Aaereanga ma te Ngakau Tavaitai

“E ikuiku mai iaku, E Iehova . . . E tavaitai i toku ngakau kia mataku i toou ingoa.”​—SALAMO 86:11, NW.

1. Akapeea a Iehova i te tutaki anga i tona aronga tiratiratu?

‘E IEHOVA, ko koe te Atua, ko koe anake ra.’ (Salamo 86:8, 10, NW) Kua akapaapaa a Davida i te Atua mei tetai ngakau tei ki ra i te tu ariki. Pera katoa i mua ake ka riro mai ei a Davida ei ariki ki rungao ia Iseraela katoa, kua akaora mai a Iehova iaia mei ia Saula e mei te au Philiseti. No reira i raukaʼi iaia i te imene: “Ko Iehova taku mato, e taku punanga, e toku nei ora: . . . I te tangata tiratiratu ra, e tiratiratu katoa taau.” (2 Samuela 22:2, 26) Kua akono a Iehova i tona tavini tiratiratu ra na roto i te au timata anga e manganui. Ka rauka ia Davida i te tuku i tona irinaki anga e te tu papu ki roto i tona Atua tiratiratu ra, inara kua anoano aia i te arataki anga tamou. Kua pati i reira a Davida i teianei ki te Atua: “E ikuiku mai iaku, E Iehova, no runga i taau mataara ra.”​—Salamo 86:11, “NW.”

2. Akapeea to Iehova rave anga e kia apiiia tatou e ia?

² Kua inangaro a Davida i te kopae takiri i te au manako o teianei ao me kore te au apii anga. Kua inangaro aia kia “apiiia e Iehova,” mei ta te peroveta a te Atua i tuatua ra i muri mai. (Isaia 54:13) Kua rauka ia Davida i te manakonako ki runga anake e iva au puka o te Puka Tapu tei rauka ra i tona tuatau. Inara, e mea puapinga te reira ikuiku anga mei ko mai ia Iehova kiaia ra! Ia tatou e apiiia ra, i teia tuatau ka rauka ia tatou i te kaikai i te 66 au puka ravarai o te Puka Tapu, e pera katoa ki rungao i te maata o te au puka Patireia tei orongaia mai na roto i te “tavini akono meitaki e te pakari.” (Mataio 24:45) Mei ia Davida rai, ka kapiki ana tatou ia Iehova, kia tauturu mai tona vaerua ia tatou kia kimi i ‘te au mea ta te Atua i vaio no te aronga i inangaro iaia ra, e te au mea oonu rai o te Atua ra.’​—1 Korinetia 2:9, 10.

3. I teea au mataara e puapingaʼi tatou mei te ikuiku anga Puka Tapu?

³ Tei te Puka Tapu te pau anga ki te au uianga e te manamanata ravarai te ka tupu mai i to tatou oraanga. “Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.” (Roma 15:4) Te raveanga i te ikuiku anga mei ko mai ia Iehova na te reira e akamaroiroi ia tatou kia tamou marie i te au tu ngata, te akapumaana anga ia tatou i te au tuatau taitaia, e te akono i te manakonakoanga Patireia te kaka veravera anga i to tatou au ngakau. Kia kiteaia e tatou te rekareka i te tatauanga i te Tuatua na te Atua e te manakonakoanga i te reira i te “po e te ao,” ka riro mai te pakari tei akatumuia ki runga i te Puka Tapu ei “rakau ora aia i te aronga e opu iaia: e ko tei tāpu iaia, e ao tona.”​—Salamo 1:1-3; Maseli 3:13-18; akara katoa ia Ioane 17:3.

4. I ta tatou ka rave, eaa te tu akaraanga ta Iesu i akanoo no tatou?

⁴ Ta te Atua tamaiti, koia a Iesu, tei kapiki katoaia ko te “tamaiti a Davida,” kua akara ua rai aia kia Iehova no te ikuiku anga. (Mataio 9:27)a Kua karanga aia: “Kare e tika ta te Tamaiti kia rave aia anake uaorai, ko tana ra i kite i te Metua i te rave anga; ko te au mea katoa tana e rave ra, koia katoa ta te Tamaiti e rave.” “E kare aku peu rave ua; ko ta taku Metua ra i apii mai iaku ra, ko taku ïa e tuatua nei.” (Ioane 5:19; 8:28) Kua akaruke mai a Iesu i tetai akaraanga no tatou kia ‘aru i tona takainga vaevae.’ (1 Petero 2:21) Ka akamanako ana! Me apii tatou mei ta Iesu i rave ra, ka rauka ia tatou i te rave i ta Iehova i inangaro ia tatou kia rave i roto i tetai ua atu turanga. E mataara tika ua rai ta Iehova mataara.

