Aru Rotai i ta Iesu Pure

1, 2. Eaa ta Iesu i rave i muri ake te akono anga aia e tana au apotetoro i te Oroa Pasa i te mataiti 33 T.N.?

KO TE aiai teia o Nisana 14, mataiti 33 T.N. Koi oti ua ake a Iesu e tona au oa piri vaitata i te akono i te Oroa Pasa. Kua akamaara teia ia ratou e akapeea te Atua te akaora anga i to Iseraela mei Aiphiti mai. Inara, ka akaoraia te au pipi akarongo mou a Iesu na roto i tetai tu umere tikai. A tera mai ra, ka tamate to Iesu au enemi iaia. I na, ka riro te atinga o tona oraanga apa kore ei akamatara mai i te tangata katoatoa mei te ara e te mate.​—Ebe. 9:12-14.

² Kia akapapu e kare tatou e akangaropoina i teia apinga aroa no ko mai i te Atua, kua akanoo a Iesu i tetai akamaaraanga ou tei mono i te Oroa Pasa. Kua rave aia i tetai varaoa opue kore, kua vavai, e kua oronga atu i te reira ki tana au pipi tiratiratu e 11. Akakite aia kia ratou e: “Toku kopapa teia, e orongaia no kotou; e akapera kotou ei manako anga iaku.” Kua oronga katoa aia i tetai kapu uaina muramura kia ratou e kua karanga e: “Teianei kapu, ko te koreromotu ïa i toku nei toto, e akamaringiia no kotou nei.”​—Luka 22:19, 20

3. (a) Eaa te tauianga maata tei tupu i muri ake te matenga o Iesu? (e) Eaa te nga uianga ta tatou ka akamanako ia tatou e makitoro marie ra i ta Iesu pure?

³ Kare e roaia, ka ope te Ture koreromotu i rotopu i te Atua e te iti tangata o Iseraela. Ka akanooia tetai koreromotu ou i rotopu ia Iehova e te au pipi akatainuia a Iesu. Kare a Iesu e inangaro ia ratou kia aite rai mei te iti tangata o Iseraela. Kare to Iseraela i taokotaiia ana i roto i ta ratou akamori anga e kare ratou e akangateitei ana i te ingoa o te Atua. (Ioa. 7:45-49; Anga. 23:6-9) Kua inangaro a Iesu i tana au pipi kia angaanga taokotai kia rauka ia ratou i te akangateitei i te ingoa o te Atua. No reira, eaa ta Iesu i rave? Kua pati aia i tona Metua no te tauturu na roto i tetai pure manea rava atu ta tetai tangata ka rauka i te tatau i roto i te Pipiria. (Akara i te tutu mua.) Kua rekotiia teia pure i roto ia Ioane 17:1-26. Ia tatou e makitoro marie ra i teia pure, kia akamanako tatou no runga i teia nga uianga: “Kua pau ainei te Atua i ta Iesu pure? Te aru rotai ra ainei au i tana pure?”

AU MEA PUAPINGA RAVA ATU KIA IESU

4, 5. (a) Eaa ta tatou i apii mai mei te akamataanga o ta Iesu pure? (e) Akapeea a Iehova te pau anga i ta Iesu patianga nona uaorai?

⁴ Tae ua atu ki te roaanga po, e manganui te au mea manea tikai ta Iesu i apii ki tana au pipi. E oti kua akara aia ki runga i te rangi e kua pure aia e: “E taku Metua, kua tae ki te ora; ka akakakā i taau Tamaiti, kia akakakā katoa oki taau Tamaiti ia koe. Kua oronga mai oki koe i te mana nona ki te tangata katoa nei, kia oronga atu aia i te ora mutu kore i te aronga katoa taau i oronga mai nona.” Kua karanga katoa aia e: “Kua akakakā au ia koe i te ao nei: kua oti iaku te angaanga taau i o mai naku e rave ra. E teianei, e taku Metua, ka akakakā mai koe iaku i mua i toou aroaro na, i te kakā noku ia koe ou ua teianei ao.”​—Ioa. 17:1-5.

⁵ Kua akamata a Iesu i tana pure na te tuatua anga no runga i te au mea puapinga rava atu kiaia. Te mea mua, kua pure aia kia akakakaia tona Metua. Kua rotai teia ki tana i pati i roto i te pure a te Atu, kia akatapuia te ingoa o tona Metua. (Luka 11:2) Te rua, kua pure aia no te au anoano o tana au pipi. Kua pure aia e “kia oronga atu aia i te ora mutu kore” kia ratou. E te mea openga, kua pati a Iesu i tetai apinga nona uaorai. Kua pati aia e: “E taku Metua, ka akakakā mai koe iaku i mua i toou aroaro na, i te kakā noku ia koe ou ua teianei ao.” Kua rongo a Iehova i te pure a tana Tamaiti, e e maata atu tana i oronga kiaia. Kua oronga te Atua i ‘te ingoa e maata ua atu te meitaki’ i to te angera.​—Ebe. 1:4.

