Pene 17
Apiianga ia Nikodemo
IAIA i te Pasa o te 30 T.N., kua rave a Iesu i te au akairo, me kore semeio umere. Ko tei tupu, e manganui te au tangata tei akarongo kiaia ra. Ko Nikodemo, e mema ia no te Sunederi, ko te akavaanga teitei te reira o te ngati Iuda, kua rekareka aia e kua anoano kia maata atu tona kite. No reira kua aere atura aia kia Iesu i te poiri o te po ra, penei no te mataku anga e ka kino tona turanga ma etai atu e te au arataki ngati Iuda ra me kitea mai aia.
Kua tuatua maira: “E Rabi, kua kite matou e, e Orometua koe mei ko mai i te Atua ra: kare oki teianei au akairo taau e rave nei e tika i te tangata, auraka te Atua katoa ra.” I tana pauanga, kua karanga atura a Iesu kia Nikodemo e e o ei te tangata ki te Patireia o te Atua ra, ka tau aia kia “anau akaou.”
Inara, akapeea e raukai tetai tangata kia anau akaouia? “Ka o akaou ainei ki roto i te kopu o tona metua vaine, ka anau mai ei?” ta Nikodemo ia i ui atu.
Kare, kare tena i te aiteanga o te anau akaou. Kua akataka maira a Iesu: “Kia kore te tangata e anau ki te vai, e te Vaerua, kare aia e o i te basileia o te Atua.” I to Iesu papetito angaia e kua eke maira te vaerua tapu ki rungao iaia, e kua anau aia “ki te vai, e te vaerua tapu” i reira. Na te kapitianga mai te akakite anga mei te rangi maira, ‘Taku Tamaiti akaperepere teia, kua mareka rava au iaia,’ kua akakite te Atua e kua anau mai e tamaiti vaerua nana ma te manakonako anga kia tomo atu ki te Patireia o te rangi ra. E i muri akera, ia Penetekote 33 T.N., ka rauka katoa i etai atu aronga te ka papetitoia, ki te vaerua tapu e ka anau akaouia ei tamariki vaerua na te Atua.
Inara e mea puapinga maata te taoonga o ta te Atua Tamaiti takake ra. Kua karanga atura a Iesu kia Nikodemo: “Mei ia Mose i akateitei i te ovi i te medebara ra, koia katoa te Tamaiti a te tangata ra, kia akateitei katoaia e tikaʼi: Kia kore e mate te akarongo iaia, kia rauka ra te ora mutu kore.” Ae, mei to Iseraela i kakatiia e te ovi poitini ra, na te akara anga i te ovi veo ratou i orai, no reira te au tangata ravarai ka tau kia akono i te akarongo i te Tamaiti a te Atua ra e orai mei to ratou turanga no te mate ra.
I te akaketaketaanga i to Iehova ra taoonga no teia, kua tuatua maira a Iesu kia Nikodemo e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” E no reira, i Ierusalema ra e ono ua marama i muri ake i te akamataanga i tana angaanga ei orometua, kua akataka marama maira a Iesu e koia ta Iehova te Atua ra apinga ei akaoraanga i te au tangata nei.
Kua rave ua atura a Iesu i te akamarama kia Nikodemo: “Kare oki te Atua i tono mai i tana Tamaiti ki te ao nei e akaapa mai i to te ao,” koia oki, kare kia akava akaapa mai, me kare akaapa i te reira, na te tukuanga i te au uanga tangata kia akapouia. Mari ra, mei ta Iesu i tuatua ra, kua tonokia mai aia “kia ora ra to te ao iaia.”
Kua aere mataku maira a Nikodemo kia Iesu i raro ake i te tapoki anga o te poiri. No reira e mea meitaki kia manakoia e kua akaoti atura a Iesu i tana tuatua anga kiaia ra i te na ko anga: “Teia taua akaapa ra, ko te mārama [ta Iesu i akatutuia mai i tona oraanga e tana au apiianga] kua tae mai ki te ao nei, e i anoano akenei te tangata i te poiri, kare te mārama, no te mea te kino ua ra ta ratou tuatua. Ko te rave i te kino ra, kua makitakita anake ïa ki te mārama, kare oki e aere mai ki te mārama, ko te kitea aea tana tuatua. Ko te akono i te tuatua-mou ra, ka tae mai ïa ki te mārama kia kitea meitakiia e, te tau ra tana tuatua ki te Atua.” Ioane 2:23–3:21; Mataio 3:16, 17; Angaanga 2:1-4; Numero 21:9.
▪ Na teaa i akakeu i to Nikodemo aere anga, e eaa aia i aere atu ei i te po?
▪ Eaa te aite anga o te “anau akaou”?
▪ Akapeea ta Iesu akatutu anga i tona taoonga no to tatou ora?
▪ Eaa te aite anga e kare a Iesu i aere mai e akaapa i to te ao nei?