5. Eaa te “tuatua-mou”?

⁵ Kua akakite a Davida i muri mai e: “Ka aaere au na taau ra tuatua mou.” (Salamo 86:11, NW) Okotai tauatini mataiti i muri mai, kua ui a Pilato, te tuatuaanga ki te Tamaiti a Davida, koia a Iesu e: “Eaa te tuatua-mou?” Inara koi pau ua akera a Iesu i te reira uianga i te akakiteanga kia Pilato e: “Kare to teianei ao taku basileia,” te tuatua ua atu anga e: “Te tuatua mai na koe e e ariki au. I anau mai ei au nei, i aere mai ei au ki te ao nei, e akakite i te tuatua-mou.” (Ioane 18:33-38) No reira kua akakite a Iesu e kua akatumuia te tuatua mou ki runga i te Patireia Mesia. E tikai, te tumu tuatua katoa o te Puka Tapu ko te akatapu anga i te ingoa o Iehova na roto i te reira Patireia.​—Ezekiela 38:23; Mataio 6:9, 10; Apokalupo 11:15.

6. Te aaereanga i te tuatua mou, eaa te tau ra kia matakite tatou?

⁶ Eaa te aite anga o te aaere anga i roto i te tuatua mou? Tera te aite anga ko te akatupu i te manakonakoanga Patireia ei mea puapinga rava i to tatou oraanga. Kia noo tatou i te tuatua mou o te Patireia. Kia kore tatou e maveteia i te tukuanga i te au inangaro Patireia i te ngai mua, te maroiroi i tau ki te ka rauka ia tatou i te akakiteanga i te tuatua mou Patireia, te aru anga i to Iesu akaraanga. (Mataio 6:33; Ioane 18:37) Kare e rauka ia tatou i te aaere i tetai tuanga ua o te taime i roto i te tuatua mou, te orongaanga i te tavini anga tutu ua inara te akamarekaanga ia tatou uaorai na te tipoto anga i te rave maata i te tamataora anga me kore te tomo atu ki roto i tetai ngai angaanga tei akapou taime me kore te “akono atu i te . . . Mamona.” (Mataio 6:24) Penei ka ngaro tatou i runga i tetai o taua au ara ke ra, te kore rava anga e kitea te ara no te oki mai ki runga i te ‘ara piri e tae atu ei ki te ora.’ Auraka tatou e aere ke atu mei te ara! (Mataio 7:13, 14) Te akakaka ra Tei Ikuiku Maata ra ia tatou, ko Iehova, na roto i tana Tuatua e te akaaerenga, i te mataara, te karangaanga e: “Teia te ara, e na reira te aere; kia anga kotou i te pae katau, e kia anga kotou i te pae kaui.”​—Isaia 30:21.

