Kia ki i te Rekareka

“Ki akera te au pipi i te rekareka e i te vaerua tapu.”​—Angaanga 13:52.

1. (a) Eaa te tu o te ua koia te rekareka? (e) Kia akakakaia te Atua no teea apinga akarekareka?

REKAREKA! Kua papaia mai teia tu Kerititiano e ko te rua ia i muri ake i te aroa i roto i ta Paulo akataka anga i te au ua o te vaerua ra. (Galatia 5:22-25) E na teaa i akatupu mai i te reira rekareka? Na te tuatua meitaki tei akakiteia maira e te angera a te Atua ki te au tiaki taakaaka ra, e tere atu i te 1,900 mataiti i topa: “I na oki, e tuatua meitaki taku e taoi mai kia kotou na, ka riro ïa ei rekareka maata no te tangata ravarai. I na konei oki i anau ei te Ora no kotou i te oire o Davida, koia oki te Mesia ra ko te Atu.” I reira kua mama maira te au angera tini e kua kapiti maira ma taua angera ra i te akapaapaaanga rekareka i te Atua i te na ko anga: “Ei kaka to te Atua i te ngai teitei i runga ra, e i te enua nei ei au i rotopu i te au tangata kitea aroaia maira.”​—Luka 2:10-14, NW.

2, 3. (a) Eaa ra i tau ei kia tono mai te Atua i tana Tama anau mua ra kia riro ei Oko no te au tangata katoa? (e) Eaa atu etai mataara ta Iesu rave anga i ta te Atua ra au akakoroanga iaia i te enua nei?

² Te akakiteia maira to Iehova akara aroa anga mai i te au tangata nei na tona orongaanga i te ora na roto i te Mesia koia te Atu ra. Ko teia Tamaiti anau mua a te Atua ra, tei akatutu maira i te pakari mou e kua akakiteia maira i te tuatuaanga no tona Metua i te tuatau o te au mea angaia ra: “I reira au i rave angaanga mou ei e te ngaueue kore i te pae iaia ra, e kua ki au i te rekareka i te au ra tataki tai, ma te akapaapaa anga ki mua iaia i te au atianga ravarai; i te akapaapaa anga i tona enua uua ra, ae ko te ki anga o toku rekareka no te tamariki ia a te tangata nei.”​—Maseli 8:30, 31, Rotherham.

³ E mea tau, i reira, kia tono mai a Iehova i teia Tamaiti, tei kite ra i te reira tu rekareka no te tamariki a te tangata nei, kia riro aia ei oko no te au tangata katoa. E akapeea teia i te akakaka anga i te Atua? Na te reira e akatuera i te mataara nona kia akatupu i tana akakoroanga meitaki kia akaki i te enua nei i te au tangata tuatua tika, e te inangaro ra i te au. (Genese 1:28) Pera katoa, iaia i te enua nei kua akaari teia Tamaiti, koia a Iesu, e i raro ake i te timata anga ketaketa roa ka rauka i te tangata apa kore ua kia tiratiratu i te akarongo anga ia Iehova ei Atu Ngateitei, e na te reira te akatikaanga i te tika no te tutara anga tona Metua ki rungao i Tana au mea i anga maira. (Ebera 4:15; 5:8, 9) Pera katoa, kua akanoo mai to Iesu mataara akono tiratiratu i te akaraanga no te au Kerititiano mou ravarai kia aru piri vaitata i tona takainga vaevae.​—1 Petero 2:21.

