Na Iehova e Tereni i te Au Tiaki No Tana Anana
“Ko Iehova oki tei oronga mai i te pakari: no roto i tona vaa te kite e te karape.”—MASELI 2:6.
1, 2. Eaa ra te au tane tei papetitoia ka inangaro ei kia akamaataia te apainga i roto i te putuputuanga?
“MATAORA tikai au te ikiia anga au ei tangata pakari,” i karanga ai a Nick, tei tavini ana ei tangata akaaere e itu mataiti. “Kiteaia mai e au teia akameitakianga kia riro ei tuatau no te akamaata atu i taku tavini anga ia Iehova. I toku manako te kaiou nei au kiaia i tetai kaiou no te akameitaki anga no te au mea ravarai tana i rave ana noku. Kua inangaro katoa au i te tauturu ki katoa i te au mema o te putuputuanga i te ka rauka, i te tauturu anga ia ratou mei te tu rai ta tetai aronga pakari i tauturu mai ana iaku.” Inara, tei kairo ki tona rekareka ko etai au manako manamanata. “Mei te mea e tei roto ua au i te 20 mataiti i te ikiia anga au,” i tuatua mai ei a Nick, “kua manata au e te ngere ra iaku te au angaanga te anoanoia ra—te karape e te pakari—kia tiaki tau i te putuputuanga.”
2 Te aronga ta Iehova i iki kia akono i tana anana e manganui te au tumuanga kia mataora. Kua akamaara atu te apotetoro ko Paulo ki te aronga pakari no Ephesia mai e e okotai tumuanga i te, taiku anga ia Iesu, kua karanga aia e: “E mea meitaki i te oronga atu i te rave mai.” (Angaanga 20:35) Te tavini anga ei tavini orometua me kore ei tangata pakari ra te oronga maira ki te au tane tei papetitoia ra i tetai au mataara ke atu kia oronga atu kia Iehova e ki te putuputuanga. Ei akaraanga, te tauturu ra te au tavini orometua i te aronga pakari. Te akono katoa ra teia au tavini i tetai atu au tukuanga angaanga e manganui te akapou ra i te taime inara te anoanoia ra. Kua akakeuia taua au taeake e te aroa no te Atua e no te tangata tupu kia oronga atu i te tavini anga puapinga.—Mareko 12:30, 31.
3. Eaa ra etai i emiemi ei i te inangaro atu i te au akameitakianga i roto i te putuputuanga?
3 Akapeea ra tetai tangata Kerititiano penei te emiemi ra i te inangaro atu i te akameitakianga kia riro mai ei tavini e i te openga ra e tangata pakari no te mea te manako ra e kare aia e tau ana? Mei ia Nick rai, penei te manata ra aia e kare i rauka ana iaia te au angaanga te anoanoia ra kia riro mai ei tiaki tau. Ei taeake papetitoia, ko koe ainei tetai tei manako ana mei teia rai? Kare taua au manako i akatumu koreia. Te tuku ra a Iehova ki runga i te au tiaki tei ikiia i te apainga no te tu ta ratou e akono ra i te anana. Kua karanga a Iesu e: “Ko te tukuia atu te mea maata ra, e mea maata katoa te umuumuia atu; e ta te tangata oki i tuku atu i te mea maata ra, e mea maata katoa ïa te patiia atu iaia ra.”—Luka 12:48.
4. Akapeea a Iehova i te tauturu anga i te aronga tana i iki kia akono i tana mamoe?
4 Te tapapa maira ainei a Iehova i te aronga tana i iki ei au tavini e te aronga pakari ra kia apai aere i te apainga maata kare e tauturu anga? Ei tuke anga, te oronga maira aia i te tauturu anga tau te tauturu ra ia ratou kare ua e kia akakoromaki ua mari katoa ra kia puapingaia. Mei tei uriuriia i roto i te atikara i mua akenei, te oronga ra a Iehova i tona vaerua tapu kia ratou, ko te ua tei tauturu ia ratou kia akono meitaki i te mamoe. (Angaanga 20:28; Galatia 5:22, 23) Kapiti mai, te oronga ra a Iehova i te pakari, te kite, e te karape kia ratou. (Maseli 2:6) Akapeea aia i te rave anga i teia? Ka uriuri tatou e toru mataara te tereni ra a Iehova i te au tangata tataki tai tana i iki kia akono i tana mamoe.
