Aronga Turama i te Marama—No Teea Akakoroanga?
“Kua akonoia kotou e au ei marama no to te pa enua.”—ANGAANGA 13:47, NW.
1. Akapeea te akauenga tei taikuia ra ia Angaanga 13:47 i riro ei kia mana ki runga i te apotetoro ko Paulo?
“KUA tuku mai a Iehova i te akauenga ki runga ia tatou na teia au tuatua nei, ‘kua akonoia kotou e au ei marama no to te pa enua, kia riro kotou ei ora e tae ua atu ki te openga o te enua katoa,’” ta te apotetoro ko Paulo i tuatua maira. (Angaanga 13:47, NW) Kare aia i tuatua anake i te reira mari ra kua kite katoa aia i te puapinga maata o te reira. I muri ake i tona riro anga ei Kerititiano, kua akono tamou a Paulo i tona oraanga i te raveanga i taua akauenga ra. (Angaanga 26:14-20) Kua tuku katoaia ainei te reira akauenga ki runga ia tatou nei? Me koia ia, eaa ra te reira i puapinga maataʼi i to tatou tuatau nei?
I ‘te Mate Anga te Au Marama’ no te Au Tangata Katoa
2. (a) I te tomo anga teianei ao ki roto i tona tuatau openga, eaa tei rokoia mai tei akatuke maata i tona tu i te pae vaerua e ki te tangata katoa oki? (e) Eaa te manako o tetai tangata maata no Peritane no runga i tana i kite ia Aukute 1914?
2 I mua ake i te anauia mai anga te maata anga o te au tangata te ora nei i teianei, kua tomo atu teianei ao ki tona tuatau openga. Kua viviki ua te tupu anga o te au tupuanga mamaata. Kua uriia mai a Satani koia te Tiaporo ra ki te enua nei, ko tei akatupu maata i te poiri i te pae vaerua e ki te tangata katoa oki. (Ephesia 6:12; Apokalupo 12:7-12) Kua oti ke ana te tarukuia te au tangata katoa ki roto i tona tamaki anga mua o teianei ao. I te akamata anga o Aukute 1914, i te mea e kua akaraanga papu e ka tamaki, a Edward Grey, koia te tekeretere maata o Peritane no te au enua ke i vao mai kua tu aia i te maramarama o tona opati i London e kua tuatua: “Te mate atu nei te au ramepa i Europa katoatoa; kare tatou e kite i te ka akaou anga o te reira i te tuatau o to tatou oraanga nei.”
3. Eaa te puapinga i rauka mai i te au arataki o teianei ao i ta ratou tauta anga kia meitaki mai te oraanga no te au tangata nei?
3 I te tauta anga kia ka akaou taua au marama ra, kua akanooia mai te Kapitianga Enua i te 1920. Inara kare taua au marama ra i ka maata mai. I te openga o te rua o te tamaki o teianei ao, kua tamata akaou te au arataki o teianei ao, i te reira tuatau ma te akaaerenga Taokotaianga Enua. Kua pera katoa oki, kare i kaka meitaki mai ana te au marama ra. Inara, i te au tupuanga i mua ua akenei, kua tuatua te au arataki o teianei ao no “tetai akatereanga ao ou.” Inara kare e tau kia tuatuaia e kua orongaia mai tetai “ao ou” e au mou e te tinamou. E tuke rai, e tamaki, e maroanga no te au tangata ke ke, e rave kino, kare e angaanga, e putaua, e taero no te reva, e maki, e te mate te tupu ua atu nei ei akakino i te rekareka anga no te oraanga o te au tangata katoatoa ra.
4, 5. (a) I naea e i akapeea te poiri i te tapoki anga ki rungao i te uanga tangata katoa nei? (e) Eaa tei umuumuia ei akaora i te reira tu?
