Pene 5

To Iesu Anau Anga​—⁠Iea e Inaea?

KUA akaue a Kaisara Auguso, koia te ariki o te Patireia o Roma, kia oki te au tangata ravarai ki te oire i anau mai ei aia ki reira retitaʼi. No reira kua aere atura Iosepha ki tona ngai i anauiaʼi, ki te oire o Betelehema.

E maata te tangata i Betelehema no te retita anga, e ko te ngai ua i kitea no Iosepha raua ko Maria no te noo ko roto anake i te are no te au manu. I reira, i te ngai e au atini e etai atu manu e akonoia ra, kua anau a Iesu ki reira. Vai atura a Maria iaia ki te au aenga kakau e akatakoto atura iaia ki roto i te ngai vairanga kai na te manu.

E mea papu ra, e na te Atua te arataki anga kia tuku a Kaisara Auguso i te ture kia retita. Na teia i raukai kia anauia mai a Iesu ki Betelehema, ko te oire ia i totouia maira i te au Tuatua Tapu i te tuatau roa i topa, e ko te ngai te reira e anau mai ei te tutara tei taputouia ra.

Mei teaa ra te puapinga maata o te reira po! I vao i te au koro kua kaka maira te marama e takapini i tetai pupu tiaki mamoe. Ko te kaka ia no Iehova! E kua tuatua maira te angera a Iehova kia ratou: “Eiaa e mataku: i na oki, e tuatua meitaki taku e taoi mai kia kotou na, ka riro ïa ei rekareka maata no te tangata ravarai. I na konei oki i anau ei te Ora no kotou i te oire o Davida, koia oki te Mesia ra ko te Atu. E teia ta kotou akairo; e kite kotou i taua tamaiti ra i te vai ua anga ki roto i te are puakatoro, kua vaiia ki te kakau.” E i viviki ua te mama anga mai tetai urupu angera ma te imene anga: “Kia akakakaia te Atua i te ngai teitei i runga roa, e ei au ki runga i te enua nei i rotopu i te au tangata marekaia maira.”​—⁠NW.

I te akaruke anga taua urupu angera ra, kua tuatua te aronga tiaki mamoe ra kia ratou uaorai: “E taki aere tatou ki Betelehema, e akara i taua mea ra, i ta [Iehova, NW] i akakite mai kia tatou nei.” Kua aere viviki atura ratou e kua kite atura ia Iesu i te ngai tikai ta te angera i tuatua atura kia ratou. I te akakite anga te au tiaki mamoe ra i ta te angera i tuatua atu kia ratou ra, kua umere anake te aronga ravarai tei akarongo atura i te reira. Kua paruru a Maria i te reira au tuatua katoa ki roto i tona ngakau e kua akaperepere atura.

E manganui te au tangata i teia tuatau te irinaki ra e i anauia a Iesu ia Titema ra 25. Inara e tuatau uaua a Titema, e anu a Betelehema. Kare te au tiaki mamoe e noo ki vao i te au koro i te po ma ta ratou anana i tera tuatau o te mataiti. Pera katoa oki, kare te Kaisara o Roma e umuumu kia aere te au tangata kua tupu ke ra to ratou manako kia patoi atu iaia, kia aere i te reira tuatau anu i te paroro e retita. I te au akapapu anga kua anau mai a Iesu i te tuanga mua o te tuatau pururu anga rau rakau o te mataiti. Luka 2:​1-20; Mika 5:⁠2.

▪ Eaa a Iosepha raua ko Maria i aere ei ki Betelehema?

▪ Eaa te apinga umere tei tupu i te po i anauiaʼi a Iesu?

▪ Akapeea tatou i kite ei e kare a Iesu i anauia ia Titema ra 25?