Tereniia e te Au Tiaki Kite
5. Eaa ra a Petero raua ko Ioane i riro ei e nga tiaki tau?
5 Te tu anga te nga apotetoro ko Petero raua ko Ioane i mua i te Sunederi, kua manako te au akava pakari o te ao o taua akavaanga i nga tangata i mua ia ratou ra e e nga tangata ‘apii koreia e te kite kore oki.” A, te kite ra raua i te tatau e te tata, inara kare i rauka mai ana ia raua tetai tereni anga rapi i te apiianga i te au Tuatua Tapu. Noatu rai, kua riro mai a Petero raua ko Ioane pera katoa tetai au pipi ei au puapii tau, te akakeu anga i te manganui o te aronga tei akarongo mai kia ratou kia riro mai ei au tangata irinaki. Akapeea ra teia au tangata kite kore oki i riro mai ei e e au puapii meitaki roa atu? I muri ake i te akarongo anga kia Petero raua ko Ioane, kua “kite atura oki [te akavaanga] e, ia Iesu katoa ra oki raua.” (Angaanga 4:1-4, 13) E tika rai, kua rauka mai ia ratou te vaerua tapu. (Angaanga 1:8) Inara kua kitea katoaia e—pera katoa ki taua au akava akapoiriia i te pae vaerua e—na Iesu i tereni i taua au tangata. Iaia i te pae ia ratou i te enua nei, kare a Iesu i apii ua i te au apotetoro e akapeea i te akaputu mai anga i te aronga mei te mamoe rai mari katoa ra akapeea i te tiaki anga ia ratou te riro mai anga ratou ei tuanga no te koro.—Mataio 11:29; 20:24-28; 1 Petero 5:4.
6. Eaa te akaraanga no te tereni anga i tetai ke ta Iesu raua ko Paulo i akanoo mai?
6 I muri ake te akatuia mai anga a Iesu, kua tereni ua atu aia i te aronga tei ikiia ei au tiaki. (Apokalupo 1:1; 2:1–3:22) Ei akaraanga, nana tikai i iki ia Paulo e te akanoo anga i tana tereni anga. (Angaanga 22:6-10) Kua ariki rekareka a Paulo i te tereni anga tei rauka mai iaia e kua oronga atu ki tetai aronga pakari ke i tana i kite mai. (Angaanga 20:17-35) Ei akatauanga, e maata te taime e te maroiroi tana i taangaanga ana i te tereni anga ia Timoteo kia riro mai “ei rave angaanga” i roto i te angaanga a te Atua, “kare e akama anga.” (2 Timoteo 2:15) Kua tupu mai tetai pirianga vaitata i rotopu i teia au tangata. I mua atu ana, kua tata a Paulo no runga ia Timoteo: “Mei ta te tamaiti akono anga i te metua ra, ko tana ïa akono anga iaku i te angaanga i te evangelia nei.” (Philipi 2:22) Kare a Paulo i kimi ana kia akariro ia Timoteo me kore i tetai tangata ke ei pipi nona uaorai. Kareka ra, kua akamaroiroi aia i te au taeake irinaki kia riro mai ei ‘aronga aru iaia mei iaia katoa i aru i te Mesia nei.’—1 Korinetia 11:1.
7, 8. (a) Eaa te tupuanga te akaari maira i te meitaki tei tupu mai me aru te aronga pakari ia Iesu raua ko Paulo? (e) Aea te aronga pakari e tereni ei i te au tavini orometua e te aronga pakari tau?
7 I te aruanga ia Iesu raua ko Paulo, kia rave te au tiaki kite i te takainga mua kia tereni i te au taeake papetitoia, te aiteite ra te au tupu anga meitaki. E akamanako ana i to Chad tupuanga. Kua utuutuia aia i roto i tetai ngutuare tei akatakakeia e te akonoanga inara kua ikiia mai i nga mea mataiti ua akenei ei tangata pakari. Te karanga ra aia: “Kua pati te au mataiti, e manganui te aronga pakari kite tei tauturu mai iaku kia tere ki mua i te pae vaerua. No te mea e tangata irinaki kore toku metua tane, kua akaari mai taua aronga pakari i te inangaro tikai kiaku e kua riro mai mei te au metua tane i te pae vaerua noku. Kua akapou ratou i te tuatau i te tereni iaku i roto i te angaanga orometua, e i muri mai, na tetai taeake tikai i tereni mai iaku te akono anga i te au tukuanga angaanga a te putuputuanga tei rauka mai iaku.”