4. Eaa te rekareka maata tei tupu no to Iesu akakoromaki anga, e akapeea te reira i te akamaroiroi anga ia tatou?

⁴ Kua kite a Iesu i te rekareka maata i te akonoanga i te anoano o tona Metua, e i te manakonako anga i te rekareka maata atu, mei ta te apotetoro ko Paulo i akakite maira ia Ebera 12:1, 2 (NW): “E oro tatou ma te akakoromaki anga i te oroanga tei tukuia maira ki mua ia tatou nei, ia tatou e akara tamou ra ki te Rima Rave Maata e te Akatinamou i to tatou akarongo, koia a Iesu. No te rekareka tei tukuia ki mua iaia ra kua akakoromaki aia i te rakau tamamae anga, kua akakore i te akama, e kua noo ki te rima katau o te terono o te Atua ra.” Eaa teia rekareka anga? Ko to Iesu rekareka anga ia, kare no te akatapu anga anake ua i te ingoa o tona Metua e te okoanga i te au tangata mei te mate mai, mari katoa ra no te tutaraanga ei Ariki e ei Taunga Maata iaia ka akaora mai ei i te au tangata akarongo kia rauka te ora mutu kore ki te enua parataito.​—Mataio 6:9; 20:28; Ebera 7:23-26.

5. Koai ma to Iesu au “taeake,” e eaa te rekareka anga takake ta ratou ka o atu ki roto?

⁵ Ae, kua kite tamou te Tamaiti a te Atua i te rekareka i te tavinianga no te au tangata nei. E kua rekareka aia i te rave anga kapiti ma tona Metua i te ikianga i te pupu tangata tiratiratu tana i tapa e e “taeake” nona e kia mate ratou ra kua tuakaou atu ki te rangi. Ka tomo atu te reira aronga ki roto i tetai rekareka anga taka ke ma Iesu katoa. Kua tuatuaia e “e ao [to ratou] e te tapu,” e “e riro ra ratou ei taunga na te Atua, e na te Mesia, e e au to ratou iaia e kia okotai tausani i te mataiti.”​—Ebera 2:11; Apokalupo 14:1, 4; 20:6.

6. (a) Eaa te patianga rekareka ta te Ariki ka oronga atu ki tana au “mamoe ke atu”? (e) Eaa te au angaanga te rekarekaia ra e teia au mamoe i teia tuatau nei?

⁶ Kapiti katoa oki, te urupu maata o te “mamoe ke atu,” ta te Ariki e tutara ra e akataka ki tona rima katau no te mareka anga, ka rauka ia ratou tana patianga: “Ka aere mai kotou, te aronga i akaoraia e taku Metua, e noo ki te basileia i akonoia no kotou mei te maani anga mairai i te enua nei.” (Ioane 10:16; Mataio 25:34) Mei teaa ra te akameitaki anga rekareka o te reira! To te reira aronga te ka noo ki te tuanga o te Patireia i te enua nei, e manganui i o ratou ra te ariki nei i te au apainga e te angaanga i te pae o te aronga tei akatainuia ra i teianei, mei ta Iehova i totou maira: “E na te tangata ke ke e tu mai e angai i ta kotou anana; e te au tamariki a te tangata ke ra te riro ei tanu-kai, e ei tope vine, na kotou. E tapaia kotou, I te kau taunga na Iehova: e tapaia kotou, I te au tavini o to tatou Atua.” Kua kapiti katoaia teia aronga ma te peroveta a te Atua i te tuatuaanga: “E rekareka maata au ia Iehova; e rere ua taku [meta, NW] i te rekareka i taku Atua; kua akakakau mai oki aia iaku i te kakau ra i te ora.”​—Isaia 61:5, 6, 10.

7. Eaa ra teia “rā” mei te 1914 mai ra i riro ei ei mea takake roa?

⁷ Te noo nei tatou i teianei i tetai ra taka ke roa. Mei te 1914 mairai kua tae tatou ki taua ra o te Mesia ra e tutaraʼi ei Ariki, i akataka ia maira ia Salamo 118:24, 25: “Ko te rā teia i akonoia e Iehova; ka rekareka tatou e ka pereperekavana i te reira ra. Kia ora i teianei, e Iehova, te pati atu nei au; te pati atu nei au, e akamanuia mai i teianei, e Iehova e.” Ko te ra ia e itae ei ki tona take kia takore atu a Iehova i te akonoanga atua o Babulonia e ka taokotai ei i te vaine akaipoipo ou a te Mesia e 144,000 au taeake ma to ratou Ariki i te rangi ra. Ka ‘rekareka e kia pereperekavana’ te au tangata ravarai o te Atua i te reira. Ka rekareka katoa oki ratou kia tamaki atu to ratou Ariki Mesia ia Aramakito i te akaora anga i tona iti tangata tiratiratu ki roto i tona ao ou no te tuatua tika. (Apokalupo 19:1-7, 11-16) Ka oronga ainei a Iehova i te autu anga i te tuatua anga tona au tangata i teia manakonakoanga rekareka? Na te ripoti e aru mai nei e akataka mai.

