Tavini Tiratiratu Anga Ia karaiti te Ariki

“Kua orongaia maira te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia.”​—DANIELA 7:14.

1, 2. Akapeea tatou i kite ei e kare ake rai a Karaiti i rave tikai ana i te mana Patireia i te 33 T.N.?

KOAI ia tutara ka oronga atu i tona oraanga no tona au tangata inara ka ora akaou mai kia tutara ei ariki ra? Koai ia ariki ka noo i runga i te enua, te akamaroiroi anga i te irinakianga e te tu tiratiratu i roto i tona au tangata, e oti ka tutara mai mei te rangi maira? Ko te tangata anake ra ka rauka i te rave i teia​—e e maata atu​—koia oki ko Iesu Karaiti. (Luka 1:32, 33) Ia Penetekote 33 T.N., i muri ake to Karaiti matenga, te akatuia mai anga, e te kake atu anga ki te rangi, “kua akono oki [te Atua] iaia ei upoko i rungao i te au mea katoa i te ekalesia.” (Ephesia 1:20-22; Angaanga 2:32-36) I akamata ai i reira a Karaiti i te tutara inara i roto i tetai tu kotingaia. Ko tona au tangata mua e au Kerititiano akatainuia e te vaerua, e tuanga ratou no Iseraela vaerua, “te Iseraela o te Atua.”​—Galatia 6:16; Kolosa 1:13.

² Vaitata atu i te 30 mataiti i muri ake i taua Penetekote i te 33 T.N., kua akapapu mai te apotetoro ko Paulo e kare ake rai a Karaiti i rave tikai ake i te mana Patireia, inara tei “te rima katau [aia] o te Atua ra: E teianei te tatari ra e kia akariroia tona au enemi ei takainga vaevae nona.” (Ebera 10:12, 13) E oti i reira, vaitata atu i te openga o te anere mataiti mua T.N., kua kite ke ana te apotetoro pakari ko Ioane i roto i tetai orama i to Iesu Karaiti akataoongaia anga e Iehova te Ngateitei i te Ao Katoa e Pini Ua Ake, ei Ariki no te Patireia tei akanoo ouia. (Apokalupo 11:15; 12:1-5) Mei ta tatou i akara ana i roto i te tuatua enua, ka rauka ia tatou i te akara akaou i te akapapu anga maata te akapapu mai anga e kua akamata a Karaiti i te tutara ei Ariki Mesia i te rangi i te 1914.a

3. (a) Eaa te manako ou ta te tuatua meitaki o te Patireia i rauka mai mei te 1914 mai? (e) Eaa te au uianga ka ui tatou kia tatou uaorai?

³ Ae, mei te 1914 mai kua kapiti mai te tuatua meitaki o te Patireia i tetai manako anga ou rekareka. Te tutara maroiroi ua nei rai a Karaiti ei Ariki no te Patireia o te Atua i te rangi, inara “i rotopu i [tona] au enemi ra.” (Salamo 110:1, 2; Mataio 24:14; Apokalupo 12:7-12) Tei runga ravao, i roto i te enua, te ariu rekareka maira tona au tangata tiratiratu ki tona mana na te piri atu anga ki roto i tetai porokaramu apiianga Pipiria i te ao katoa kare i aite ana ki te tuatua enua o te tangata. (Daniela 7:13, 14; Mataio 28:18) Te tavini ra te au Kerititiano tei akatainuia e te vaerua, “te tamariki o te basileia,” ei ‘karere na te Mesia.’ Te turu tiratiratuia nei ratou e tetai urupu tangata maata te “mamoe ke atu” a Karaiti, te angaanga ra ei aronga tuatua no te Patireia o te Atua. (Mataio 13:38; 2 Korinetia 5:20; Ioane 10:16) Noatu rai, kia akara tatou e me te kite tikai ra tatou tataki tai i to Karaiti mana. Te vai tiratiratu ngaueue kore ra ainei tatou kiaia? Akapeea tatou i te akaari anga i te tu tiratiratu ki tetai Ariki te tutara ra i te rangi? Inara, ka uriuri ana tatou na mua, e eaa te au tumu anga no tatou kia tiratiratu kia Karaiti.