4 Ko te tika tikai, no mua roa ake i te 1914 i mate atu ei te au marama no te au tangata katoa nei. Kua tupu te reira no etai 6,000 mataiti i topa i Edene ra, i te iki anga to tatou nga metua mua ra na raua uaorai e tuku te au tika ma te manako kore anga i te anoano o te Atua tei akatakaia maira. Ko te au tupuanga mamae katoa ki te uanga tangata katoa mei reira mairai e tupu anga anake ia no raro ake i ta te Puka Tapu e karanga nei e ko “te mana o te poiri.” (Kolosa 1:13) Na raro ake i te mana o Satani koia te Tiaporo ta te tangata mua ra, ko Adamu, taruku anga i teianei ao ki roto i te ara; e mei ia Adamu maira te ara e te mate i totoaʼi ki te au tangata ravarai nei. (Genese 3:1-6; Roma 5:12) Ngaro ke atura i te au tangata katoa te akamareka anga a Iehova, koia ra te Tumu o te marama e te ora.—Salamo 36:9.
5 Ko te mataara anake ua e kaka akaou tikai te marama no etai aronga o te au tangata nei na te rauka anga anake ia ratou te mareka anga o te Atua ra o Iehova, koia Tei Anga mai i te au tangata nei. Ei reira, “te tapoki i tapokiiaʼi te mata o te tangata katoa ra,” koia te akaapa anga no te ara, ka rauka kia apai ke ia atu. Akapeea e raukai te reira?—Isaia 25:7.
Ko Tei Orongaia Maira “ei Marama no to te Pa Enua”
6. Eaa te au manakonakoanga meitaki ta Iehova i oronga mai no tatou na roto ia Iesu Karaiti?
6 I mua ake i te tuaru angaia a Adamu raua ko Eva mei roto i Parataito ra, kua totouia mai e Iehova tetai “uanga” te ka riro ei akaora i te aronga inangaro i te tuatua tika. (Genese 3:15) I muri ake i anau mai ei taua Uanga taputouia ra ei tangata, kua akariro a Iehova na Simeona ruaine ra, i te iero i Ierusalema ra, kia akataka iaia e ko “te marama no te akakore atu i te arai mei runga i to te pa enua ra.” (Luka 2:29-32, NW) Na te akarongo i te atinga o to Iesu oraanga tangata apa kore ua ra, ka rauka i te akakore atu i te akaapa anga tei tupu maira no te ara mei te to anga mai te tangata nei. (Ioane 3:36) Kia rotai ki te anoano o Iehova ra, ka rauka ia ratou i teia nei te akara atu ki mua ki te ora mutukore ma te tu apa kore ua ei tuanga no te Patireia o te rangi ra me kare ei au tangata no te reira ki runga i te enua parataito. Mei teaa ra te umere maata o te reira oronga anga mai!
7. Eaa ra nga taputou ia Isaia 42:1-4 e tona akatupu anga i te anere mataiti mua ra i akaki ei ia tatou i te manakonakoanga?
7 Ko Iesu Karaiti uaorai te akapapu anga i te akatupuanga i te reira au manakonakoanga meitaki. No runga i ta Iesu ra rapakauanga i te au tangata makiia ra, kua akapiri atura te apotetoro ko Mataio kiaia i te tataanga ia Isaia 42:1-4 (NW). Te karanga ra tetai tuanga o taua tuatua tapu ra: “I na! Toku tavini, taku e mou meitaki ra! Tei ikiia e au ra, ta toku meta i mareka ra! Kua tuku au i toku vaerua ki roto iaia. Ko te tuatua tau ki to te pa enua ra tana ka apai mai.” Kare ainei e ko te reira ta te au tangata o to te pa enua katoa te umuumu ra? Kua tuatua ua atu taua totou ra: “Kare aia e kapiki maata, kare katoa e akateitei i tona reo, e kare aia e tuku kia rongonaia tona reo i te arataa. Kare aia e aati i te kakao paruparu ra; e ko tetai ramepa matemate ra, kare aia e tamate takiri atu.” Kia rotai ki te reira, kare a Iesu i akono takinga kino atu i te au tangata tei vaira i roto i te tu kino. Kua akaari aia i te tu aroa no ratou, kua apii atu ia ratou ki ta Iehova ra au akakoroanga, e kua rapakau atura ia ratou.—Mataio 12:15-21.