Te Mataku Tau

7. Akapeea tatou te “tavaitai” anga i to tatou ngakau?

⁷ Kua aere ua atu ta Davida pure i te Salamo 86 irava 11: “E tavaitai i toku ngakau no te mataku i toou ingoa.” Mei ia Davida rai, e tau tatou kia inangaro i to tatou ngakau kia mavete koreia, kia ki katoa, te raveanga i to te Atua anoano. Te tano ra teia ki te ako anga a Mose: “E teianei, E Iseraela, eaa ta Iehova toou Atua ra e pati maira ia koe mari ra kia mataku ia Iehova toou Atua ra, e raukaʼi i te aaere i tana au ara ravarai e te aroa iaia e te tavini ia Iehova toou Atua ra ma toou ngakau katoa e toou meta katoa; te akono i te au akauenga a Iehova e tana au tuku ture koia taku e akaue atura ia koe i teianei ra, ei meitaki noou?” (Deuteronomi 10:12, 13, NW) No reira, ei meitaki rai no tatou kia riringi tatou i to tatou ngakau e te meta ki te tavinianga ia Iehova. I reira te akaari ra tatou i te mataku tau no tona ingoa maroiroi. Te aite anga tikai i to Iehova ingoa “Ko Tei Akariro Kia Tupu,” i roto tikai i tana apaianga mai i tana au akakoro anga maata ki tona akaoti angaia. Tetai aite anga katoa ko tona mana teitei rava i rungao i teianei ao katoa e pini ua ake. Te tavini anga ma te mataku i te tu teitei o te Atua, kare i reira tatou e akapaeia e te mataku i te tangata mate ua nei. Kare to tatou au ngakau e maveteia. Mari ra, ka mataku tatou i te rave ua atu i tetai mea te ka akamareka kore ia Iehova, te Akava Teitei Rava e te Atu Ngateitei, tei mou ra i to tatou oraanga tikai i tona rima.​—Isaia 12:2; 33:22.

8, 9. (a) Eaa te aite anga e ‘kare no teianei ao’? (e) Eaa te au takainga kia rave tatou no te mea e “teata akaariari” tatou?

⁸ Pera katoa i rotopu i te akakino anga e te takinokino anga, ka aru tatou i te akaraanga mataku kore o Iesu te kore anga e riro mai ei tuanga o te ao kino tei takapini ra ia tatou. (Ioane 15:17-21) Kare te aite anga e kia noo ta Iesu au pipi ei aronga uunaia me kore tei pipini ra i roto i tetai are pure. Kua karanga a Iesu i roto i tana pure ki tona Metua e: “Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino. Kare ratou i to teianei ao, mei iaku nei rai oki, kare i to teianei ao. Ka akatapu koe ia ratou i te tuatua-mou naau, ko te tuatua aau na te tuatua-mou. Mei ia koe i tono iaku i teianei ao, kua tono katoa oki au ia ratou i teianei ao.” (Ioane 17:15-18) Mei ia Iesu rai, te tonoia ra tatou kia akakitekite i te tuatua mou Patireia. Kua ngoie ua i te tuatua kia Iesu. Kua akaoraoraia te au tangata i tana tu apiianga. (Akaaiteia atu kia Mataio 7:28, 29; 11:28, 29; Ioane 7:46.) E tau katoa te reira kia tatou.

⁹ To tatou tu oaoa ma te oraora, te akamaneaanga e te akara anga mako, te pukapuka anga takinga meitaki e te ma, e tau te reira ei maani ia tatou e ta tatou tuatua kia arikiia e te au tangata ngakau tika. Kia kopae tatou i te tu mako kore, te kakau tau kore, te piri anga te ka arataki atu ki te o anga atu ki to teianei ao, e te oraanga tuku ua, ma te kore e kaveinga mei ta tatou e kite nei i teianei ao takapini ia tatou. Te riroanga mai “ei tetai teata akaariari ki to teianei ao, e ki te au angera, e ki te au tangata” te angaanga ra tatou e 24 ora i te ra takitai no te tavini e te noo anga ei au Kerititiano akaraanga meitaki. (1 Korinetia 4:9, NW; Ephesia 5:1-4; Philipi 4:8, 9; Kolosa 4:5, 6) E tau to tatou ngakau kia tavaitai i teia tua.

10. Akapeea a Iehova i te akamaara anga i te aronga tei tavaitai i to ratou ngakau i te angaanga tapu?

¹⁰ Ko tatou tei tavaitai i to tatou au ngakau i te mataku i te ingoa o Iehova, te manakonakoanga i tana au akakoro anga maata e te akakianga i to tatou oraanga ma te angaanga tapu, ka maaraia teia e Iehova. “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.” (2 Paraleipomeno 16:9) Te manako anga i to tatou tuatau i tau ki te totou, te tatau ra a Malaki 3:16 e: “I reira te aronga i mataku ia Iehova i te tuatua putuputu anga ki tetai ki tetai: e kua akarongo mairā Iehova, e kua kite e kua tataia iora tetai buka manakoanga ki mua iaia, no te aronga e mataku ia Iehova, e tei manako i tona ra ingoa.” Kia tavaitaiia to tatou au ngakau i te mataku ki katoa ia Iehova!