Ko Tetai Ariki Tei Akakeu i te Tu Tiratiratu

4. Eaa tei rauka ia Iesu ei Ariki Akataoongaia i te tuatau o tana angaanga orometua i te enua nei?

⁴ Kua akatumuia to tatou tu tiratiratu kia Karaiti ki runga i te ariki rekareka anga i tana i rave ana e pera katoa no tona au tu meitaki roa. (1 Petero 1:8) Iaia i te enua nei, kua akaari mai a Iesu ei Ariki Akataoongaia i roto i tetai tu kotingaia eaa tana ka rave ei Ariki tutara i runga i te enua katoa i roto i to te Atua tuatau tau. Kua angai aia i tei pongi. Kua akaora aia i te maki, te matapo, te ngoru, te turi, e te murare. Kua akaora katoa mai aia i tetai au tangata aere tei mate ana. (Mataio 15:30, 31; Luka 7:11-16; Ioane 6:5-13) Kapiti katoaia mai, te rauka anga te kite no runga i to Iesu oraanga i runga i te enua nei te tauturu maira ia tatou kia kite i tona au tu ei Tutara no te tuatau ki mua i runga i te enua nei​—tei kite maataia tona aroa akaatinga uaorai. (Mareko 1:40-45) Kapiti atu ki teia, ko Napoléon Bonaparte kua tuatua putuputu aia e: “Ko Alekanedero, ko Kaisara, ko Charlemagne, e au katoa oki kua akatumu i te au patireia, inara na runga i teaa ta matou akatumu anga i te akatupu i ta matou au angaanga mamaata ra? Na runga i te tamakianga. Ko Iesu Karaiti anake ua tei akanoo i tona patireia ki runga i te aroa, e i teia tuatau nei e au mirioni ua atu te au tangata te ka tuku kia mate ratou nona ra.”

5. No teaa ra i marekaia ai to Iesu tu?

⁵ No te mea e ngakau maru e te akaaka to Iesu, te aronga tei taitaia no te au taomianga e no te au apainga ra kua akaangaia te roi na roto i tana au apii akamaroiroi anga e te tu takinga meitaki. (Mataio 11:28-30) Kua mareka ua te tamariki i te pae iaia. Kua inangaro ua te au tangata akaaka e te karape kia riro mai ei au pipi nana. (Mataio 4:18-22; Mareko 10:13-16) No tona tu manako anga e te ngateitei kua rauka iaia te tu tiratiratu o te au vaine e manganui tei mataku i te Atua, te maataanga ia ratou kua oronga atu i to ratou taime, te tauta anga, e te au apinga o te kopapa kia akono iaia iaia e rave ra i tana angaanga orometua.​—Luka 8:1-3.

6. Eaa te au manako ngakau aroa ta Iesu i akaari te mate anga a Lazaro?

⁶ Kua akaari mai a Karaiti i etai o tona au manako ngakau maru te mate anga tona oa akaperepere ko Lazaro. Kua akakeu oonuia aia e to Maria raua ko Mareta taitaia kare i rauka ana iaia i te tapu i tetai ngunguru mamae ngakau, e kua ‘aue iora aia.’ Kua “taitaia atura” aia​—kua taitaia no te maata te mamae ngakau e te mii​—noatu e kua kite aia e kare e roa atu ana ka akaora akaou mai aia ia Lazaro. E oti i reira, kua akakeuia e te aroa e te tangi aroa ra, kua taangaanga a Iesu i tona mana tei orongaia mai e te Atua e kua akatu mai ia Lazaro mei te mate mai.​—Ioane 11:11-15, 33-35, 38-44.

7. Eaa ra tatou ka tiratiratu ei kia Iesu? (E akara katoa i te pia i te kapi 31.)

⁷ Ka tu umere ua tatou no to Iesu aroa ketaketa no te tikaanga e tona tu rikarika i te pikikaa e te ravenga kino. E rua ona taime i te rave mataku kore anga i te tama i te iero no te aronga okooko noinoi. (Mataio 21:12, 13; Ioane 2:14-17) Pera katoa, i tona tuatau ei tangata i runga i te enua nei, kua kite aia i te au tu ravarai o te tu kino, na te kite uaorai anga no runga i te au taomianga e te au manamanata ta tatou ka aro atu. (Ebera 5:7-9) Kua kite katoa a Iesu e mei teaa rai te tu ei tangata takinokinoia e te tu tau kore ra. (Ioane 5:15-18; 11:53, 54; 18:38–​19:16) I te openga ra, kua tuku mataku kore atu aia ki te matenga kino tikai kia akatupu i te anoano o tona Metua e kia oronga ki tona au tangata ra te ora mutu kore. (Ioane 3:16) Kare ainei taua au tu o Karaiti e akakeu ana ia koe kia tavini ua atu rai iaia ma te tiratiratu? (Ebera 13:8; Apokalupo 5:6-10) Inara eaa te umuumuia maira kia riro ei tangata no Karaiti te Ariki ra?