Akatotoa Anga ki te Ao Katoa

8. (a) Akapeea te akakite angaia o te rekareka ma te vaerua tapu i roto i te ripoti i nga kapi 18 ki te 21 o teia makatini nei? (e) Eaa etai o te au akataka anga o teia ripoti?

⁸ “E manakonako anga maata ma te mana o te vaerua tapu” to te au Kite o Iehova i teia tuatau nei. (Roma 15:13, NW) Te akakiteia mai nei teia i te papaanga i nga kapi 18 ki te 21 o teia makatini nei, i te ngai i akapapaia mai ei te ripoti no te angaanga o te Patireia i te ao katoa nei i te 1990. E rekareka maata rai to tatou i te kite anga i te take ou e 4,017,213 te numero o te aronga orometua tei rave i te tutu aere anga! Kua akakite mai teia i te tupu anga e 77 patene i te tuatau o te tai ngauru mataiti i topa akenei, i te viviki anga te akaputuanga i te au mamoe i roto i te au enua e 212 takapini te ao katoa. I muri ake i te 15 mataiti, kua taea te take maata katoa e 301,518! E au papetito anga tei maata te numero i etai uruoaanga e manganui, ko te tu ia i te au ngai i akaputu atu ei te au Kite no te Itinga ra O Europa. I roto i teia aronga e manganui te au mapu, i te akakiteanga e kua pikikaa te tuatua a te totiaretiki e ka kore atu te akono anga atua me mate atu te aronga kua ruaine ra.

9. (a) Eaa te au tupu anga rekareka no te akamata vave anga te au metua i te apiianga? (e) Eaa te au mea i tupu i toou ngai me kare i etai atu ngai ei akapapu mai i te reira?

⁹ E maata te aronga ou te akarongo ra i te akauenga ia Salamo 32:11 e: “Kia rekareka e kia pereperekavana ia Iehova, kotou e te aronga tuatua-tika ra; e maeva i te rekareka, kotou katoa, e te aronga i tiratiratu te ngakau ra.” I te akaraanga e rai te au metua te akono ra i te ako kia apii i ta ratou au tamariki “mei to tamariki anga mairai.” (2 Timoteo 3:15) E meitaki te apiianga i te au puka e te au tepe ratio tei akapapaia ra na te aronga tamariki tokoiti ua mataiti. Kia aere atu teia au tamariki ki te ngai apii, kare e roa kua oronga ratou i te akakite anga meitaki, ei akaraanga kua ripoti mai tetai tamaine Tiapani e varu ra ona mataiti: “I muri ake i te orote o te akau ra, kua aravei atu au i toku puapii e kua ui atu kiaia: ‘I aere ana ainei koe ki te tanumanga o toou metua tane i te tuatau orote ra?’ Kua pau maira aia: ‘Ae, e tangata maru tikai toku metua, e aere ana au i te au mataiti ravarai ki tona ngai tanumanga.’ Kua karanga atu au: ‘Me ka apii koe i te Puka Tapu e ka aru i te au apiianga a te Atua ra, ka rauka ia koe te kite akaou i toou metua akaperepere i te enua parataito ra.’ E kua oronga atu au i te My Book of Bible Stories. I teianei te tatau nei to matou puapii e tai pene o teia puka ki te pupu katoatoa i te tuatau kaikai i te au epetoma tataki tai.”

