Pene 54

“Te Kai Tikai no te Rangi Mai”

E MEITAKI tikai te tupu anga i te ra i mua akera. Kua angai a Iesu i nga tauatini ra na te tu semeio e kua oro ke atura i te tauta anga a te au tangata kia akariro iaia ei ariki. I te reira po kua aaere aia na runga i te Tai ngarungaru o Galilea ra; kua akaora ia Petero, tei akamata ra i te tomo i tona aere anga i runga i te vai oripuia e te matangi viviki ra; e kua tamarino i te au ngaru kia kore tana au pipi e rokoia e te pai ngaa.

Ei reira, kua kitea a Iesu e te aronga tana i angai ra na te tu semeio i te pae tokerau o te itinga ra o te Tai i Galilea i vaitata ia Kaperenauma e kua ui kiaia: “I naea mai koe i ko nei?” Kua akaapa atura ia ratou, e kua karanga atura Iesu e i kimi ratou iaia no te anoano i tetai atu kaikai anga tutaki koreia ra. Kua raurau atura aia ia ratou kia angaanga, kare no te kai pe ua, ko te kai ra te ka tika i te vairanga, e tae ua atu ki te ora mutukore ra. Kua ui atura te au tangata ra: “Eaa ta te Atua angaanga i anoano kia rave matou?”

Kua taiku maira Iesu e okotai ua angaanga tei maata te puapinga. Kua akataka maira aia: “Teia oki te angaanga a te Atua kia taangaanga kotou i te akarongo iaia i Tana i tono mai.”​—NW.

Inara, kare te au tangata ra i taangaanga i te akarongo ia Iesu, noatu rai te au semeio katoatoa tana i rave ra. E mea ngata kia irinakiia, noatu rai i muri ake i te au mea umere tei raveia e ia ra, kua ui ratou: “Eaa taau akairo e rave, kia akara atu matou, ka akarongo atu ei matou ia koe? eaa taau ravenga? I kaikai ana to matou ai metua i te māna i te medebara ra; ko tei tataia ra e, ‘I o mai ana Aia i te kai no te rangi na ratou ei kaikai anga.’ ”

I te manako anga i ta ratou pati anga no tetai akairo, kua akataka atura Iesu i te Tumu no te au apinga oronga semeioia mai, i te na ko anga: “Kare a Mose i oronga mai i te kai no te rangi na kotou; kua oronga maira taku Metua i te kai tikai o te rangi na kotou. Tera ta te Atua kai, ko tei eke mai mei te rangi, e ko tei oronga mai i te ora no to te ao.”

Kua karanga atura te au tangata ra: “E te Atu, eiaa koe e tivata i te oronga mai i taua kai ra na matou.”

Kua akataka papu maira Iesu: “Ko au te kai ora; ko te aere mai kiaku nei, kare rava ïa e pongi; ko [tei taangaanga i te akarongo iaku nei, NW], kare rava ïa e kaki vai. Kua karanga atu na ra oki au kia ­kotou, kua kite kotou iaku, e kare ­kotou i akarongo. Ko ta taku Metua i oronga mai noku ra, ka tae mai ïa kiaku nei; e ko te aere mai kiaku nei, kare rava ïa e kopaeia e au. I eke mai nei oki au mei te rangi mai, e akono i to tei tono mai iaku nei anoano, auraka i toku uaorai anoano. Teia oki to te Metua anoano, to tei tono mai iaku nei, kia kore au e ngere i tetai i tana i oronga mai noku ra, kia akatu akaouia e au kia tae ki te rā openga ra. Ko teia oki te anoano o taku Metua, ko te kite i te Tamaiti e te [taangaanga i te, NW] akarongo iaia ra, ei ora mutu kore tona.”

I reira kua akamata te ngati Iuda i te urutoe ia Iesu no tei karanga aia, “ko au te kai no te rangi mai.” Kare i tere atu to ratou kite iaia mari ua e tamaiti aia na nga metua tangata ua nei e no reira mei te tu rai o to Nazareta ra, kua akaapa ratou, i te na ko anga: “Kare ainei teia ko Iesu, te tamaiti a Iosepha, ra, tei kite katoa oki tatou i tona metua tane, e te metua vaine ra? eaa akera aia i tuatua mai ei e, I eke mai nei au mei te rangi mai?”

“Auraka na kotou e urutoe ua,” e na Iesu ei, “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia: e naku aia e akatu akaou kia tae ki te rā openga ra. Kua tataia oki i roto i te au peroveta ra e, ‘Ka ope takiri ratou i te apiiia e te Atua [Iehova, NW].’ ” E teianei, ko te akarongo e te apiiia e te Metua ra, ko te ka tae mai ia kiaku nei. Kare ra e tangata i kite i te Metua, mari ra ko to ko mai i te Atua ra, kua kite aia i te Metua ra. Tika, tika tikai taku e karanga atu kia kotou, Ko te [irinaki, NW] mai iaku nei, e ora mutu kore tona.”

I te rave ua atu anga, kua taiku akaou maira Iesu: “Ko au te kai e oraʼi. I kai ana to kotou ui metua i te māna i te medebara ra, e mate atura. Ko te kai teia no te rangi mai, kia kaikai ua te tangata i te reira, e kia kore rava e mate. Ko au te kai ora, ko tei eke mai mei te rangi: ko te ka kai i teianei kai, ka tika ia i te ora anga e tuatau ua atu.” Ae, na te akono anga i te akarongo ia Iesu, koia ta te Atua i tono maira, ka rauka i te au tangata te ora mutukore. Kare e rauka i te mana, me kare i tetai ua atu kai, i te oronga mai i te reira!

I te akara anga i akamata te uriuri anga no runga i te kai mei te rangi mai i muri poto ake i te kite angaia te au tangata a Iesu i vaitata i Kaperenauma ra. Inara kua rave ua atu ia te reira, tae roa ki tona take i muri akera, ia Iesu i apii ra i roto i te sunago i Kaperenauma ra. Ioane 6:​25-51, 59; Salamo 78:24; Isaia 54:13; Mataio 13:​55-57.

▪ Eaa te au tupu anga i mua ake i ta Iesu uriuri anga no runga i te kai mei te rangi mai ra?

▪ I te manako anga i ta Iesu i rave ua akera, eaa i tau kore ei te pati anga no tetai akairo ra?

▪ Eaa ra te ngati Iuda i urutoe ei no ta Iesu tuatua e ko ia te kai tikai no te rangi mai?

▪ I ea i raveiaʼi te ­uriuri anga no runga i te kai no te rangi maira?