Pene 92

Kua Akaoraia te Tino Ngauru Repera i to Iesu Aerenga Openga ki Ierusalema

KUA tamanata a Iesu i te Sunederi ra i ta ratou tauta anga kia tamate iaia, na tona akaruke anga ia Ierusalema e te aere atu anga ki te oire ko Epheraima, e 24 ua paa kiro mita ki te pae tokerau o te opunga ra o Ierusalema ra. I reira kua noo aia ma tana au pipi, kia mamao mai i tona au enemi.

Inara, te vaitata maira te tuatau no te Pasa o te 33 T.N., e kare e roa ka aere akaou a Iesu. Kua aere atura aia na Samaria, e tae atu ki Galilea. Ko tona aerenga openga ia ki te reira ngai i mua ake i tona matenga. Iaia i Galilea, penei kua kapiti atu aia e tana au pipi kia etai katoa atu te aere atura ki Ierusalema no te oroa Pasa. Kua na te mataara atu ratou o te tapere o Perea, i te itinga ra o te Kauvai i Ioridana ra.

I muri ua ake i te akamata anga tona tere, ia Iesu e aere atura ki roto i tetai vira i Samaria me kare i Galilea, kua aravei akera iaia tetai aronga repera tino ngauru katoa. Te rauka ra i teia maki piri i te kai marie i te au tuanga o te kopapa o tetai tangata​—tona au mangamanga rima, tona au mangamanga vaevae, tona nga taringa, tona iu, e tona nga ngutu katoa oki. Ei paruru kia kore etai atu e makiia, te tuatua maira te Ture a te Atua no te repera e: “Ka tau aia kia tapoki i te uru vaa e ka kapiki uaʼi, ‘Kua viivii, kua viivii!’ I te au ra katoatoa e vai ei te reira maki mate iaia e viivii rai aia. . . . Ka tau kia noo takake koia anake ua.”​—NW.

Kua akono nga repera tino ngauru ra i te Ture no te repera e kua tu ua maira i te atea ke ia Iesu ra. Inara, kua kapiki maira ratou ma te reo maata: “E te Orometua, e Iesu e, e aroa mai koe ia matou”!

I te akara mamao atu anga ia ratou ra, kua akaue atura a Iesu: “Ka aere, ka akakite ki te kau taunga ia kotou.” Kua tuatua pera a Iesu no te mea kua akamana te Ture a te Atua i te kau taunga kia tuatua e kua ora te au repera tei kore ra to ratou maki. Na teia mataara ka rauka i te reira aronga te akatika anga kia noo akaou ma te aronga ora meitaki ra.

Kua irinaki te tino ngauru repera ra i to Iesu mana no te rave semeio. No reira kua aere viviki atura ratou ki te kau taunga ra, noatu rai e kare ratou i ora ake. Ia ratou i te mataara, kua tutakiia to ratou akarongo ia Iesu. Kua akamata ratou i te akara e te kite e kua akaoraia ratou ra!

E toko iva o taua aronga repera ra tei aere ua atu i to ratou aerenga, inara ko tetai o ratou repera ra, e tangata Samaria, kua oki i te kimi ia Iesu. Eaa te tumu? No te mea e maata tana ka akameitaki no tei tupu kiaia ra. Kua akapaapaa aia i te Atua ra ma te reo maata, e i te kitea anga e ia a Iesu, kua tipapa iora aia i te vaevae o Iesu, ma te akameitaki anga iaia ra.

I te pau atu anga kua karanga atura Iesu: “Kare ainei tino ngauru katoa i akaoraia nei? Teiea io nei ra e toko iva? Kare rava tetai i oki mai e akakakā i te Atua, mari ra ko teianei tangata ke”?

Kua karanga atura aia ki taua tangata Samaria ra: “Ka tu, ka aere i to tere: kua ora koe i to akarongo.”

Kia tatau tatou i ta Iesu akaora anga i te tino ngauru repera ra, ka tau tatou kia tamou ki te ngakau i te apiianga te akakiteia maira e tana uianga: “Teiea io nei ra e toko iva?” E apa kino roa tei akakiteia maira e te toko iva kare i akameitaki ana. Ka rave ainei tatou, mei te tangata Samaria ra, e akaari i ta tatou uaorai akameitaki anga no te au mea ta tatou i rauka no ko mai i te Atua ra, kapiti katoa i te taputou papu no te ora mutu kore ki roto i to te Atua ao ou no te tuatua tika? Ioane 11:​54, 55; Luka 17:​11-19; Levitiku 13:​16, 17, 45, 56; Apokalupo 21: 3, 4.

▪ I akapeea ta Iesu tamanata anga i te au ­tauta anga kia tamateia aia ra?

▪ Kua aere atura Iesu kiea i muri ake, e eaa tikai tona akakoroanga?

▪ Eaa ra te aronga repera ra i tu mai ei i te ngai atea ke ra, eaa a Iesu i akaue ei ia ratou kia aere ki te kau taunga ra?

▪ Eaa te apiianga ta tatou ka tau kia kite mei teianei tupu anga?