10. Eaa te akakoro anga meitaki tei akonoia e te puka Young People Ask, e eaa etai akaraanga?

¹⁰ Kua rave te aronga ou i to ratou au mataiti ou anga ra i te apii anga tataki tai e te akakitekite anga kia etai atu i te puka Questions Young People Ask​—Answers That Work (Au Uianga Uiia e te Aronga Ou​—Au Pauanga te Angaanga Ra). Kua manako ariki katoa te au metua i teia puka. Ko tetai tuaine i Tuiterani, kua o atu aia ei painia tauturu, e kua iki aia kia aravei atu i te au metua o te au taeake o tana tamaiti i te ngai apii. Kua akatuera mai teia i te tuatau no etai uriuri anga manako meitaki ma te au metua e manganui, e 20 puka (ko te maataanga e Young People Ask) e e 27 makatini tei orongaia atu na ratou. I te oronga anga tetai tamaine apii i Tirinitata i teia puka na tona puapii i te ngai apii, kua aru atu tona metua vaine i muri akera, e kua tua atu e 25 au puka na te aronga puapii e 36 katoa ra. Kua rave ua atu aia i tetai marama mai ma te akataka anga i te tuatau no te aravei i te au metua tana i kite ana, kua tua atura aia e 92 au puka e kua akamata i etai apiianga Puka Tapu. I Korea kua rave tetai puapii no te pupu apii rotopu, i te puka Young People Ask no tana au ako anga poto ua no runga i te au tumu tuatua e “Akapeea au i te Akameitaki Mai Anga i Taku Apii?” e pera katoa oki “Akapeea au e Meitaki ei Toku Piri Anga ma Toku Puapii” i muri akera kua orongaia atu te puka. I muri ake i te rave anga te au tamariki apii e 39 puka, kua akamata tetai papaki o te au metua i te akaapa. Inara kua akara matatio te puapii maata i tetai o taua puka ra, e kua karanga aia e “meitaki tikai” te reira, e kua pati mai i tetai na tana tamaine.

Te Kite Meitaki Rava

11, 12. Eaa etai akakiteanga tei tataia e te oronga maira te au puka a te Totaiete Punanga Tiaki Anga i te kite meitaki rava atu?

¹¹ Kua ariki te aronga e manganui i te puapinga no te kite no ta tatou makatini, ei akatauanga i tetai ngai apii i Marike tei pati maira e 1,200 au puka Awake! no Tiurai 22, 1990 (akakite akaapaanga i te apinga akakona e crack) kua apiiia te reira i roto i tona au pupu. Pera katoa, kua rave ua atu te tu akono meitaki o te au tamariki a te au Kite o Iehova i te apii, i te akakite anga i te akaraanga meitaki. I roto i tetai pia apii anga maniania i Tairani, kua kapiki atura te puapii ia Racha e 11 ona mataiti ki mua i tona pupu kua akapaapaa atura iaia no tona tu akono meitaki, i te na ko anga: “Eaa kotou katoatoa ka kore ei e akariro iaia ei akaraanga? E maroiroi aia i tana au apii e e mako meitaki tona tu akono.” Kua tuatua katoa mai aia: “E tikai, i toku manako ka tau kotou kia riro ei Kite no Iehova mei ia Racha rai kia meitaki mai to kotou tu akono.”​—Akaaiteia atu kia Maseli 1:8; 23:22, 23.