To Iehova Aroa Takinga Meitaki

11. Akapeea to Iehova aroa takinga meitaki me akaariia ki te aronga tiratiratu?

¹¹ Mei teaa atura te akatenga i ta Davida pure! Kua tuatua aia e: “Te akapaapaa nei au ia koe, E Iehova toku Atua, ma toku ngakau katoa, e ka akakaka au i toou ingoa e rimua, no toou aroa takinga meitaki e maata ia kiaku nei, e kua akaora mai koe i toku meta mei roto mai ia Teoro, tona ngai akaaka rava.” (Salamo 86:12, 13, “NW”) No te rua o te taime i roto i teia salamo, te akapaapaa ra a Davida ia Iehova no tona aroa takinga meitaki​—Tona aroa tiratiratu. No te maata i teia aroa i raukaʼi i te reira i te akaora i roto i te au turanga rauka anga ngata tei manakoia. Te arumakianga a Saula iaia i roto i te metepara, penei kua manako atu a Davida i te totoro ki roto i tetai kona no te mate atu. Kua aite te reira ki te akara mata anga ki te Teoro akaaka rava atu​—koia te oonu anga o te vaarua tanumanga. Inara kua akaora a Iehova iaia! Pera katoa, i te maata anga o te taime kua apai mai a Iehova i te tu maru ki tona au tavini i teia tuatau na roto i te au mataara umere, e kua tauturu rai aia i te aronga akono tika tei tamou marie ra ma te akarongo e tae ua atu ki te matenga. Ka rauka te tutaki i te aronga tiratiratu ravarai, pera katoa na roto i tetai tuakaou anga me ka anoanoia te reira.​—Akaaiteia atu kia Iobu 1:6-12; 2:1-6, 9, 10; 27:5; 42:10; Maseli 27:11; Mataio 24:9, 13; Apokalupo 2:10.b

12. Mei teaa ra te tu nengonengo e te kino o te au orometua i te tupu anga, e eaa ta ratou tutaki?

¹² No runga i te aronga takinokino ra kua kapiki a Davida e: “E te Atua, kua tu mai te aronga nengonengo uaorai ki runga iaku; E te akaputuputuanga tikai o te aronga kino ra kua kimi i toku meta ra, E kare ratou i akanoo ia koe ki mua ia ratou uaorai.” (Salamo 86:14, “NW”) I teia ra, te kapitiia maira te au orometua o Kerititome ei aronga takinokino. Te nengonengo ra teia aronga i te akamori i te Atua inara kua komono ratou i tona ingoa ki te taoonga “Atu” e te tuku ra iaia ei Toru Tai ngaro tei kare tikai i taikuia i roto i te Puka Tapu. Mei teaa atura te nengonengo! Kapiti atu ki teia, te tauta ra ratou i te akakeu i te au mana poritiki kia akapae e te tapeka i te Au Kite o Iehova, mei tei raveia ra rai ma te poitirere i roto i te maata anga o te au enua takapini i te enua nei. Ko teia aronga akakakauia ma te akakino i te ingoa o te Atua ka kokoti ratou i ta ratou tutaki, pera katoa te au tuanga akaturi ravarai o Babulonia Maata.​—Apokalupo 17:1, 2, 15-18; 19:1-3.

13. Eaa te au tu ta Iehova e akaari ra i te akakite anga i tona tu meitaki?

¹³ Ei tuke anga mataora kua aere ua atu ta Davida pure: “Inara ko koe, E Iehova, te Atua akaroa e te maru, Te marie i te riri e te maata te aroa takinga meitaki e te tika.” (Salamo 86:15, “NW”) E ngateitei tikai, teia au tu o to tatou Atua. Te apai ra teia au tuatua ia tatou ki te Maunga i Sinai te pati anga a Mose kia kite aia i te kaka o Iehova. Kua pau mai a Iehova: “Ka tuku rai au i te meitaki katoa noku ra na mua ia koe, e e tutu au i te ingoa o Iehova na mua ia koe.” Inara kua akamatakite aia ia Mose e: “Kare koe e tika kia akara i toku mata; kare rava oki tetai tangata e ora kia akara mai iaku.” I muri akera kua aere mai a Iehova na roto i te tumurangi ra, te akakiteanga e: “Ko Iehova, Ko Iehova, e Atua akaroa e te maru, kare e riri vave e te ki i te aroa takinga meitaki e te tuatua mou.” (Exodo 33:18-20; 34:5, 6, NW) Kua taiku a Davida i teia au tuatua i roto i tana pure. E puapinga rava atu teia au tu o Iehova kia tatou i tetai ua atu tutu anga kopapa! Mei ta tatou uaorai kite anga, kare ainei tatou e ariki ana i te tu meitaki o Iehova mei tei akaariia i roto i teia au tu memeitaki?