8 Mei te tupuanga o Chad e akaari maira, e akamata ana te au tiaki karape i te tereni i te au tavini orometua tei tau e te aronga pakari ra i mua roa atu ka tere ei ki mua teia aronga nei kia tau no taua au apainga. No teaa ra? No te mea te akaue maira te Pipiria e kia rauka i te au tavini orometua e te aronga pakari tetai turanga teitei i te pae akono tau e i te pae vaerua i mua ake ka ikiia ai ratou kia tavini atu. E mea tau “kia na mua rai oki i te timata marie” ia ratou.—1 Timoteo 3:1-10.
9. Eaa ra ta te au tiaki pakari apainga, e no teaa ra?
9 Me ka timataia te au taeake papetitoia, e mea tau ua e kia tereniia ratou na mua. Ei akatutu anga: Me ka patiia atu tetai tangata apii i te apii kia rave i tetai tarere ngata e kare te au puapii i oake mai ana i tetai tereni anga tau, ka pati ainei te tangata apii i te tarere anga? Papu e, kare aia e pati. No reira, te anoanoia ra te tereni anga. Inara, kare te au puapii meitaki e tereni ua i te au tangata apii kia pati i tetai tarere mari katoa ra kia taangaanga i te kite tei rauka mai ia ratou. Mei te reira katoa, te tauturu ra te aronga pakari karape ra i te au taeake papetitoia kia tatanu i te au tu te umuumuia ra no tetai tangata tei ikiia na te oronga anga kia ratou i te tereni anga tau. Kare ratou e rave ua i te reira e tauturu uaia i teia au taeake nei kia ikiia ei tavini mari katoa ra e tauturu ia ratou kia rauka i te akono tau tikai i te anana. (2 Timoteo 2:2) E tika rai, e rave te au taeake papetitoia i ta ratou tuanga e kia angaanga pakari kia akatano ki te au tu tau te umuumuia ra no tetai tavini orometua me kore no tetai tangata pakari. (Tito 1:5-9) Noatu rai, na te tereni puareinga anga i te aronga te inangaro ra i te apainga i roto i te putuputuanga, ka rauka i te au tiaki kite i te tauturu ia ratou kia tere viviki ki mua.
10, 11. Akapeea te au tiaki te tereni anga i tetai ke no te au akameitakianga ke atu?
10 Akapeea tikai te au tiaki kite i te tereni anga i tetai ke kia akono i te au akameitakianga a te putuputuanga? Te mea mua, na te akamanako anga i te au taeake i roto i te putuputuanga—te angaanga putuputu anga kia ratou i roto i te angaanga orometua e te tauturu anga ia ratou kia akameitaki mai i to ratou kite i te akono anga ‘ma te tika oki i te tuatua-mou.’ (2 Timoteo 2:15) Ka uriuri te au tiaki pakari ki taua au taeake i te au rekareka tei rauka mai no te tavini anga i tetai ke e te tu merengo tei rauka mai ia ratou uaorai i te akanoo anga e te rauka anga te au akakoroanga pae vaerua. Te oronga takinga meitaki katoa ra ratou i te au akakiteanga tau e akapeea e rauka ai i tetai taeake i te akameitaki mai i te riro anga mai ei “akaraanga no te anana.”—1 Petero 5:3, 5, NW.
11 Me ikiia tetai taeake ei tavini orometua, e tereni ua rai te au tiaki pakari iaia. Te karanga ra a Bruce, tei tavini ana e ngauru mataiti ei tangata pakari e: “E inangaro ana au i te noo ki raro ma tetai tavini ou tei ikiia e kia uriuri kiaia i te au ikuikuanga tei neneiia e te tavini akono meitaki e te pakari. E tatau katoa ana maua i tetai au kaveinga no runga i tana tukuanga angaanga tikai, e oti te inangaro ra au e kia angaanga maua e kite roa mai aia i tana au angaanga.” E rauka mai ei i tetai tavini ra te kite, kia tereni katoaia aia i roto i te angaanga atoro i te anana. “Me aru mai tetai tavini orometua iaku ki tetai atoro anga i te anana,” i na Bruce ei, “e tauturu ana au iaia kia iki i te au irava tau te ka akamaroiroi e ka akakeu i te tangata me kore i te ngutuare tangata ta maua e atoro ra. Te apiianga e akapeea te taangaanga anga i te au Tuatua Tapu na roto i taua tu e te akakeu ra te reira i te ngakau e puapinga tikai me ka riro mai te tavini ra ei tiaki tau.”—Ebera 4:12; 5:14.