“KIA KITE” NO RUNGA I TE ATUA MOU ANAKE

6. Eaa ta te au apotetoro e anoano ra i te rave kia rauka te ora mutu kore, e akapeea tatou i kite ei e kua rave ratou i teia?

⁶ I roto i ta Iesu pure, kua taiku katoa aia e eaa ta tatou ka anoano i te rave kia rauka te ora mutu kore. (E tatau ia Ioane 17:3.) Karanga aia e “kia kite” ua rai tatou no runga i te Atua e Karaiti. Akapeea tatou me rave i teia? Te mea mua, kia rave i ta tatou ka rauka kia apii maata atu no runga ia Iehova e tana Tamaiti. Te rua, ka anoanoia tatou kia akono i ta tatou i apii mai i roto i to tatou oraanga. Kua rave ke ana te au apotetoro i teia nga mea e rua, mei ta Iesu i akakite i roto i tana pure e: “Naau i tuku mai iaku i te tuatua taku i tuku ake kia ratou nei; e kua āriki ratou i taua tuatua ra.” (Ioa. 17:8) Inara kia rauka te ora mutu kore, kua anoanoia ratou kia akamanako oonu ua rai no runga i te Tuatua a te Atua e kia akono i ta ratou i apii mai i roto i to ratou oraanga. Kua rave ainei te au apotetoro i teia e tae ua atu ki te openga o to ratou oraanga i te enua nei? Ae. Kua kite tatou i teia no te mea e ingoa mutu kore to ratou tatakitai tei tataia ki runga i te au toka tumu e 12 o Ierusalema Ou i te rangi.​—Apo. 21:14.

7. Eaa te aiteanga e “kia kite” no runga i te Atua, e eaa ra i puapinga ai kia rave i te reira?

⁷ Me ka inangaro tatou kia rauka te ora mutu kore, ka anoanoia tatou “kia kite” no runga i te Atua. Eaa te aiteanga o te reira? Ko teia tuatua Ereni, ka rauka katoa i te uri e “kia apii ua atu rai.” No reira te aiteanga e “kia kite” no runga i te Atua, koia oki kia apii maata ua rai no runga iaia. Inara e maata atu te o maira ki te kite anga i tona au tu e tona akakoroanga. Ka anoanoia kia oonu to tatou inangaro nona e kia akatupu i to tatou pirianga vaitata kiaia. Pera katoa, kia akaari tatou i to tatou inangaro no te au taeake e te au tuaine. Te akamarama maira te Pipiria e: “Ko tei kore e aroa ra, kare ïa i kite i te Atua.” (1 Ioa. 4:8) Te kite anga no runga i te Atua, te kapiti katoa maira i te akono anga i tana au akauenga. (E tatau ia 1 Ioane 2:3-5.) E tikaanga ngateitei to tatou kia kite no runga ia Iehova! Inara ka anoanoia tatou kia matakite kia kore to tatou pirianga vaitata kiaia e ngaro, mei tei tupu kia Iuda Ikariota. No reira, kia tauta pakari tatou i te akaketaketa i to tatou pirianga kia Iehova. Me rave tatou i teia, ka oronga mai a Iehova i tetai apinga manea rava atu, ko te ora mutu kore.​—Mata. 24:13.

“TAAU I O MAI NOKU I TOOU INGOA”

8, 9. Eaa te mea puapinga rava atu kia Iesu iaia i te enua nei, e eaa tana i rikarika?

⁸ Ia tatou e tatau ra i ta Iesu pure i roto ia Ioane pene 17, ka kite tatou i to Iesu inangaro maata no tana au apotetoro e ia tatou katoa. (Ioa. 17:20) Inara, kare to tatou oraanga te mea puapinga rava atu kia Iesu. I to Iesu tuatau i runga i te enua nei, ko te akakaka anga i te ingoa o tona Metua te mea puapinga rava atu kiaia. Ei akaraanga, te akamarama mai anga a Iesu i te tumu i aere mai ei aia ki te enua nei, kua tatau aia mei roto mai i te pokaikai a Isaia e: “Tei rungao iaku te Vaerua o [Iehova], koia i akatainu mai iaku ei tutu aere i te evangelia i te tangata rikiriki.” Papu ia tatou e te tatau anga a Iesu i teia, kua akakite taka meitaki aia i te ingoa o te Atua.​—Luka 4:16-21.