“Tetai Akairo Koia te Aiteanga e Meitaki”

14, 15. Akapeea a Iehova i te angaanga anga no tana au tavini no “tetai akairo koia te aiteanga meitaki”?

¹⁴ Kua pati akaou a Davida i ta Iehova akameitakianga, te karangaanga e: “E uri mai kiaku e akaari mai i te mareka anga kiaku. E oronga mai i toou maroiroi ki toou ra tavini, E e akaora i te tamaiti a toou ra tavini tamaine. E angaanga mai kiaku ra i tetai akairo koia te aiteanga e meitaki, E ko te aronga te makitakita ra iaku kia kite mai i te reira e kia akama ra. No te mea ko koe uaorai, E Iehova, tei tauturu mai iaku e te akapumaana iaku ra.” (Salamo 86:16, 17, “NW”) Kua kite a Davida e ei ‘tamaiti na te tamaine tavini a Iehova,’ e tau katoa e tei ia Iehova aia. Pera katoa tatou katoatoa i teia ­tuatau tei akatapu i to tatou oraanga kia Iehova e tei tavini ra i roto i tana angaanga. Te anoano ra tatou i to Iehova maroiroi na roto i tona vaerua tapu. No reira, ka pati tatou i to tatou Atua kia angaanga mai ma tatou i “tetai akairo koia te aiteanga e meitaki.” Te takave ra to Iehova tu meitaki i te au tu memeitaki tei uriuriia akera e tatou. No teia tumu, eaa te akairo, me kore te akakite anga, te tapapa ra tatou ia Iehova kia oronga mai kia tatou?

¹⁵ Ko Iehova Tei Oronga maira i te “te au apinga aroa meitaki ravarai e te au apinga tiama ravarai” e te oronga ua, mei ta Iesu e akapapu maira ia tatou, te orongaanga mai i te “Vaerua Tapu i te aronga e pati atu [i]aia ra.” (Iakobo 1:17, NW; Luka 11:13) Te vaerua tapu​—mei teaa te apinga aroa oko koreia mei ko mai ia Iehova! Na roto i te vaerua tapu, te oronga maira a Iehova i te mataora i te ngakau, pera katoa i te tuatau takinokino anga. No reira, i te tuatau te timata angaia to ratou oraanga, kua rauka i te au apotetoro a Iesu i te akakite ma te rekareka e te oronga maira te Atua i te vaerua tapu ki te aronga te akarongo ra iaia ei tutara. (Angaanga 5:27-32) Kua taangaanga putuputu te rekareka o te vaerua tapu ma ratou ra i “tetai akairo koia te aiteanga e meitaki.”​—Roma 14:17, 18.

16, 17. (a) Eaa te akairo o tona tu meitaki ta Iehova i oronga kia Paulo raua ko Banaba? (e) Eaa te akairo tei orongaia ki te au Tesalonia tei takinokinoia?

¹⁶ I te tuatau i to raua tere mitinari na roto ia Asia Minora, kua aravei a Paulo raua ko Banaba i te au tu ngata, pera katoa te takinokino anga pakari. Te tutu anga raua i Anetioka i Pisidia, kua patoi mai te ngati Iuda i ta raua tuatua. No reira, kua aere atu raua ki te au tangata o te pa enua. Eaa tei tupu? “Te akarongo anga te aronga o te pa enua i teia, kua akamata ratou i te rekareka e te akakaka i te tuatua a Iehova, e te aronga katoatoa tei inangaro tikai ra i te ora mutu kore kua riro mai ei aronga irinaki.” Inara kua akatupu te ngati Iuda i tetai tamanamanata anga, e kua peiia taua au mitinari ra ki vao i te enua. Kua riri ainei ratou e te aronga irinaki ou ra i teia? Kare rava! Mari ra, “kua tamou ua atu te au pipi i te akakiia i te rekareka e te vaerua tapu.” (Angaanga 13:48, 52, NW) Kua oronga a Iehova i te reira akairo o tona tu meitaki kia ratou.

