesu au tuatua e te au angaanga i te tu tangi aroa, te tu akaaroa, e te inangaro o tona Metua.​—Ioane 5:19; 8:28; 14:​9, 10.

Akapeea a Iesu i te apai mai anga i te maru ki te au tangata ara? Na te tauturu anga ia ratou kia kimi i te rekareka e te merengo anga i roto i ta ratou au tauta anga i te akamareka i te Atua. I te tataanga ki te au taeake Kerititiano akatainuia, kua taopenga a Paulo i taua turanga na te tuatua anga: “E teianei, e taunga maata teitei to tatou, i riro akenei ki runga i te rangi, ko te Tamaiti a te Atua ra ko Iesu, e tāpu marie rai tatou i ta tatou tuatua. Kare oki to tatou i te taunga maata e kore e tika kia aroa mai ia tatou i to tatou au paruparu nei; i rokoia katoa oki aia i te au timataanga katoa, mei ia tatou katoa nei rai, kare rava ra e ara. E teianei e akavaitata ua atu tatou i te terono o te aroa ua ma te mataku kore, kia aroaia mai tatou nei, e kia rauka te meitaki ei tauturu mai ia tatou i te tuatau e tau ei ra.”​—Ebera 4:​14-16.

“Tauturu i te Tuatau Tau”

Inara eaa te ka rauka ia tatou i te rave me aro atu i te au manamanata te manako ra tatou e mea maata ia i te ka rauka ia tatou i te akono​—te maki kino, te teiaa i te manako apa, te maata i te maroiroi kore, e te taitaia? Ka rauka ia tatou i te taangaanga i te mataara ta Iesu uaorai i irinaki putuputu​—te akameitaki anga akaperepere o te pure. Ei akaraanga, i te po i mua ake ka oronga atu ei aia i tona oraanga no tatou, “viviki rava atura tana pure: e mei te toto kurukuruatu ra tona ou i te topa anga ki raro i te one.” (Luka 22:44) Ae, kua kite a Iesu e mei teaa rai te tu i te pure pakari anga ki te Atua. Kua “tuku oki te Mesia i te pure, i tona ora anga, i te pati anga atu kiaia, ma te aue maata e te roi-mata i Tei tika kia akaora iaia mei te mate maira, e i akarongoia aia i tana i mataku ra.”​—Ebera 5:7.

Kua kite a Iesu i te puapinga no te tangata ravarai kia “akarongoia” e kia akaketaketaia. (Luka 22:43) Pera katoa, kua taputou mai aia: “Ta kotou e pati atu i te Metua ma toku ingoa, nana ïa e o mai kia kotou na. . . . ka pati, e rauka ïa ia kotou, kia ki tikai oki kotou i te rekareka.” (Ioane 16:​23, 24) No reira, ka rauka ia tatou i te pati i te Atua ma te papu e ka akatika aia i tana Tamaiti kia taangaanga i tona mana e te puapinga o tona atinga oko no tatou.​—Mataio 28:18.

Ka papu ia tatou i roto i te ka rauka iaia i te rangi ra, ka oronga mai a Iesu i te tauturu tau tikai i te tuatau tau. Ei akaraanga, me kua rave tatou i tetai ara e kua tataraara ngakau tae tikai tatou, ka rauka ia tatou te pumaana mei te akapapu anga e e “tika to tatou tei ko i te Metua ra, ko Iesu Mesia tuatua-tika ra.” (1 Ioane 2:​1, 2) Ka pati to tatou Tauturu e te Akapumaana i te rangi ra no tatou e raukai ta tatou pure i te pauia na roto i tona ingoa e kia rotai ma te au Tuatua Tapu.​—Ioane 14:​13, 14; 1 Ioane 5:​14, 15.

Akaarianga i te Ariki Anga no te Tauturu o Karaiti

E maata te o maira i te pati ua anga i te Atua na roto i tana Tamaiti. Ma te puapinga o tona atinga oko, kua “oti oki tatou i te oko ravaia e te Mesia” kua riro e ko “tei oko” i te iti tangata. (Galatia 3:13; 4:5; 2 Petero 2:1) Ka rauka ia tatou i te akaari i to tatou tu takinga meitaki no ta Karaiti i rave no tatou na te akakiteanga e koia to tatou pu e kia ariu rekareka ki tana pati anga: “Kia inangaro te tangata i te aru mai iaku ra, e akaruke aia iaia uaorai, ka rave ei i tana satauro i tera rā i tera rā, ka aru mai ei iaku.” (Luka 9:23) Te ‘akaruke iaia uaorai’ kare ua ei tuatua e kua taui te pu. I te openga ra, kua “mate oki [a Karaiti] no te tangata ravarai, kia kore te aronga e ora ra e akono akaou ia ratou uaorai i te ora anga nei, kia akono ra iaia i tei mate . . . no ratou ra.” (2 Korinetia 5:​14, 15) No reira, ka akakeu oonu te ariki anga i te oko i ta tatou akara anga, au akakoroanga, e te tu oraanga. Ka tau ta tatou kaiou mutu kore kia “Iesu Mesia; ko tei oronga iaia uaorai no tatou,” kia akakeu ia tatou kia apii maata atu no runga iaia e tona Metua aroa, ko te Atua ko Iehova. Ka inangaro katoa tatou e kia tupu ua i roto i te akarongo, kia akono i ta te Atua au turanga puapinga, e kia “maroiroi i te au angaanga memeitaki ra.”​—Tito 2:​13, 14; Ioane 17:3.