Riro Anga Mai ei Tangata Tau na te Ariki ra ko Karaiti

8. Eaa te umuumuia ra ei au tangata no Karaiti?

⁸ E akamanako ana i teia akaaiteanga: Te riro anga ei tangata no tetai enua ke te maata anga o te taime te umuumuia ra kia aruia tetai au mea tau puapinga maata. Penei ka umuumuia te au tangata e manakonako ra kia riro mai ei au tangata meitaki e kia aru i tetai au turanga i te pae oraanga. Mei te reira katoa, te anoanoia ra te au tangata o Karaiti kia akono tamou i te au turanga teitei no te tu akono tau e te oraanga meitaki i te pae vaerua.​—1 Korinetia 6:9-11; Galatia 5:19-23.

9. Akapeea tatou i te akaari anga i to tatou tiratiratu kia Karaiti?

⁹ Te umuumu katoa maira a Iesu Karaiti e kia tiratiratu tona au tangata kiaia e ki tona Patireia. Ka akaari ratou i taua tu tiratiratu na te noo rotai anga ki tana i apii ana iaia i te enua nei ei Ariki Akataoongaia. Ei akatauanga, e tuku ratou i te au inangaro Patireia e te anoano o te Atua na mua ake i te au anoano kopapa. (Mataio 6:31-34) E tauta rekareka katoa ratou i te akaata i te tu tangata mei ia Karaiti rai, noatu e tei raro ake i te au turanga manamanata tikai. (1 Petero 2:21-23) Pera katoa, e aru te au tangata a Karaiti i tona akaraanga na te rave anga na mua i te takainga kia rave i te meitaki ki tetai ke.​—Mataio 7:12; Ioane 13:3-17.

10. Akapeea te tu tiratiratu kia Karaiti i te akaariia anga i roto i te (a) te ngutuare tangata e te (e) te putuputuanga?

¹⁰ E akaari katoa ta Iesu au pipi i to ratou tu tiratiratu kiaia na te akaata anga i tona au tu i roto i te ngutuare tangata. Ei akatauanga, e akaari te au tane i te tu tiratiratu ki to ratou Ariki i te rangi na te aru anga i to Karaiti au tu i te akono anga ratou i ta ratou au vaine e te au tamariki. (Ephesia 5:25, 28-30; 6:4; 1 Petero 3:7, NW) E akaari te au vaine i te tu tiratiratu kia Karaiti na te tu akono e te akaari anga i “te vaerua muteki ua e te maru ra.” (1 Petero 3:1-4, NW; Ephesia 5:22-24) Te tiratiratu ra te tamariki kia Karaiti me aru ratou i tona akaraanga no te akarongo anga. Ei tangata mapu, kua kauraro ua atu rai a Iesu ki tona nga metua, noatu to raua tu apa. (Luka 2:51, 52; Ephesia 6:1) Te tauta tiratiratu nei te au tangata o Karaiti i te aru iaia na te “akaarianga i te manako ngakau aroa, te raukaanga te inangaro akataeake” e na roto i te “tu akaroa ma te maru.” Te titau ra ratou kia riro mai mei ia Karaiti rai, “te akaaka o te manako, auraka oki e tutaki atu i te kino no te kino me kore te akakino anga no te akakino anga.”​—1 Petero 3:8, 9; NW; 1 Korinetia 11:1.

Te Au Tangata Tei Akono i te Ture

11. Ko teea au ture ta te au tangata a Karaiti ka kauraro atu ratou ra?

¹¹ Mei tetai au tangata manakonakoia no tetai enua te akarongo ra ki te au ture a to ratou enua ou, te kauraro nei te au tangata o Karaiti ia ratou uaorai ki “te ture a te Mesia” na te akono rotai anga i to ratou oraanga ki te au mea katoatoa ta Iesu i apii ana e i akaue ana. (Galatia 6:2) Tera tikai, te akono tiratiratu anga ratou “i te ture ariki” o te aroa. (Iakobo 2:8) Eaa te piri maira ki teia au ture?

12, 13. Akapeea tatou i te kauraro tiratiratu anga ki “te ture a te Mesia”?

¹² E au tu apa e e au tarevake to te au tangata o Karaiti. (Roma 3:23) No reira, e tatanu ua atu ratou i te “aroa taeake pikikaa kore” kia ‘aroa maata mei te ngakau.’ (1 Petero 1:22) “E tapepeanga ta tetai ki tetai ra,” e akono tiratiratu te au Kerititiano i te ture a Karaiti na te “tauturu atu tetai ki tetai, e akakore tetai i ta tetai ara.” Na te akarongo anga ki teia ture te tauturu ra ia ratou kia akangaropoina atu i te au tu apa e te kimi anga i te au tumu anga kia aroa atu i tetai e tetai. Kare ainei koe e ariki rekareka ana i te piri anga ki te aronga tei kauraro tiratiratu ana ki to tatou Ariki aroa ra i te akakakau anga ia ratou uaorai ki te aroa, “ko taua tatua apa kore ua ra”?​—Kolosa 3:13, 14.