¹² Kua tata tetai tuaine mapu i te Patireia Tominika: “Koi a ua akera oku mataiti, e kua vaitata au i te akaoti i taku apii tamariki meariki a tetai akonoanga, te ngai ia i apiiiaʼi au i te tatau e te tata. Kua oronga atu au i te puka Ka Rauka ia Koe te Ora Mutukore i Paradaiso i te Enua Nei, ei apinga aroa na te paretenia koia ra toku puapii, ma te tuatua tei tataia: ‘Te akameitaki nei au e naau i apii iaku i te tatau e te tata. Te inangaro nei au kia kite katoa oki koe i toku akarongo e kia rauka ia koe toku manakonako anga kia ora e tuatau ua atu ki runga i te enua nei a te tuatau e riro ei ia ei parataito.’ No teia kua akaateaia atu au ki vao i te apii. E varu mataiti i muri mai kua aravei akaou atu au i teia puapii. Kua akakite mai aia e, noatu te maata o te patoi anga a te orometua, kua rauka iaia i te tatau i taua puka ra. Kua aere aia ki te oire maata noo ei, e i reira kua rauka iaia i te apii i te Puka Tapu ma tetai Kite. Kua papetitoia maua i te Uruoaanga Tapere o te ‘Vaa Viivii Kore’ ra.” Mei tei totouia maira, ka rauka mai te pakari no roto i “te vaa o te tamariki meangiti”!​—Mataio 21:16; Salamo 8:1, 2.

13. Akapeea te aruanga a te au mapu e manganui i te ako a Solomona, e akapeea te akakite mai anga i te reira i roto i te ripoti no te ao katoa nei?

¹³ Kua orongaia mai e Solomona te ako akamaroiroianga: “Ka rekareka, e tenana tangata ou, i toou na ou anga, e kia rekareka oki to ngakau i te au rā o toou na ou anga; e aere ua koe na te au arataa na toou uaorai ngakau.” (Koheleta 11:9) E mea rekareka tikai i teia tuatau kia kite e manganui te au tamariki a te au Kite o Iehova i te akono anga i teia au tuatua, ma te akonoanga i to ratou au mataiti mapu anga ei teateamamao anga no te oraanga ei tavini ia Iehova e te tomo atu anga ki teia angaanga meitaki rava i te au tuatau katoatoa i muri ake i to ratou akaoti anga i te apii. Te tupu viviki ua atura te pupu painia, e 821,108 te ripoti ra i te mataiti tataki tai. Tei Kapiti atu ki te 11,092 au taeake te tavini ra i Betela, te mono ra e 21 patene o te aronga tutu aere katoa.

14. Eaa te tauturu ta te au tuaine e rave nei, e eaa te akameitaki anga tau no ratou?

¹⁴ I te au enua e manganui, mei ia Marike rai, e vaitata i te 75 patene o te au painia ravarai e au tuaine, te tuku atura i te mana ki te au tuatua ia Salamo 68:11 ra e: “Kua tuku maira te Atu [ko Iehova] i te tuatua, e na tetai nuku tamaine maata i akakite.” E mea tau kia akameitakiia to tatou au tuaine no te mea te rave ra ratou i te tuanga maata o te angaanga tutu aere anga. Na ta ratou apiianga karape i te au apii Puka Tapu i te ngutuare te taki maira i te aronga e manganui ki te tuatua mou, e ko te au tuaine tei akaipoipoia te turu tiratiratu ra i ta ratou au tane i te au angaanga e manganui o te putuputuanga ka tau te akapaapaa anga maanaana no ratou katoa.​—Maseli 31:10-12; Ephesia 5:21-25, 33

Tupu Ruperupe Nei te Kite Puka Tapu

15. (a) Akapeea etai enua i roto i te papa anga o te ripoti no te ao katoa nei i tere roaʼi ki mua i te angaanga apii Puka Tapu i te ngutuare? (e) Eaa etai au tupu anga te ka rauka ia koe i te akakite, ei akaarianga i te uua anga o te au apii Puka Tapu?