⁹ I mua roa ake to Iesu aere mai anga ki te enua nei, kua apii atu te au arataki ngati Iuda i te tangata kia kore e taangaanga i te ingoa o te Atua. Akamanako ana e mei teaa te maata i to Iesu rikarika i ta ratou peu. Kua akakite aia ki taua au arataki akonoanga e: “I aere mai nei au ma te ingoa o toku Metua, e kare kotou i oo mai iaku nei; kia aere mai tetai ma tona uaorai ingoa, e kite kotou i te reira.” (Ioa. 5:43) Tetai au ra i mua ake i tona matenga, kua akakite akaou a Iesu i te mea puapinga rava atu kiaia na te pure anga e: “E taku Metua, e akakakā i toou ingoa.” (Ioa. 12:28) I roto i te pure ta tatou e uriuri nei, te taka ua ra e ko te akakaka anga i te ingoa o tona Metua te mea puapinga rava atu kia Iesu.

10, 11 (a) Akapeea a Iesu te akakite anga i te ingoa o tona Metua? (e) Eaa ra te au pipi a Iesu i akakite ei i to Iehova ingoa?

¹⁰ Kua pure a Iesu e: “Kua akakite atu au i toou ingoa i te au tangata o teianei ao, taau i o mai noku ra: noou ana oki ratou, e naau oki ratou i o mai noku; e kua akono ratou i taau tuatua. Kua kore au e noo i te ao nei, ka noo tikai ra ratou i te ao nei, e te aere atu nei au kia koe na. E taku Metua tapu ra e, ka tiaki koe ia ratou i taau i o mai noku i toou ingoa, kia okotai ake ratou, mei ia taua katoa nei rai.”​—Ioa. 17:6, 11

¹¹ Te “akakite” anga a Iesu i te ingoa o tona Metua ki tana au pipi, e maata atu tana i rave i te taangaanga ua anga i te ingoa o Iehova. Kua tauturu a Iesu ia ratou kia marama e koai tikai a Iehova. Kua apii aia ia ratou no runga i to te Atua au tu e te tu e akono maira aia ia tatou. (Exo. 34:5-7) I teianei, te tutara ra a Iesu ei Ariki i runga i te rangi e te apii nei rai aia i tana au pipi kia akakite i to Iehova ingoa i te ao katoa. Eaa te tumu e raveia ai teia angaanga? Kia tauturu i te tangata e manganui kia kite no runga ia Iehova i mua ake ka tae mai ei te openga o teia akatereanga kino. Me tae mai taua tuatau ra, ka akaora aia i tona au kite tiratiratu, e ka kite te katoatoa i te ingoa kaka o Iehova!​—Eze. 36:23.

“KIA AKARONGO TO TE AO NEI”

12. Eaa te au mea e toru ka anoanoia tatou kia rave ei akaoti i te angaanga ta Iesu i akamata?

¹² Kua akaue a Iesu i tana au pipi kia akaoti i te angaanga tana i akamata. Kua pure aia e: “Mei ia koe i tono iaku i teianei ao, kua tono katoa oki au ia ratou i teianei ao.” Inara, kua kite a Iesu e ka anoano ratou i te tauturu kia rave i teia angaanga. Te tuatau ia Iesu e angaanga kapiti ra e tana au pipi, kua tauta pakari aia i te tauturu ia ratou kia autu i to ratou au tu paruparu. No reira i roto i tana pure, kua pati aia kia Iehova kia tauturu i tana au pipi kia rave e toru au mea puapinga. Te mea mua, kua pure aia kia kore tana au pipi e riro ei tuanga no te ao o Satani. Te rua, kua pure aia e kia akarongo tana au pipi ki te Tuatua a te Atua e kia riro mai ei aronga tapu. E te toru, kua inangaro tikai a Iesu kia taokotaiia tana au pipi, mei iaia rai e tona Metua. No reira ka anoanoia tatou kia ui kia tatou uaorai e, ‘Te rave ra ainei au i teia au mea e toru ta Iesu i taiku i roto i tana pure?’ Kua irinaki a Iesu e me rave tana au pipi i te reira, e manganui te tangata te ka ariki mai i ta ratou karere.​—E tatau ia Ioane 17:15-21.

