Kua Kite Aia i te Anoano o Tona Ngakau
TE ANOANO ra ainei toou ngakau i te kite i te Patireia o te Mesia kia tutara i te au enua katoatoa nei? Me koia ia, te umuumu nei koe e te pure no te akameitakianga tei totouia no te enua i raro ake i te reira Patireia i te rangi. E taangaanga i te akakoromaki, i reira, “kia tupu ra te mea inangaroia ra, e tau ïa ki te rakau ora.”—Maseli 13:12; Iakobo 5:7, 8.
Tere atu i te 2,000 mataiti i topa ra, te noo ra i Ierusalema te ‘tangata tuatua-tika e te akono i te Atua,’ ko Simeona. Kua rauka iaia te akarongo i roto i te au totou o te Mesia e tei akakoromaki i te “tapapa ra i te akapumaana no Iseraela.”—Luka 2:25.
Oronga Mai te Au Totou o te Mesia i te Manakonakoanga
Na Iehova i akamata i te totou mua o te Mesia—ko tei oronga mai i te manakonakoanga ki te au tangata tu ara e te mate ua. Kua totou te Atua no te aerenga mai o te Uanga o tana “vaine,” me kore tana akaaerenga i te ao katoa e pini ua ake.—Genese 3:15.
Kua akatakaia mai Aia ei uanga na Aberahama, e kua akakite mai a Iakoba i tona aerenga mai. (Genese 22:17, 18; 49:10) E kua akapaapaaia te au kakaanga o te Patireia o te Mesia i roto i te au taramo. (Salamo 72:1-20) Kua akakite a Isaia e ka anauia te Uanga na roto mai i tetai paretenia, e kua totou a Mika e ka tupu te anauanga i Betelehema. (Isaia 7:14; Mika 5:2) Ko teia ra tetai au mea iti ua o te au totou e manganui no te Mesia.
Kare Rai e Mesia!
E akaata atu ki muri, e tamanako ana e te aere maira te anere mataiti T. N. i mua. E i teianei e 4,000 mataiti te roa o te totou mua a te Atua no te Mesia. Kua kite te au ngati Iuda i te akapouanga o te iero o Iehova, te takore anga o to ratou kainga enua, e te 70 mataiti tuikaa anga i Babulonia, e te maata atu i te 500 mataiti o te kauraro anga ki te au tutara Kenitara. E kare rai e Mesia!
Mei teaa atura te au ngati Iuda mataku i te Atua i te anoano tikai anga atu i te aerenga mai o te Mesia! Mei ko mai iaia ra ka tere mai te au akameitakianga kia ratou e ki te pa enua katoatoa.
E Tangata Akono i te Atua
I rotopu i te au ngati Iuda akono i te Atua tei anoano tikai ra e te pureanga no te aerenga mai o te Mesia ko Simeona, e tavini pakarikari tiratiratu no Iehova te noo ra i te oire maata o Iudea. Kua tupu tetai mea meitaki kia Simeona.
Kua tuku te Atua i tona vaerua tapu ki runga ia Simeona e kua tutaki atu iaia ma tetai akakiteanga. Kare a Simeona e kite i te mate kia tae rava ki tona kiteanga i Tetai te ka riro mai e ko te Mesia. Inara te pati nei te au epetoma e te au marama. E te ruaine nei a Simeona e kare e manakoia e ka ora ua atu. Ko ta te Atua taputou kiaia, ka akatupuia ainei?
I tetai ra (i te 2 M.T.N.), kua aere mai tetai nga tangata akaipoipo ma tetai pepe i ko i te iero mei Betelehema mai. Kua akakite te vaerua tapu kia Simeona e ko teia te ra tei tiaki roaia. Kua aere atura aia i ko i te iero, e i reira aia e kite ei i Tetai tei tataia ra e te au peroveta. I te aere vivikianga i te ka rauka i tona kopapa i te rave kua kite atu aia ia Iosepha, Maria, e te pepe.
Mei teaa atura te tu o te rekareka i to Simeona apai anga i te pepe ko Iesu i roto i tona rima! Ko Teia te Mesia tei totouia—“te Karaiti o Iehova.” I tona pakari anga kare e rauka ia Simeona i te manakonako no te akara ia Iesu i te akatupu anga i Tana angaanga i te enua nei. E inara, e mea mataora tikai i te kite anga iaia e ei pepe. Te akamata nei te au totou no te Mesia i te akatupuia. Mei teaa atura te mataora ia Simeona! I teianei ka merengo ua aia i te moe atu i te mate e tae ua atu ki te tuakaouanga.—Luka 2:25-28, akaaite NW.
