Pene 81

Etai Atu Timataanga kia Tamate ia Iesu

I TE mea e tuatau paroro, te aaere ra a Iesu na te ngai marumaru tei matauia e ko te tomoanga o Solomona ra. I te pae te reira o te iero. I reira kua koropiniia aia e te ngati Iuda e kua tuatua maira kiaia: “Mei te aa ra te roa o to matou ekoko anga ia koe? Ko te Mesia koe ra, ka akakite ua mai koe.”

“Kua akakite atu oki au kia kotou,” ta Iesu ia i karanga atu, “kare ra kotou i akarongo mai.” Kare ra a Iesu i tuatua tika tika atu kia ratou ra e ko te Mesia aia, mei tana i akakite atura ki te vaine Samaria i te ruavai ra. E tika ra e kua akakite aia i te tika i tana akataka anga kia ratou e no runga mai aia e i vai ana aia i mua ake ia Aberahama.

Inara, te anoano ra a Iesu e na ratou uaorai e tuku te tika openga e ko ia tikai te Mesia na te akaaite atu anga i tana au angaanga ki ta te Puka Tapu i totou maira e ta te Mesia ia ka rave. Ko te tumu te reira i karanga atura aia ki tana au pipi i mua akera e auraka e akakite ki te tangata e ko te Mesia aia ra. E no reira aia i tuatua ua atu ei ki teia au ngati Iuda riririri ra kiaia: “Ko te angaanga tini taku e rave ma te ingoa o taku Metua ra, ko te akakite mai ïa iaku. Kareka kotou, kare ïa e akarongo.”

Eaa ra ratou i kore ei i akarongo? No te kore ainei i rava te akapapu anga e ko Iesu te Mesia? Kare, no te tumu ra ta Iesu i oronga atura i tana tuatua anga kia ratou: “Kare kotou i taku mamoe. Ka akarongo mai taku mamoe i toku reo, taku rai oki i karanga atu na kia kotou, kua kite oki au ia ratou, e ka aru mai oki ratou iaku: E oronga atu au i te ora mutu kore no ratou; kare rava ratou e mate, e kare rava oki ratou i roto i toku nei rima e riro ia etai ke, me āru mai. Ko taku Metua i oronga mai ia ratou noku ra, ko te maata ua atu ïa; e kare e tika ia etai kia āru atu ia ratou i roto i te rima o toku Metua ra.”

Kua akakite atura Iesu i tona pirianga vaitata ma tona Metua ra, i te akataka anga: “Ko au e te Metua ra, okotai ïa.” I te mea tei te enua nei a Iesu e ko tona Metua tei te rangi ra, te taka meitaki ra e kare aia e tuatua tika tika ana e, e kopapa okotai raua ra. Mari ra, ko te aiteanga o tana tuatua te rotai ra ta raua akakoro anga me kare te taokotai ra raua.

I te riri anga i ta Iesu au tuatua ra, kua rave te au ngati Iuda i te au toka e ta iaia, mei ta ratou rai i rave i nga marama e rua i mua akera, i te tuatau o te Oroa Puakapa ra. I te aro mataku kore anga i te aronga te ka ta iaia ra, kua karanga atura Iesu: “Manganui oki taku angaanga meitaki i akakite atu au kia kotou na toku Metua; no teaa ra i taua angaanga tini ra, i peî mai ei kotou iaku i te toka na?”

Kua tuatua maira ratou: “Kare to te angaanga meitaki i peî atu ei matou ia koe i te toka, no te akakino Atua; ko koe te tangata na, i akaatua ia koe uaorai.” I te mea kare a Iesu i karanga e e atua aia, eaa ra te ngati Iuda i tuatuaʼi i te reira?

Penei no tei karanga a Iesu e mana tona uaorai tei manako ra ratou e no te Atua anake ua ia. Ei akatauanga, koi tuatua ua akera aia no te “mamoe,” “e oronga atu au i te ora mutu kore no ratou,” e apinga ia kare e rauka i te tangata kia rave. Inara, kare te ngati Iuda i manako i te tika e kua akatika a Iesu i te rauka anga tona mana no ko mai ia i tona Metua ra.

Kua akaari a Iesu e meangiti aia i te Atua, i tona na ko anga: “Kare ainei i tataia i roto i ta kotou Ture [ia Salamo 82:6] ra e, I tuatua na au e: e atua kotou? I karanga aia ki te aronga i tuatuaia atu te tuatua a te Atua ra e, e atua ratou, e kare oki e apa te Tuatua i tataia ra; I tapepe mai oki kotou i te akakino Atua i ta te Metua i akataka e i tono mai i te ao nei, ko au i karanga ra e, ko te Tamaiti au na te Atua?”

Ae, i te mea te karanga ra te Tuatua i tataia ra e “e au atua” te au akava tangata tika kore ua ra, eaa te apa i kitea e teia aronga ngati Iuda i ta Iesu tuatua anga e, “ko te Tamaiti au na te Atua”? Kua tuatua atura Iesu: “Kare au i rave i te angaanga a taku Metua ra, auraka e akarongo mai iaku. Te rave nei ra au, e kare kotou i akarongo mai iaku ra, ka akarongo i te au angaanga: kia kite kotou, kia akarongo kotou e, tei roto iaku te Metua, e tei roto oki au iaia.”

I ta Iesu tuatua anga i te reira, kua tamata te ngati Iuda i te opu iaia. Inara, kua ora atura aia i to ratou rima, mei tana i rave i mua akera, i te Oroa Puakapa ra. Kua akaruke atura aia ia Ierusalema e kua aere atu ki tetai pae o te Kauvai i Ioridana ra te ngai i akamataʼi a Ioane i te papetito anga e vaitata i te a mataiti i mua akera. Kare teia ngai i mamao mei te taatai i te apatonga o te Tai i Galilea ra, e rua ra no te aere atu mei Ierusalema.

E manganui te aronga tei aere atu kia Iesu i teia ngai e kua tuatua atu: “Kare ua a Ioane akairo i rave ana: kareka te au tuatua katoa ta Ioane i tuatua i teianei tangata, e tuatua mou anake ïa.” E manganui oki tei akarongo iaia i reira. Ioane 10:​22-42; 4:26; 8:​23, 58; Mataio 16:20.

▪ Kua anoano a Iesu na teaa e akatakaʼi ki te au tangata iaia e ko te Mesia?

▪ Akapeea a Iesu e tona Metua i riro ei e okotai raua?

▪ Eaa ra, i te akara anga, i karangaʼi te ngati Iuda e te akariro ra a Iesu iaia uaorai ei atua?

▪ Akapeea te akaari anga o ta Iesu taiku anga mei te Salamo e kare i karanga ana e aiteite atu aia ki te Atua ra?