¹⁵ Te tupu ruperupe nei te angaanga apii Puka Tapu, kua raveia e 3,624,091 au apii anga i te ao katoa i te au marama tataki tai. Ka rauka i te tuatua mou no te Puka Tapu i te taui i te au tu tangata, mei tei akakiteia maira e tetai ripoti no raro mai. I te akamata anga o Tianuare 1987, kua akaateaia mai tetai tangata ki Niu Tireni mei Otereria mai i muri ake i te tapekaanga e 25 marama no te keikeia e te tata moni pikikaa. I konaia ana aia i te au apinga akakona e kua oko katoa aia i te reira no te tere atu i te 17 mataiti. I te mataiti i muri mai kua akamata tana vaine i te apii Puka Tapu ma te au Kite o Iehova, e i te tupu anga tona kite, kua kite te tane i te taui anga o tona tu akono. Kua riro mai aia ei vaine meitaki e ei metua vaine meitaki. I te raurauanga a tana vaine, kua aere atu teia tangata ki te uipaanga kotinga ia Tiunu 1989. Kua ariki aia i tetai apii Puka Tapu i tona ngutuare, e kua kitea te akamata anga o te au taui anga maata i te akara anga iaia e tona tu oraanga. Kua akamata i reira te aere nga mema toko itu katoa o te ngutuare ki te au uipaanga. Kua papetitoia aia ia Tianuare 1990 ei tangata tei aru i ta Paulo ako meitaki ia Ephesia 4:17-24 ra.

16. (a) Eaa te au ripoti no te Akamaaraanga i te 1990 i riro ei ei tumu no te rekareka? (e) Eaa te tumu rapurapu ka tau kia akonoia, e eaa te tauta anga tau no tatou kia rave ei tauturu atu?

¹⁶ Ko tetai tuanga meitaki roa atu o te ripoti no teia mataiti, ko te maata ia o te aronga e 9,950,058 i tae ki te oroa no te Akamaara anga, tei akonoia i te Ruirua, Aperira 10, 1990. E tere atu i te 70 i roto i te 212 au enua tei ripoti i te aronga tei putuputu mai e e tere atu i te toru taime maata atu i te take o te aronga tutu aere! Ei akaraanga, noatu te au arairai anga, e itu au enua Aperika ma te take kapitiia e 62,712 aronga tutu aere kua ripotiia e e 204,356 aronga tei putuputu mai ki te Akamaara Anga. Kua rekareka a Riperia akapueurikirikiia ra e 1,914 aronga tutu aere no tei tae mai e 7,811 ki te Akamaara Anga. I Aiti ma tetai take aronga tutu aere e 6,427 kua ripoti mai e 36,551. E 3,958 o te 886 aronga tutu aere i te au motu ke ke o Mikoronetia. I to Tiri Ranaka 1,298 aronga tutu aere e 4,521 tei ripotiia mai e to Tamapia 73,729 aronga tutu aere e 326,991 tei tae mai ki te Akamaara Anga, e tare anga tai peretana teia ki te 25 au tangata o Tamapia. Te akakite akaou maira te ripoti no te ao katoa nei e e au mirioni ua atu te aronga ngakau tae te tapapa maira kia akaputuia mai ki roto i te koro mamoe. Inara kare e rava e ko te ngakau tae anake ua. Ka rauka ainei ia tatou kia akamaata atu i te tu o ta tatou angaanga apii Puka Tapu, te tauturu maata anga i te aronga e aere maira ki te Akamaara Anga kia patu i te akarongo maroiroi? Te inangaro nei tatou kia riro mai ratou ei oa rave angaanga no tatou i te akapaapaaanga ia Iehova. Tei runga i te reira to ratou oraanga!​—Salamo 148:12, 13; Ioane 17:3; 1 Ioane 2:15-17.

Te Kianga o te Rekareka

17. Eaa te au akaraanga no te anere mataiti mua ra te ka tau ei akamaroiroi i to tatou manako kia mou marie i to tatou rekareka?