8. Na teea tu ta Iehova oronga anga ia Iesu “ei koreromotu no te au tangata ra” e “ei marama no to te pa enua ra”?
8 Kua akakite atura Tei Oronga mai i teia totou, iaia uaorai ki tona Tavini, kia Iesu, e kua na ko maira: “Naku uaorai, na Iehova, i kapiki ia koe i te tuatua tika, e kua mou mai au i toou rima. E naku e tiaki ia koe e ka oronga ia koe ei koreromotu no te au tangata ra, ei marama no to te pa enua ra, kia riro naau e akapuera i te mata o te aronga matapo ra, kia apai mai i tei tapekaia ra ki vao i te tapekaanga, ki vao i te are tapeka anga te aronga te noo ra i roto i te poiri.” (Isaia 42:6, 7, NW) Ae, kua oronga a Iehova ia Iesu Karaiti ei koreromotu, ei akapapuanga ma te taputou ngakau tae tikai. Mei teaa ra te akamaroiroianga a te reira! Kua akaari maira a Iesu i tona manako mou tikai no te au tangata katoa iaia i te enua nei; e kua oronga oki aia i tona ora no te au tangata nei. Koia ta Iehova i oronga atura i te mana tutara anga nona ki rungao i to te pa enua ravarai. No reira a Iehova i taiku ei iaia ei marama no to te pa enua. Kua karanga a Iesu uaorai e: “Ko au te mārama o teianei ao.”—Ioane 8:12.
9. Eaa ra a Iesu uaorai i kore ei i rave i te akariro kia meitaki mai te akatereanga i te au mea te vaira i tona tuatau ra?
9 Eaa te akakoroanga o ta Iesu akono anga ei marama no teianei ao? E mea papu e kare te reira no tetai akakoroanga a te tangata me kare no te au apinga. Kare aia i akatika kia tamata i te akatikatika anga i te akatereanga poritiki te vaira e kare, na te ariki anga i te taoonga ei ariki mei ia Satani mai, koia te tutara o teianei ao, me kare mei te au tangata maira. (Luka 4:5-8; Ioane 6:15; 14:30) Kua akaari a Iesu i te aroa maata no te aronga tei takinga kinoia ra e kua akaora ia ratou na te au mataara tei kore ra i rauka ia etai ke ra. Inara kua kite aia e kare e rauka mai te ora tamou na roto mai i te akapapa anga a tetai totaiete tangata nei tei raro akera i te akaapa anga a te Atua no te ara i toia maira te tangata i reira, e tei raveraveia ra e te au nuku vaerua kikino te akara koreia ra. Ma te akono anga kite oonu no te Atua maira, kua akono a Iesu i tona oraanga katoa i te raveanga i te anoano o te Atua ra.—Ebera 10:7.