¹⁷ I muri mai, kua tupu te takinokino anga ki te putuputuanga ou i Tesalonia. Kua arataki atu teia ki to te apotetoro tata anga i tetai reta akapumaana anga, te akameitakianga i to ratou tu tamou marie i raro ake i te mate. Kua “āriki oki kotou i te tuatua ma te mate maata, ma te rekareka a te Vaerua Tapu.” (1 Tesalonia 1:6) Kua tamou ua atu “te rekareka a te Vaerua Tapu” i te akamaroiroi ia ratou ei akairo kite anga mei ko mai i te Atua tei akaroa ra e te maru, te marie i te riri, e te maata te aroa takinga meitaki e te tika.

18. Akapeea te au taeake i Europa Itinga i te akaari anga i to ratou tu ariki no to Iehova tu meitaki?

¹⁸ I te au tuatau i ou ake nei, kua akaari a Iehova i tona tu meitaki ki to tatou au taeake akarongo i Europa Itinga, te taakamaanga i te aronga tei makitakita ia ratou​—to ratou aronga takinokino i mua ana. Noatu e kua akamaruia mai i ou ake nei mei te takinga kino anga no tetai ngauru ua atu mataiti, te tau nei rai teia au taeake akaperepere kia tamou marie, no te mea e manganui te aro atura i te au tu ngata pakari i te pae o te puapinga. Inara, te akapumaana ra to ratou “rekareka a te Vaerua Tapu” ia ratou. Mei teaa atura te rekareka maata te ka rauka ia ratou i te taangaanga anga i to ratou tu rangatira ou tei kiteaia i te akamaataanga i te akakitekite anga? E manganui te au tangata te akarongo maira ia ratou, mei ta te au ripoti no runga i te au uruoaanga e te au papetito anga e akaari maira.​—Akaaiteia atu kia Angaanga 9:31.

19. Akapeea tatou i te maani anga i te au tuatua a Salamo 86:11 ei na tatou uaorai?

¹⁹ Ko te au mea ravarai tei uriuriia i roto i teia atikara e to mua ra te akatangi ra i ta Davida pure akatenga kia Iehova: “E ikuiku mai iaku, E Iehova . . . E tavaitai i toku ngakau no te mataku i toou ingoa.” (Salamo 86:11, NW) E akatupu tatou i taua au tuatua ra i ta tatou irava mataiti 1993 ei na tatou uaorai ia tatou e angaanga ra ma te ngakau katoa no te turu i te au inangaro Patireia e te ariki anga i te tu meitaki maata rava o to tatou Atua okotai, ko te Atu Ngateitei ko Iehova.

[Au Tataanga Rikiriki i Raro]

Akapeea Koe me Pau?

◻ Eaa ta tatou e akaari ra na te pureanga, “E ikuiku mai iaku, E Iehova”?

◻ Eaa te aite anga me tavaitaiia to tatou ngakau no te mataku i to Iehova ingoa?

◻ Akapeea a Iehova me akaari i tona aroa takinga meitaki ki te aronga tiratiratu ravarai?

◻ Akapeea ta Iehova taangaanga anga ma tatou ra i “tetai akairo koia te aiteanga e meitaki?”

[Pia i te kapi 16]

“E ikuiku mai iaku, E Iehova . . . E tavaitai i toku ngakau kia mataku i toou ingoa.”​—Salamo 86:11, NW.

[Tutu i te kapi 15]

E mato e e punanga a Iehova no te aronga te aaere titika i roto i te tuatua mou

[Tutu i te kapi 18]

I te Uruoaanga Pa Enua o te “Aronga Turama i te Marama” a te Au Kite o Iehova i St. Petersburg, i Rutia, i roto ia Tiunu, e 46,214 tei tae mai e e 3,256 tei papetitoia. Mei teaa atura te vavaria i te aronga te tuku ra ia ratou uaorai ki te tu meitaki o Iehova, ma te “rekareka a te Vaerua Tapu”!