Pene 76

Kaikaianga ma Tetai Pharisea

I MURI ake i ta Iesu pauanga i te aronga patoi tei akaapa ra i tona mana no te akaora i te tangata muteki, kua pati maira tetai Pharisea iaia kia aere e kaikai. I mua ake ka kai ei ratou, kua rave te au Pharisea i ta ratou peu orei i te rima tae roa ake ki te poo rima. Kua rave ratou i teia i mua ake e i muri katoa ake i te kaikai anga e i te taui anga mei tetai manga ki tetai. Noatu rai e kare te reira peu i aati ana i te ture tataia a te Atua ra, te topa mamao atura i ta te Atua i umuumu i te tumu no te tamaanga.

I te kore anga a Iesu e akono i ta ratou peu, kua poitirere te tangata ngutuare iaia. Noatu rai e kare tona poitirere anga i tuatuaia mai, kua kite ra a Iesu e kua na ko atura: “Kareka kotou, e te au Pharisea na, te tamā na kotou i te kapu ma te mereki ki vao ake; kareka o roto ia kotou uaorai, te ki nei ïa i te noinoi apinga e te kino. E te aronga neneva e, kare ainei na tei anga i vao akera, i anga katoa i roto?”

Kua akakite pu atura Iesu i te tu pikikaa o te au Pharisea ra tei rave i te peu tama i to ratou rima kare ra i tama i to ratou ngakau i te au kino. Kua ako atura aia: “Ka oronga ra i ta kotou apinga [aroa no roto ra, NW] e, i na! e mā anake te au mea katoa ra ia kotou i reira.” Ka tau ta ratou oronga anga na te ngakau aroa e akakeu, kare na te inangaro kia manakoia mai e etai ke ra na ta ratou akamea ua e e tuatua tika ratou.

Kua na ko atura Iesu: “Aue kotou, e te au Pharisea e! te oronga na kotou i te ngauru o te minete, e te pegano, e te au rakau rikiriki ravarai, e te kopae ua nei oki i te tuatua-tau, e te anoano i te Atua: ko ta kotou ïa e akono e tikaʼi, e auraka katoa e akaruke i tera.” Te umuumuia ra to Iseraela i te Ture a te Atua kia tutaki i te ngauru, me kare te tuanga ngauru, o te ua o te kai tanu ra. Te minete e te pegano e au rakau rikiriki anake ia me kare e ngangaere no te akareka i te kai. Te tutaki meitaki ra te au Pharisea i teia au rakau rikiriki nei, inara kua akaapa atu a Iesu ia ratou no te manako kore i te au mea maata te umuumuia kia akaari i te aroa, kia akono i te takinga meitaki, e kia mako oki.

Kua tere atura ta Iesu akaapaanga ia ratou i te na ko anga: “Aue kotou, e te au Pharisea e! te inangaro na oki kotou i te nooanga meitaki i te au sunago ra, e kia aroaia oki i te ngai okoanga ra. Aue kotou, e te au tata tuatua e, e te au Pharisea pikikaa! mei te vaarua turuma kitea kore ra kotou na, ko tei aere vare uaia e te tangata na rungao e kare i kite.” Kare i kitea to ratou tu viivii. E akaari anga i vao ua te akonoanga o te au Pharisea kare ua ra e puapinga o roto ra! Kua akatumuia ki rungao i te pikikaa.

I te akarongo anga ki teia akaapaanga, kua tuatua riri maira tetai roia, koia tetai tei kite i te Ture a te Atua ra, kua karanga: “E te Orometua, i pera mai koe ra, kua akakino katoa mai koe ia matou.”

Kua mou katoa ra Iesu i te reira aronga kite i te Ture e na ratou katoa te apainga, kua na ko atura: “Aue katoa oki kotou, e te au apii ture e! te tuku na oki kotou i te apainga maranga kore i runga i te tangata, e kare rava oki tetai rima o kotou na e mirimiri ua atu i taua apainga ra. Aue oki kotou e! te patu nei kotou i te tanumanga o te au peroveta, ta to kotou ai metua i ta ra.”

Te au apainga ta Iesu i taiku ra ko te au peu i tuatua uaia ra, inara kare teia aronga apii ture nei e apai i tetai ture meangiti ua kia mama mai ei no te au tangata ra. Kua akakite atura Iesu e kua akatika ratou kia ta i te au peroveta ra, e kua akamatakite atura aia: “[Kia] umuumuia mai te toto o te peroveta ravarai, i akamaringiia mei muatangana mai o teianei ao, i teianei uki; Mei te toto mai o Abela e tae roa ake ki te toto o Zakaria, tei taia i roto i te va o te atarau e te nao ra: tikai taku e karanga atu kia kotou nei, Ka umuumuia mai i teianei uki.”

Kua akamataia maira te ao o te au tangata te ka rauka kia okoia mai i te anau mai anga te tamariki a Adamu raua ko Eva; e no reira kua ora a Abela i “te akatumuanga o teianei ao.” (NW) Aru mai i te ta anga kino ia Zakaria, kua takinoia ra a Iuda e te nuku no Suria. Inara kua totou a Iesu i te takinoanga kino roa atu i tona uaorai uki no te mea e maata rava atu tana kino i rave. Kua tupu te reira takinoanga e vaitata e 38 mataiti i muri akera, koia oki i te 70 T.N.

I te rave ua atu anga i tana akaapaanga, kua karanga atura Iesu: “Aue oki kotou, e te au apii ture e! kua apai ke oki kotou i te taviri o te kite, kare kotou uaorai e tomo ki roto, e te aronga e anoano i te tomo ra, kua tāpu kotou!” E angaanga tikai ta tera aronga kite i te Ture kia akataka i te Tuatua a te Atua ra ki te au tangata, i te akatuera anga i tona aiteanga ra. Inara kare ratou i rave i te reira e kua apai ke atu i te tika no te au tangata kia kite i te reira.

Kua riri te au Pharisea e te aronga kite i te ture ra kia Iesu no te akakite i to ratou apa. I tona akaruke anga i te are, kua akamata ratou i te patoi pakiri atu iaia e i te tuku i te au uianga kiaia ra. Kua tamata ratou kia mou aia i te tuatua anga i tetai apinga e raukai ia ratou kia tapekaia aia ra. Luka 11:​37-54; Deuteronomi 14:22; Mika 6:8; 2 Paraleipomeno 24:​20-25.

▪ Eaa ra a Iesu i akaapaʼi i te au Pharisea e te aronga kite i te Ture ra?

▪ Eaa te au apainga ta te au roia e tuku ra ki runga i te au tangata ra?

▪ I naea “te akatumuanga o teianei ao?”