13. Akapeea a Iehova te pau anga i ta Iesu pure i te anere mataiti mua?

¹³ Me apii tatou i te puka, te Angaanga a te au Aposetolo, ka kite tatou e kua pau a Iehova i ta Iesu pure. Te au Kerititiano i te anere mataiti mua e au ngati Iuda e te Kenitara, e aronga apinganui e te putaua, e au tavini e te au pu. Akamanako ana i te ke te ka rauka i te akatupu i rotopu ia ratou! Tera ra kua taokotai tikai ratou, no reira te apotetoro ko Paulo i akaaite ia ratou ki te au tuanga tukeke o te kopapa tangata nei, e ko Iesu te upoko. (Ephe. 4:15, 16) No te vaerua tapu ririnui o Iehova i tupu ei teia taokotaianga, noatu tei roto ratou i te ao o Satani.​—1 Kori. 3:5-7.

14. Akapeea ta Iesu pure te pauia anga i to tatou tuatau?

¹⁴ Te mea tangi ra, kua taui te reira i muri ake te matenga o te au apotetoro. E maata tei akaruke i te tuatua mou. Kua o mai te au apiianga pikikaa ki roto i te putuputuanga, e kua tupu te ke i rotopu ia ratou. (Anga. 20:29, 30) Inara i roto i te mataiti 1919, kua akamatara mai a Iesu i te au Kerititiano akatainuia mei te au akonoanga pikikaa e kua akaputuputu aia ia ratou ma te “tatua apa kore,” koia oki te aroa. (Kolo. 3:14) Eaa tei tupu mai no to ratou taokotaianga i roto i te angaanga tutuanga? I teianei, tere atu i te itu mirioni tangata mei ‘te pa enua ravarai, te au kopu ravarai, te au iti-tangata ravarai, e te au reo katoa’ tei taokotaiia i te akamori anga ia Iehova, kapiti atu te aronga akatainuia. (Apo. 7:9; Ioa. 10:16) E pauanga umere tikai teia ki ta Iesu pure kia Iehova, “kia kite to te ao nei e naau au i tono mai nei, e kua akaperepere mai koe ia ratou, mei ia koe e akaperepere mai iaku nei.”​—Ioa. 17:23.

AKAOTIANGA MANEA NO TA IESU PURE

15. Eaa te patianga puapinga ta Iesu i rave no tana aronga akatainuia?

¹⁵ I te po ia Nisana 14, kua oronga a Iesu i te “kakā” ki tana au apotetoro na te akanoo anga i tetai koreromotu kia tutara kapiti ratou kiaia i roto i tona Patireia. (Ioa. 17:22; Luka 22:28-30) No reira, kua pure a Iesu no te aronga katoatoa te ka riro ei aronga akatainuia, e kua karanga aia e: “E taku Metua e, kua anoano au i te aronga taau i o mai noku ra, ei vaitata katoao oki iaku, i te ngai taku e noo ra, kia akara mai ratou i toku kakā, i taau i o mai noku ra: kua akaperepere mai ana oki koe iaku ou teianei ao i angaiaʼi.” (Ioa. 17:24) Te mataora nei te au mamoe ke atu no runga i teia tikaanga ngateitei a te aronga akatainuia, e kare ratou e vareae ana. E akapapuanga katoa teia e te taokotai ra te au Kerititiano mou i teia tuatau.

16, 17 (a) I te openga o tana pure, eaa ta Iesu i tuatua no runga i tana ka rave? (e) Eaa ta tatou ka anoano i te rave?

¹⁶ Manganui te tangata i teia tuatau tei kopae i te au akapapuanga e e iti tangata to Iehova tei taokotaiia e tei kite tikai no runga iaia. E tupu ana teia no te au pikikaa ta te au arataki akonoanga e apii ra. Kua tupu katoa teia i to Iesu tuatau. No reira kua taopenga a Iesu i tana pure na roto i te tuatua: “E taku Metua tuatua-tika e, kare rai oki to te ao i kite ia koe, kua kite ra au ia koe, e kua kite oki ratou e naau au i tono mai. E kua akakite atu oki au kia ratou, e e akakite atu rai au, i toou ingoa: e ei roto ia ratou te akaperepere taau i akaperepere mai iaku ra, e ei roto au ia ratou.”​—Ioa. 17:25, 26

¹⁷ Kua akakite tikai a Iesu i te ingoa o tona Metua. E ei Upoko no te putuputuanga, te tauturu nei rai aia ia tatou kia akakite i te ingoa e te akakoroanga o tona Metua ki te tangata. No reira, ka inangaro tatou kia aru i ta Iesu aratakianga na te tutu maroiroi anga, e te akariro anga i te au tangata ei pipi. (Mata. 28:19, 20; Anga. 10:42) Pera katoa kia tauta pakari tatou kia taokotaiia ei iti tangata no te Atua. I reira, te aru rotai ra tatou ki ta Iesu pure. Ka akakaka te reira i to Iehova ingoa, e ka apai mai i te mataora mutu kore.