10. Na teea au mataara e no teea akakoroanga ta Iesu ra akono anga ei marama no teianei ao?
10 Na teea au mataara e no teea akakoroanga, i reira, i akono ei a Iesu ei marama no teianei ao? Kua rave aia uaorai i te tutu aereanga i te tuatua meitaki o te Patireia o te Atua ra. (Luka 4:43; Ioane 18:37) Na te akakitekite anga i te tuatua mou no ta Iehova ra akakoroanga, kua akakaka katoa a Iesu i te ingoa o tona Metua i te rangi ra. (Ioane 17:4, 6) Kapiti katoa oki, ei marama no teianei ao, kua akakite atea a Iesu i te au ravenga pikikaa a te au akonoanga e na reira te oronga anga i te tu rangatira i te pae vaerua no te aronga tei tuikaaia ra e te au akonoanga. Kua akakite atea aia ia Satani e ko tei raverave akara koreia no te aronga te tuku ua ra ia ratou uaorai kia taangaangaia e ia ra. Kua akataka meitaki katoa a Iesu i te au angaanga no te poiri ra. (Mataio 15:3-9; Ioane 3:19-21; 8:44) E mea taka meitaki ra, kua papu e koia te marama o teianei ao na te tukuanga i tona oraanga tangata apa kore ua ei oko, na te reira i akatuera i te mataara no te aronga tei akono ra i te akarongo i teia apinga orongaia mai ei akakore i te au ara, te pirianga marekaia ma te Atua ra, e te manakonakoanga no te oraanga mutu kore ei tuanga no ta Iehova ra tamariki i te ao katoa e pini ua ake. (Mataio 20:28; Ioane 3:16) E te mea openga, na te tamou marie anga i te tu akono apa kore i te Atua i tona oraanga katoa, kua mou a Iesu i to Iehova ra ngateitei e kua akapapuia e pikikaa te Tiaporo, na te reira i akariro kia rauka te au puapinga mutu kore no te aronga inangaro i te tuatua tika. Inara ko Iesu anake ainei te ka riro ei turama no te marama?
“Ko Kotou te Mārama o te Ao Nei”
11. E riro ei ratou ei aronga turama i te marama, eaa ta Iesu au pipi e anoano kia rave?
11 Ia Mataio 5:14, kua tuatua atura Iesu ki tana au pipi: “Ko kotou te mārama o te ao nei.” Kua tau ratou kia aru i tona au tapuae. Na te tu o to ratou oraanga e ta ratou tutu aere anga, kua anoanoia ratou kia arataki atu i etai ke ra kia Iehova ei Tumu no te akamarama anga mou. I te aru anga ia Iesu, kua anoanoia ratou kia akakite i te ingoa o Iehova ra e kia mou i Tona ngateitei. Mei ta Iesu i rave ra, na reira katoa ratou i te akakitekite anga i te Patireia o te Atua ra ei manakonakoanga no te au tangata katoa. Kua tau katoa oki ratou kia akakite atea i te au pikikaa a te au akonoanga, te au angaanga no te poiri ra, e tei rave kino ra koia te turu ra i teia au mea nei. Kua anoanoia te au pipi a Karaiti kia tuatua ki te au tangata i te au ngai ravarai no runga i te apinga aroa orongaia mai e Iehova no te ora na roto ia Iesu Karaiti. Mei teaa ra te maroiroi te rave anga a te au Kerititiano i taua angaanga ra, akamata atu i Ierusalema na mua e i Iudea e kua aere atu ki Samaria i muri iora, mei ta Iesu i akaue atura!—Angaanga 1:8.
12. (a) Eaa te mamao no te akatotoa anga i te marama i te pae vaerua ra? (e) Eaa ta te vaerua o Iehova i akono kia kite a Paulo no runga ia Isaia 42:6, e eaa te mea tau kia akatupuia e taua totou ra ki to tatou oraanga?
12 Inara, kare te tutuanga i te tuatua meitaki i kotingaia ki te reira tuanga enua anake. Kua akaue atura a Iesu i tana au pipi kia “akariro i to te pa enua katoa ei pipi.” (Mataio 28:19) I te tuatau i tauiiaʼi te akarongo o Saula o Tareso ra, kua taka meitaki ta te Atu akakite anga e ko Saula (tei riro maira ko te apotetoro ko Paulo) kua anoanoia aia kia tutu aere kare ki te ngati Iuda anake ua mari ra ki te au Kenitara katoa oki. (Angaanga 9:15) Ma te tauturu anga a te vaerua tapu, kua riro a Paulo kia ariki i tei kapitiia ki te reira. E na reira, kua kite aia e ko te totou ia Isaia 42:6, tei akatupu tikaia maira i roto ia Iesu Karaiti, e akauenga katoa oki ia ki te katoatoa tei akono ra i te akarongo ia Karaiti. E no reira, ia Angaanga 13:47 (NW) i tana taiku anga mai i ta Isaia ra, kua karanga a Paulo: “Kua tuku mai a Iehova i te akauenga ki runga ia tatou na teia au tuatua, ‘kua akonoia kotou e au ei marama no to te pa enua, kia riro kotou ei ora e tae ua atu ki te openga o te enua katoa.’” Akapeea koe? Kua tuku ainei koe i te reira apainga ki roto i to ngakau, kia riro ei turama i te marama? Mei ia Iesu raua ko Paulo ra, te akono ra ainei koe i toou oraanga kia tau ki runga i te raveanga i to te Atua ra anoano?