Au Tuatua Totou a Simeona
Ia Simeona e taki ra i tona reo i te akapaapaa ia Iehova, ka rongo tatou iaia e tuatua ra: “E taku Atu e, e tuku koe i toou tavini i teianei ma te au, kua tau oki i taau tuatua; Kua kite akenei oki toku mata i te Ora naau, I akonoia e koe ki mua i te mata o te tangata katoa nei; Ei turama, ei akamārama mai i te au etene, e ei kakā oki no toou iti-tangata no Iseraela.” Kua umere atu a Iosepha, te metua angai o Iesu, e Tona mama, ko Maria, no runga i teia au tuatua i tuatuaia.—Luka 2:29-33.
Kua kaka to Simeona nga mata e iaia e akameitaki ra ia Iosepha raua ko Maria, mei tera te tu te oronga anga i ta Iehova akameitakianga kia raua no te akatupuanga i ta raua au apainga ki te tamaiti ra. E i reira kua riro mai te nga mata o te tangata ruau e kia pakari. E te orongaanga aia i taua tuatua kia Maria ua, kua tapiri maira: “I na, kua tukuia teia tamaiti nei, ei mea e ingaʼi, e e tu akaou ei, to Iseraela e manganui; e ei akairo, ei tauetono anga; (E ka puta mama rava katoa oki toou uaorai ngakau mei te puta koke ra,) kia kitea te manako o te ngakau e manganui.”—Luka 2:34, 35.
Ta Simeona Au Tuatua kia Maria
E akamanako ana e akapeea to Maria manako anga. Eaa te aiteanga o ta Simeona i tuatua ra? Ka ariki tetai papaki ia Karaiti e ka akatuia ki runga mei to ratou turanga pururu. Inara, ka kopae tetai papaki iaia, e ka turori atu i runga iaia, e ka topa. E tei akakiteia, kua riro mai a Iesu ei mato turorianga ki te au ngati Iuda e manganui. (Isaia 8:14; 28:16) Kare te au tuatua a Simeona e aite ra e ka topa te au Iseraela tataki tai na mua i te irinaki kore anga e oti ka tu akaou i te irinaki anga na te arikianga ia Iesu. Mari ra, ka tukeke te au manako o te aronga tuke tataki tai kiaia ra, i te akakite anga i te au manako o te au ngakau e manganui e te aratakianga ki ta te Atua akavaanga kia ratou no te meitaki me kore no te kino. Ki te au aronga irinaki kore, ka riro mai aia ei akairo, me kore ei apinga rikarika. Na te tuku anga i te akarongo i roto iaia, ka akatuia mai tetai papaki mei te mate ra i roto i te kino e te au ara kia rekareka i tetai turanga tuatua tika ma te Atua. Na te au angaanga a te tangata ki te Mesia e akaari e eaa tikai to roto i to ratou au ngakau.
Akapeea ra te au tuatua a Simeona: “E ka puta mama rava katoa oki toou uaorai ngakau mei te puta koke ra”? Kare oki e akakite anga i te Tuatua Tapu e kua puta mama a Maria i te koke. Inara, na to Iesu kopaeangaia e te maataanga i akataitaia te reira iaia. E mei teaa atura i te mamae tikai no Maria te kite anga ia Iesu i te patiatia angaia ki tetai rakau tamamae! Kua aite teia mei tetai koke tei puta mama ra na roto iaia.
Akono a Simeona i te Au Totou o te Mesia
Kua akakeu te vaerua o te Atua ia Simeona kia akono i te au totou o te Mesia kia Iesu. Ka rauka ia Simeona i te mate ma te tu au, me kore te tu maru, no te mea ‘kua kite tona mata i te Ora a te Atua, I akonoia eia ki mua i te mata, o te tangata katoa nei ei turama, ei akamārama mai i te au etene, e ei kakā oki no toou iti-tangata no Iseraela.’ (Luka 2:30-32) Mei teaa atura te meitaki te akono angaia teia i tau ki ta Isaia au tuatua totou!
Kua akakite te reira peroveta e: “E akakiteia mai te kakā o Iehova, ka okotai rai kitenga to te tangata ravarai.” “E oronga katoa au [Iehova] ia koe [te Mesia] ei turama no te etene, ei ora naku e tae ua atu ki te openga mai o te enua nei.” (Isaia 40:5; 42:6; 49:6; 52:10) Te akaari maira te au Tuatua Tapu Ereni Kerititiano e te au tataanga pae kopapa e ko te Mesia, ko Iesu Karaiti, koia tikai te marama tika o te pa enua, ko Teia te ka akaatea i te arai o te poiri pae vaerua e te apai i te ora ki te tangata ravarai.
Kare te au Tuatua a te Atua i tuatua akaou no runga i te ruaine ra ko Simeona. Te tika anga kua mate atu aia i mua ake ka akatuera ei a Karaiti i te mataara ki te oraanga i te rangi ra. Kare e roa atu ana, i reira, ka akatuia mai a Simeona ki te ora i runga nei i te enua. Mei teaa atura tona rekareka—e koe atu—ka rauka i te kite i roto i te ao ou i raro ake i te Patireia o te Atua e te Mesia!