Pene 77

Te Uianga o te Tuanga Apinga

TE PAPU ra e kua kite te au tangata e te kaikai ra a Iesu i te ngutuare o tetai Pharisea. E kua uipa maira te aronga e mano tini ua atu e kua tiaki atu i to Iesu aere mai anga ki vao. Kare i aite ki te au Pharisea tei patoi ra ia Iesu e kua tauta ra kia mou tetai tuatua tarevake nana, kua akarongo meitaki atu teia au tangata kiaia e kua manako ariki katoa oki iaia.

Te ariu mua anga ki tana au pipi, kua tuatua atura Iesu: “E matakite i te akaopue a te au Pharisea, e pikikaa te reira.” Mei tei akakiteia maira i te kaikai anga, ko te akatereanga akonoanga a te au Pharisea katoa ra kua ki i te pikikaa. Inara noatu te tapokiia ra te au ravenga kikino a te au Pharisea na te tu akameamea ua e te akono ra i te Atua, i te openga ka akakiteia mai te reira. Kua karanga a Iesu: “Kare oki e mea tapokiia e toe i te akakiteia; kare e mea ngaro e toe i te kitea.”

Kua rave akaou atura Iesu i te akamaroiroi anga tana i oronga ki te 12 i te unga atu anga ia ratou i te tere tutu aere i Galilea. Kua karanga aia: “Auraka e mataku i te aronga e ta mai i te kopapa nei, e oti akera, kare atu ta ratou e rauka.” I te mea kare e ngaropoina i te Atua noatu e e okotai ua manu rikiriki, kua akapapu atura Iesu i tana au pipi e kare katoa ratou e akangaropoinaia e te Atua. Kua na ko atura aia: “E kia aratakiia kotou ki te au sunago e ki mua i te aroaro o te au akava ra, e te au tutara, . . . Na te vaerua tapu e apii mai ia kotou i tei tau kia karanga atu i reira.”

Kua tuatua maira tetai no taua aronga tini ra. Kua pati maira ia: “E te Orometua, e tuatua ake ana koe ki taku tuakana, e tua aia i to maua apinga.” Te akataka maira te Ture a Mose e e rua tuanga o te apinga na te tama mua, no reira kare e tumu no te taumaro anga. Inara i te akara anga te inangaro ra te reira tangata kia tere atu tana tuanga i ta te ture i akatika.

Kare tikai a Iesu i o atu ki te reira manako. Kua karanga atura aia: “E tama, naai au i akariro ei akava e ei tua apinga i o kotou nei?” I reira aia i akakite atu ei i teia ako meitaki ki te aronga tini ra: “E akono meitaki e e matakite ia kotou i te morimori apinga: e maata ua oki to te tangata nei apinga, kare oki tei taua apinga nona ra tona ora.” Ae, noatu e maata te apinga a tetai tangata, ko te mea matauia ka mate aia e ka akaruke pouroa mai i te apinga. Ei akaketaketa atu i te reira tika, e pera katoa ei akaari i te tarevake tei kore e patu i te turanga meitaki ma te Atua ra, kua tuatua a Iesu i tetai akatutuanga. Kua akakite maira aia:

“E kainga ua maata to tetai tangata apinga nui: Kua na ko iora aia, i te akaeatu anga ki roto iaia uaorai, Eaa ra au, kare oki aku vairanga e o mai ei toku apinga? Kua na ko akera aia, E akapera au: e vavaʼi au i toku au are kai nei e akatu atu ei ei are mamaata; ei reira akaputuputu ei au i taku kai ravarai e toku apinga: Ka karanga atu ei ki toku [meta, NW], E taku [meta, NW] e, e apinga maata toou, kua uipa ïa ki te vairanga no te au mataiti e manganui; e akaangaroi marie, e kaikai, e inu, e kia rekareka marie. Kua tuatua maira ra te Atua kiaia, E tera ra neneva e! ei teianei rai po e tiki naia mai ei toou [meta, NW]: noai iora tenana au apinga taau i akaputu na?”

I te akaopenga ra, kua akakite mai a Iesu e: “Ko te tu ïa o te tangata i akaputuputu i te apinga nona uaorai, kare i maata tona apinga i te Atua ra.” Noatu rai e kare te au pipi i ereereia ki te tarevake na te akaputu anga apinga nui, ka ngoie ua ratou i te akavareia kia kore e tavini ki te Atua ma te ngakau katoa na te au apiapi o te au ra tatakitai no te oraanga. No reira kua akono a Iesu i te reira atianga i te taiku akaou anga i te ako meitaki tana i oronga atura e vaitata i te mataiti e te apa i topa i tana Tuatua i te Maunga ra. Kua ariu atu aia ki tana au pipi, e kua na ko atura:

“I ako atu ei au kia kotou i teianei, Auraka e apiapi i to kotou ora, i ta kotou e kai; e te kakau no to kotou kopapa. . . . E akamaara i te au kotaa; kare ratou e ruru, kare oki e kokoti; kare ua e are apinga, kare e are kai; i angaiia ra ratou e te Atua. . . . E akamaara i te au lili, te peea nei to ratou tupu; kare ratou i angaanga, kare oki i iro; e karanga atura au kia kotou, E tae ua atu ki te manea ope o Solomona, kare rai tona manea i arite ki tetai o ratou nei. . . .

“Auraka kotou e ui ua e, i ta kotou e kai, e ta kotou e inu; auraka oki e noo ma te apiapi. Ko ta te au etene oki ïa o teianei ao e kimi nei, ko taua au mea katoa ra; kua kite na to kotou Metua e, kia rauka taua au mea ra ia kotou e tikaʼi. E kimi ra kotou i te basileia o te Atua, e kapiti katoaia mai taua au mea katoa ra ia kotou.”

E maata atu oki i teia tuatau ngata tikai te oraanga, te tau ra ta Iesu au tuatua kia akamanakoia. Ko te tangata te apiapi maata ra no te au apinga kopapa nona e te akamata ra i te akameangiti maira te kimi i te au apinga no te pae vaerua, te akaari maira i te ngere i te akarongo i to te Atua mana no te oronga i te au apinga no Tona au tavini. Luka 12:​1-31; Deuteronomi 21:17.

▪ Penei, eaa te tumu i ui ei te tangata no tona tuanga apinga, e eaa te ako ta Iesu i oronga atura?

▪ Eaa te akatutuanga ta Iesu i taangaanga ra, e eaa tikai te tumu?

▪ Eaa te ako ta Iesu i tuatua akaou ra, e eaa ra i tau ei no te reira atianga?