Pene 102

To te Mesia Aerenga Autu ki Ierusalema

I TE popongi i muri akera, i te Tapati, Nisana 9, kua akaruke atura a Iesu ma tana au pipi i Betania e kua aere atu na te Maunga ra i Oliveta ki Ierusalema. E poto ua te tuatau, kua vaitata atu ratou ki Betephage, i runga i te Maunga i Oliveta ra. Kua ikuiku atura a Iesu ki nga pipi e rua:

“Ka aere ana korua ki tera ra vila, e kite korua i tetai asini i reira, kua erekia, ma tana punua i te pae, e tatara, e taki mai i ko nei kiaku nei. E kia tuatua mai tetai tangata kia korua, e karanga atu korua, E tau teia i te Atu; e nana e tuku mai i reira ra.”

Noatu rai i te akamata anga kare nga pipi i kite e ko teia ikuikuanga e akatupu anga i te totou a te Puka Tapu, i muri akera kua kite raua e te akapera ra. Kua totouia e te peroveta ko Zekaria e ka aere mai te Ariki a te Atua i taputouia maira ki Ierusalema na runga i te atini, ae, “e te noo anga ki rungao i te asini, e te punua oki, te anaunga a te asini.” Kua akapera katoa oki te Ariki ko Solomona ra i te noo anga ki rungao i te punua a te atini, ki tona akatainu angaia.

I te tomo anga nga pipi ra ki Betephage e kua rave maira i te atini e tana punua, kua na ko maira tetai pae o te aronga i tu ua i reira: “Eaa korua i tataraʼi i tenana punua?” Inara i te akakite atu anga e te raveia ra tera manu no te Atu, kua tuku atu te reira aronga i nga pipi kia rave atu kia Iesu. Kua tuku atura nga pipi i to raua kakau ki rungao i te atini e tana punua ra, inara kua noo a Iesu ki runga i te punua.

I to Iesu aere atu anga ki Ierusalema na runga i te atini, kua maata atu te tangata i reira. Kua totoa te maata anga o te au tangata i to ratou kakau i te arataa, e kua tipu atura tetai papaki i te rara rakau, arikiriki atura i te ara. “Kia ora te Ariki, ko tei aere mai ma te ingoa o te Atu ra; [Iehova]!” ta ratou ia i kapiki. “E au to te rangi, e te kakā i te ngai teitei!”

Kua tupu te pekapeka ki tetai papaki o te au Pharisea i roto i te reira urupu no taua kapikipiki anga ra e kua tuatua akaapa atura kia Iesu: “E te Orometua, e ako ake ana koe i to au pipi nei.” Inara kua karanga atura a Iesu: “E akakite atu au kia kotou, kua kapiki ua mai ïa te au toka nei i reira.”

E vaitata atura a Iesu ki Ierusalema, kite atura i te oire e kua akamata atura i te aue no te reira, na ko atura: “Naringa koe i kite ana, ko koe tikai, i teianei i toou nei tuatau, i te tuatua [no te au, NW] na! i teianei ra, kua ngaro ke ïa tuatua, kare toou mata e kite.” No tona akarongo kore tikai, kua tau a Ierusalema kia tutaki i te utunga, mei ta Iesu i totou ra:

“E akapiniiaʼi koe e to au enemi [te au Roma i raro ake i te Rangatira ko Tito] i te koro, e takako ratou ia koe e pini ua ake, ka tāpu ei ia koe i roto: E ka uri oki ia koe ki raro i te one, e to tamariki i roto ia koe na; e kare oki tetai toka i roto ia koe na, e vaioia i rungao i tetai.” Kua tupu tikai te reira akapouanga o Ierusalema ta Iesu i totou ra i te 37 mataiti i muri akera, i te 70 T.N.

E tokoiti ua epetoma i mua ake i te reira, e manganui i roto i te urupu tei kite i ta Iesu akatu anga ia Lazaro. I reira kua akakitekite ratou ia etai atu no te reira semeio. No reira i to Iesu tomo anga ki Ierusalema kua keukeu iora to te oire katoa ra. “Koai teia?” kua anoano te au tangata kia kite ratou. E kua akakite atura te urupu e: “Ko Iesu teia, te peroveta no Nazareta i Galilea ra!” I te kite anga i tei tupu ra, kua taitaia te au Pharisea ra no te mea kare ua a ratou i rauka, kua tuatua ratou e: “Kua ope takiri to te ao katoa i te aru iaia.”

Mei tana ravenga tei matauia me aere ki Ierusalema ra, kua aere atu a Iesu ki te iero e apii. I reira kua aere mai te matapo e te pirikoki kiaia, e kua akaora atura aia ia ratou! I te kite anga te kau taunga maata e te au tata tuatua i te au mea umere ta Iesu e rave ra e i te akarongo anga i te au tamaroa i te iero ra i te kapiki anga, “Hosana i te Tamaiti a Davida; Kia ora aia!” kua riri ratou. “Te kite na koe i ta ratou e tuatua nei?” kua akaapa ratou.

“A,” e na Iesu ei: “Kare kotou i tatau ra, I rauka ia koe te akameitaki no roto i te vaa o te tamariki meangiti e te kai u?”

Kua rave ua atu a Iesu i te apiianga, e kua akara aia i te au mea katoa i te iero ra. Kare i roa ana kua tureiti. E kua aere aia, ratou ko te 12, e kua oki e vaitata i te toru kiro mita ki Betania. I reira kua noo aia i te po Tapati ra, penei i te kainga o tona taeake o Lazaro. Mataio 21:​1-11, 14-17; Mareko 11:​1-11; Luka 19:​29-44; Ioane 12:​12-19; Zekaria 9:9.

▪ I naea e na teea tu to Iesu tomo anga ki Ierusalema ei Ariki?

▪ Eaa ra i puapinga maataʼi no te urupu ra kia akapaapaa ia Iesu?

▪ Akapeea to Iesu manako ngakau i tona akara anga ia Ierusalema, e ko teea totou tana i tuatua?

▪ Eaa tei tupu i to Iesu aere anga ki te iero?