Marama e te Tuatua Mou Mei ko Mai i te Atua ei Arataki ia Tatou
13. Kia rotai atu kia Salamo 43:3, eaa ta tatou ka pure ma te ngakau tae, e eaa ta te reira ka paruru mai ia tatou nei?
13 Me ka tamata tatou na ta tatou uaorai au ravenga ‘kia akakaka akaou i te marama’ kia kaka mai te tuatau ki mua no te au tangata nei, ka kino roa to tatou aere ke anga i te tumu o te Tuatua akauruia a te Atua ra. Noatu rai e eaa ta to teianei ao e matau ana i te rave, ka akara ra te au Kerititiano mou kia Iehova ei Tumu mou no te marama. Te aiteite ra ta ratou pure ki tei tataia ia Salamo 43:3, te na ko ra: “E akakite ua mai i to mārama e te tuatua-mou; e na te reira e arataki iaku nei; kia aratakiia au e te reira ki to maunga tapu, e ki to au puakapa ra.”
14, 15. (a) Na teea au mataara ta Iehova ra tukuanga mai i tona marama e te tuatua mou i teianei? (e) Akapeea tatou me akaari e te arataki tika ra te marama o te Atua e te tuatua mou ia tatou nei?
14 Te rave ua atura a Iehova i te pau i taua pure a tona au tavini tiratiratu ra. Te tuku maira aia i te marama na te akakiteanga i tana akakoroanga, e na te akariroanga i tona au tavini kia marama i te reira, e na te akatupu anga i tana i akakite ra. Me pure tatou ki te Atua, kare te reira i te peu rave uaia, tei raveia ei akaraanga ua e e tapu ia. Ko to tatou umuumu anga ngakau tae tikai e kia riro na te marama no ko mai ia Iehova ra e arataki ia tatou, mei ta te Salamo i tuatua ra. Ka ariki tatou i te apainga te ka tupu mai no te raukaanga te marama ta te Atua ra i oronga mai. Mei te apotetoro ko Paulo ra, ka kite ia tatou e te apai maira te tupu anga o te Tuatua a Iehova i tetai akauenga i te katoatoa tei akono ra i te akarongo i te reira. Ka manako tatou mei te mea ra e e kaiou ta tatou kia etai au tangata ke atura e kia oti roa ia tatou i te oronga atu kia ratou te tuatua meitaki ta te Atua i omai ra kia tatou no te reira akakoroanga.—Roma 1:14, 15.
15 Na te marama e te tuatua mou ta Iehova i tuku maira i to tatou tuatau nei i akakite mai e te rave ra a Iesu Karaiti i te tutaraanga mei tona terono mai i te rangi. (Salamo 2:6-8; Apokalupo 11:15) E kua totou mai a Iesu e i te tuatau o tona taenga mai ei ariki, ka tutu aereia teia tuatua meitaki o te Patireia e kako rava ake te ao katoa nei ei kite. (Mataio 24:3, 14) Te raveia ra te reira angaanga i teianei, e te maroiroi uaia atura, takapini teianei ao katoa. Me te akariro ra tatou e ko te angaanga te apinga maata roa i to tatou oraanga, te arataki ra te marama o te Atua e tana tuatua mou ia tatou, mei ta te tata taramo i tuatua maira.
Kua Marama Maira te Kaka Tikai o Iehova
16, 17. Akapeea ta Iehova akaiti anga i tona kaka ki rungao i tana akaaerenga aite ki te vaine rai te tu i te 1914, e eaa tana akauenga i oronga atu kiaia ra?