¹⁷ Noatu rai eaa te au timata anga te vai maira ki mua ia tatou, e akapapu tatou kia mou to tatou rekareka. Penei kare tatou e rokoia e te tupu anga ngata mei to Setephano ra, inara ka rauka ia tatou te akamaroiroi anga na tona akaraanga. I raro ake i te akaapa anga, kua rauka iaia te tamou i tona tu rekareka. Ko tona enemi kua “akara atura i tona mata mei te mata o te angela ra.” Kua tu te Atua i te pae iaia i tona takinga kinoanga. Kua tuatua mataku kore atura aia, e “kua ki akera aia i te Vaerua Tapu” tae roa ki tona matenga no te akarongo. I to Paulo raua ko Banaba ariu anga ki to te etene i ta raua tutu aere anga, “mareka rava atura ratou, e akameitaki atura oki i te tuatua a te Atu [ko Iehova].” Kua tupu akaou maira te takinga kinoanga. Inara kare te aronga akarongo ra i mataku. “Ki akera te au pipi i te rekareka e i te Vaerua Tapu.” (Angaanga 6:15; 7:55; 13:48-52) Noatu eaa ta to tatou enemi ka rave kia tatou, noatu eaa to tatou timata anga i te oraanga, auraka rava tatou e tuku kia akaparuparuia to tatou rekareka i te vaerua tapu ra. Kua ako maira a Paulo: “E rekareka i te [m]anakonako anga; e akakoromaki i te mate; tamou marie tikai i te pure.”​—Roma 12:12.

18. (a) Eaa te Ierusalema Ou, e eaa ra i tau ei te iti tangata o te Atua kia rekareka ma ia katoa ra? (e) Akapeea te au “rangi ou e te enua ou” i te akameitaki anga i te au tangata katoa?

¹⁸ Mei teaa ra te tu takake te reira manakonakoanga! Kua akakite a Iehova ki tona au tangata ravarai: “I na oki, te anga nei au i te rangi ou e te enua ou: kare oki tei muatangana ra e maaraia, kare e akamanako akaouia atu. E rekareka ra kotou, e e rere ua i te rekareka e tuatau ua atu, i taku e anga nei.” Kapiti katoa te Mesia koia te Atu ma te “Ierusalema Ou” (te oire maata i teianei o ta te Atua ra akaaerenga i te rangi, te “Ierusalema i runga ra”) e te totaiete o te ao ou i te enua nei ka apai mai i te rekareka maata ki te au tangata katoa. (Galatia 4:26) Te tuakaouanga o te au tangata mate, e te taaki anga i te aronga akarongo katoatoa ki te oraanga mutu kore ei tangata apa kore ua, e tuatau ua atu te puapinga anga, te oraanga meitaki ki te enua parataito​—mei teaa ra te manakonako anga teitei roa atu e tumu tikai te reira no te rekareka anga! Mei ia Iehova uaorai ka kite i ‘te mareka anga ia Ierusalema e ka rekareka i tona au tangata ra,’ no reira ka oronga katoa tana peroveta i tetai atu kapiki anga ki to te Atua au tangata ra e: “E rekareka kotou ma Ierusalema katoa, e rere ua kotou i te rekareka iaia, kotou, e te aronga katoa e aroa iaia ra: kia maata to kotou rekareka iaia.” (Isaia 65:17-19; 66:10; Apokalupo 14:1; 20:12, 13; 21:2-4) Kia ki tatou i te rekareka e i te vaerua tapu ia tatou e akarongo ra i te apiianga a te apotetoro ko Paulo e: “E rekareka i te Atu ra, aua e tivata, e te tuatua akaou atu nei au, Kia rekareka rai kotou”!​—Philipi 4:4.

Akatakaanga i to Tatou Rekareka:

◻ Eaa te akaraanga no te akakoromaki anga rekareka ta Iesu i akanoo mai no tatou?

◻ Eaa nga tumu no nga pupu akatapuia e rua ra no te rekareka?

◻ Akapeea te aronga ou e te aronga ruaine i rekarekaʼi i te tuatua mou i teia tuatau nei?

◻ I te uriuri akaouanga i te ripoti o te 1990, eaa te pau anga te orongaia maira i teianei no te pure, e “e akamanuia mai i teianei, e Iehova e”?

◻ Aea e akapeea e raukai te ki anga o te rekareka ra?

[Tutu i te kapi 16]

Kua akakiteia mai e te angera a Iehova te anau anga o te Mesia ra ko te Atu ei ‘tuatua meitaki no tetai rekareka anga maata’