I roto i te au putuputuanga Kerititiano te ngai e raukai ia tatou te au kai tau pae vaerua, te akamaroiroi anga, e te arataki anga. (Mataio 24:​45-47; Ebera 10:​21-25) Ei akatauanga, me te maki ra tetai i te pae vaerua, ka rauka ia ratou e “tiki aia i te aronga pakari [te aronga pakari akataoongaia] o te ekalesia ra .” Te akapapu maira a Iakobo: “E e ora taua maki ra i te pure akarongo, e na te Atu aia e akatu ki runga; e i rave na aia i te ara ra, e akakoreia tana ara.”​—Iakobo 5:​13-15.

Kia akatutu: Kua tata tetai tangata te akapou ra i te utunga i roto i te are auri i Aperika Apatonga ki tetai tangata pakari o tetai putuputuanga te akakiteanga i te ariki anga no “te Au Kite o Iehova katoatoa te rave ra i te angaanga meitaki tei akamataia mai e Iesu Karaiti i te tauturuanga i te tangata kia tauta i te Patireia o te Atua.” E oti kua tata aia: “Kua rekareka tikai au i te rauka mai anga taau reta. Kua akatukia toou manako anga i toku akarangatira angaia i te pae vaerua. E maata toku tumu no te akamata i te akonoanga i ta te Atua ko Iehova kapiki anga e kia tataraara. E 27 mataiti kua inga ana au e kua ngaro toku aerenga i roto i te poiri o te ara, te tiriki, te au mea tureia, te au raveanga tau kore, e te au akonoanga papu kore. I muri mai i toku akaaravei angaia ki te Au Kite o Iehova, kua manako au e kua kitea e au te mataara​—te mataara tau! Ko te ka rauka ua iaku i te rave koia kia aru i te reira.”

Maata te Tauturu a te Tuatau ki Mua te Vaitata Maira

E akapapu anga taka meitaki te kino o te au turanga i te ao e te noo nei tatou i roto i te tuatau puapinga tikai te ka aere mai i mua ake i te “mate maata.” I teianei, e urupu maata no roto mai i te au pa enua, te kopu, te au tangata, e te au reo te ‘orei ra i to ratou kakau, e kua akateatea i te toto o te Punua-mamoe.’ (Apokalupo 7:​9, 13, 14; 2 Timoteo 3:​1-5) Na te akonoanga i te akarongo i roto i te atinga oko o Iesu, te rauka ra ia ratou te akakore anga i ta ratou au ara e te tauturuia ra kia piri vaitata atu ma te Atua​—te tika, te riroanga mai ei taeake.​—Iakobo 2:23.

Te Mamoe, ko Iesu Karaiti, “e angai ia ratou [te aronga ka ora mai i te mate maata], e e arataki oki ia ratou ki te au pupui anga o te vai ora, e na te Atua e orei i to ratou roi-mata katoa i to ratou mata.” (Apokalupo 7:17) I reira ka rave pu tikai a Karaiti i tana au angaanga ei Kau Taunga. Ka tauturu aia i te au taeake katoatoa o te Atua kia puapinga tikai mei te “pupui anga o te vai ora”​—i te pae vaerua, te pae kopapa, te pae manako, e te pae ngakau. Ko ta Iesu i akamata i te 33 T.N. e tana i rave tamou mei te rangi ra ka raveia i reira ki te tuatau apa kore.

No reira, auraka e tuku ua i taau akaari anga i te ariki anga oonu no ta te Atua e Karaiti i rave​—e te rave nei rai​—no tatou. Kua raurau mai te apotetoro ko Paulo e: “E rekareka i te Atu ra. . . . Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”​—Philipi 4:​4, 6, 7.

Te vaira tetai mataara puapinga no te akaari i toou tu ariki anga kia Iesu Karaiti, to tatou Tauturu i te rangi ra. I muri ake i te opunga ra i te Ruitoru, Aperira 19, 2000, ka putuputu mai te Au Kite o Iehova i te ao katoa kia akono i te Akamaara Anga i to Karaiti matenga. (Luka 22:19) E tuatau teia ka rauka i te akaoonu i toou ariki anga i te atinga oko o Karaiti. Te pati maanaia atu nei koe kia tae atu e kia akarongo e akapeea ta te Atua akapapaanga umere no te ora na roto ia Karaiti i te akapuapinga mutu kore anga ia koe. E aravei atu i te Au Kite o Iehova i toou ngai i te ora tikai e te ngai no teia uipaanga takake.

[Tutu i te kapi 7]

Kua kite a Iesu mei teaa rai te tu kia pure pakari tikai ki te Atua

[Au Tutu i te kapi 8]

Ka tauturu mai a Karaiti ia tatou kia autu i te au manamanata maata atu kare e rauka ia tatou i te akono

[Tutu i te kapi 9]

Te tauturu maira a Karaiti ia tatou na roto i te aronga pakari aroa ua