16 Na roto i te reo akakeu i te meta, kua akataka maira te au Tuatua Tapu i te tu o te akatotoa anga i te marama no te atua ki te au tangata i te au ngai ravarai. Ko Isaia 60:1-3 (NW), tei tuatuaia atura ki te “vaine” a Iehova, me kare tana akaaerenga i te rangi no te au tavini tiratiratu ra, te na ko ra: “Ka tu ki runga, E te vaine e, e akaiti mai i toou marama kua tae mai oki toou marama, e kua iti maira te kaka tikai o Iehova ki runga ia koe. I na oki! ka tapoki mai te poiri i te enua, e te poiri tangotango i te au pupu tangata ke ke; inara ka iti mai a Iehova ki runga ia koe, e ka kitea mai tona kaka ki runga ia koe. Ka aere oki to te pa enua ki toou marama, e te au ariki oki ki te kaka o toou marama mai anga.”
17 Ka iti mai te kaka o Iehova ki rungao i tana akaaerenga aite ki te vaine rai te tu i te rangi ra i te mataiti 1914, i muri ake i tetai tuatau roa te tatarianga, kua anau maira aia i te Patireia o te Mesia, ko Iesu Karaiti te Ariki. (Apokalupo 12:1-5) Kua iti mai ra te marama kaka o Iehova ma te marekaanga ki runga i taua kavamani kia riro koia tei tika no te enua katoa ra.
18. (a) Eaa ra te poiri i tapoki ei i te enua, mei ta Isaia 60:2 i totou maira? (e) Akapeea e raukai kia akaoraia te aronga tataki tai mei roto mai i te poiri o teianei ao?
18 E tuke anga, kua tapoki mai te poiri i te enua e te poiri tangotango i te au pupu tangata ke ke. No teaa ra? No te mea kua kopae ke to te au pa enua i te kavamani o te Tamaiti akaperepere a te Atua ra e kua kauraro atu i te tutara na te tangata nei. Kua manako ratou e na te takore atu i tetai tu kavamani a te tangata nei e akatuanga i tetai ke atu, ka rauka ia ratou te akakore atu i to ratou au manamanata. Inara kare te reira e apai mai i te tauturu ta ratou i manakonako ra. Kare ratou i kite e koai tei muri ake i te reira au ravenga te akatere maira i to te au pa enua mei te tuanga vaerua mai ra. (2 Korinetia 4:4) Kua kopae ke ratou i te Tumu no te marama mou tikai e no reira tei roto ratou i te poiri. (Ephesia 6:12) Inara, noatu eaa ta to te au pa enua ka rave, ka rauka ra te akaora mai i te aronga tataki tai mei roto mai i taua poiri ra. Na teea mataara? Na te tukuanga i te akarongo ki katoa i te Patireia o te Atua ma te kauraro anga i te reira.
19, 20. (a) Eaa, e akapeea oki te akaiti anga mai te kaka o Iehova ki rungao i ta Iesu ra au pipi akatainuia? (e) Eaa te tumu i akariro ei a Iehova i tana aronga akatainuia ra ei aronga turama i te marama? (ng) Mei tei totouia maira, i akapeea te “au ariki” e “to te au pa enua” i te akavaitata angaia mai ki te marama orongaia maira e te Atua?
19 Kare a Kerititome i akanoo i tona akarongo ki runga i te Patireia o te Atua ra e kare katoa oki i kauraro i te reira. Mari ra ko te au pipi a Iesu Karaiti tei akatainuia i te vaerua ra kua akono ratou i te reira. Ko tei tupu mai, kua iti mai te marama mareka anga o Iehova ki rungao i teia aronga mono akara mataia no tana vaine i te rangi ra, e kua kiteia tona kaka i runga ia ratou. (Isaia 60:19-21) Te rekareka nei ratou i te marama no te pae vaerua kare e rauka i te taui anga poritiki me kare tetai tu i te pae o te puapinga kia akakore atu i te reira. Kua kite ratou i ta Iehova ra akaora anga ia ratou mei ia Babulonia Maata mai. (Apokalupo 18:4) Te rekareka nei ratou i tona katakata mareka anga no to ratou ariki anga i tana akoanga e kua mou tiratiratu i tona ngateitei. E au manakonako anga meitaki to ratou no te tuatau ki mua, e te rekareka ra ratou i te manakonako anga tana i akanoo ki mua ia ratou ra.
