Kua Ariki Aia i te Arataki Anga Tu-Atua

PENEI e kua tukuia mai tetai tamaiti tiama kia akono koe e kia utuutu meitaki koe iaia. Mei teaa te akaaoanga! Akapeea tetai au tangata apa kore ua i te rave anga i te reira? Na te arikianga i te arataki anga tu-Atua e te taangaanga anga i te reira i roto i te oraanga i te au ra katoatoa.

Kua raveia taua mea ra e Iosepha, te metua angai o Iesu. Ma te tuke i te akakite anga i te au manako ekokoia no runga ia Iosepha, e meangiti ua ta te Puka Tapu tuatua anga no runga i tona turanga akaaka i to Iesu oraanga i te ou anga. Kua kite tatou e kua utuutu mai a Iosepha raua ko tana vaine, ko Maria ia Iesu, etai au tamaroa e a, e te au tamaine katoa oki.​—Mareko 6:3.

E uanga a Iosepha no te Ariki o Iseraela ko Davida na roto i te akapapaanga o Solomona. E tamaiti aia na Iakoba e e unonga na Eli. (Mataio 1:16; Luka 3:23) Ei kamuta i te oire o Nazareta i Galilea, e putaua a Iosepha. (Mataio 13:55; Luka 2:4, 24; akaaite ia Levitiku 12:8.) Inara e apinga nui aia i te pae vaerua. (Maseli 10:22) E tika teia no te mea kua ariki aia i te arataki anga tu-Atua.

Ma te ekoko kore, e ngati Iuda maru e te akaaka a Iosepha ko tei akarongo i te Atua e te anoano ra kia rave i tei tika. Ko te au tupuanga meangiti i roto i tona oraanga tei rekotiia i roto i te au Tuatua Tapu te akaari ra e te akarongo ra aia ki te au akauenga a Iehova. Kua tika teia noatu e tei roto teia i te Ture me kare te oronga tika angaia mai kia Iosepha na roto i te au angera.

E Tangata Tuatua Tika ma te Au Manamanata

Eaa ta te tangata akono i te Atua ra ka rave me o atu ki tetai manamanata maata? Ka tau aia kia ‘tuku i tana apainga kia Iehova’ e kia aru i te arataki anga tu-Atua! (Salamo 55:22) Ko te reira ta Iosepha i rave. Koi tapaoiaʼi aia kia Maria, “kare ra raua i moe i nui ei aia i te Vaerua Tapu.” No te mea ko Iosepha ‘e tangata tuatua-tika kare oki i inangaro i te akakite ua iaia, manako iora e akaruke poiri ua iaia.’ I muri ake ia Iosepha i te uriuri manako anga i taua mea nei, kua mama maira te angera a Iehova kiaia na roto i te moemoea e karanga atura: “E Iosepha te tamaiti a Davida ra, auraka koe e mataku i te arataki mai i to vaine ia Maria ki o ou ra: no te Vaerua Tapu i nui ei aia. E tamaiti tana e anau, e ko Iesu te ingoa taau e tapa nona: e akaora oki aia i tona au tangata i ta ratou ara.” I te ara mai anga, kua “akono atura [a Iosepha] i ta te angela a te Atu i tuatua mai kiaia ra, e kua arataki maira i tana vaine ki ona ra: Kare ra i rave atu, e anau ua maira tana tama mua, e tapa atura aia i tona ingoa ko Iesu.” (Mataio 1:18-25) Kua ariki a Iosepha i te arataki anga tu-Atua.

Kua tuatua maira Kaisara Auguso ki te au tangata kia retitaia ki to ratou uaorai au oire. Na te akarongo anga, kua aere atu a Iosepha raua ko Maria ki Betelehema i Iudea. I reira kua anau iora a Maria ia Iesu e kua tuku atura iaia ki roto i te are puakatoro no te mea kare ua etai au ngai i va mai. I taua po ra kua aere mai te au tiaki mamoe tei akarongo i te akakite anga o teia anau anga takake a te angera kia akara i te tamaiti. E 40 ra i muri mai, kua akono a Iosepha raua ko Maria i te Ture na te apaianga ia Iesu ki te iero i Ierusalema ma te atinga. Kua umere raua roaʼi ia raua e akarongo ra i te au tuatua totou a Simeona no runga i te au mea maata ra ta Iesu ka rave.​—Luka 2:1-33; akaaite ia Levitiku 12:2-4, 6-8.