¹³ Pera katoa, kua akamarama mai a Iesu e te aroa tana i akatutu maira e maata atu i te aroa ta te tangata i akaari ana ki tetai e tetai. (Ioane 13:34, 35) Me te aroa ua ra tatou i te aronga te aroa maira ia tatou, kare tatou e rave ana i tetai ‘apinga maata atu.’ No taua tu nei te ngere ra ia tatou te aroa e kare e rava ana. Te raurau maira a Iesu ia tatou kia aru i te aroa o tona Metua na te akatupu anga i te aroa tei tau ki te kaveinga e no te au enemi te makitakita maira e te takinokino maira ia tatou. (Mataio 5:46-48) Te akakeu katoa ra teia aroa i te au tangata o te Patireia kia akakoromaki maata ma te tiratiratu i roto i ta ratou angaanga. Eaa ra te reira?

Timataia te Tu Tiratiratu

14. Eaa te angaanga tutu aere anga i puapinga maata ai?

¹⁴ E angaanga pakari ta te au tangata no te Patireia o te Atua i teianei no te “akakitekite tikai anga no runga i te patireia o te Atua.” (Angaanga 28:23, NW) E puapinga maata tikai te rave anga i te reira no te mea na te Patireia a te Mesia ra e akatika i to Iehova tu ngateitei i te ao katoa e pini ua ake. (1 Korinetia 15:24-28) Me tutu aere tatou i te tuatua meitaki, e tuatau to te aronga te akarongo maira kia riro mai ei au tangata no te Patireia o te Atua. Pera katoa, te tu e akarongo maira te au tangata ki taua karere ra te oronga maira i tetai turanga, ka akava ei a Karaiti te Ariki ra i te au tangata ravarai. (Mataio 24:14; 2 Tesalonia 1:6-10) No reira, tetai mataara meitaki e akaari tatou i to tatou tu tiratiratu kia Karaiti koia oki na te akarongo anga ki tana akauenga kia akakitekite i te Patireia ki tetai ke.​—Mataio 28:18-20.

15. Eaa ra i timataia ai te tu tiratiratu o te au Kerititiano?

¹⁵ E tikai, te patoi ra a Satani i te angaanga tutu anga na tetai mataara e rauka ra iaia, e kare te au tangata tutara e ariki ana i to Karaiti mana tei orongaia mai e te Atua. (Salamo 2:1-3, 6-8) No reira, kua akamatakite a Iesu ki tana au pipi e: “Kare te tavini i maata i tona pu. I takinga-kino ana ratou iaku ra, e takinga-kino katoa ratou ia kotou.” (Ioane 15:20) No reira, kua piri atu te au pipi a Karaiti ki roto i tetai tamaki anga i te pae vaerua te timataia ra to ratou uaorai tu tiratiratu.​—2 Korinetia 10:3-5; Ephesia 6:10-12.

16. Akapeea te au tangata o te Patireia i te tutaki anga i ‘ta te Atua ra ki te Atua’?

¹⁶ Noatu rai, te vai tiratiratu nei rai te au tangata o te Patireia o te Atua ki to ratou Ariki kitea koreia inara kare e akangateitei kore ana i te au tangata mana taoonga. (Tito 3:1, 2) Kua akakite a Iesu e: “Ka apai mari i ta Kaisara ra kia Kaisara; e ta te Atua ra, e apai ïa ki te Atua.” (Mareko 12:13-17) No reira, te akarongo ra te au tangata o Karaiti, ki te au ture a te kavamani kare e patoi mai ana i te au ture a te Atua. (Roma 13:1-7) Inara, te patoianga te akavaanga teitei ngati Iuda i te au ture a te Atua na te akauenga i te au pipi a Iesu kia akamutu i te tutu aere anga, kua karanga atura ratou ma te ngaueue kore inara ma te ngateitei kia ratou e “ko te Atua ta matou e akarongo e tikaʼi auraka te tangata.”​—Angaanga 1:8; 5:27-32.

