Pene 55

E Manganui te au Pipi Tei Akamutu i te Aru ia Iesu

TE APII ra a Iesu i roto i te sunago i Kaperenauma no runga i tana tuanga e koia te kai tikai no te rangi mai. E mea papu e e akatotoa anga tana tuatua no te uriuri anga tei akamataia ra ma te au tangata i tona kitea angaia e ratou i to ratou oki mai anga mei te pae itinga ra o te Tai i Galilea ra, te ngai i kaikai ana ratou i nga kai e nga ika tei orongaia na te tu semeio ra.

Kua rave ua atura Iesu i tana tuatua, i te na ko anga: “Ko taku kai e oronga atu, ko toku ia kopapa, ko taku ïa e oronga atu ei ora no to te ao.” E rua ua mataiti i mua akera, i te tuatau tupu anga rau o te 30 T.N., kua akakite atura Iesu kia Nikodemo e i aroa maata mai te Atua i to te ao nei e kua oronga mai i tana Tamaiti ei Akaora. E no reira, te akaari maira Iesu e ko tetai ua atu o te au tangata o to te ao nei te ka kai i tona kopapa akatutuia maira, na te akono anga i te akarongo i te atinga tana ka tuku i mua poto akera, ka rauka te ora mutukore iaia.

Inara, kua turori te au tangata ra i ta Iesu tuatua. Kua ui ratou: “Eaa e tikaʼi i teianei tangata kia oronga mai i tona kopapa ei kai?” Te anoano ra a Iesu kia taka meitaki i taua aronga e akarongorongo maira kiaia e ko te kai anga i tona kopapa ka raveia na te mataara akatutuia ra. No reira, i te akaketaketa anga i te reira, kua taiku maira aia i tetai atu apinga tei ngata rava me ka manakoia i tona tu tikai.

Kua karanga maira Iesu: “Kia kore kotou e kai i te kopapa o te Tamaiti a te tangata nei, e kia kore oki kotou e inu i tona toto, kare ïa e ora i roto ia kotou. Ko te kai i toku kopapa, e te inu i toku nei toto, e ora mutu kore tona; e naku aia e akatu akaou kia tae ki te rā openga ra. E kai tikai oki toku kopapa, e e vai inu tikai toku toto. . . . ka noo [taokotai aia iaku nei, NW], e ka noo [taokotai au iaia, NW].”

E tika rai, e tangi anga akariri tikai ta Iesu apiianga me te tuatua ra aia no te kaikai anga kopapa tangata tika tikai. Inara, kare a Iesu i akakite ana i te kaikai anga kopapa tika tikai me kare te inu anga toto. Te akaketaketa ua maira aia e ko te katoatoa te ka rauka ia ratou te ora mutukore ka tau anake ratou kia taangaanga i te akarongo i te atinga tana ka tuku na tana oronga anga i tona kopapa tangata apa kore ua e ka riringi i tona toto ora ra. Inara, noatu ko tana aronga pipi e manganui kare i tauta kia kite ratou i te aiteanga o tana apiianga e kua akaapa: “E tuatua rikarika teia; koai te ka akarongo atu i te reira?”​—NW.

I tona kite anga e e manganui tana au pipi te koumuumu ra, kua karanga maira Iesu: “Te maitu na kotou i te reira? Naringa paa kotou e kite ana i te Tamaiti a te tangata i te oki akaou anga ki runga i te ngai tana i noo i muatangana? . . . Te tuatua taku e karanga atu kia kotou, e vaerua ïa, e e ora tei te reira. Kare ra tetai papaki o kotou nei i akarongo.”

Kua tuatua ua atura Iesu: “No reira i karanga atu ei au kia kotou e, kare rava te tangata e tae mai kiaku nei, kia kore e orongaia mai te tae e taku Metua ra.” Ei reira, e manganui tana au pipi tei akaruke maira iaia e kare i aru akaou iaia ra. Kua ariu atura Iesu ki tana au apotetoro 12 ra e kua ui atu: “Ka aere katoa ainei kotou?”

Kua karanga atura Petero: “E te Atu, ka aere tika matou kiaai ra? tei ia koe te tuatua o te ora mutu kore ra. Kua akarongo akenei oki matou, e kua kite oki matou e, ko koe [Tei Tapu ra, NW] a te Atua ora ra.” Mei teaa ra te meitaki te reira tuatua no te tiratiratu, noatu rai e kare a Petero ratou ko etai atu apotetoro ra i kite papu i te aite anga o ta Iesu apiianga no te reira tumu ra!

Noatu tona rekareka i ta Petero pau anga, kua tuatua maira Iesu: “Kare aina kua iki au ia kotou tino ngauru ma rua ra? e e diabolo rai tetai o kotou nei.” Te tuatua ra aia no Iuda Ikariota. Penei kua kite a Iesu i te “akamata anga” a Iuda, me kare te manako anga, i te mataara tarevake ra.

Koi reka kore ua akera te au tangata no ta Iesu akakore anga i ta ratou tauta anga kia akaariki iaia ra, e penei te manako ra ratou e, ‘Akapeea e tau ei e ko te Mesia teia i te mea kare aia e akatika i te turanga tika no te Mesia ra?’ Te vai ou ra te reira tumu i roto i te au manako o te au tangata katoa ra. Ioane 6:​51-71; 3:16.

▪ Koai ma ta Iesu ka oronga atu i tona kopapa, e akapeea ratou i ‘te kai anga i tona kopapa’?

▪ Eaa etai atu tuatua na Iesu tei akapoitirere i te au tangata ra, inara eaa tana e akaketaketa maira?

▪ I te akaruke anga tetai papaki e manganui i te aru anga ia Iesu, eaa ta Petero i tuatua ra?