I te mea e te akakite ra a Luka 2:39 e kua oki a Iosepha raua ko Maria ki Nazareta i muri ake te apaianga ia Iesu ki te iero, ko teia kopapa tuatua e tuanga no tetai akapapaanga poto ua. Te akara anga i etai tuatau i muri roa mai i muri ake te orongaia anga i te iero, kua atoro mai te au tangata pakari Orieni (Magi) ia Maria e Iesu i tetai are i Betelehema. Na te raveanga tu-Atua i arai kia kore teia atoro anga e apai mai i te mate kia Iesu. I muri ake i te aere atu anga te Magi, kua mama iora te angera a Iehova kia Iosepha na roto i te moemoea e kua akakite atura kiaia: “E kimi oki a Heroda i te tamaiti iti e ta.” Tei tau ra, kua akarongo a Iosepha i te arataki anga tu-Atua apai atura i tona ngutuare tangata ki Aiphiti.​—Mataio 2:1-14.

I to Heroda matenga, kua mama mai tetai angera kia Iosepha i Aiphiti na roto i tetai moemoea, na ko maira: “Ka tu, ka rave i te tamaiti iti, e te metua vaine, e ka oki ki te enua o Iseraela.” I te akarongoanga e te tutara ra te tamaiti a Heroda ko Arekelau i te taoonga o tona metua ra, kua mataku a Iosepha i te oki ki Iudea. Te aruanga i te akamatakiteanga tu-Atua tei orongaia na roto i tetai moemoea, kua aere atu aia ki te ngai o Galilea e noo iora ki te oire Nazareta.​—Mataio 2:15-23.

E Tangata Pae Vaerua

Kua akapapu a Iosepha e te akono ra tona ngutuare tangata i te ture tu-Atua e te angaiia ra i te pae vaerua. I te au mataiti tataki tai kua aere atu aia e tona ngutuare tangata katoatoa ki te oroa Pasa i Ierusalema. Ko tetai o teia au atianga, te oki ra a Iosepha raua ko Maria ki Nazareta e e po tai maira i te aerenga mei Ierusalema i to raua kite anga e kua ngaro a Iesu 12 mataiti ra. Te oki akaou anga ki Ierusalema, kua kimi raua e i te openga iora kiteia mai aia i te iero, te akarongo ra e te uiui ra ki te au orometua i reira ra.​—Luka 2:41-50.

Te akara anga te tuku ra a Iosepha i tana vaine kia rave ua i etai au mea. Ei akatauanga, i to ratou oki anga ki Ierusalema e te kite anga ia Iesu i te iero, ko Maria tei tuatua atu ki tana tamaiti no runga i teia manamanata. (Luka 2:48, 49) Koi tupu ei ei “tamaiti a te kamuta,” kua rauka ia Iesu te ikuiku anga pae vaerua. Kua apii katoa oki a Iosepha i te angaanga kamuta kiaia, no te mea kua kapikiia a Iesu “te kamuta, te tamaiti a Maria.” (Mataio 13:55; Mareko 6:3) Ka tau te au metua tu Atua kia taangaanga maata i taua au tuatau kia apii i ta ratou tamariki, te oronga tikai kia ratou te terenianga i te pae vaerua.​—Ephesia 6:4; 2 Timoteo 1:5; 3:14-16.

Te Au Manakonako Anga o Iosepha

Kare te au Tuatua Tapu i oronga mai ana i te akakite anga no runga i te matenga o Iosepha. Inara e akara anga tau te kapiki anga a Mareko 6:3 ia Iesu “te tamaiti a Maria,” kare na Iosepha. Te akakite maira teia e kua mate a Iosepha. Pera katoa, naringa a Iosepha i ora atu e tae ua atu ki te 33 T.N., kare rai a Iesu tei patitiia ra e oronga ia Maria ki te apotetoro ko Ioane kia akonoia.​—Ioane 19:26, 27.

Ko Iosepha, i reira, tetai i roto i te aronga tei mate ra ka akarongo i te reo o te Tamaiti a te tangata ra e ka aere mai mei te tuakaou anga. (Ioane 5:28, 29) Te apiianga i ta Iehova oronga anga no te oraanga mutu kore, kare e ekoko anga e ka ariki rekareka a Iosepha i te reira e ei tangata akarongo i te Ariki maata o te rangi ra, ko Iesu Karaiti, mei tana akarongo anga i te arataki anga tu-Atua i te au mataiti 1,900 i topa ra.

[Tutu i te kapi 31]

Kua oronga a Iosepha kia Iesu i te ikuiku anga pae vaerua e kua apii katoa iaia i te angaanga kamuta