Pene 68

Etai atu Apiianga i te Ra Itu

KARE i ope ake te ra openga o te Oroa Patia Puakapa ra, koia te ra itu. Te apii ra a Iesu i roto i te tuanga o te iero tei karangaia ko te “vairanga apinga.” Penei ko te ngai ia tei karangaia e ko te Paepae no te au Vaine ra te ngai e au pia etai no te tuku anga a te au tangata i ta ratou au tauturu ra.

I te au po ravarai o te oroa ra, e marama takake tetai i te reira ngai o te iero ra. E a nga poupou ramepa mamaata tei akanooia ki reira, e a pa mamaata tei akakiia ki te inu. Ko te marama mei teia au mori, i te tutungi anga i te inu no nga pa e 16 ra, kua rava ua no te akamarama takapini kia mamao i te po. Na ta Iesu tuatua i teianei e akamaaraara i te aronga akarongo atu iaia ra, i te reira akaari anga. Kua karanga atura Iesu: “Ko au te mārama o teianei ao. Ko te aru mai kiaku nei, kare aia e aere ua i te poiri, e mārama ora tona.”

Kua patoi atura te au Pharisea: “Te tuatua nei koe ia koe uaorai; kare taau tuatua e akatikaia.”

Kua karanga atura Iesu: “Tuatua ua rai au iaku uaorai, ka tika rai taku tuatua: kua kite oki au i te ngai no reira au nei, e te ngai taku e aere nei kare kotou i kite i te ngai no reira mai au nei, e te ngai taku e aere nei.” Kua karanga katoa aia: “Ko au oki tetai i akatika iaku uaorai, e te Metua oki, ko tei tono mai iaku nei, tetai i akatika katoa mai iaku nei.”

“Teiea ua toou Metua?” kua inangaro te au Pharisea kia kite ratou.

Kua karanga atura Iesu: “Kare kotou i kite iaku, e toku Metua katoa; naringa kotou i kite iaku ra, kua kite katoa ïa kotou i toku Metua.” Noatu rai e te inangaro ra te au Pharisea e opu ia Iesu, kare ra tetai i rave atu iaia ra.

Kua tuatua akaou atura Iesu: “Te aere ke nei au.” “Kare kotou e tae ki te ngai taku e aere nei.”

Kua akamata te ngati Iuda i te manako e: “Ka ta ainei aia iaia uaorai, i karanga mai ei e, kare kotou e tae ki te ngai taku e aere nei.”

Kua akataka atura Iesu: “No raro nei kotou; no runga au; no teianei ao kotou; kare au no teianei ao.” Kua karanga akaou atura aia: “Kia kore kotou e akarongo e, ko au ra, ka mate rai kotou ma ta kotou ara katoa.”

Inara, te tuatua ra a Iesu no tona oraanga i mua ake i te riro anga ei tangata e i riro ei, ei te Mesia tei taputouia maira. Tera ra, kua ui atura ratou ma te avirianga maata: “Koai oki koe na?”

I te aro atu anga ki ta ratou kopae ke anga iaia, kua na ko atura Iesu: “Eaa ra au i tuatua atu ei kia kotou na?” (NW) Inara kua tuatua ua atu aia: “Ko tei tono mai iaku nei ra, e tuatua-mou tana; e te tuatua nei au ki to te ao nei i te au tuatua taku i akarongo iaia ra.” Kua tuatua ua atura Iesu: “Kia akateiteiia e kotou te Tamaiti a te tangata nei, ei reira kotou e kite ei e, ko au ia, e kare aku peu rave ua; ko ta taku Metua ra i apii mai iaku ra, ko taku ia e tuatua nei. Ko tei tono mai iaku nei, tei vaitata uaorai ïa iaku nei; kare te Metua i akaruke ua iaku nei ko au anake ra; kare oki au i tukumoe i te rave i te mea e mareka mai ei aia.”

I ta Iesu tuatua anga i teia au mea nei, e manganui tei akarongo iaia. Kua karanga atura aia kia ratou: “I tāpu tika kotou i taku tuatua, e pipi tikai kotou naku i reira: Ka kite ïa kotou i te tuatua-mou, e na te tuatua-mou kotou e akarangatira.”

Kua tuatua maira te aronga patoi iaia ra: “E tamariki matou na Aberahama, kare ua matou i riro ei tuikaa na etai ke: Eaa koe i tuatua mai ei e, ka akarangatiraia kotou?”

Noatu rai e e putuputu te ngati Iuda te riro ki raro ake i te tutara a te etene, kare ratou i akatika e e pu akateimaa ratou ra. Kare ratou i akatika kia tapaia e tuikaa. Inara kua akakite atura Iesu e tuikaa tikai ratou. I teea tu? Kua akakite atura Iesu: “Tika, tika tikaʼi taku e karanga atu kia kotou, ko te rave i te kino ra, e tuikaa ïa no te kino.”

No te kore i akatika e i tuikaaia ratou i te ara, kua tuku te reira i te ngati Iuda ki roto i te turanga kino. “Kare oki te tuikaa e noo tamou i te ngutuare,” ta Iesu ia i akataka atu. “Kareka ra te Tamaiti ka noo tamou ïa i reira.” I te mea kare e tuanga tika no te tuikaa, penei ka akakoreia atu aia a tetai tuatau. Ko te tamaiti anake ua tei anauia me kare tei akatamarikiia ki roto i te ngutuare ra ka vairai ïa e “tuatau ua atu,” koia oki, i te tuatau e oraʼi aia ra.

Kua tuatua ua atura Iesu: “Na te Tamaiti kotou e akarangatira ra, kua rangatira tika ïa kotou.” No reira ko te tuatua mou te ka akarangatira i te au tangata nei, ko te tuatua mou ia no te Tamaiti, koia a Iesu Mesia. Na te atinga anake ua o tona oraanga tangata apa kore ra e matara mai ei te tangata nei mei te ara te akatupu ra i te mate. Ioane 8:​12-36.

▪ I ea a Iesu apii ei i te ra itu ra? Eaa tei tupu ki reira i te po ra, e eaa te piri anga o te reira ki ta Iesu i apii ra?

▪ Eaa ta Iesu i tuatua no tona akamata mai anga, e eaa ta te reira i tau kia akakite mai no te akataka anga iaia ra?

▪ Na teea tu i akariro i te ngati Iuda ra ei tuikaa, inara eaa te tuatua mou te ka akarangatira ia ratou ra?