20 Inara eaa te akakoroanga i akono ei a Iehova ia ratou na teia mataara? Mei tana rai i tuatua ia Isaia 60:21, ko te reira “kia akakakāia” aia ra, kia akangateiteiia tona ingoa e kia akavaitataia mai etai ke atu kiaia ei te Atua mou anake ra—kia riro te reira ei puapinga mutu kore no ratou uaorai. I te rave tamou anga i te reira, i te 1931 kua mou teia aronga akamori i te Atua mou ra i te ingoa e Au Kite no Iehova. Ko te tupu anga o ta ratou akakitekiteanga, kua akavaitataia mai ainei te “au ariki” ra ki te marama ta ratou i akaiti atura, mei ta Isaia i totou maira? Ae! Kare ko te au tutara poritiki o te enua nei, mari ra ko te toenga o te aronga tei tau ra kia tutara ei au ariki ma Karaiti i tona Patireia i te rangi ra. (Apokalupo 1:5, 6; 21:24) Akapeea “to te au pa enua”? Kua aratakiia ainei to ratou manako ki teia marama nei? Kua pera tikai! Kare ra e ko tetai enua poritiki tataki tai tei aratakiia, mari ra e urupu maata te au tangata no to te pa enua ravarai kua akanoo i to ratou turanga ki te pae o te Patireia o te Atua ra, e te tapapa marie ra ratou i te akaora anga ki roto i to te Atua ra ao ou. Ka riro te reira ei ao ou tika tikai ko te ngai ia e vai ei te tuatua tika.—2 Petero 3:13; Apokalupo 7:9, 10.
21. Akapeea tatou me akaari e kare tatou i aere ke i te akakoroanga o te aroa ua o te Atua i te oronga mai anga kia tatou i te kite i tona ra anoano?
21 Ko koe ainei tetai o taua urupu e aronga turama i te marama te tupu aere ra? Kua orongaia mai e Iehova te kite i tona ra anoano kia raukai ia tatou, e aronga turama i te marama mei ta Iesu i rave ra. Na te akaarianga i te maroiroi i te rave i te angaanga ta Iehova i oronga maira ki tona au tavini i to tatou tuatau nei, e akakite oki tatou ravarai e kare tatou i aere ke i te akakoroanga o te aroa ua ta te Atua i oronga maira kia tatou nei. (2 Korinetia 6:1, 2) Kare e angaanga ke atu tei maata atu tona puapinga i to tatou tuatau nei. E kare tetai angaanga i maata atu na tatou kia rave i teia koia oki kia akakaka ia Iehova na te akaiti atu anga ki etai ke ra i te marama kaka no ko mai iaia ra.
Akapeea Koe Me Pau?
◻ Eaa te au tumu i akaia mai ei te au manamanata mamae ngakau o te au tangata nei?
◻ Na teea au tumu i riro ei a Iesu e tana au pipi katoa ei “marama no teianei ao”?
◻ Akapeea te aratakianga a te marama e te tuatua mou o Iehova ia tatou?
◻ Akapeea ta Iehova ra akariro anga kia iti mai tona kaka ki runga i tana akaaerenga?
◻ No teea akakoroanga a Iehova i akariro ei i tona au tangata ei aronga turama i te marama?
[Au Tutu i te kapi 9]
Na tetai tupu anga i Edene ra e tauturu ia tatou kia kite i te au manamanata mamae ngakau o te au tangata nei i teia tuatau
[Au Akameitakianga]
Tom Haley/Sipa
Paringaux/Sipa