17. No teaa ra i rauka ai ia tatou kia akono atu i te au timataanga no te tu tiratiratu ma te mataku kore?

¹⁷ E tikai, te umuumuia ra te mataku kore no te au tangata o Karaiti kia vai tiratiratu ki to ratou Ariki me takinga kinoia mai. Noatu rai, te karanga ra a Iesu e: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei: E rekareka kotou, e kia rere ua i te rekareka; e tutaki maata oki ta kotou i te ao [“i te au rangi,” NW] ra.” (Mataio 5:11, 12) Kua kite te au pipi mua a Karaiti i te tikaanga o taua au tuatua. Noatu kua papaia ratou no te tutu aere ua atu anga i te Patireia, kua rekareka ratou “i te mea, no tona ingoa i manakoiaʼi ratou e tau ia ratou taua takinga-kino ra. E kare e rā i tukua ia ratou, i te apii anga atu e te tuatua anga atu ia Iesu Mesia, ki roto i te iero ra, e i tera are i tera are.” (Angaanga 5:41, 42) Kia akameitakiia koe, ia koe e akaari ra i taua tu no te tu tiratiratu me akakoromaki koe i te au turanga ngata, te maki, te tumatetenga, me kore te patoianga.​—Roma 5:3-5; Ebera 13:6.

18. Eaa ta Iesu au tuatua kia Ponotio Pilato e akakite maira?

¹⁸ Iaia i runga i te enua nei ei Ariki Akataoongaia, kua akamarama atu a Iesu ki te Kavana Roma ko Ponotio Pilato e: “Kare to teianei ao taku basileia: naringa no teianei ao taku basileia, kua akamaroiroi ïa toku au tavini, kia kore au e tukuia ki te ngati Iuda; kare ra toku basileia i to ko nei.” (Ioane 18:36) No reira, kare te au tangata o te Patireia o te rangi, e tamaki atu ki tetai ke kare katoa e turu atu ana i tetai kaitamaki anga a te tangata. No te tu tiratiratu ki te “Ariki no te au,” kia vai neutara tikai ratou i roto i te au angaanga patoianga o teianei ao.​—Isaia 2:2-4; 9:5, 6.

Te Au Tutaki Anga Mutu Kore no te Au Tangata Tiratiratu

19. Eaa ra to Karaiti au tangata ka akara ai ki te tuatau ki mua ma te irinakianga?

¹⁹ Te tapapa irinaki nei te au tangata tiratiratu a Karaiti, te “Ariki o te au ariki,” i te tuatau ki mua. Te tapapa rekareka nei ratou i te akaarianga mai aia i te mana ririnui roa atu ei ariki. (Apokalupo 19:11–​20:3; Mataio 24:30) Te akara nei te toenga o te “tamariki o te basileia” tiratiratu tei akatainuia e te vaerua ki mua ki ta ratou tuanga akaperepereia ei au ariki ma Karaiti i te rangi. (Mataio 13:38; Luka 12:32) Te tatari rekareka atu nei te ‘mamoe tiratiratu ke atu’ a Karaiti i te akakite mareka mai anga to ratou Ariki e: “Ka aere mai kotou, te aronga i akaoraia e taku Metua, e noo ki te [ngai i te enua Parataito o te] basileia i akonoia no kotou mei te maani anga mairai i te enua nei.” (Ioane 10:16; Mataio 25:34) E no reira, kia tauta ua atu rai te au tangata ravarai o te Patireia i te tavini tiratiratu ia Karaiti te Ariki ra.

[Tataanga Rikiriki i Raro]

Ka Rauka Ainei ia Koe te Akataka?

• Eaa ra a Karaiti ka tau ei i ta tatou tiratiratu?

• Akapeea te au tangata o Karaiti i te akaari anga i to ratou tu tiratiratu kiaia?

• Eaa ra tatou ka inangaro ei kia tiratiratu kia Karaiti te Ariki?

[Pia i te kapi 31]

TETAI UA ATU AU TU MEITAKI ROA O KARAITI

Tu papakitai kore​—Ioane 4:7-30.

Tangi aroa​—Mataio 9:35-38; 12:18-21; Mareko 6:30-34.

Aroa akaatinga uaorai​—Ioane 13:1; 15:12-15.

Tu tiratiratu​—Mataio 4:1-11; 28:20; Mareko 11:15-18.

Tu tangi​—Mareko 7:32-35; Luka 7:11-15; Ebera 4:15, 16.

Tu tau​—Mataio 15:21-28.

[Tutu i te kapi 29]

Na te aroaanga i tetai e tetai, te kauraro tiratiratu ra tatou ki “te ture a te Mesia”

[Au Tutu i te kapi 31]

Te akakeu ra ainei te au tu o Karaiti ia koe kia tavini tiratiratu iaia?