12. Akapeea te au tiaki kite i te tereni anga i te aronga pakari ou tei ikiia?
12 Te puapinga maata katoa ra te au tiaki ou tei ikiia no tetai tereni anga ke atu. Te karanga ra a Nick, tei taikuia i mua akenei e: “E puapinga maata tikai te tereni anga tei rauka mai iaku no ko mai i nga akaaere pakarikari e rua. E marama ua ana teia nga taeake e akapeea tetai au tumu manako i te akonoia anga. E akarongo marie ua mai ana raua kiaku e te akamanako tikai anga i toku manako—noatu e kare raua e ariki mai ana i te reira. E maata taku i kite mai na te akarakara anga i te tu akaaka e te ngateitei te akono anga raua i te au taeake e te au tuaine i roto i te putuputuanga. Kua akaari mai teia nga taeake pakari kiaku nei i te anoano kia taangaanga ma te karape i te Pipiria i te akono anga i te au manamanata me kore te oronga anga i te akamaroiroi anga.”
Tereniia e te Tuatua a te Atua
13. (a) Eaa ta tetai taeake e anoano ra kia riro mai ei tiaki tau? (e) Eaa ra a Iesu i karanga ai e: “Kare taku uaorai i taku e apii nei”?
13 E tika, te vai ra i roto i te Tuatua a te Atua, te Pipiria, te au ture, te au kaveinga, e te au akaraanga ta tetai tiaki e anoano ra kia riro mai “ma te tau tikai i te au angaanga memeitaki katoa ra.” (2 Timoteo 3:16, 17) Penei e apiianga meitaki na teianei ao ta tetai taeake, inara ko tona kite i te au Tuatua Tapu e akapeea aia i te taangaanga anga i te reira te ka tauturu iaia kia riro mai ei tiaki tau. E akamanako ana i to Iesu akaraanga. E kite maata tona, te karape roa atu, e te tiaki pakari roa atu i te pae vaerua tei aaere ana i te enua nei; inara, kare katoa aia i irinaki ana ki runga i tona uaorai pakari i te apiianga i ta Iehova mamoe. Kua karanga aia e: “Kare taku uaorai i taku e apii nei, nana ra, na tei tono mai iaku nei.” Eaa ra a Iesu i oronga ai i te akameitakianga ki tona Metua i te rangi? Kua akamarama mai aia: “Ko tei tuatua i te tuatua nona uaorai, te kimi ra ïa i tona uaorai kakā.”—Ioane 7:16, 18.
14. Akapeea te au tiaki te kopae anga i te kimi anga i to ratou uaorai kaka?
14 E kopae te au tiaki tiratiratu i te kimi i to ratou uaorai kaka. Te akatumu ra ratou i ta ratou ako anga e te akamaroiroi anga, kare i runga i to ratou uaorai pakari, mari ra ki runga i te Tuatua a te Atua. Te ariki rekareka ra ratou e te tukuanga angaanga a te tiaki ra koia oki te tauturu anga i te mamoe kia rauka mai “te manako o Karaiti,” kare i te manako o te aronga pakari. (1 Korinetia 2:14-16, NW) Ei akaraanga, akapeea ra me te tauturu ra tetai tangata pakari i nga tokorua i te akono anga i te au manamanata o te akaipoipo kua akatumu i tana ako anga ki runga i tona uaorai tupuanga kare ra ki runga i te au kaveinga Pipiria e te akakite anga tei neneiia e “te tavini akono meitaki e te pakari” ra? (Mataio 24:45) Penei ka akakeu maataia tana ako anga e te au peu o te reira ngai e ka arairaiia e tona kite tei kotingaia ra. E tika, kare e kino roa ana etai au peu, e penei e tupuanga to te tangata pakari ra i roto i te oraanga. Inara ka puapinga maataia te mamoe me akamaroiroi te au tiaki ia ratou kia akarongo ki to Iesu reo e ki te au tuatua a Iehova kare ki te au manako o te au tangata me kore ki te au kaveinga no te peu o te reira ngai.—Salamo 12:6; Maseli 3:5, 6.
Tereniia e “te Tavini Akono Meitaki e te Pakari”
15. Eaa te tukuanga angaanga ta Iesu i oake ki “te tavini akono meitaki e te pakari,” e eaa te tumu anga okotai i puapinga meitaki ei te pupu tavini?
15 E au mema pouroa te au tiaki mei te au apotetoro ko Petero, Ioane, e Paulo no te pupu ta Iesu i akataka mai e ko “te tavini akono meitaki e te pakari.” E tuanga teia pupu tavini o to Iesu au taeake akatainuia i te pae vaerua i runga i te enua nei, to ratou manakonakoanga koia oki kia tutara ma Karaiti i te rangi. (Apokalupo 5:9, 10) I teia au tuatau openga o teia akatereanga nei, kua meangiti takiri mai te numero o te au taeake o Karaiti i runga i te enua nei. Inara, te angaanga ta Iesu i tuku mai kia akaoti ratou—te tutu aere anga i te tuatua meitaki o te Patireia i mua ake ka tae mai ei te openga—kua akatotoa atea maataia i teianei. Noatu rai, kua autu meitaki tikai te pupu tavini! No teaa ra? I tetai tuanga, no te mea kua tereni ratou i te au mema o te “mamoe ke atu” kia tauturu mai ia ratou i roto i te angaanga tutu anga e te apiianga. (Ioane 10:16; Mataio 24:14; 25:40) I teia tuatau, na teia pupu tiratiratu e akaoti nei i te maata anga o te angaanga.
16. Akapeea te pupu tavini i te tereni anga i te au tangata tei ikiia?
16 Akapeea te pupu tavini i te oronga mai anga i teia tereni anga? I te anere mataiti mua, kua akaueia te au komono o te pupu tavini kia tereni e kia iki i te au akaaere i roto i te au putuputuanga, e i reira, ka tereni ratou i te mamoe. (1 Korinetia 4:17) Te tika tikai ra te reira i teia tuatau. Te akaue ra te Pupu Akaaere—te pupu meangiti o te aronga pakari akatainuia te akatutu maira i te pupu tavini—i tona au komono kia tereni e kia iki i te au tavini e te aronga pakari i roto i te au putuputuanga e tai ngauru tauatini ua atu i te ao katoa. Kapiti mai, kua akapapa te Pupu Akaaere i te au apii kia tereni i te au mema o te Kumiti Manga, te au akaaere tutaka, te aronga pakari, e te au tavini orometua e akapeea te akono meitaki anga i te mamoe. Kua oronga katoaia mai te aratakianga na roto i te au reta, i roto i te au atikara tei neneiia i roto i Te Punanga Tiaki, e na roto i tetai atu au puka, mei te Organized to Do Jehovah’s Will.a
17. (a) Akapeea a Iesu i te akaari anga i tona irinakianga ki roto i te pupu tavini? (e) Akapeea te au tiaki pae vaerua i te akaari anga e e irinakianga to ratou i roto i te pupu tavini?
17 E irinakianga maata tikai to Iesu i te pupu tavini tana i iki i rungao ake i te “au apinga ravarai nana ra”—koia oki, tana au mea katoatoa i te pae vaerua i runga i te enua nei. (Mataio 24:47) Te akapapu maira te au tiaki tei ikiia e te irinaki katoa ra ratou i te pupu tavini na te taangaanga anga i te au aratakianga tei rauka mai ia ratou no ko mai i to te reira Pupu Akaaere. Ae, me tereniia e te au tiaki ra tetai ke, me tuku ratou ia ratou uaorai kia tereniia e te Tuatua a te Atua, e me taangaanga ratou i te tereni anga tei orongaia mai e te pupu tavini ra, te akatupu ra ratou i te taokotaianga i roto i te anana. Mei teaa ra to tatou rekareka e kua tereni a Iehova i te au tangata te manako oonu maira i te mema takitai o te putuputuanga Kerititiano!
[Tataanga Rikiriki i Raro]
a Neneiia e te Au Kite o Iehova
Akapeea Koe me Pau?
• Akapeea te au tiaki pakari i te pae vaerua i te tereni anga i tetai ke?
• No teaa ra te au tiaki i kore ei e apii i runga i te tumu anga o to ratou uaorai au manako?
• Akapeea e no teaa ra te au tiaki i akaari ei i te irinakianga ki roto i te pupu tavini?
[Au Tutu i te kapi 24, 25]
Te tereni ra te aronga pakari Kerititiano i te au tane mapu i roto i te putuputuanga
[Au Tutu i te kapi 26]
E maata te tereni anga ta “te tavini akono meitaki e te pakari” i oronga mai na te aronga pakari